Jehová oiporu ijespíritu sánto ojapo hag̃ua hembipota

‘Pe ñeʼẽ osẽva che jurúgui ndojevyichéne che rendápe oikopaʼỹre pe che haʼevaʼekue.’ (ISA. 55:11.)

1. Mbaʼépa tekotevẽ jepi jajapo ñag̃uahẽ hag̃ua jahasehápe? Emombeʼu peteĩ ehémplo.

 ÑAPENSAMI mokõi karai ojepreparaha oviaha hag̃ua ikóchepe peteĩ távape. Mokõivéva oikuaa porã moõ rupípa ohovaʼerã og̃uahẽ hag̃ua upépe, péro upéi oho ha otopa hikuái pe tape oñembotyha. Pe peteĩ ojevy jeýnte hógape, péro pe ótro oheka ambue tape og̃uahẽ hag̃ua upe távape. Ko ehémplo ohechauka ñandéve heta vése tekotẽveha ñakambia ñande rape ñag̃uahẽ hag̃ua jahasehápe.

2, 3. a) Mbaʼépa Jehová rembipota, ha mbaʼépa ojapo haʼe, Adán ha Eva opuʼãrõ guare hese? b) Mbaʼépa jahupytýta oikóramo Jehová rembipota?

² Jehová oipotáva oiko katuete ha avave ndaikatúi ojoko chupe. Péro peichahágui oĩramo ojaposéva upéva, haʼe okambiánte jepi hape okumpli hag̃ua hembipota (Efe. 3:11). Jehová oipota ko yvýgui oiko peteĩ hardín neporãva ikatu hag̃uáicha yvyporakuéra perféktova oiko pype pyʼaguapy ha vyʼápe opa ára g̃uarã (Gén. 1:28). Péro Adán ha Eva opuʼãrõ guare Ñandejárare, tekotevẽvaʼekue haʼe okambia hape okumpli hag̃ua hembipota (jaleemína Génesis 3:15). Upévare heʼi pe kuña “ñemoñare”, ohunditaha Satanáspe ha omyatyrõmbaitetaha umi mbaʼe vai oikóva ikáusare (Heb. 2:14; 1 Juan 3:8).

³ Ni yvágape ni yvy ape ári ndaipóri mbaʼeve ikatúva ojoko Jehovápe ojapo hag̃ua haʼe oipotáva (Isa. 46:9-11). Katuete ‘oikopaitéta’ haʼe heʼivaʼekue (Isa.  55:10, 11). Jehová ningo oiporu ijespíritu sánto ojapo hag̃ua opa mbaʼe ha upéva hína pe puʼaka imbaretevéva. Mbaʼépa jahupytýta oikóramo Jehová rembipota? Upéicharõ añoite ningo ñande jahupytýta jeikove opaveʼỹva. Upévare iporãta jahechami mbaʼéichapa haʼe ojapo ohóvo hembipota, ha mbaʼépa ñande jajapovaʼerã jaiko hag̃ua Jehová oipotaháicha. Avei ñamombaretéta ñande jerovia jahechávo mbaʼéichapa Ñandejára oiporuvaʼekue ijespíritu sánto yma, mbaʼéichapa oiporu koʼág̃a ha mbaʼéichapa oiporutahína amo gotyove.

Mbaʼéichapa Jehová oiporu ijespíritu ymave

4. Mbaʼéichapa Jehová yma oikuaauka hembipota?

⁴ Yma Jehová mbeguekatúpe oikuaauka mbaʼéichapa oñekumplíta hembipota. Ñepyrũrã ndohejái ojekuaa mávapa pe Ñemoñare oprometevaʼekue outaha (1 Cor. 2:7). Ohasa rire 2 mil áño ae oñeʼẽ jey upe ñemoñare rehe. Upérõ opromete Abrahánpe peteĩ mbaʼe tuichaitereíva (jaleemína Génesis 12:7; 22:15-18). Jehová heʼi Abrahánpe: ‘Ne ñemoñare rupi ojehovasáta opa tetãnguérape’, ha upéva ohechauka pe ñemoñare haʼetaha peteĩ yvypóra oúva Abrahán familiarégui. Katuete ningo Satanás ojapysakáne Jehová heʼivaʼekuére, ha ndoipotáigui oñekumpli upéva oñehaʼãmbaite ohundi Abrahán ñemoñarépe. Péro ndoikói haʼe oipotáva Ñandejára oiporúgui ijespíritu sánto ojapo hag̃ua hembipota. Jahechamína mbaʼéichapa.

