Kuimbaʼekuéra, peñehaʼãkena pembaʼapove kongregasiónpe

‘Pe ohejáva espíritu sánto oisãmbyhy chupe, espíritu sántogui omonoʼõta jeikove opaveʼỹva.’ (GÁL. 6:8)

1, 2. Mbaʼéichapa oñekumplihína Mateo 9:37, 38? Mbaʼépa oñekotevẽ kongregasiónpe?

 JESÚS heʼivaʼekue ñane tiémpope oĩtaha peteĩ tembiapo iñimportantetereíva ojegueromanduʼátava tapia g̃uarã. Haʼe heʼi: ‘Pe kóga oñemonoʼõvaʼerã ningo hetaiterei, omonoʼõva katu saʼi. Upévare pejerurékena pe kóga Járape tombou hetave omonoʼõvaʼerã’ (Mat. 9:37, 38, NM). Koʼág̃a jahecha Jehová ohovasaha ko tembiapo arakaʼeve ojapoʼỹ haguéicha. Áño 2009-pe oñepyrũ 2.031 kongregasión pyahu, péicha jahupytýma 105.298 kongregasión. Ha káda día ojevautisa 757 tapicha rupi.

² Jehová puévlo okakuaave ohóvo, upévare oñekotevẽ hetave ermánore ikatu hag̃uáicha omboʼe ha oñangareko umi kongregasiónre (Efe. 4:11). Yma Jehová oiporavo kuimbaʼekuéra ikatupyrýva oñangareko hag̃ua isiervokuérare, ha Haʼe ojapo upéva koʼag̃aite peve. Miqueas 5:5-pe Ñandejára opromete ára pahápe omeʼẽtaha ‘7 pytyvõhára’ ha ‘8 omoakãva’, péva heʼise oĩtaha heta kuimbaʼe ikatupyrýva omoakã hag̃ua kongregasión.

3. Mbaʼépa heʼise ‘jaheja espíritu sánto ñanesãmbyhy’?

³ Nde oimérõ kuimbaʼe ha rejevautisáma, eñeporandumi: Mbaʼépa chepytyvõta ambaʼaposeve hag̃ua kongregasiónpe?. Reñakãrapuʼãséramo kongregasiónpe tekotevẽ ‘reheja espíritu sánto nesãmbyhy’, upéva heʼise rehechaukavaʼerãha reiko lájare reimeha espíritu sánto poguýpe (Gál. 6:8). Ha mbaʼeveichavérõ ani reheja ‘nde rete rembipota ipuʼaka nderehe’, ni reiporupaite ko múndo oikuaveʼẽva, térã reiko vyʼarã rapykuéri. Umíva oiporupáramo ne tiémpo, ndaikatumoʼãi reservi porã Jehovápe. Añetehápe enterove jahejavaʼerã espíritu sánto ñanesãmbyhy, péro umi kuimbaʼe oñehaʼãvevaʼerã. Upéicharõmante ikatúta oipytyvõ porã hikuái kongregasiónpe. Koʼág̃a rupi oñekotevẽterei siérvo ministeriál ha ansiáno, upévare ko artíkulo ojehai kuimbaʼekuérape g̃uarã. Ermanokuéra, peñemboʼékena Jehovápe ha upéi pehesaʼỹijo ko artíkulo.

Ehechaukákena rejaposeha peteĩ tembiapo iporãva

4, 5. a) Mbaʼe iporãvapa oñehaʼãmbaitevaʼerã ohupyty umi kuimbaʼe ojevautisámava? b) Mbaʼépa tekotevẽ ojapo upearã?

⁴ Oiko hag̃ua ndehegui ansiáno ndahaʼéi reguapyntevaʼerã rehaʼarõ, rekuʼevaʼerã. Reñehaʼãmbaitevaʼerã rehupyty ko ‘mbaʼe porã’ (1 Tim. 3:1). Péro upearã tekotevẽta rejepyʼapy ermanokuéra oikotevẽvare (jaleemína Isaías 32:1, 2). Nderejapoivaʼerã mbaʼeve rejechaukaséguinte, ni reñemombaʼeguasu hag̃ua, síno reipytyvõségui nde rapichápe.

