Pe espíritu oipyguara umi mbaʼe hypyʼũva oĩva la Bíbliape

‘Pe espíritu sánto oipyguara opa mbaʼe, umi mbaʼe hypyʼũva Ñandejára rehegua jepe.’ (1 COR. 2:10)

1. Heʼiháicha 1 Corintios 2:10, mbaʼépa ojapo pe espíritu sánto? Mbaʼépa ñahesaʼỹijóta koʼág̃a?

 JAVYʼAITE ningo pe espíritu sánto ojapo haguére heta mbaʼe! La Biblia heʼi haʼeha peteĩ jopói oúva Ñandejáragui. Pe espíritu haʼe avei peteĩ pytyvõhára, oikuaauka ñandéve heta mbaʼe ha ombaʼejerure Jehovápe ñanderehehápe (Juan 14:16; Hech. 2:38; Rom. 8:16, 26, 27). Péro apóstol Pablo heʼi ojapoha ambue mbaʼe iñimportánteva: ‘Pe espíritu sánto oipyguara opa mbaʼe, umi mbaʼe hypyʼũva Ñandejára rehegua jepe’ (1 Cor. 2:10). Jehová oiporu ijespíritu omyesakã hag̃ua umi mbaʼe hypyʼũva oĩva Iñeʼẽme, ndaikatumoʼãiva ñantende porã ñandejeheguínte (jaleemína 1 Corintios 2:9-12). Ñahesaʼỹijomi koʼã porandu: Mbaʼéichapa pe espíritu sánto oipyguara umi mbaʼe hypyʼũva oĩva Ñandejára Ñeʼẽme? Síglo primérope, mávarepa ojevale Jehová omyesakã hag̃ua Iñeʼẽ? Koʼág̃a rupi, mbaʼéichapa pe espíritu ohesaʼỹijo umi mbaʼe hypyʼũva oĩva la Bíbliape? Ha mávarepa ojevale omyesakã hag̃ua?

2. Mbaʼéichapa pe espíritu sánto oipytyvõta kristianokuérape?

² Jesús heʼivaʼekue hemimboʼekuérape pe espíritu sánto ojapotaha mokõi mbaʼe. Haʼe opromete: ‘Pe pytyvõhára, pe espíritu sánto, Ñandejára omboútava pene rendápe che rérape, haʼe penemboʼéta opaite mbaʼe, ha penemomanduʼáta opa mbaʼe haʼemavaʼekue peẽme’ (Juan 14:26, ÑÑB). Primero, pe espíritu sánto omboʼéta umi kristiánope ha omyesakãta chupekuéra umi mbaʼe nontendéiva. Segundo katu oipytyvõta chupekuéra  imanduʼa hag̃ua Jesús omboʼevaʼekuére. Péicha ojapóta hikuái opa mbaʼe hekoitépe.

Síglo primérope

3. Mbaʼéichapa Jesús ohechauka saʼi saʼípe oñemyesakãtaha umi mbaʼe hypyʼũva?

³ Oĩrõ guare ko yvy ape ári, Jesús omboʼe hemimboʼekuérape heta mbaʼe ipyahúva. Péro oĩ gueteri heta mbaʼe haʼekuéra ndoikuaáiva. Upévare Jesús heʼi: ‘Heta mbaʼe gueteri areko haʼevaʼerã peẽme, koʼág̃ante ndaikatumoʼãi pegueropuʼaka. Opáichavo, og̃uahẽtahína pe ára pe espíritu añeteguáva oikuaauka hag̃ua peẽme pe añetegua’ (Juan 16:12, 13). Heʼiháicha Jesús koʼápe, pe espíritu rupive oñemyesakãta saʼi saʼípe umi mbaʼe hypyʼũva oĩva Ñandejára Ñeʼẽme.

