Satanás goviérno osẽ vaíta katuete
Satanás goviérno osẽ vaíta katuete
‘Umi mbaʼe vai apoha nosẽporãmoʼãi.’ (ECL. 8:13.)
1. Mbaʼe notísia porãpa oĩ umi hekojojávape g̃uarã?
UMI mbaʼe vai apoha ningo koʼẽrõite opagáta opa mbaʼe ojapovaʼekuére (Pro. 5:22; Ecl. 8:12, 13). Upéva ningo peteĩ notísia porãiterei umi hekojojávape g̃uarã! Haʼekuéra ningo hetáma ohasa asy umi iñañáva poguýpe. Ha Satanás, pe tekove iñañavéva opagáta opa mbaʼe vai ojapovaʼekuére. Hese ningo ojeʼe voi haʼeha pe aña ruvicha (Juan 8:44).
2. Mbaʼérepa Jehová oheja ohasa heta tiémpo osolusiona hag̃ua pe provléma oñepyrũvaʼekue hardín de Edénpe?
2 Satanás oñemombaʼeguasueterei rupi heʼi ñande sy ha ñande ru ypykuépe ojei hag̃ua Jehová goviérno poguýgui. Upéva oikovaʼekue pe hardín de Edénpe. Upéi Adán ha Eva omoirũ Satanáspe ha opuʼã hikuái Jehová sãmbyhýre. Upéicha oiko chuguikuéra pekadór (Rom. 5:12-14). Jehová ningo oikuaa porã vaʼekue mbaʼépa oikóta hesekuéra ndorrespetái ha opuʼãramo Hese. Péro Haʼe ohejamantevaʼerã enterove ohecha mbaʼépa oiko upéicha ojejapóramo. Upévare Jehová oheja ohasa heta tiémpo osolusiona hag̃ua upe provléma ha upéicha ohechauka tuichaiterei ojavy hague umi naiñeʼẽrenduivaʼekue chupe.
3. Mbaʼéichapa jahechavaʼerã umi mburuvichápe?
3 Yvyporakuéra ndoipotavéivo Jehová oisãmbyhy chupekuéra, oñepyrũ oheka hikuái mbaʼéichapa oñogovernáta. Apóstol Pablo ohaírõ guare peteĩ kárta umi kristiáno Romayguápe heʼi umi goviérno haʼeha “mburuvichakuéra”. Upérõ ningo haʼe oñeʼẽ pe goviérno rrománore oisãmbyhýva césar Nerón upe áño 54 guive 68 peve. Apóstol Pablo heʼi ‘Ñandejára omoĩvaʼekue memeha’ umi mburuvichakuéra (jaleemína Romanos 13:1, 2). Mbaʼérepa heʼi upéicha? Heʼise mbaʼépa yvypóra oñogoverna porãvetaha? Nahániri. Heʼisénte Ñandejára ohejanteha yvyporakuérape oñogoverna. Upévare kristianokuéra orrespetavaʼerã umi mburuvichápe.
Peteĩ tape oporogueraha vaítava
4. Mbaʼérepa yvypóra goviérno osẽ vaíta katuete?
4 Satanás poguýpe ningo oĩmba umi goviérno polítiko ha upévare osẽ vaíta katuete. Mbaʼérepa jaʼe upéva? Haʼekuéra ningo ndojapói Jehová heʼíva, pe iñaranduvéva ko univérsope. Jehová añoite ningo ikatu heʼi mbaʼeichagua goviérnopa la iporãvéva yvyporakuérape g̃uarã (Jer. 8:9; Rom. 16:27). Ñandejára ningo oikuaa mbaʼéichapa ojejapovaʼerã osẽ porã hag̃ua peteĩ mbaʼe. Péro yvypóra katu ombota raẽmante vaʼerã iñakã oaprende hag̃ua. Upévare umi yvypóra goviérno ndojapóiva Jehová heʼíva, katuete nosẽporãmoʼãi. Ha koʼýte Satanás ojapo rupi opa mbaʼe iñañágui. Haʼe voi omboliga yvyporakuérape oñogoverna hag̃ua. Upévare osẽ vaíta katuete yvypóra goviérno.
5, 6. Mbaʼérepa Satanás opuʼãvaʼekue Jehováre?
5 Peteĩ tapicha iñakãporãva ningo noinvertimoʼãi mbaʼeve peteĩ emprésa osẽ vaítavape. Péro ojapóramo, amo ipahápe ohechakuaamantevaʼerã ojavy hague. Upéicha avei yvyporakuéra oaprendéma ikostíllare tuichaiterei ojavyha opuʼãvo Ñandejárare (jaleemína Proverbios 21:30). Ha Satanás upéva la ojapóva opuʼãvo Ñandejárare. Haʼe oñemombaʼeguasuetereígui oheja Jehovápe ha oho peteĩ tape ohundítavare chupe.