⁵ La Bíbliape jatopa mbaʼe mbaʼépa tekotevẽ  ojapo peteĩ kuimbaʼe oservi hag̃ua siérvo ministeriál térã ansiánoramo. Umi ermáno ohupytyséva ko mbaʼe oñehaʼãmbaitevaʼerã ojapo upéva (1 Tim. 3:1-10, 12, 13; Tito 1:5-9). Enterove kuimbaʼe ojevautisámava oñeporanduvaʼerã: “Asẽ memépa apredika ha amokyreʼỹpa ermanokuérape osẽ hag̃ua avei? Ajepyʼapýpa che rapichakuérare ha añehaʼãpa aipytyvõ chupekuéra? Ajepokuaápa astudia meme la Biblia? Ajepreparápa akomenta porãve hag̃ua rreunionhápe? Ajapópa kyreʼỹme umi tembiapo omeʼẽva chéve umi ansiáno?” (2 Tim. 4:5). Iporãta rejepyʼamongetáramo koʼã porandúre.

6. Mbaʼépa tekotevẽ avei ojapo umi ermáno ombaʼapove hag̃ua kongregasiónpe?

⁶ Mbaʼépa tekotevẽ avei ojapo umi ermáno ombaʼapove hag̃ua kongregasiónpe? Oñehaʼãvaʼerã ‘omombarete ipyʼapýpe oĩva, pe puʼaka omeʼẽva espíritu sánto rupive’ (Efe. 3:16). Nopensaivaʼerã iñimportantevetaha ambue ermánogui, haʼe oservíta haguére siérvo ministeriál térã ansiánoramo. Upéva rangue ohechakuaavaʼerã Jehová oiporavoha omoakã hag̃ua ikongregasión umi kuimbaʼe ijerovia mbaretévape. Upéicharõ, mbaʼépa ojapovaʼerã peteĩ ermáno ijerovia mbarete hag̃ua? Ohejavaʼerã pe ‘espíritu sánto oisãmbyhy chupe’ opa mbaʼe ojapóvape (Gál. 5:16, 22, 23). Pe ermáno oñehaʼãramo okumpli umi mbaʼe oñehaʼarõva chugui, ha osegíramo umi konsého oñemeʼẽva chupe, ‘enterove ohechakuaáta mbaʼéichapa oñakãrapuʼã’ ohóvo (1 Tim. 4:15).

Ani ndekaigue

7. Mbaʼéichapa umi omoakãva kongregasión ojapovaʼerã hembiapo?

⁷ Umi omoakãva kongregasión heta oiko oipytyvõ hag̃ua ermanokuérape, upévare nandekaigueivaʼerã. Umi ansiáno ikatu ñambojoja umi kuimbaʼe oñangarekóva ovecha  rehe. Mbaʼérepa? Haʼekuéra ojepyʼapýgui Jehová ovechakuérare. Jahechamína mbaʼéichapa oñeñanduvaʼekue apóstol Pablo ojapóvo ko tembiapo. Haʼe heʼi umi ermáno Corintoyguápe: ‘Tuichaite mbaʼembyasýpe ha che resay che rováre ahai peẽme, ndajapói upéva peñembyasy hag̃ua, aipotánte pehecha mbaʼeichaite pevépa pohayhu’ (2 Cor. 2:4). Ojekuaa Pablo oñemeʼẽmbaite hague okumpli porã hag̃ua hembiapo.

8, 9. Máva mávapa oñemeʼẽmbaitevaʼekue hapichakuéra rehehápe?

