Aníkena ñañemoĩ Jehová espíritu rehe

‘Ani pemoñembyasy Ñandejára espíritu sánto, upévape ningo haʼe penemarkavaʼekue.’ (EFE. 4:30)

1. Mbaʼe iporãitereívapa ikatu ohupyty hetaiterei ñande rapicha? Ha mbaʼépa jajapovaʼerã upearã?

 KO MÚNDO henyhẽ provlémagui, upéicharamo jepe hetaiterei ñande rapicha ohupyty peteĩ mbaʼe iporãitereíva: Ikatu oñemoag̃ui Jehováre itaʼýra Jesucristo rupive (Juan 6:44). Ñande ñaime hag̃ua avei ijapytepekuéra, jajapovaʼerã peteĩ kompromíso Ñandejárandi ha ñañemeʼẽ chupe; ha upéi ñakumplivaʼerã ñaprometevaʼekue. Ñanemanduʼákena avei jajevautisaha espíritu sánto rérape, upévare jahejavaʼerã ñanesãmbyhy tapiaite (Mat. 28:19).

2. Mbaʼe porandúpa ñambohováita koʼág̃a?

² Enterove ñande ‘jahejáva espíritu sánto ñanesãmbyhy’, ñambopyahu ñande rekove apóstol Pablo heʼi haguéicha (Gál. 6:8; Efe. 4:17-24). Péro tekotevẽ avei ñañatende ani  hag̃ua ‘ñamoñembyasy Ñandejára espíritu sánto’ heʼiháicha Efesios 4:25-32 (jaleemína). Ñahesaʼỹijo porãmína ko téysto. Mbaʼépa heʼise ‘ñamoñembyasy espíritu sántope’? Mbaʼe mbaʼe jajapóramopa ikatu ñamoñembyasy pe espíritu sánto? Mbaʼépa jajapovaʼerã ani hag̃ua oiko upéva?

Mbaʼépa heʼiséraʼe Pablo

3. Ikatúpa remyesakãmi Efesios 4:30-pe heʼíva.

³ Ñepyrũrã ñahesaʼỹijomi Efesios 4:30, upépe heʼi: ‘Ani pemoñembyasy Ñandejára espíritu sánto, upévape ningo haʼe penemarkavaʼekue penemosãso hag̃ua’. Pablo omeʼẽ ko konsého iñermanokuérape, ndoipotáigui ikangy chuguikuéra ijerovia. Heʼi pe espíritu sánto rupive oñemarkáma hague chupekuéra oñemosãso hag̃ua. Pe espíritu sánto haʼete ohejáva peteĩ márka ohechaukáva ungidokuérape ‘umi mbaʼe ohupytýtava hína amo gotyove’ (2 Cor. 1:22). Pe márka péva ohechauka haʼekuéra Ñandejára mbaʼemaha, ha oikovetaha opa ára g̃uarã yvágape. Oĩtahína 144.000 yvypóra ojeporavóva oiko hag̃ua yvágape (Rev. 7:2-4).

4. Mbaʼérepa ñañatendevaʼerã ani hag̃ua ñamoñembyasy espíritu sántope?

⁴ Mbaʼérepa enterovete ñañatendevaʼerã ani hag̃ua ñamoñembyasy Jehová espíritu? Nañañatendéiramo Ñandejára ikatu oipeʼaite ñandehegui ijespíritu sánto. Jaleéramo David ohaivaʼekue jahechakuaa ikatuha oiko upéva oimeraẽvare. Haʼe opeka rire Bat-sébandi oñembyasy ha ojerure asy Jehovápe: ‘Aníkena chemosẽ ne renondégui, ha anína reipeʼa chehegui nde espíritu sánto’ (Sal. 51:11, ÑÑB). Upévare umi ungido tekotevẽ ‘ojerovia Jehováre omanoite peve’, ikatu hag̃uáicha ohupyty pe jeikove opaveʼỹva yvágape (Rev. 2:10; 1 Cor. 15:53). Ha umi ohupytyséva pe jeikove opaveʼỹva ko yvy ape ári, tekotevẽ ojerovia Jesucrístore ha iñeʼẽrendu Ñandejárape. Upearã oikotevẽ espíritu sánto oipytyvõ chupekuéra (Juan 3:36; Rom. 5:8; 6:23).

