Pe mbaʼerepy ñangarekoha imbaʼeporãva ha Icuérpo Gobernante

‘Mávatepa pe mbaʼerepy ñangarekoha imbaʼeporã ha iñakãporãva, pe ógajara omoĩvaʼerã chupe hogaygua ñangarekoháramo omeʼẽ hag̃ua chupekuéra hembiʼurã hiʼórape.’ (LUC. 12:​42, JMP.)

1, 2. Mbaʼépa oporanduvaʼekue Jesús oñeʼẽ rire pe ára paháre?

 JESÚS heʼipa rire mbaʼe mbaʼépa oikovaʼerã pe ára pahápe, oporandu: ‘Mávapa hína pe tembiguái jeroviaha ha iñarandúva, pe ijára omoĩva ipoguýpe ambue hembiguaikuéra omongaru hag̃ua oikotevẽ jave?’. Upe rire Jesús heʼi pe tembiguái ojerovia haguére hese omoĩmbataha ipoguýpe opa mbaʼe oguerekóva (Mat. 24:​45-47).

² Upe mboyve ningo Jesús oporandumavaʼekue voi upéva (jaleemína Lucas 12:​42-44). Upérõ ohenói pe tembiguáipe “mbaʼerepy ñangarekoha” (mayordomo),  ha umi hembijokuáipe, “hogaygua”. Pe “mbaʼerepy ñangarekoha” ningo peteĩ tembiguái omoakãva peteĩ ogapy ha umi ambue tembiguáipe. Ha máva piko pe tembiguái térã pe mayordomo Jesús oñeʼẽ hague? Ha mbaʼéicha piko pe tembiguái omombeʼu Ñandejára rembipota oñekotevẽve jave? Koʼã porandu ningo tekotevẽ ñambohovái jaikuaa hag̃ua máva rupivépa Ñandejára ñanerekomboʼe.

3. a) Mávarepa heʼi umi iñarandúva haʼeha pe “tembiguái”? b) Mávapa pe “mbaʼerepy ñangarekoha” (mayordomo), térã “pe tembiguái”? Ha mávapa umi “hogayguakuéra”, térã ‘tembijokuái’?

³ Heta iñarandúva oñeʼẽva la Bíbliare, heʼi upe “tembiguái” Jesús oñeʼẽ hague haʼeha umi omoakãva rrelihionkuéra. Péro Jesús ningo oñeʼẽ ijehe heʼírõ guare “pe ógajara”, ha ndeʼíri oĩtaha heta tembiguái opaichagua rrelihiónpe. Jesús heʼi porã vaʼekue oĩvaʼerãha peteĩnte pe “mbaʼerepy ñangarekoha” (mayordomo), térã “tembiguái” orekotáva ipoguýpe opa mbaʼe haʼe oguerekóva. Upévare “pe mbaʼerepy ñangarekoha” térã mayordomo orrepresenta pe ‘ovecha aty michĩvape’ térã opavave ungídope. Péicha ningo ko rrevístape heta vésema oñemyesakã. Ha pe lívro de Lucas heʼiháicha Jesús oñeʼẽmakuri umi ungídore oñeʼẽ mboyve “pe mbaʼerepy ñangarekoha” rehe (Luc. 12:32). Ha heʼírõ guare “hogayguakuéra” ha ‘tembijokuái’ oñeʼẽnte avei enterove ungídore, péro koʼápe oñeʼẽma káda únore. Péro, opavave piko umi tembiguái oikuaauka Ñandejára rembipota oñekotevẽ jave? Ñahesaʼỹijóramo la Biblia heʼíva, jaikuaa porãta upéva.

Jehová rembiguái yma guare

4. a) Mbaʼépa Jehová heʼivaʼekue umi Israelgua rehe? b) Mávantepa omboʼevaʼekue umi Israelguápe?