⁸ Ymaite guive Jehová oiporavo umi kuimbaʼe ikyreʼỹvape, oipytyvõ hag̃ua isiervokuérape. Pór ehémplo, Noé ndeʼíri ifamiliakuérape: “Nde, pejapopa vove pe várko guasu cherenoika ág̃a”. Ha Moisés osẽrõ guare Egíptogui umi Israelguándi, ndeʼíri chupekuéra: “Che aháma, jajotopáta amo már Rójope”. Avei Josué arakaʼeve ndeʼirivaʼekue: “Hoʼapa vove umi murálla oĩva Jericópe ajúta”. Upéicha avei, Isaías noseñeái ambue profétare ha heʼi: “Emañami! Napépe oĩ péva, emondóna chupe” (Isa. 6:8).

⁹ Jesús katu omoĩ pe ehémplo iporãvéva ohejávo pe espíritu sánto oisãmbyhy chupe, haʼe vyʼapópe ou omano ñanderehehápe (Juan 3:16). Upévare iporã pe jaiko lájare jahechauka ñamombaʼeha Jesús mborayhu, ha pe sakrifísio ojapovaʼekue. Peteĩ ansiáno katupyry omombeʼu mbaʼépa oñandu iñermanokuérare: “Cherehe opokoiterei Jesús heʼivaʼekue Pédrope: ‘Eñangareko che ovecha mimi rehe’. Hetaiterei vésema ahecha ikatuha ñamokyreʼỹ ñande rapichápe peteĩ ñeʼẽ mbykymi rupive, térã oimeraẽ mbaʼe porã michĩmíva jepe jajapóramo hese. Añetehápe avyʼa añangarekóvo che ermanokuérare” (Juan 21:16).

10. Mbaʼépa nemomýita reñangarekose hag̃ua ermanokuérare?

¹⁰ Umi kuimbaʼe ojevautisámava otrata porã vaʼerã ermanokuérape Jesús ojapo haguéicha. Haʼe heʼivaʼekue: ‘Che pomombytuʼúta’ (Mat. 11:28, NM). Reñangarekose hag̃ua ermanokuérare, rehayhuvaʼerã chupekuéra ha rejeroviavaʼerã Jehováre. Péicha nerepensamoʼãi upe tembiapo ipohyietereiha. Péro mbaʼépa oikóta peteĩ ermáno naikyreʼỹiramo oporoservi hag̃ua? Mbaʼépa omokyreʼỹta chupe?

Mbaʼépa nemokyreʼỹta

11. Mbaʼépa ñanemokyreʼỹta jaservise hag̃ua ermanokuérape?

¹¹ Ndépa ere ndaikatumoʼãiha rejapo porã umi tembiapo kongregasionpegua? Oimérõ repensa upéicha, rejerurevaʼerã Jehovápe ijespíritu sánto nepytyvõ hag̃ua (Luc. 11:13). Añetehápe Jehová hína pe ñanemokyreʼỹva jaservise hag̃ua ñane ermanokuérape, ha upearã omeʼẽ ñandéve espíritu sánto (Fili. 2:13; 4:13). Upévare jajerurevaʼerã katuete Jehovápe tañanepytyvõ ñambaʼapo kyreʼỹ hag̃ua kongregasiónpe (jaleemína Salmo 25:4, 5).

12. Mávapa ñanemoarandúta ñañangareko porã hag̃ua ermanokuérare?

¹² Oĩ ermáno opensáva ipohýi ha ijetuʼuetereiha ñañatende hag̃ua kongregasiónre, térã oimoʼã ndaikatupyryiha ojapo hag̃ua upe tembiapo. Oimérõ upéicha, tuicha oipytyvõta chupe ostudia meméramo la Biblia ha umi puvlikasionkuéra. Iporãta avei oñeporandúramo: “Amboyképa tiémpo astudia hag̃ua Ñandejára Ñeʼẽ ha ajerurépa Jehovápe chemoarandu hag̃ua?”. Santiago ohaivaʼekue: ‘Oiméramo peteĩ naiñarandupáiva, tojerure Ñandejárape; Haʼe ningo ipojera opavavéndi, ohekyiʼỹ rehe mbaʼeve. Oiméramo ojeruréva arandu, Ñandejára omeʼẽta chupe’ (Sant. 1:5, BNP). Ndépa reguerovia ko promésa? Ñanemanduʼami Salomón rehe, haʼe ojerure Jehovápe ‘katupyry ha arandu’, ha upéva oipytyvõ chupe  odesidi porã hag̃ua ohusgárõ guare umi héntepe (1 Rey. 3:7-14). Péva ndeʼiséi entéro ñanearandutaha Salomón iñarandu haguéicha. Péro jajeroviakuaa Jehová omeʼẽtaha ñandéve pe arandu ñaikotevẽva ñañangareko hag̃ua hembiguaikuérare (Pro. 2:6).

