Eporomboʼékena mborayhúpe Jesús ojapo haguéicha

“Ndaipóri niko avave oñeʼẽva ko kuimbaʼe oñeʼẽháicha.” (JUAN 7:46.)

1. Mbaʼépa heʼi umi hénte ohenduvaʼekue Jesúspe?

 OIMEVAʼERÃ ningo igustoiterakaʼe ñahendu Jesúspe oporomboʼe jave. La Biblia ningo omombeʼu ñandéve mbaʼéichapa oñeñanduvaʼekue umi hénte ohendúva chupe. Pór ehémplo apóstol Lucas heʼi Jesús oporomboʼérõ guare Nazarétpe, umi hénte ‘oguerohoryjoa hague umi mbaʼe porã haʼe heʼíva’. Mateo avei omombeʼu umi ohenduvaʼekue Jesúspe pe Sermón del Móntepe ‘ohecharamojoaite hague mbaʼéichapa haʼe omboʼe chupekuéra’. Ha Juan katu omombeʼu umi soldádo ohovaʼekue ojagarra hag̃ua Jesúspe ou rei jeýnte hague ha heʼi: “Ndaipóri niko avave oñeʼẽva ko kuimbaʼe oñeʼẽháicha” (Luc. 4:22; Mat. 7:28; Juan 7:46).

2. Mbaʼéichapa Jesús oporomboʼevaʼekue?

² Ha añetéko la umi soldádo heʼíva, Jesús ningo ikatupyryetereivaʼekue oporomboʼe hag̃ua ha ndaipóri voi ohupytýva chupe. Haʼe ningo omboʼe enterove ontende porã ha oguerovia hag̃uáicha pe heʼíva. Haʼe ikatupyryvaʼekue ombojoja hag̃ua umi mbaʼe omboʼéva ha oporandukuaa avei. Oñeʼẽ la héntepe umi mbaʼe oikuaasévare ha upéicha rupi umi imboriahu ha iplátava jepe ohendu porã chupe. Ha oñeʼẽramo jepe umi mbaʼe hypyʼũvévare oĩva Ñandejára Ñeʼẽme, enterovénte ontende chupe. Péro ndahaʼéi ningo koʼã mbaʼérente oñehenóiva Jesúspe Mboʼehára guasu.

Japorohayhuvaʼerã

3. Mbaʼérepa Jesús idiferentetevaʼekue umi rrelihión omoakãvagui?

³ Umi escriba ha fariséo apytépe ningo oĩnerakaʼe avei umi kuimbaʼe oporomboʼekuaáva. Péro mbaʼérepa Jesús idiferénte chuguikuéra? Umi rrelihión omoakãva ningo ndohayhúi hapichakuérape ha heʼi voi hesekuéra “umi tekove tavy” (Juan 7:49). Ha ndohayhúi avei Ñandejárape (Juan 5:42). Haʼekuéra ningo nomombaʼéi Ñandejára Ñeʼẽ ha oiporu vaipa. Jesús katu oiporiahuverekovaʼekue umi héntepe ohechágui ojoguaha hikuái umi “ovecha herekuaʼỹvape”. Imbaʼeporã, hory ha ombyasy voi chupekuéra (Mat. 9:36). Jesús ningo ohayhueterei avei Itúva Jehovápe ha vyʼápe ojapo  hembipota. Omombaʼeterei avei ‘Ñandejára Ñeʼẽ’, upévare odefende, omboʼe ha omyesakã porã umi héntepe. Ha oiko voi Ñandejára oipotaháicha (Luc. 11:28). Jesús ningo opa mbaʼe heʼi ha ojapóvare ohechauka oporohayhuetereiha.

4, 5. a) Mbaʼérepa ñaporomboʼevaʼerã mborayhúpe? b) Mbaʼérepa tekotevẽ ñantende porã Ñandejára Ñeʼẽ ha ñandekatupyry ñaporomboʼe hag̃ua?