5, 6. Mbaʼéichapa Jehová oñangareko Abrahán ha ifamíliare?

⁵ Jehová oiporu ijespíritu sánto oñangareko hag̃ua Abrahán ha ifamíliare. Upévare Haʼe heʼi Abrahánpe (ñepyrũrã héra vaʼekue Abrán): “Romoʼãta opa mbaʼe vaígui” (Gén. 15:1). Ha upeichaite ojapo. Pór ehémplo, ñanemanduʼami oikovaʼekuére heta áño Jesús ou mboyve. Upérõ Abrahán ha hembireko oho oiko sapyʼami táva Guerárpe, ha pe mburuvicha upepegua hérava Abimélec ogueraha Sárape hembirekorã, ndoikuaáigui haʼe omendavaha. Oiporuparakaʼe Satanás ko mburuvichápe ojoko hag̃ua Jehová rembipota? La Biblia ndeʼíri upéva, péro heʼi Ñandejára oñeʼẽ hague iképe Abimélecpe ani hag̃ua ojapo mbaʼeve Sárare (Gén. 20:1-18).

⁶ Upe rire heta vése Jehová oñangareko jey Abrahán ha ifamíliare (Gén. 12:14-20; 14:13-20; 26:26-29). Upévare pe salmísta hesakuaitépe heʼi: ‘Jehová ndohejaivaʼekue avave ojopy vai chupekuéra, ha [Abrahán ha iñemoñare rehehápe] ohavira umi tetã ruvichakuérape. Ha heʼi: “Aníke pepokótei che rembiporavokuéra rehe, ha aníke pejapótei mbaʼeve ivaíva umi che proféta rehe”’ (Sal. 105:14, 15, ÑÑB).

7. Mbaʼéichapa Jehová oñangareko tetã Israel rehe?

⁷ Jehová oiporu avei ijespíritu oñangareko hag̃ua tetã Israel rehe, upépe onaséta rupi pe Ñemoñare oñeprometevaʼekue. Ñepyrũrã omeʼẽ chupekuéra iléi ani hag̃ua ojeheʼa hikuái rrelihión japúre, ha hekopotĩ hag̃ua (Éxo. 31:18; 2 Cor. 3:3). Upéi umi Hués tiémpope ijespíritu rupive oiporu kuimbaʼekuérape oipeʼa hag̃ua Israélpe iñenemigokuéra poguýgui (Jue. 3:9, 10). Ha onase meve Jesús, Jehová oiporu ijespíritu oñangareko hag̃ua Jerusalén, Belén, pe témplo ha ambue távare. Upévare ikatúkuri oñekumpli umi profesía oñeʼẽva pe ñemoñare oñeprometevaʼekuére.

8. Mbaʼéichapa pe espíritu sánto oñangareko Jesús rehe ha oipytyvõ chupe?

⁸ Jehová oiporu avei ijespíritu oñangareko hag̃ua Jesús rehe ha oipytyvõ hag̃ua  chupe predikasiónpe. Ñepyrũra oñangareko hese oĩ aja María retepýpe, ha péicha oiko peteĩ mbaʼe arakaʼeve oikoʼỹva: María iñimperféktaramo jepe, Jesús onase perfékto ha upévare haʼe noĩri pekádo ha ñemano poguýpe (Luc. 1:26-31, 34, 35). Pe espíritu sánto oñangareko avei hese ani hag̃ua ojejuka chupe imitãme (Mat. 2:7, 8, 12, 13). Upe rire Jesús orekópe 30 áño rupi, ijespíritu rupive Ñandejára oiporavo chupe oiko hag̃ua rréiramo ha omoherakuã hag̃ua pe marandu porã (Luc. 1:32, 33; 4:16-21). Ko espíritu rupive Jesús ojapo heta milágro, pór ehémplo omonguera hasývape, omongaru hetaitereípe ha omoingove jey omanovaʼekuépe. Umi milágro ohechauka mbaʼépa ojapóta ág̃a oisãmbyhy vove ko yvy.

9, 10. a) Mbaʼéichapa jaikuaa pe espíritu sánto oipytyvõ hague umi kristiáno ypykuépe? b) Mbaʼépa ohechauka umi milágro ojapovaʼekue umi kristiáno ypykue?