6 Tiémpo rire oñeñeʼẽ la Bíbliape peteĩ rréi Babiloniaguáre ha oñemombaʼeguasúva Satanás oñemombaʼeguasuháicha. Upe rréi heʼi voi: ‘Yvága peve ajupíta. Ñandejára mbyjakuéra ári amoĩta cheguapyha, ha pe sérro opytáva nórte gotyo tupãnguéra oñembyatyhápe aguapýta. Arai ijyvatetéva ári ajupíta, ha aikóta pe Ijyvatetévaicha’ (Isa. 14:13-15, ÑÑB). Péro upe rréi vyroitépe osẽ ha opa vaieterei pe igoviérno. Upeichaitéta avei Satanás ha imúndo, koʼẽrõitéma oñehundíta ha opa vaietereíta.
Mbaʼérepa Jehová oheja oiko péicha?
7, 8. Mbaʼe mbaʼépa ojehupyty Jehová oheja haguére Satanáspe ogoverna?
7 Oĩ ningo oñeporandúva mbaʼérepa Jehová ndojokói yvyporakuérape ani hag̃ua oñemoĩ Satanás poguýpe. Avei ani hag̃ua omoñepyrũ hikuái peteĩ goviérno pyahu osẽ vaítava katuete. Jehová ningo añete ipoderosoiterei ha ikatu kuri ojoko chupekuéra (Éxo. 6:3). Péro Haʼe ndojapói upéva. Mbaʼérepa? Jehová ningo opensa umi mbaʼe porã ojehupytýtavare tenonde gotyove. Ohecha avei ikuentavetaha ohejánte yvypórape opuʼã hese. Ha tiémpo rire ojekuaa porãta Jehová haʼeha peteĩ Rréi hekojoja ha oporohayhúva. Upévare umi iñeʼẽrendúva mombyry oganáta Jehová odesidi rupi upéicha.
8 Hetaite jehasa asýgui ningo ojeimoʼã yvyporakuéra ndojapóirire Satanás heʼíva ha ndoikóirire iñakãre! Péro jaikuaamaháicha Jehová oheja haguére yvyporakuérape oñogoverna ojehechakuaáma heta mbaʼe. Pór ehémplo heta tapicha ipyʼaporãva ohechakuaa iporãveha ñaneñeʼẽrendu Ñandejárape ha jajerovia hese. Ymaite guive ningo opaichagua goviérnoma oñetantea péro ni peteĩ nosẽporãi. Ha upéicha rupi Jehová siervokuérape hesakãvéntema Ñandejára goviérno rasaharã ndaiporiha. Jaikuaa ningo avei yvyporakuéra hetáma ohasa asyha ojeheja haguére Satanáspe mbaretépe oporogoverna. Ha Jehová siervokuéra jepe hetáma ohasa asy upeichakue. Péro umi kuña ha kuimbaʼe ojeroviáva Ñandejárare ohupytýma heta mbaʼe porã. Ha mbaʼépa hína umi mbaʼe porã?
Jehovápe oñemombaʼeguasu oñepuʼãramo jepe hese
9, 10. Mbaʼérepa ikatu jaʼe Satanás oisãmbyhy vaieterei haguére oñemombaʼeguasuha Jehovápe?
9 Jehová ningo oheja yvyporakuéra oiko Satanás poguýpe ha oñehaʼã hikuái oñogoverna. Péro upéva ndohejavaíri Jehovápe. Ohechauka uvei yvyporakuéra ndaikatuiha ogoverna porã. Upéicha voi Jeremías heʼimavaʼekue yma (jaleemína Jeremías 10:23). Avei Satanás opuʼã rupi hese, ikatu ojehecha heta mbaʼe porã Jehová ojapóva. Mbaʼérepa jaʼe upéva?
10 Satanás ogoverna vaieterei rupi ojekuaa porãvéntema umi mbaʼe porã Jehová ojapóva. Upéicha umi ohayhúva Jehovápe ohechakuaa haʼe ipoderosoitereiha. Upévare, ikatu jaʼe Satanás ogoverna vai haguére oñemombaʼeguasuha Jehovápe. Péicha rupi jahechakuaa avei mbaʼéichapa Jehová ombohovái porã oñepuʼãrõ guare isãmbyhýre. Ñantende porãve hag̃ua koʼã mbaʼe, ñahesaʼỹijomi umi mbaʼe porã Jehová ojapóva ha mbaʼéichapa jahechakuaa upéva Satanás oisãmbyhy vaieterei rupi.