⁴ Ñande ningo jajapose opa mbaʼe Jesús ojapo hagueichaite ha ñamboʼese avei haʼéicha (1 Ped. 2:21). Upévare, ndahaʼéi ñamboʼesénteva la Biblia ñande rapichakuérape, ñande ningo jahechaukase japorohayhuha Jehováicha. Nañanearandúi térã nañandekatupyrýiramo jepe ikatu ñag̃uahẽ ñande rapicha korasõme jahayhúramo chupe. Ajeve ningo oiko hag̃ua ñandehegui mboʼehára katupyry jasegivaʼerã Jesús ehémplo ha ñaporomboʼe mborayhúpe.

⁵ Tekotevẽ ningo ñantende porã Ñandejára Ñeʼẽ ha ñandekatupyry ñaporomboʼe hag̃ua. Jesús oipytyvõvaʼekue hemimboʼekuérape upearã ha Jehová ñanepytyvõ ñandéve koʼág̃a iñorganisasión rupive (jaleemína Isaías 54:13 y Lucas 12:42). Ñaporomboʼe hag̃ua ningo jaiporuvaʼerã ñane akã ha ñane korasõme jarekóva. Katuetéko ñamboʼe porãta ñande rapichápe ñanearandu, ñandekatupyry ha jahayhúramo chupe. Péro mbaʼéicha piko ikatu ñaporomboʼe mborayhúpe? Mbaʼéichapa ojapovaʼekue Jesús ha hemimboʼekuéra?

Jahayhuvaʼerã Jehovápe

6. Mbaʼéichapa ñañeʼẽ pe jahayhúvare?

⁶ Enterovénte ningo ñañeʼẽse umi mbaʼe ñandegustávare. Jarekóramo peteĩ jahayhúva ningo ñande juru renyhẽ voi ñañeʼẽ hese ha ojekuaa ñande rováre. Jaipota enterovénte oikuaa mbaʼeichaguápa haʼe. Ha ñañeʼẽ porã hese ha oĩramo oñeʼẽ vaíva hese katu ñadefende voi chupe. Hiʼãiterei ñandéve enterovénte oguerohory ha omombaʼe chupe.

7. Mbaʼépa ojapo Jesús ohayhúgui Jehovápe?

⁷ Ñaipytyvõ mboyve ñande rapichápe oikuaa hag̃ua Jehovápe, ñande raẽ voi jaikuaa porã ha jahayhuvaʼerã Jehovápe. Jahayhumantevaʼerã voi ningo Ñandejárape ñamombaʼeguasu hag̃ua chupe (Mat. 22:​36-38). Upévare Jesús ehémplo porã ñandéve. Haʼe ningo ohayhuvaʼekue Itúvape ipyʼaite guive, hiʼánga, iñarandu ha imbaretekue reheve. Heta áñore ningo oikovaʼekue Itúvandi yvágape ha upéicha Jesús oikuaa porã ha ohayhueterei Chupe. Haʼete heʼivaʼekue: ‘Che ahayhu che Rúpe’ (Juan 14:31). Jesús ningo opa mbaʼe heʼi ha ojapóvare ohechauka ohayhuha Jehovápe. Upévare akóinte ojapo Itúva rembipota (Juan 8:29). Ohayhúgui Jehovápe omombeʼu umi héntepe umi rrelihión omoakãva hovamokõiha ha ijapuha oñeʼẽvo hikuái Ñandejára rérape. Upévare avei omombeʼu umi héntepe mbaʼeichaguápa Jehová ha oipytyvõ chupekuéra oikuaa porã ha ohayhu hag̃ua Chupe.

8. Mbaʼépa ojapo umi kristiáno ypykue ohayhúgui Jehovápe?

⁸ Umi kristiáno ypykue ningo ohayhuvaʼekue avei Jehovápe ipyʼaite guive, ha upévare kyreʼỹ ha pyʼaguasúpe oñeʼẽ hikuái pe marandu porã rehe. Ha ojokosérõ jepe chupekuéra umi rrelihión omoakãva, opredika hikuái Jerusalén tuichakue. Haʼekuéra ningo ndaikatúi oguerokirirĩvo umi mbaʼe ohecha ha ohenduvaʼekue (Hech. 4:20; 5:28). Oikuaa avei hikuái Jehová oĩha hendivekuéra ha ovendesitaha chupekuéra. Ha upeichaite oikovaʼekue, pórke treinta áño haguépe apóstol Pablo heʼi ‘pe marandu porã oñemombeʼumaha oparupiete’ (Col. 1:23).