Mbaʼéichapa ikatu ñamoñembyasy espíritu sántope?

5, 6. Mbaʼéichapa ikatu ñamoñembyasy Jehová espíritu?

⁵ Mbaʼépa jajapovaʼerã ani hag̃ua ñamoñembyasy espíritu sánto? Jahejavaʼerã pe espíritu oisãmbyhy ñande rekove. Upéicha ndajaikomoʼãi ñane akãre ha ndajajaposemoʼãi mbaʼeve ivaíva (Gál. 5:16, 25, 26). Péro nañañatendéiramo, mbeguekatúpe ikatu ñañepyrũ ñamboykeʼimi jahávo la Biblia heʼíva. Péicha jajapóramo ñañemoĩñaína espíritu sánto rehe.

⁶ Jajepokuaáramo ñamboyke la Biblia heʼíva ha ndajaikói espíritu sánto poguýpe, ñamoñembyasýta Jehovápe ha haʼe oipeʼáta ñandehegui ijespíritu. Mbaʼépa ñanepytyvõta ani hag̃ua jajapo upéva? Efesios 4:25-32 ombohováita ñandéve ko porandu.

Mbaʼépa jajapovaʼerã ani hag̃ua ñañemoĩ espíritu sántore

7, 8. Mbaʼérepa nañandejapuivaʼerã?

⁷ Aníke ñandejapu. Efesios 4:25-pe heʼi: ‘Peẽ koʼág̃a pemboykéma pe japu, upévare añeteguánte pejevaʼerã ojupe. Penemanduʼáke enterove oñopehẽnguéicha ñaimeha oñondive’. Kongregasiónpe ningo ñande ñaime oñondivepa oñopehẽnguéicha, upévare aníkena ni guaʼuhápe jaiko ñamokañykañy umi mbaʼe oikóva, ni ñaneʼensuguy. Térã ñañehaʼã jagueroviauka ñane ermanokuérape peteĩ mbaʼe noĩporãiva, péicha jajapóramo ñandejapuhína. Oĩrõ osegíva ojapo péicha, katuete opyta vaíta Jehovándi (jaleemína Proverbios 3:32).

⁸ Ñandejapu térã jajapóramo peteĩ mbaʼe hekopeʼỹ, ñande káusare ojeiko vaíta kongregasiónpe. Upévare ñañehaʼãvaʼerã jasegi proféta Daniel ehémplo, haʼe peteĩ kuimbaʼe ijoheipyréva, ha avave ndaikatúi oñeʼẽ vai  hese (Dan. 6:4). Ñanemanduʼákena apóstol Pablo heʼi hague umi ohótava yvágape haʼeha ‘Cristo rete’. Upévare haʼekuéra ombaʼapovaʼerã oñondivepa pyʼaguapýpe ha ndaiporivaʼerã japu ijapytepekuéra (Efe. 4:11, 12). Ñande jaikoséva opa ára g̃uarã ko yvy ape ári nañandejapuivaʼerã avei, péicharõmante oĩta pyʼaguapy kongregasiónpe.

9. Mbaʼérepa iñimportánte jasegi pe konsého oĩva Efesios 4:26, 27-pe?

⁹ Ñañemoĩ Satanás rehe ha ani jaheja ombyai ñande jerovia (Sant. 4:7). Espíritu sánto ñanepytyvõta ani hag̃ua jaʼa Satanás ñuhãme. Upearã tekotevẽ ñañatende ani ñandepochy rei. Upévare apóstol Pablo ohai ñandéve péicha: ‘Aníkena pejapo ivaíva pendepochy jave, kuarahy oike mboyve peiko porã jeýma vaʼerã. Ndovaléi pemeʼẽ juruja Aña ruvichápe’ (Efe. 4:26, 27). Sapyʼánte oĩrõ ofalláva ñanendive, iporãvéta ñakirirĩnte ha pyaʼe porã ñañemboʼe Jehovápe. Péicharõ ikatúta ‘ñandepyʼaguapy’, ha ndajajapomoʼãi mbaʼeve ivaíva, ikatúva omoñembyasy espíritu sántope (Pro. 17:27). Ndovaléi ñandepyʼaro, cháke jaikóramo pochyháre, Satanás ikatu ojapouka ñandéve mbaʼe vai (Sal. 37:8, 9). Jesús heʼivaʼekue pyaʼe jahavaʼerãha jaiko porã jey ñande rapichándi, upéicha jajapóramo ndajaʼamoʼãi Satanás ñuhãme (Mat. 5:23, 24; 18:15-17).