11. Mbaʼéichapa Jehová ohechauka oporohayhuha?
11 Mborayhu. La Biblia heʼi voi: ‘Ñandejára niko mborayhu’ (1 Juan 4:8). Haʼe ningo oporohayhúguinte voi ojapovaʼekue yvyporakuérape. Upéva jahechakuaa avei ñande retére, mbaʼéichapa Jehová ojapo porãite vaʼekue. Umi yvypóra ypykuépe ningo omoĩ peteĩ lugár neporãmba jepévape ha otopatahápe opa mbaʼe oikotevẽva oiko hag̃ua vyʼápe (Gén. 1:29-31; 2:8, 9; Sal. 139:14-16). Péro ko múndo oĩ rire Satanás poguýpe, Jehová ohechauka imborayhu ambue hendáicha. Apóstol Juan omombeʼu mbaʼéichapa: ‘Ñandejára ohayhuetereígui opa yvypórape, omeʼẽvaʼekue Itaʼýra peteĩete ani hag̃ua omano umi hese ojeroviáva, oikove hag̃ua katu opa árare’ (Juan 3:16). Aje piko ñanderayhuete la Ñandejára! Upévarente ningo ombouvaʼekue Itaʼýra ñandepeʼa hag̃ua pekádo poguýgui (Juan 15:13). Tuichaite mbaʼe ningo la ojapóva ñanderayhupápe! Upévare Jesús ojapo haguéicha, ñañehaʼãmbaitevaʼerã koʼẽ koʼẽre jahechauka japorohayhuha (Juan 17:25, 26).
12. Mbaʼéichapa jahechakuaa Jehová ipoderosoha?
12 Podér. ‘Ñandejára ningo ipoderosoiterei’, haʼe añoite ikatu omeʼẽ ñandéve ñande rekove (Rev. 11:17; Sal. 36:9). Upévare mbaʼépa jahechakuaa jajepyʼamongetávo ñandejehe voi? Pór ehémplo, ñanasévo mbaʼeve gueteri ndajaikuaái ha ndajajapói. Upéi jakakuaávo jadesidi, jajapo ha jahasáma heta mbaʼe. Ñamano mbaʼéramo Jehová imanduʼáta mbaʼeichaguápa ñande ha ñanemoingove jey vove, ñanemopuʼã jeýta upeichaite (Juan 5:28, 29). Jehová ningo nañandeaopoivaʼekue voi ñamano hag̃ua. Ha ñanemoingove jey vove ohechaukáta ipoderosoitereiha. Jehová ningo haʼe voi pe Todopoderóso.
13. Mbaʼéichapa Jehová ohechauka hekojojaha ohejárõ guare Itaʼýra ojejuka?
13 Tekojoja. Jehová ningo ndaijapúi ha ndojapói mbaʼeve ivaíva (Deu. 32:4; Tito 1:2). Haʼe katuete ojapo umi mbaʼe añetegua ha hekopeguáva, haʼéteramo jepe sapyʼánte operhudikátava chupe (Rom. 8:32). Mbaʼeichaite piko oiméne hasýraʼe chupe ohechárõ guare Itaʼýra ohayhuetéva ojejuka mbaʼe vai apoháramo! Péro mbaʼére piko ojapo upe ombohasa asyetétava chupe? Ohayhúgui yvyporakuérape ha ojaposégui hekoitépe opa mbaʼe (jaleemína Romanos 5:18-21). Upévare ko múndo aña rupive Haʼe ohechauka ymaite guive ha opa árare mbaʼeichaitépa hekojoja.
14, 15. Mbaʼéichapa Jehová ohechauka iñarandu ha ipasiensiaitereiha?