9. Mbaʼépa jajapovaʼerã jahayhuve hag̃ua Ñandejárape?

⁹ Oiko hag̃ua ñandehegui mboʼehára katupyry, ñañehaʼãvaʼerã koʼẽ koʼẽre jahayhuve Jehovápe. Mbaʼéichapa ikatu jajapo upéva? Ñañemboʼe jave ñañemongetavaʼerã Jehovándi ñañemongetaháicha peteĩ ñane amígo  ndive. Ha ñahenduvaʼerã avei heʼíva ñandéve la Biblia, umi rrevísta, lívro ha umi rreunionkuéra rupive. Ha jaikuaavévo Ñandejárape jahayhuvéta chupe. Ha jahechaukáramo jaʼe ha jajapóvare jahayhuha Jehovápe opavave ohechakuaáta ha oñemoag̃uiséta hese (jaleemína Salmo 104:​33, 34).

Jahayhuvaʼerã pe ñamboʼéva

10. Mbaʼéichapa omboʼe pe mboʼehára ikatupyrýva?

¹⁰ Pe mboʼehára ikatupyrýva ningo kyreʼỹme omboʼe oikuaágui iñimportanteha pe ojapóva. Ha upéva ohecha hese hemimboʼekuéra ha oaprendese voi hikuái. Péro pe mboʼehára nomombaʼéiramo pe omboʼéva ningo hemimboʼekuéra ndostudiasemoʼãi avei. Upévare akóinte ñapensavaʼerã mbaʼeichaitépa iñimportánte pe ñamboʼéva Ñandejára Ñeʼẽgui. Jesús ningo heʼi voi: ‘Pe temimboʼépe oñemboʼe porã rire oikóta imboʼeháraicha’ (Luc. 6:​40, ÑÑB).

11. Mbaʼérepa Jesús omombaʼetereivaʼekue umi mbaʼe omboʼéva Ñandejáragui?

¹¹ Jesús ningo omombaʼetereivaʼekue umi mbaʼe omboʼéva Ñandejáragui. Haʼe oikuaa mbaʼeichaitépa oipytyvõta upéva umi héntepe. Pórke ‘Ñandejára Ñeʼẽ ningo pe oporomoingovéva opa ára g̃uarã’ (Juan 3:34; 6:68). Umi mbaʼe Jesús omboʼéva Ñandejáragui ohesape ñandéve ñande raperã ha jahechakuaa mbaʼépa iporã ha mbaʼépa ivai. Ombopyʼaguapy ha omeʼẽ esperánsa umi hénte ipyʼaporãvape. Umíva ningo ohasa asy hína Satanás poguýpe ha umi rrelihión japu omoakãva ombotavy rupi chupekuéra (Hech. 10:38). Jesús ningo omombaʼe ha ohayhu voi umi mbaʼe porã omboʼéva ha upéva ojekuaa opa mbaʼe ojapóvare.

12. Mbaʼépa heʼi Pablo pe marandu porã rehe?

¹² Hemimboʼekuéra omombaʼetereivaʼekue avei umi mbaʼe porã oikuaáva Jehová ha Jesucrístogui. Upévare ni umi oñemoĩ mbaretéva hesekuéra jepe nomokirĩriri chupekuéra. Apóstol Pablo ningo heʼivaʼekue umi ermáno Romayguápe: ‘Hiʼãiterei chéve aikuaauka peẽme ko marandu porã. Che natĩri amombeʼu hag̃ua. Upéva ningo Ñandejára podér ikatu hag̃uáicha opa umi ogueroviáva osẽ jejopy vaígui’ (Rom. 1:​15, 16). Páblope g̃uarã ningo tuichaiterei mbaʼe voi omombeʼu pe marandu porã. Upéicha rupi heʼi: ‘Oñemeʼẽ ningo chéve pe jopói Ñandejára jeporiahuvereko rehegua amyasãi hag̃ua opárupi pe marandu porã ijojahaʼỹva oúva Jesucrístogui’ (Efe. 3:8). Oimevaʼerã ningo kyreʼỹme Pablo oñeʼẽraʼe umi héntepe Jehová rehe ha umi mbaʼe porãita Haʼe ojapótavare.