13, 14. a) Mbaʼéichapa Cristo mborayhu omokyreʼỹ Páblope? b) Mbaʼéichapa ‘Cristo mborayhu ñanemokyreʼỹ’?

¹³ Jajepyʼamongetárõ Jehová ha Jesús ojapovaʼekuére ñanderehehápe, ñanekyreʼỹvéta avei ñambaʼapo hag̃ua kongregasiónpe. Jahechami mbaʼépa heʼi 2 Corintios 5:14, 15 (jaleemína). Mbaʼérepa jaʼekuaa ‘Cristo mborayhu ñanemokyreʼỹha’? Jesús oporohayhu ha upévare iñeʼẽrendu Itúvape ha omano ñanderayhupápe. Jahechávo upéva ñandepyʼarory ha jajapose oimeraẽ mbaʼe hesehápe. Pór ehémplo, apóstol Pablo ohejavaʼekue Cristo mborayhu oisãmbyhy hekove. Upévare haʼe nopensái ijehénte, omotenonde Jehová servísio ha ojepyʼapy hapichakuérare tahaʼe kongregasiónpe térã okapeguáre.

¹⁴ Javyʼaiterei ñapensávo mbaʼeichaitépa Jesús ohayhuvaʼekue hapichakuérape. Upéva ohechauka ndovaleiha jaheja ‘ñande rete rembipota ipuʼaka ñanderehe’, ha jaiko jaheka ñandéve ñandegustávante. Iporãve guei ñamotenonde pe tembiapo Ñandejára omeʼẽva ñandéve. Jahayhúgui ñane ermanokuérape jaservise chupekuéra ‘tembiguáiramo’ (jaleemína Gálatas 5:13). Upéicha ndajaikomoʼãi jakopi ha jataky hesekuéra Satanás ojapoháicha (Rev. 12:10). Ñapensáta ñande tembiguaiminteha ha ñamombaʼéta ñane ermanokuérape.

Nde rogaygua nepytyvõvaʼerã

15, 16. Peteĩ kuimbaʼe oservi hag̃ua siérvo ministeriál térã ansiánoramo, mbaʼéichapa oĩvaʼerã hogapy?

¹⁵ Peteĩ ermáno oservi hag̃ua siérvo ministeriál térã ansiánoramo, ojehecha raẽ mbaʼéichapa ojeporta hembireko ha ifamiliakuéra. Ojeporavo hag̃ua chupe, tekotevẽ ifamília ojerovia mbarete ha herakuã porã. Péva ohechauka enterove pe ogapýpe oipytyvõvaʼerãha pe túva ombaʼapo hag̃ua siérvo ministeriál térã ansiánoramo (jaleemína 1 Timoteo 3:4, 5, 12).

¹⁶ Jehová oipota enterove oñopytyvõ pe ogapýpe (Efe. 3:14, 15). Umi kuimbaʼe ojapovaʼerã hembiapo kongregasiónpe ha avei ‘omoakã porã vaʼerã hogapy’. Umi ansiáno ha siérvo ministeriál káda semána ojapovaʼerã katuete peteĩ aty ostudia hag̃ua hembireko ha ifamiliakuérandi. Tekotevẽ avei osẽ opredika hendivekuéra. Iporãta pe sy ha umi mitãnguéra oñehaʼãramo oipytyvõ pe túvape.

Ikatúnepa reservi jey yma guaréicha?