⁴ Yma ningo Jehová heʼivaʼekue umi Israelgua rehe hembiguaiha. Heʼi chupekuéra: ‘Peẽ ningo che rembiguaikuéra, pe che rembiguái che aiporavomavaʼekue’. Heʼívo ‘che rembiguaikuéra’ oñeʼẽ hetáre ha heʼívo ‘che rembiguái’ katu oñeʼẽ peteĩrente (Isa. 43:​10, ÑÑB). Upéicharõ opavave Israelgua haʼevaʼekue pe Ñandejára rembiguái. Péro jahechakuaavaʼerã avei umi saserdóte ha ambue levíta añónte omboʼe hague umi Israelguápe (2 Cró. 35:3; Mal. 2:7).

5. Mbaʼépa heʼivaʼekue Jesús umi hudíope?

⁵ Pe tetã Israel piko haʼerakaʼe pe tembiguái Jesús oñeʼẽ hague? Nahániri, Jesús heʼivaʼekue voi umi hudíope: ‘Ñandejára Rréino ojepeʼáta pendehegui ha oñemeʼẽta ambuépe, omeʼẽtavape hiʼa hekoitépe’ (Mat. 21:43). Péicha jahecha Jehová oiporavopotaitemaha upérõ peteĩ tetã pyahu. Upéicharamo jepe, pe tembiguái Jesús oñeʼẽ hague oporomboʼéta avei yma ojejapo haguéicha.

Ojeporavo pe tembiguái jeroviaha

6. Mbaʼeichagua tetãpa oñepyrũvaʼekue áño 33-pe, ha mávapa umi oikéva upe tetãme?

⁶ Pe tetã pyahu, ‘Israel Ñandejára mbaʼévape’ ningo oĩ umi ojeroviáva Jehováre (Gál. 6:16; Rom. 2:​28, 29; 9:6). Pe tetã pyahu oñepyrũ áño 33-pe Pentecostés jave, Ñandejára omeʼẽrõ guare espíritu sánto pe kongregasiónpe. Upe guive káda ungído ojeporavovaʼekue espíritu sánto rupive haʼe pe tembiguái Jesús omoĩva omombeʼu hag̃ua pe marandu porã ha upéicha oipytyvõ hapichakuérape oservi hag̃ua avei Jehovápe (Mat. 28:​19, 20). Péro, opavave ungído piko oikuaaukavaʼerã Ñandejára rembipota? Jahechamína mbaʼépa heʼi la Biblia upévare.

7. a) Mbaʼe tembiapópa omotenondevaʼerã umi apóstol? b) Mbaʼépa ojapovaʼerã avei umi apóstol oñepyrũtarõ guare pe kongregasión?

⁷ Jesús oiporavo doce apóstol ha omondo chupekuéra omombeʼu hag̃ua pe marandu  porã. Haʼekuéra ningo omotenondevaʼerã upe tembiapo (jaleemína Marcos 3:​13-15). Ha upe tembiapo rehe opyta porã pe ñeʼẽ griégo apóstolos, oúva peteĩ ñeʼẽ heʼisévagui “ñemondo”. Péro oñepyrũtarõ guare pe kongregasión, umi apóstolpe ojeʼe avei ‘omotenonde hag̃ua’ la kongregasión (Hech. 1:​20-26).

8, 9. a) Mbaʼépa ojapóraʼe umi apóstol Pentecostés riremi? b) Mbaʼe tembiapo iñimportántevapa oñemeʼẽ avei ambue kristiánope?

⁸ Ha mbaʼépa ojapóraʼe umi apóstol upe rire? Jaikuaa hag̃ua jahechami mbaʼépa oikorakaʼe pe Pentecostés riremi. La Biblia omombeʼu iprovléma hague hikuái orreparti hag̃ua tembiʼu umi viúdape. Upévare, umi apóstol oñembyaty umi disipulokuéra ndive ha heʼi chupekuéra: ‘Naiporãi niko ore roheja rei pe Ñandejára Ñeʼẽ roñangareko hag̃ua tembiʼúre’ (jaleemína Hechos 6:​1-6). Upémaramo oiporavo hikuái umi kuimbaʼe ikatupyrýva omoakã hag̃ua upe tembiapo, ikatu hag̃uáicha umi apóstol ‘oporomboʼe Ñandejára Ñeʼẽ’. Ha upe ojapóva hikuái Jehová ovendesi, pórke ‘Ñandejára ñeʼẽ iñasãive ohóvo ha umi ogueroviáva hetave Jerusalénpe’ (Hech. 6:7). Upéicharõ umi apóstol omboʼe kongregasiónpe Ñandejára Ñeʼẽ ha upe tembiapo ningo haʼekuéra voi omotenondevaʼerã (Hech. 2:42).