⁹ Pentecostés áño 33 guive Jehová oiporu ijespíritu sánto oiporavo hag̃ua umi oisãmbyhýtava Jesús ndive. Koʼãva apytépe heta oĩ ndahaʼéiva Abrahán familiare (Rom. 8:15-17; Gál. 3:29). Ojekuaa pe espíritu sánto oipytyvõ hague umi kristiáno ypykuépe, upéicha rupínte haʼekuéra opredika kyreʼỹme pe marandu porã ha ojapo heta milágro (Hech. 1:8; 2:1-4; 1 Cor. 12:7-11). Umi milágro ohechauka peteĩ mbaʼe iñimportánteva: Jehová omboykemaha umi hudiokuéra rrelihión, ha upe guive haʼe oiporutamaha pe kongregasión kristiána ojapo hag̃ua hembipota.

¹⁰ Jahecháma haguéicha, yma Jehová oiporu ijespíritu oiporavo hag̃ua isiervokuérape, oñangareko hag̃ua hesekuéra ha ojapouka hag̃ua chupekuéra milágro. Ha péicha ojapo ohóvo hembipota. Mbaʼéichapa Jehová oiporu koʼág̃a ijespíritu sánto okumpli hag̃ua hembipota? Tekotevẽ jaikuaa ko mbaʼe, jaheja hag̃ua pe espíritu sánto ñanesãmbyhy. Upévare jahecháta irundy mbaʼe Jehová ojapóva koʼág̃a ijespíritu rupive.

Mbaʼéichapa Jehová oiporu ijespíritu koʼág̃a

11. a) Mbaʼéichapa pe espíritu sánto oipytyvõ hetápe hekopotĩ hag̃ua? b) Mbaʼéichapa umi kristiáno ohechauka Ñandejára espíritu oisãmbyhyha hekove?

¹¹ Primero, pe espíritu sánto oipytyvõ umi kristiáno teépe hekopotĩ hag̃ua. Entéro oservíva Jehovápe oñehaʼã meme vaʼerã hekopotĩ (jaleemína 1 Corintios 6:9-11). Oikuaa mboyve Jehovápe oĩvaʼekue hekovaíva, oporomoakãratĩva, kuimbaʼe oikóva kuimbaʼéndi ha kuña kuñándi. Ha hetápe ijetuʼuetereivaʼekue oheja hag̃ua koʼã mbaʼe (Sant. 1:14, 15). Upéicharamo jepe oheja hikuái hembiapo vaikue Ñandejára oguerohory hag̃ua chupekuéra, upévare ojeʼe ‘ipotĩmaha’ hikuái. Ha mbaʼépa oipytyvõ chupekuéra ojejokokuaa hag̃ua? ‘Ñandejára espíritu.’ (1 Cor. 6:11.) Umi kristiáno ohechauka Ñandejára espíritu oisãmbyhyha hekove oñehaʼãmbaitévo oiko tekopotĩme.

12. a) Ojehechauka haguéicha Ezequiélpe, mbaʼépa oiporu Jehová oisãmbyhy hag̃ua iñorganisasión? b) Mbaʼéichapa jahechauka ñañemoĩha espíritu sánto poguýpe?

¹² Segundo, Jehová oiporu ijespíritu sánto oisãmbyhy hag̃ua iñorganisasión, oĩva ko yvy ape ári ha yvágape avei. Ezequiel ohechavaʼekue peteĩ visión rupive Jehová organisasión yvagapegua ohoha peteĩ kárroicha ha ndaipóri ojokóva chupe ojapo hag̃ua hembipota. Ha mbaʼéichapa oñesãmbyhy ko kárro? Ñandejára espíritu rupive (Eze. 1:20, 21). Jehová oiporu avei ijespíritu oisãmbyhy hag̃ua iñorganisasión  ko yvy ape ári. Upévare jajapóvo iñorganisasión heʼíva jahañaína Jehová kárro ohoha gotyo ha ñañemoĩ ijespíritu sánto poguýpe (Heb. 13:17).

13, 14. a) Mávapa hína ‘umi hénte ko tiempopegua’ térã ‘generación’? b) Emombeʼumi peteĩ mbaʼe oñemyesakã ramóva espíritu sánto rupive (ehecha rrekuádro “Nemanduʼápa umi mbaʼe oñemyesakãvaʼekuére?”).