13. Mbaʼérepa ñamombaʼete pe marandu porã?

¹³ Ñandejára Ñeʼẽ ningo ñanepytyvõ jaikuaa porã hag̃ua ñande Apoharépe ha jareko hag̃ua chupe ñane amígoramo. Ombohovái avei ñandéve heta mbaʼe jaikuaaséva. Ñanepytyvõ ñakambia hag̃ua, omeʼẽ ñandéve esperánsa ha ñanemombarete ñambohovái hag̃ua ko múndo aña. Omombeʼu avei ñandéve mbaʼépa jajapovaʼerã jaiko hag̃ua vyʼápe opa ára g̃uarã. Aje piko ndaijojahái koʼã mbaʼe! Koʼãva ningo jopói neporãmba jepéva Ñandejára omeʼẽva ñandéve ha ñanembovyʼaitereíva. Upévare pyʼarorýpe ñasẽ ñamombeʼu ñande rapichakuérape pe marandu porã (Hech. 20:35).

14. Mbaʼépa ikatu jajapo ñamombaʼeve hag̃ua pe marandu porã?

¹⁴ Mbaʼépa ikatu jajapo ñamombaʼeve hag̃ua jahávo pe marandu porã? Jalee jave Ñandejára Ñeʼẽ japytamimi vaʼerã ñañaminduʼu umi mbaʼe jaleévare. Ikatu ñapensa japredikaha Jesús ndive térã javiahahañaína apóstol Pablo ndive. Ikatu avei ñapensa ñaimemaha Ñandejára múndo pyahúpe ha mbaʼéichapa jaikóta upépe. Avei umi mbaʼe porã jahupytýtavare ñaneñeʼẽrendu rupi. Ñanemanduʼavaʼerã ñamombaʼéramo pe marandu porã umi ñane estudiánte ohechakuaataha ñanderehe. Upévare jajepyʼamongetavaʼerã umi mbaʼe jaikuaávare  Ñandejára Ñeʼẽgui ha ñañatende umi mbaʼe ñamboʼévare (jaleemína 1 Timoteo 4:​15, 16).

Jahayhuvaʼerã ñande rapichakuérape

15. Mbaʼérepa peteĩ mboʼehára ohayhuvaʼerã hemimboʼekuérape?

¹⁵ Pe mboʼehára ikatupyrýva ningo oñehaʼãmbaite enterove hemimboʼekuéra opartisipa hag̃ua la klásepe ha oñeʼẽ hag̃ua okyhyjeʼỹre. Ojepyʼapy hemimboʼekuérare, ohechakuaa mbaʼépa oikotevẽ ha mbaʼépa ikatu ojapo. Avei ohechakuaa mbaʼe situasiónpepa oĩ. Ha peteĩ mboʼehára ohayhu añetéramo umi hemimboʼépe, haʼekuéra opilla katuete upéva. Upéicha ojapóramo ningo ovyʼáta katuete haʼe ha hemimboʼekuéra.

16. Mbaʼéichapa Jesús ohechauka ohayhuha la héntepe?

¹⁶ Jesús ningo ohayhuetereivaʼekue la héntepe. Ha upéva ohechauka omanóvo ñanderehehápe ikatu hag̃uáicha jajesalva (Juan 15:13). Ohechauka avei oporohayhuha opredikárõ guare. Haʼe ningo omonguera umi hasývape ha omongaru ha mbaʼe umi héntepe, péro la iñimportantevéva omboʼe chupekuéra Ñandejára Ñeʼẽ. Haʼe ndoguapyivaʼekue ohaʼarõ la héntepe, haʼete voi oguata kilómetrore ogueraha hag̃ua chupekuéra pe marandu porã (Mat. 4:​23-25; Luc. 8:1). Haʼe ningo ipasiénsia ha imbaʼerechakuaa. Péro hemimboʼekuéra ojavy jave haʼe katuete okorrehíva chupekuéra mborayhúpe (Mar. 9:​33-37). Ohechauka voi ojeroviaha hesekuéra opredika porãtaha avei, ha upéva oiméne omokyreʼỹetereíraʼe chupekuéra. Ndaipóri gueteri ni peteĩ mboʼehára oporohayhúva Jesús ojapo haguéicha. Ha upéva omomýi hemimboʼekuérape ohayhu ha iñeʼẽrendu hag̃ua chupe (jaleemína Juan 14:15).