⁹ Upe rire oñemeʼẽ avei ambue kristiánope umi tembiapo iñimportánteva ojapo hag̃ua. Jahechamína mbaʼépa ojapovaʼekue Pablo ha Bernabé. Koʼã mokõi ermáno oĩva kongregasión de Antioquíape ojeporavo espíritu sánto rupive oñemondo hag̃ua misionéroramo. Ha haʼekuéra noĩri umi doce apóstol apytépe, péro mokõivévape ojekuaavaʼekue avei apóstolramo (Hech. 13:​1-3; 14:14; Gál. 1:19). Upéi, pe Cuerpo Gobernante oĩva Jerusalénpe heʼi avei hesekuéra apostolha (Gál. 2:​7-10). Upe riremi Pablo espíritu sánto rupive ohai pe primera kárta ha péicha omboʼe Ñandejára rembipota.

10. Enterove ungído piko omoakã predikasión ha omboʼe Ñandejára rembipota? Emombeʼu mbaʼérepa rembohovái upéicha.

¹⁰ Péro, enterove ungído piko omoakã predikasión ha omboʼe Ñandejára rembipota? Nahániri. Apóstol Pablo ohai: ‘Naentéroi ningo apóstol, ha naentéroi avei proféta. Ndaopavavéi avei mboʼehára ha ndaopavavéi ojapo milágro’ (1 Cor. 12:29). Yma ningo enterove ungído opredika, péro Jehová oiporu óchonte ohaika hag̃ua veintisiete lívro Mateo guive Revelación peve.

Mbaʼépa ojapo koʼág̃a pe tembiguái jeroviaha?

11. Mbaʼépa oñemoĩ pe tembiguái jeroviaha poguýpe?

¹¹ Mateo 24:​45-pe Jesús heʼi pe ára pahápe oĩvaʼerãha ‘pe tembiguái jeroviaha ha iñarandúva’. Revelación 12:​17-pe ojeʼe hesekuéra ‘pe kuña Ñemoñare hembýva’. Koʼãva poguýpe oñemoĩ opa mbaʼe Jesucristo orekóva ko yvy ape ári. Ha mbaʼe mbaʼépa hína umíva? Umíva ningo umi Ñandejára rembiguái oikótava ko yvy ape ári, ha umi Betel, Salón del Reino ha ambue mbaʼe ojeporúva oñemog̃uahẽ hag̃ua opárupi pe marandu porã.

12, 13. Mbaʼéichapa peteĩ ermáno ikatu oikuaa haʼépa ungído?

¹² Mbaʼéichapa peteĩ ermáno ikatu oikuaa haʼépa ungído? Jahechamína mbaʼépa heʼivaʼekue Pablo umi kristiáno ohótavape avei yvágape: ‘Opa oñesãmbyhykáva Ñandejára espíritupe, umíva Ñandejára raʼy. Peẽme ningo noñemeʼẽi peteĩ espíritu peiko hag̃ua tembiguáiramo ha pekyhyje jey hag̃ua. Upéva rangue pe espíritu ojapo pendehegui Ñandejára raʼy. Ko espíritu rupive jaʼe Ñandejárape: Abba che Ru! Ha upe espíritu ojoaju ñande espíriture ohechauka hag̃ua Ñandejára raʼymaha ñande. Ha ñande  haʼégui itaʼýra, jahupytýta avei Cristo ndive pe Ñandejára oguerekóva chupe g̃uarã, ha jahasa asýramo Cristo ohasa asy haguéicha, ñaiméne avei hendive hekomimbipápe’ (Rom. 8:​14-17).