10, 11. Mbaʼérepa ndovaléi ñanemonda térã ñandepokarẽ?

¹⁰ Aníkena ñanemonda térã ñandepokarẽ. Apóstol Pablo heʼi: ‘Pe omondáva anivéma omonda, tojepytaso guei ha tombaʼapo. Tojapo ipópe tembiapo iporãva, ikatu hag̃ua avei oipytyvõ umi oikotevẽvape’ (Efe. 4:28). Peteĩ ermáno omondáramo ‘omongyʼáta Ñandejára réra’ (Pro. 30:7-9). Ohayhu añetéva Ñandejárape ha hapichápe ndojapomoʼãi péicha ni imboriahuvéramo (Mar. 12:28-31).

¹¹ Péro apóstol Pablo ndahaʼéi heʼínteva ñandéve mbaʼépa ndovaléi jajapo, haʼe heʼi avei mbaʼépa jajapovaʼerã. Jahejáramo Ñandejára espíritu ñanesãmbyhy, ñambaʼapo pohýita ñamantene hag̃ua ñane familiakuérape, ha ikatúta avei ‘ñaipytyvõ umi oikotevẽvape’ (1 Tim. 5:8). Péicharõ ndajaikomoʼãi Judas Iscarióteicha, haʼe oikomivaʼekue omonda pe pláta Jesús ha ijapostolkuéra ombyatýva oipytyvõ hag̃ua imboriahúvape (Juan 12:4-6). Jaikuaa ningo upe kuimbaʼe ñañaite ndohejái hague oisãmbyhy chupe espíritu sánto. Péro ñande jaheja ñanesãmbyhy ha upévare ‘nañanemondái ha jajapo opa mbaʼe hekoitépe’, Pablo ojapo haguéicha (Heb. 13:18). Péicha ñande nañañemoĩri Jehová espíritu sántore.

 Mbaʼépa ikatu jajapove

12, 13. a) Mbaʼe konsého iporãvapa jatopa Efesios 4:29-pe? b) Mbaʼéichapa ñañeʼẽvaʼerã ñande rapichakuérape?

¹² Jajokókena ñande juru. Apóstol Pablo heʼi ñandéve: ‘Aníke osẽ pende jurúgui ñeʼẽ kyʼa. Peiporu guei ñeʼẽ iporãva oporomokyreʼỹva tekotevẽ jave, péicha ikatúta peipytyvõ umi penerendúvape’ (Efe. 4:29). Koʼápe Pablo ndahaʼéi heʼínteva ñandéve mbaʼépa ndovaléi jajapo, heʼi jey mbaʼépa jajapovaʼerã. Espíritu sánto ñanesãmbyhýramo ñane ñeʼẽ omokyreʼỹta ñande rapichakuérape. Ha arakaʼeve nosẽivaʼerã ñande jurúgui ‘ñeʼẽ kyʼa’. Ko ñeʼẽ ojetradusíva griégogui ‘ñeʼẽ kyʼa’ ojeporumivaʼekue oñeñeʼẽ jave umi yva, soʼo térã pira itujupáva rehe. Ajépa ñanembojeguaruete peichagua tembiʼu. Upéicha avei ñanembojeguaruvaʼerã umi ñeʼẽ vai ndogustáiva Jehovápe.

¹³ La Biblia heʼi voi ñandéve ñañeʼẽ hag̃ua ‘torypápe’ ñande rapichakuérape ha ñamombaʼe chupekuéra (Col. 3:8-10; 4:6). Umi ñanerendúva ohechakuaavaʼerã ñande ndahaʼeiha ambue hentekuéraicha. Jaiporúramo ‘ñeʼẽ iporãva ha oporomokyreʼỹva’ ikatúta ñaipytyvõ chupekuéra. Iporãitevaʼerã ñapensáramo David opensa haguéicha, haʼe heʼivaʼekue Jehovápe: ‘Pe che ñeʼẽ heñóiva che pyʼapýgui, hiʼãite chéve nembopyʼarory Jehová’ (Sal. 19:14).