¹³ Tercero, pe espíritu sánto omyesakãve ohóvo la Biblia heʼíva (Pro. 4:18). Heta áñorema pe ‘tembiguái jeroviaha ha iñarandúva’ oiporu ko rrevísta omyesakã hag̃ua ñandéve Ñandejára Ñeʼẽ (Mat. 24:45). Pór ehémplo, mbaʼéichapa oñemyesakãraʼe Jesús heʼivaʼekue Mateo 24:32-34-pe? (Jaleemína.) Mávapa hína ‘umi hénte ko tiempopegua’ térã ‘generación’? Omyesakã haguéicha pe artíkulo “Mbaʼépa heʼise ñandéve g̃uarã Jesucristo ogovernamaha?”, upérõ Jesús noñeʼẽikuri umi hénte aña upe tiémpope oikovaʼekuére. Oñeʼẽ guei hemimboʼekuérare; chupekuéra upe riremínte ojeporavo espíritu sánto rupive ogoverna hag̃ua yvágape. * Ha oiko haguéicha upe tiémpope, koʼág̃a avei umi kristiáno ohótava yvágape ohecha mbaʼéichapa oñekumpli pe profesía Jesús omeʼẽvaʼekue, ha avei ontende hikuái mbaʼépa heʼise upéva: Cristo ‘og̃uahẽmbaitemaha, oĩmaha pe okẽme’. Péicha jahecha umi kristiáno ohótava yvágape térã ungido haʼeha ‘umi hénte ko tiempopegua’.

¹⁴ Ñande ndaikatúi jakalkula arakaʼe pevépa oĩta ‘umi hénte ko tiempopegua’ (térã generación); péro oĩ heta mbaʼe ikatúva ñantende. Pór ehémplo pe ñeʼẽ generación ojeporu jepi oñeñeʼẽ hag̃ua umi hénte oikovévare peteĩ tiémpope ndahaʼéirõ jepe ojoavegua. Pór ehémplo peteĩ mitã oikove aja, ikatu avei itúva ha ijavuélo oikove gueteri (Éxo. 1:6). Mbaʼéichapa upéicharõ ñantendevaʼerã Jesús heʼivaʼekue oñeʼẽrõ guare ‘umi hénte ko tiempopegua’ rehe? Pe áño 1914-pe Jesús oñepyrũ ogoverna yvágape. Upérõ oĩ ko yvy ape ári heta ungido ohecháva mbaʼéichapa oñepyrũ oñekumpli pe profesía Jesús omeʼẽvaʼekue. Haʼekuéra oikove aja gueteri onase avei ambue ungido ha umíva ohecháta ág̃a oñepyrũ vove pe jehasa asy guasu. Ko  generación ningo opáta katuete, ha koʼág̃a oñekumplihína heta profesía ohechaukáva pe jehasa asy guasu hiʼag̃uimbaitemaha. Jahechakuaágui mbaʼe tiémpopepa jaiko, tekotevẽ koʼág̃ama ñañatende porã (Mar. 13:37). Péicha jahechauka jajesareko memeha tembiguái jeroviaha omyesakãvare ha jahejaha espíritu sánto ñanesãmbyhy.

15. Mbaʼéichapa pe espíritu sánto ñanepytyvõ japredika hag̃ua?

¹⁵ Cuarto, pe espíritu sánto oipytyvõ ojepredika hag̃ua (Hech. 1:8). Upéicha rupínte pe marandu porã oñemoherakuãma oparupiete ko yvy ape ári. Pe espíritu sánto ñanepytyvõ avei ñandéve. Ymave ikatu ñaneotĩeterei térã jakyhyje oimeraẽ mbaʼégui ha jaʼe voi arakaʼeve ndaikatumoʼãiha japredika. Ha koʼág̃a katu kyreʼỹme ñasẽ ñamoherakuã pe marandu porã. * Oĩ avei heta testígo opredika meméva oĩramo jepe oñemoĩva hesekuéra. Pe espíritu sánto ñanemombarete ñambohovái hag̃ua umi provléma tuicháva ha ñanepytyvõ jajapo hag̃ua heta mbaʼe ndaikatumoʼãiva jajapo ñandejehegui reínte (Miq. 3:8; Mat. 17:20). Upévare jajapovaʼerã ikatúva entéro jaikuaauka hag̃ua pe marandu porã, ha péicha jaiko pe espíritu sánto poguýpe.