¹³ Upéva heʼise umi ohótava yvágape ojeporavoha espíritu sánto rupive ha Jehová voi “ohenói” térã ‘oinvitaha’ chupekuéra (Heb. 3:1). Umi ungído katu pyaʼe porã voi oasepta Ñandejára oinvitávo chupekuéra oiko hag̃ua itaʼýraramo, ndahaʼeiete aipo ipyʼamokõi térã ipyʼamirĩ mbaʼéva hikuái (jaleemína 1 Juan 2:​20, 21). Upéicharõ ndahaʼéi haʼekuéra odesidíva oho hag̃ua yvágape, Jehová hína pe oselláva ijespíritu sántope chupekuéra (2 Cor. 1:​21, 22; 1 Ped. 1:​3, 4).

Mbaʼépa opensa hikuái ijehe

14. Mbaʼéichapa opensavaʼerã ijehe umi ungído?

¹⁴ Mbaʼéichapa opensavaʼerã ijehe umi ungído? Chupekuéra ningo tuichaiterei mbaʼe ojeporavo oho hag̃ua yvágape, péro oikuaa Jehová oinvitáguinte chupekuéra ohotaha. Ohechakuaa avei oñemeʼẽ hag̃ua chupekuéra upe jopói iñeʼẽrenduvaʼerãha omano meve. Heʼi avei hikuái pe apóstol Pablo heʼi haguéicha: ‘Che ryvykuéra, che niko ndaʼéi ahupytypamaha. Peteĩ mbaʼe katu ajapo: añembyesarái umi mbaʼe ohasamavaʼekuégui ha añehaʼã ahupyty pe oĩva tenonderã, ag̃uahẽ hag̃ua huʼãme ha ahupyty pe jopói Ñandejára omeʼẽtava umi ohenoivaʼekuépe Cristo Jesús rupi’ (Fili. 3:​13, 14, BNP). Umi ungído opytáva gueteri ko yvy ape ári oñehaʼãmbaitevaʼerã oiko ‘Ñandejára oipotaháicha ha noñemombaʼeguasúi’, avei oikovaʼerã ‘kyhyjepópe’ (Efe. 4:​1, 2, BNP; Fili. 2:​12, BNP; 1 Tes. 2:12).

15. Mbaʼépa jaʼéta peteĩ ermáno heʼíramo ijehe ungidoha ha hoʼúramo pe pán ha víno Conmemoracionhápe? Ha mbaʼépa nohaʼarõmoʼãi umi ungído añetetéva?

¹⁵ Mbaʼépa jaʼéta peteĩ ermáno heʼíramo ijehe ungidoha ha hoʼúramo pe pán ha víno Conmemoracionhápe? Avave noñeʼẽvairivaʼerã hese, upéva ningo peteĩ mbaʼe haʼe ojechataha Jehovándi (Rom. 14:12). Umi ungído añetetéva ningo nohaʼarõi voi oñemombaʼeguasu chupekuéra. Ndeʼíri hikuái ijehe oikuaaveha la Biblia ‘umi ambue ovechakuéra’ ikatupyryvévagui  jepe (Rev. 7:9). Ndeʼíri avei hikuái oñemeʼẽveha chupekuéra espíritu sánto (Juan 10:16). Umi ungído nohaʼarõi ermanokuéra ombojerovia chupekuéra, ha nopensái oñemombaʼevevaʼerãha chupekuéra umi ansiánogui.

16-18. a) Mbaʼéicha piko umi ungído oikuaa ha omombeʼu umi mbaʼe pyahu Ñandejára omyesakãva chupekuéra? Emombeʼu peteĩ ehémplo. b) Mbaʼérepa pe Cuerpo Gobernante noporandúi káda únope mbaʼépa opensa odesidi mboyve peteĩ mbaʼe?