14. Mbaʼe mbaʼépa heʼi ñandéve ñamboyke hag̃ua Efesios 4:30, 31?

¹⁴ Ndovaléi ñandepyʼaro, ñandepochy rei, térã ñane ñeʼẽ guasu, ha ñaneñaña. Heʼi rire ñandéve ani hag̃ua ñamoñembyasy Ñandejára espíritu, Pablo ohai: “Anive pendepyʼaro, pendepochy vai térã pendepochy rei. Ani pesapukái ojupe, térã pene ñeʼẽ guasu. Pemboyke guei opaichagua ñaña” (Efe. 4:30, 31). Ñaneimperfékto rupi tekotevẽ ñañehaʼãmbaite ani hag̃ua ñapensa térã jajapo ivaíva. Jaikóramo ñandepyʼaro, ñandepochy vai, térã ñañeʼẽ guasu ojupe, ñamoñembyasýta pe espíritu sánto. Upéicha avei oikóta oĩramo ofalláva ñanendive ha nañaperdonaséiramo chupe. Jajepokuaáramo ñamboykénte la Biblia heʼíva, ikatu amo gotyove ñañemoĩ espíritu sánto rehe, ha ipahápe ivaíta ñanendive.

15. Mbaʼépa jajapovaʼerã oĩrõ ofalláva ñanendive?

¹⁵ Tekotevẽ ñanembaʼeporã, jaiporiahuvereko ha ñaperdonakuaa ñande rapichápe. Apóstol Pablo heʼi ñandéve: ‘Penembaʼeporãvaʼerã, ha pejoporiahuvereko. Peñoperdona Ñandejára peneperdona haguéicha avei Cristo rupive’ (Efe. 4:32). Oĩramo jepe ofalla vaíva ñanendive, ñaperdonavaʼerã chupe, Ñandejára ojapoháicha (Luc. 11:4). Epensamína peteĩ ermáno oñeʼẽ vaiha nderehe. Reiko porã jey hag̃ua hendive reho hendápe ha peñemongeta, haʼe ombyasyeterei pe ojapovaʼekue ha ojerure ndéve reperdona hag̃ua chupe. Upémaramo nde reperdona chupe. Ovalémapa upéva? Nahániri, ofalta rejapove peteĩ mbaʼe. Levítico 19:18-pe heʼi: ‘Ani reñevenga, térã ndepyʼaro ne retãyguándi, rehayhuvaʼerã nde rapichápe nde rejehayhuháicha. Che hína Jehová’.

 Ñañatende memékena

16. Mbaʼépa tekotevẽ jajapo ani hag̃ua ñañemoĩ Ñandejára espíritu rehe? Emoĩmi peteĩ ehémplo.

¹⁶ Sapyʼánte ikatu avei jajapose ivaíva ñaime jave ñaneaño. Pór ehémplo ñahendu músika ivaíva. Ñapensamína peteĩ ermáno ojapoha jepi upéicha. Upéi ikonsiénsia oñepyrũ ojopy chupe. Haʼe ohechakuaa omboyke hague Ñandejára Ñeʼẽ, ha umi konsého omeʼẽva “tembiguái jeroviaha ha iñarandúva” (Mat. 24:45). Upémarõ oñemboʼe Ñandejárape ha imanduʼa Efesios 4:30-pe heʼíva rehe. Haʼe noñemoĩséi espíritu sánto rehe, upévare odesidi nohendumoʼãveimaha upeichagua músika. Katuete Jehová oguerohory ha ohovasáta upe ermánope. Upéicha avei ñande enterovete ñañatende porã vaʼerã ani hag̃ua ñamoñembyasy Ñandejára espíritu sánto.