17. Mbaʼéichapa Jesús remimboʼekuéra ohechauka ohayhuha la héntepe?

¹⁷ Jesús remimboʼekuéra ningo ohayhuvaʼekue avei la héntepe. Ha ojepersegi ha ojejukátaramo jepe chupekuéra oipytyvõ hapichakuérape ha omombeʼu pe marandu porã. Aje piko ohayhuete hikuái umi héntepe! Jahechamína apóstol Pablo ohaivaʼekue: ‘Ore roiko pyʼaporã reheve pende apytépe peteĩ sy oñangareko porãháicha imemby rehe. Ore pohayhúgui romyasãi Ñandejára Ñeʼẽ porãite pende apytépe ha hiʼári romeʼẽse ore rekove jepe peẽme’ (1 Tes. 2:​7, 8, ÑÑB).

18, 19. a) Mbaʼépa jajapo jepi japredika hag̃ua? b) Mbaʼérepa ikatu jaʼe ñande rapichakuéra ohechakuaaha jahayhuha chupekuéra? Emoĩmína peteĩ ehémplo.

¹⁸ Koʼág̃a rupi avei, testigos de Jehová oheka ko yvy tuichakue umi oikuaase ha oservisévape Ñandejárape. Ojapóma voi diecisiete áño, ojepredika ha oñemboʼéma hague la Biblia mil millones de óra ári káda áño. Ha jaiporútaramo  jepe ñanetiémpo, ñanembarete ha umi mbaʼe jarekóva japredika hag̃ua, kyreʼỹme jajapo. Jesús oikuaa haguéicha ningo ñande jaikuaa avei ñande Ru yvagapegua oipotaha la hénte oikuaa chupe ikatu hag̃uáicha ohupyty pe jeikove opaveʼỹva (Juan 17:3; 1 Tim. 2:​3, 4). Ñande ningo japorohayhúgui, ñaipytyvõ umi ipyʼaporãvape oikuaa ha ohayhu hag̃ua Jehovápe ñandéicha.

¹⁹ Ñande rapichakuéra ningo ohechakuaa jahayhuha chupekuéra. Pór ehémplo, peteĩ prekursóra Estados Unidosgua ohai jepi kárta ombopyʼaguapy hag̃ua umi ihénte manóvape. Ha peteĩ árape ningo oñekontesta chupe kóicha: “Ñepyrũrã naimoʼãiete peteĩ ndaikuaáiva ohaiha chéve peteĩ kárta chekonsola hag̃ua. Péro upéi haʼe nderehe oiméne hag̃ua rehayhuete la nde rapichakuérape ha Ñandejárape ajeve la rejapo péicha”.

20. Mbaʼérepa iñimportánte ñaporomboʼe mborayhúpe?

²⁰ Ojeʼéva voi ningo katuete ñasẽ porãtaha japorohayhukuaa ha ñandekatupyrýramo. Ha ñande ningo jahayhuvaʼerã ñane estudiantekuérape ikatu hag̃uáicha oikuaa porã hikuái Jehovápe ha ohayhu avei chupe. Jahecháma haguéicha, oiko hag̃ua ñandehegui mboʼehára katupyry: Jahayhuvaʼerã Ñandejárape, pe marandu porã ha ñande rapichakuérape. Upévare, ñañehaʼãkena jajapo upéicha predikasiónpe ikatu hag̃uáicha javyʼa ñameʼẽ haguére. Ha javyʼáta avei jasegi haguére Jesús ehémplo ha jaikuaágui Jehová ñandeguerohoryha.

Ñambohovaimína koʼã porandu

• Ñaporomboʼe jave la Biblia, mbaʼérepa tekotevẽ...

... jahayhu Ñandejárape?

... ñamombaʼe pe ñamboʼéva?

... jahayhu ñande rapichakuérape?

[Porandu ñahesaʼỹijóva]

[Nóta oĩva taʼanga ndive páhina 15]

Mbaʼérepa Jesús ndojoguaietevaʼekue umi escriba ha fariséope?

[Nóta oĩva taʼanga ndive páhina 18]

Ñaporomboʼe porã hag̃ua, tekotevẽ japorohayhu, avei ñanearandu ha ñandekatupyry