¹⁶ Umi ungído ningo oiko oparupiete ko yvy ape ári. Upéicharõ, mbaʼéicha piko oikuaa ha omombeʼu hikuái umi mbaʼe pyahu Ñandejára omyesakãva? Ndahaʼéi ningo oñekomunika mbaʼéva hikuái oñondivepa upearã. Pe tembiguái jeroviaha oikuaaukavaʼerã Ñandejára rembipota umi ambue ungídope. Ha chupekuéra ningo oñemeʼẽ avei hembiaporã, ndahaʼéi voi peteĩ tembiapónte oñemeʼẽva káda únope (jaleemína 1 Corintios 12:​14-18). Jahecháma haguéicha enterove umi kristiáno ypykue ningo opredikavaʼekue. Péro mbovymínte ijapyteguikuéra oĩvaʼekue ohaíva la Biblia ha omotenondéva kongregasión.

¹⁷ Sapyʼánte ningo la Biblia heʼi ‘pe kongregasión’ odesidivaʼerãha peteĩ mbaʼe (Mat. 18:17). Péro la odesidíva ningo umi ansiáno omotendéva kongregasiónpe. Haʼekuéra ningo ndoikói ombaʼeporandu káda ermánope oikuaa hag̃ua mbaʼépa opensa peteĩ mbaʼe ojedesidítavare. Upéva rangue, ojapo hikuái pe tembiapo oñemeʼẽva chupekuéra ha odesidi pe kongregasión rérape.

¹⁸ Upéicha avei, mbovymínte oĩ umi ungído apytépe orrepresenta térã omotenondéva umi ótrope. Umíva hína umi oĩva Testigos de Jehová Cuerpo Gobernánteramo. Koʼã ungído omoakã predikasión ha oprepara umi lívro, rrevísta ha opa mbaʼe ojeporúva oñehesaʼỹijo hag̃ua Ñandejára Ñeʼẽ. Yma guaréicha pe Cuerpo Gobernante noporandúi káda únope mbaʼépa opensa odesidi mboyve hikuái peteĩ mbaʼe (jaleemína Hechos 16:​4, 5). Péro enterove ungído opredika ha omboʼe Ñandejára Ñeʼẽ. ‘Pe tembiguái jeroviaha ha iñarandúva’ ningo ikatu ñambojoja ñande retére, káda párte ombaʼapo ha idiferénte ojuehegui (1 Cor. 12:​19-26).

19, 20. Mbaʼéichapa pe ‘aty guasu’ ohecha pe tembiguái jeroviaha ha iñarandúvape’ ha Icuérpo Gobernántepe?

¹⁹ Mbaʼépa ojapovaʼerã ohesaʼỹijo rire ko artíkulo umi ohaʼarõva oikove opa ára g̃uarã ko yvy ape ári? Haʼekuéra ningo kyreʼỹme oipytyvõ pe Cuerpo Gobernántepe. Ha omombaʼeterei umi mbaʼe oñemoĩva chupekuéra omombarete hag̃ua ijerovia. Ha orrespetáramo jepe umi ungídope oñatende porã hikuái ani hag̃ua omombaʼeve umi ermánope ungído haguére. Ni peteĩ ungído ndoipotái ni nohaʼarõi oñeguerochichĩ chupekuéra (Hech. 10:​25, 26; 14:​14, 15).

²⁰ Oiméramo ñande ungído térã pe aty guasupegua, jajepytaso mbaretékena pe “mbaʼerepy ñangarekoha” ha Icuérpo Gobernante ykére. Akóintekena ñañatende porã ha ñaneñeʼẽrendu ára pahaite peve (Mat. 24:​13, 42).

Nemanduʼápa rembohovái hag̃ua?

• Mávapa pe ‘tembiguái jeroviaha ha iñarandúva’? Ha mávapa umi ‘tembijokuái’?

• Mbaʼéichapa peteĩ ermáno ikatu oikuaa haʼépa ungído?

• Mávapepa Jehová ojokuái omboʼe hag̃ua hembipota?

• Mbaʼépa nohaʼarõmoʼãi umi ungído añetetéva?

[Porandu ñahesaʼỹijóva]

[Nóta oĩva taʼanga ndive páhina 23]

Yma síglo primérope guaréicha, pe Cuerpo Gobernante orrepresenta pe ‘tembiguái jeroviaha ha iñarandúvape’