17. Mbaʼépa ikatu oiko ñanderehe nañañatendéiramo ha nañañemboʼevéi?

¹⁷ Peichahágui nañañatendéirõ ha nañañemboʼevéi Jehovápe, ikatu jaʼa tekokyʼápe ha jajapo ivaíva, ha péicha ñañemoĩ Ñandejára espíritu rehe. Jehová oiporu ijespíritu sánto ojapo hag̃ua hembipota, ha ñande ndajajapóiramo haʼe oipotáva ikatu ñamoñembyasy ijespíritu. Ha upéva ndajajaposéi arakaʼeve (Efe. 4:30, nóta). Yma síglo primérope umi mboʼehára leipegua, iñañágui rei heʼi Jesús ojapoha umi milágro Satanás rupive (jaleemína Marcos 3:22-30). Upéicha ojapóvo, haʼekuéra ‘oñeʼẽ vai espíritu sántore’, ha upe pekádo ndaikatuvéima oñeperdona. Aníkena ñande jajapo upéva arakaʼeve!

18. Mbaʼéichapa jaikuaáta ndajajapói hague peteĩ pekádo ikatuʼỹva oñeperdona?

¹⁸ Ñande ndajajaposéi mbaʼeve ikatúva ñandereity pe pekádo ikatuʼỹvape oñeperdona, upévare ñanemanduʼa meme vaʼerã pe konsého omeʼẽvaʼekue Pablo: ‘Aníke pemoñembyasy Ñandejára espíritu sánto’. Ha oiméramo jaʼáma peteĩ pekádo vaípe? Ñapensami: Ñañembyasýpa jajapo haguére upe mbaʼe vai ha ñañeʼẽmapa umi ansiánondi ñanepytyvõ hag̃ua? Oimérõ upéicha jajeroviakuaa Ñandejára ñaneperdonataha ha ndajajapói hague peteĩ pekádo ikatuʼỹva oñeperdona. Péicharõ Jehová ñanepytyvõta anivéma hag̃ua jajapo mbaʼevete omoñembyasýva ijespíritu.

19, 20. a) Mbaʼe mbaʼépa ndovaléi jajapo? b) Mbaʼépa jajedesidivaʼerã jajapo?

¹⁹ Ijespíritu sánto rupive Ñandejára oipytyvõ isiervokuérape ojoayhu, ha oiko hag̃ua vyʼápe oñondivepa (Sal. 133:1-3). Upévare ndovaléi jaiko ñañeʼẽ rei ñane ermánore, térã ñañeʼẽ vai umi ansiáno rehe (Hech. 20:28; Jud. 8). Upéva rangue ñamombaʼevaʼerã ñane ermanokuérape ha ñañehaʼã jaiko porãmba enterovéndi kongregasiónpe. Ivaietéta ningo jaikóramo ñamboliga ermanokuérape opuʼã hag̃ua ojuehe, térã oñemomombyry hag̃ua ojuehegui. Upévare Pablo ohai péicha: ‘Che ermanokuéra, Jesucristo rérape ajerure peẽme, peñemoĩ hag̃ua peteĩ ñeʼẽme ha ani peiko vai. Ha enterove peime hag̃ua oñondive pende pyʼaite guive’ (1 Cor. 1:10).

²⁰ Jehová ikatu ñanepytyvõ ani hag̃ua ñamoñembyasy ijespíritu. Ha ñande jajedesidivaʼerã ñaneñeʼẽrendu chupe ha ani jajapo mbaʼeve oñemoĩva ijespíritu sántore. Upearã jasegivaʼerã jajerure Ñandejárape ijespíritu ha jaheja tañanesãmbyhy. Péicharõ jajapóta haʼe oipotáva koʼág̃a ha opaite ára.

Mbaʼépa ikatu rembohovái?

• Mbaʼépa heʼise ñamoñembyasy Jehová espíritu?

• Mbaʼe jajapóramopa ikatu ñamoñembyasy Jehová espíritu?

• Mbaʼépa jajapovaʼerã ani hag̃ua ñamoñembyasy espíritu sánto?

[Porandu ñahesaʼỹijóva]

[Nóta oĩva taʼanga ndive páhina 30]

Pyaʼékena jaiko porã jey oñondive

[Nóta oĩva taʼanga ndive páhina 31]

Mbaʼépepa ojogua ñane ñeʼẽ?