14 Arandu. Adán ha Eva opekárõ guare, Jehová upepete voi heʼimavaʼekue mbaʼépa ojapóta osolusiona hag̃ua umi mbaʼe vaiete oikótava haʼekuéra naiñeʼẽrendúi haguére (Gén. 3:15). Péicha ningo Jehová ohechauka iñaranduetereiha, pórke pyaʼe porã voi haʼe omombeʼúma mbaʼépa ojapóta. Upéi mbeguekatúpe omyesãkave ohóvo upéva hembiguaikuérape (Rom. 11:33). Ndaipóri ningo haʼeichagua, Jehová oikuaa porã voi mbaʼépa iporãvéta ojapo. Péro ko múndo henyhẽramo jepe tekovai, ñaña, ñorairõ, ñeʼẽrenduʼỹ, tovamokõi ha hekojojaʼỹvagui, hetaiterei vésema Jehová ohechauka iñaranduetereiha. Santiago ningo heʼivaʼekue voi: ‘Umi oguerekóva pe arandu Ñandejáragui oúva ningo hekopotĩ, ndaipochykuaái, ipyʼaporã ha iñeʼẽrendukuaa. Upéicha avei oporoporiahuverekokuaa ha iñeʼẽ añete, ndahovamokõiri ha ojapo iporãva’ (Sant. 3:17).
15 Pasiénsia ijojahaʼỹva. Jehová ningo hetáma ohechauka ipasiensiaitereiha oaguantávo umi mbaʼe vai ñande jajapóva ñaneimperfékto rupi. Ha ymaiterei guivéma ningo haʼe oaguanta koʼã mbaʼe, upéicha rupi jahechakuaa ndaiporiha haʼéicha ipasiénsiava. Upévare ningo ñande kristiáno jaagradesevaʼerã Jehovápe. Apóstol Pedro heʼivaʼekue voi: ‘Peñemomanduʼákena Ñandejára ipasiénsia rupi ñandesalvaha’ (2 Ped. 3:9, 15).
16. Mbaʼérepa javyʼa Jehová imbaʼeporãite haguére ñanendive?
16 Mbaʼeporã. Ñande ningo pekadór ha pyʼỹinte jajavy (Sant. 3:2; 1 Juan 1:8, 9). Upévare jaagradeseterei Jehovápe ‘ohejarei haguére ñandéve ñane rembiapo vaikue’! (Isa. 55:7.) Ñambyasy ningo ñanase hague imperfékto, péro mediánte upéva ñañandu mbaʼeichaitépa javyʼa jahechávo ojeheja reiha ñandéve umi mbaʼe jajapo vai vaʼekue (Sal. 51:5, 9, 17). Ñande ningo jahayhueterei Jehovápe jahechávo mbaʼeichaitépa imbaʼeporã ñanendive ha jatrata porãse avei haʼéicha ñande rapichakuérape (jaleemína Colosenses 3:13).
Mbaʼérepa ivaipaite ko múndo?
17, 18. Mbaʼéichapa jahecha Satanás goviérno mbaʼevépente nosẽporãiha?
17 Ko múndo ningo oĩ Satanás poguýpe ha opa mbaʼe haʼe ojapóvante osẽ vai. Áño 1991-pe peteĩ periodísta heʼi: “Ivaipaitépa ko múndo? Jaʼekuaa ningo upeichaha. Péro yvyporakuéra kúlpare, ndahaʼéi Ñandejára la ojapóva” (The European). Ajépa añetete la heʼíva! Satanás omoinge ñande sy ha ñande ru ypykue akãme omboyke hag̃ua Ñandejára sãmbyhy. Upéicha rupi oñepyrũ yvyporakuéra ogoverna ha mbaʼevénte nosẽporãi chupekuéra. Umi mbaʼe vai jahasáva koʼág̃a rupi ningo ohechauka ñandéve koʼẽrõitéma oñehunditaha umi yvyporakuéra goviérno.
18 Satanás goviérno guýpe opavave opensa hoʼorãrente ha avave nopensái hapicháre. Péro pe taryrýi arakaʼeve ndaipuʼakamoʼãi mborayhúre. Ha jaikuaaháicha Jehová mborayhúpe ogoverna. Satanás katu arakaʼeve nomoĩri pyʼaguapy, vyʼa ha jeiko porã hembiguaikuérape. Upéicha jahechakuaa ndaiporiha Jehová goviérno rasaharã! Mbaʼéichapa koʼág̃a rupi jahechakuaa upéva? Upéva jahecháta pe artíkulo oúvape.
Mbaʼépa ñanemboʼe...
[Porandu ñahesaʼỹijóva]
[Nóta oĩva taʼanga ndive páhina 25]
Satanás goviérno ndoguerúi mbaʼeve iporãva yvyporakuérape
[Roagradese]
U.S. Army fóto
OMS, P. Almasy fóto
[Nóta oĩva taʼanga ndive páhina 26]
Jehová ohechaukáta ipoderosoha omoingove jeývo umi omanovaʼekuépe
[Nóta oĩva taʼanga ndive páhina 27]
Jehová ohechauka oporohayhu ha hekojojaha omeʼẽvo itaʼýra ñanderehehápe