17, 18. a) Mbaʼépa tekotevẽ ojapo peteĩ ermáno ojepeʼárõ chugui pe tembiapo ojapovaʼekue kongregasiónpe? b) Mbaʼépa ikatu gueteri ojapo peteĩ ermáno ndahaʼevéimava siérvo ministeriál térã ansiáno?

¹⁷ Oĩ ermáno oservivaʼekue siérvo térã ansiánoramo ha upéi ojepeʼa chugui upe tembiapo. Oimérõ upéicha nde kásope, katuete rehayhu gueteri Jehovápe ha haʼe nderayhu avei (1 Ped. 5:6, 7). Péro oiméne ojeʼéraʼe ndéve mbaʼépepa rekambiavaʼerã. Upéicharamo rehechakuaavaʼerã rejavy hague ha ejerure Jehovápe nepytyvõ hag̃ua. Ani repyta reñamarga. Upéva rangue nearandu ha nekyreʼỹvaʼerã. Peteĩ ermáno ansiáno vaʼekue heta  áñore ha upéi ndahaʼevéi; haʼe omombeʼu mbaʼépa ojapo ikyreʼỹ jey hag̃ua: “Aha meme rreunionhápe, apredika ha alee la Biblia ajapo haguéicha aservírõ guare ansiánoramo. Che aimoʼã 1 térã 2 áñope oiko jeýtama chehegui ansiáno, péro 7 áño rupi ahaʼarõ upearã. Péva chemboʼe tekotevẽha ahaʼarõkuaa. Upe tiémpope heta ermáno chemokyreʼỹ añehaʼã meme hag̃ua”.

¹⁸ Oiméramo rehasa ko mbaʼére, aníkena nekangy. Nemanduʼáke Jehová ohovasaha nde rogapy ha ne predikasión. Heta mbaʼe ikatu rejapo: eñehaʼã emombarete ne família jerovia, eho eñandu umi hasývape ha emokyreʼỹ ikangývape. Ani nderesarái tuichaiterei mbaʼeha ñamoherakuã pe marandu porã. Ñande hína testígo de Jehová ha ñamombaʼeguasu chupe * (Sal. 145:1, 2; Isa. 43:10-12).

Mbaʼépa rejapóta koʼág̃a?

19, 20. a) Mbaʼépa iporã oñeporandu entéro ermanokuéra? b) Mbaʼépa jahecháta pe artíkulo oúvape?

¹⁹ Ko tiémpope oñekotevẽterei hetave siérvo ministeriál ha ansiáno. Upévare ermanokuéra, pemañami pendejehe ha peñeporandu: “Mbaʼérepa ndoikói gueteri chehegui siérvo ministeriál térã ansiáno?”. Pejerurékena Jehovápe ijespíritu sánto. Upéva penepytyvõta pehechakuaa hag̃ua mbaʼépa tekotevẽ pejapo porãve.

²⁰ Enterove ñaiméva kongregasiónpe ñamombaʼeterei ñane ermanokuéra ojapóva. Jahecha haguéicha, ñanembaʼeporãramo ha vyʼapópe jaservi ñande rapichápe, jaheja espíritu sánto ñanesãmbyhy. Péro ñañatendevaʼerã ani hag̃ua jajapo mbaʼeve oñemoĩva Ñandejára espíritu sántore. Pe artíkulo oúva omyesakãta upéva.

[Nóta]

Nemanduʼápa?

• Mbaʼépa oñepromete Miqueas 5:5-pe?

• Mbaʼéichapa jahechauka ñamotenondeha ñande rapicha oikotevẽva?

• Mbaʼépa ñanemokyreʼỹta jaservise hag̃ua ermanokuérape?

• Mbaʼéichapa hogaygua ikatu oipytyvõ pe túvape oservi hag̃ua siérvo ministeriál térã ansiánoramo?

[Porandu ñahesaʼỹijóva]

[Nóta oĩva taʼanga ndive páhina 25]

Mbaʼéichapa jahechauka ñambaʼaposeveha Jehová servísiope?