Mbaʼéichapa Jehová oiporúta ijespíritu amo gotyove

16. Mbaʼérepa jajeroviakuaa Jehová oñangarekotaha hembiguaikuérare pe jehasa asy guasúpe?

¹⁶ Koʼẽrõite Jehová ijespíritu rupive ojapóta heta mbaʼe iporãitereíva okumpli hag̃ua hembipota. Ñepyrũrã oiporúta oñangareko hag̃ua hembiguaikuérare. Jahecháma haguéicha yma haʼe oñangarekovaʼekue isiervokuérare ha tetã Israel rehe. Upévare jajeroviakuaa oiporu jeytaha ijespíritu oñangareko hag̃ua hembiguaikuérare pe jehasa asy guasúpe. Natekotevẽi ningo jaiko jakalkula mbaʼéichapa haʼe ojapóta upéva. Ñande jahayhu Jehovápe ha upévare jajerovia haʼe ijespíritu rupive ojesarekotaha ñanderehe (2 Cró. 16:9; Sal. 139:7-12).

17. Mbaʼépa ojapóta Jehová pe múndo pyahúpe ijespíritu rupive?

¹⁷ Mbaʼépa ojapóta Jehová pe múndo pyahúpe ijespíritu rupive? Pór ehémplo, omeʼẽta yvyporakuérape peteĩ kuatiañeʼẽ ipyahúva (Rev. 20:12). Mbaʼépa oĩta ipype? Umi léi ojeporútava Cristo ogoverna aja mil áño pukukue. Hiʼãitéma ningo jaguereko umi kuatiañeʼẽ ha jaiko vyʼápe pe múndo pyahúpe. Ág̃a Ñandejára ijespíritu rupive okumpli vove hembipota yvyporakuérape g̃uarã, jahupytýta hetaiterei mbaʼe porã ñaimoʼãʼỹva.

18. Mbaʼépa ñande jajapovaʼerã?

¹⁸ Aníke ñanderesarái Jehová ojapoha hembipota ijespíritu sánto rupive, ha ndaipóri ikatúva ojoko upéva. Ñande ningo jajapose avei hembipota, upévare jajerurékena chupe ñanesãmbyhy hag̃ua ijespíritu rupive (Luc. 11:13). Jajapóramo upéicha ikatúta jahupyty Ñandejára oipotavaʼekue iñepyrũmby guive ñandéve g̃uarã: jaikovéta opa ára g̃uarã peteĩ hardín neporãvape.

[Nóta]

Mbaʼépa ñaaprendéraʼe?

• Mbaʼéichapa Jehová oiporu yma ijespíritu sánto ojapo hag̃ua hembipota?

• Mbaʼéichapa Jehová oiporu ijespíritu koʼág̃a?

• Mbaʼéichapa Jehová oiporúta ijespíritu koʼẽrõite ojapo hag̃ua hembipota?

[Porandu ñahesaʼỹijóva]

[Rrekuádro oĩva páhina 10-pe]

Ñanemanduʼápa umi mbaʼe oñemyesakãvaʼekuére?

Jehová akóinte omyesakãve iñeʼẽ. Mbaʼe mbaʼépa oñemyesakãraʼe Ñemañahápe umi áño ohasavaʼekuépe?

▪ Mbaʼéichapa okakuaa Jehová organisasión, ohechaukaháicha pe ehémplo oñeʼẽva pe levadúrare? (Mat. 13:33; w 15 de julio de 2008, páhina 26, 27.)

▪ Arakaʼe pevépa Jehová oiporavóta umi ohótava yvágape? (w-S 1 de mayo de 2007, páhina 30, 31.)

▪ Mbaʼépa heʼise ñamombaʼeguasu Jehovápe ‘espíritu sánto rupive’? (Juan 4:24; w-S 15 de julio de 2002, páhina 15.)

▪ Juan ohechárõ guare pe témplo, mbaʼe lugárpepa omombaʼeguasu Jehovápe pe aty guasu? (Rev. 7:15; w-S 1 de mayo de 2002, páhina 30, 31.)

▪ Arakaʼépa ojepeʼáta umi ovecha kavarakuéra apytégui? (Mat. 25:31-33; w-S 15 de octubre de 1995, páhina 18-28.)