4. Mbaʼéichapa pe espíritu sánto oipytyvõ umi kristiánope ontende hag̃ua pe oikovaʼekue Pentecostéspe?

⁴ Pentecostés áño 33-pe ijaty Jerusalénpe 120 kristiáno rupi. Upérõ Jehová omeʼẽ chupekuéra “pe espíritu añeteguáva”. Upe jave oiko avei heta milágro, pór ehémplo, umi kristiáno oñepyrũ oñeʼẽ heta idiómape ha omombeʼu ‘umi mbaʼe guasuete Ñandejára ojapovaʼekue’ (Hech. 1:4, 5, 15; 2:1-11). Heta áño upe mboyve proféta Joel heʼimavaʼekue Jehová omeʼẽtaha espíritu sánto isiervokuérape (Joel 2:28-32). Ha Pentecostés árape opavavénte ohecha mbaʼéichapa oñekumpli ko profesía avave oimoʼãʼỹ haguéicha. Upémarõ apóstol Pedro omyesakã umi héntepe mbaʼépa heʼise pe oikóva (jaleemína Hechos 2:14-18). Mbaʼéicha rupípa Pedro ikatu ojapo upéva? Pe espíritu sánto omboʼe ha oipytyvõ rupi chupe. Upévare haʼe ohechakuaa mbaʼéichapa oñekumpli Joel heʼivaʼekue, ha avei imanduʼa mokõi salmo David ohaivaʼekuére (Sal. 16:8-11; 110:1; Hech. 2:25-28, 34, 35). Jaʼekuaa upe árape umi hénte ohecha ha ohendu hague heta mbaʼe hypyʼũva oúva Ñandejáragui.

5, 6. a) Mbaʼe mbaʼépa tekotevẽraʼe oñembohovái Pentecostés rire? b) Máva mávapa ohesaʼỹijo umi porandu, ha mbaʼépa ojapo hikuái og̃uahẽ hag̃ua peteĩ ñeʼẽme?

⁵ Upéicharõ jepe oĩ gueteri heta mbaʼe umi kristiáno nontendeporãiva. Pentecostés áño 33 guive, oike hikuái peteĩ kompromíso pyahúpe ha umi kristiáno ndoikuaaporãi gueteri mbaʼe mbaʼépa ojejapovaʼerã. Ndoikuaái hikuái oikétapa pe kompromísope umi hudiokueténte, térãpa avei umi ndahaʼéiva hudío. Ojeporavótapa avei umi tetã ambueguápe espíritu sánto rupive? (Hech. 10:45.) Tekotevẽtapa umi kuimbaʼe oñesirkunsida ha okumpli Moisés Léipe oĩva? (Hech. 15:1, 5.) Koʼã mbaʼe ningo iñimportánte ha hypyʼũ, upévare oñehesaʼỹijo porã vaʼerã. Ha upearã umi kristiáno oikotevẽ pe espíritu sántore. Péro mávarepa ojevale Jehová ojapo hag̃ua upéva?

⁶ Jehová ojevale umi ermáno omotenondévare kongregasión. Haʼekuéra ohesaʼỹijo porã koʼã porandu iñimportánteva. Upéi Pablo, Bernabé ha Pedro oñembyaty pe Cuerpo Gobernántendi. Upépe koʼã mbohapy kristiáno omoĩ heta ehémplo ohechaukáva Jehová oiporavoha avei umi ndahaʼéivape hudío (Hech. 15:7-12). Pe espíritu sánto oipytyvõ pe Cuerpo Gobernántepe ohecha hag̃ua mbaʼépa heʼi Escrituras Hebreas upe téma rehe. Ha og̃uahẽ rire peteĩ ñeʼẽme oguerahauka hikuái kárta umi kongregasiónpe opavave oikuaa hag̃ua mbaʼépa ojedesidíraʼe (jaleemína Hechos 15:25-30 ha 16:4, 5; Efe. 3:5, 6).

7. Mbaʼe rupivépa oñemyesakã avei umi mbaʼe hypyʼũva?

⁷ Upe rire Juan, Pedro, Santiago ha Pablo ohai ikuatiañeʼẽ, ha umíva rupive oñemyesakãve ohóvo heta mbaʼe hypyʼũva. Ojehaipa rire Escrituras Griegas ndaiporivéima ermáno oprofetisáva térã ojapóva milágro (1 Cor. 13:8). Péro mbaʼépa ojapovéta pe espíritu sánto? Omboʼétapa umi kristiánope  ha oipytyvõtapa chupekuéra imanduʼa hag̃ua umi mbaʼe oaprendevaʼekuére? Omyesakãvétapa chupekuéra umi mbaʼe hypyʼũva oúva Ñandejáragui? Umi profesía heʼi upeichataha.

Ára pahápe

8, 9. Máva mávapa umi omimbítava ha ontende porãtava Ñandejára Ñeʼẽ ára pahápe?

⁸ Peteĩ ánhel heʼivaʼekue mbaʼépa oikóta ára pahápe: ‘Umi kuimbaʼe arandu omimbíta pe yvágaicha; ha umi oipytyvõva hapichápe ojuhu hag̃ua pe hustísia omimbivaʼerã tapia g̃uarã ku mbyjáicha. Ha pe añetegua oñemyesakãvéta ohóvo’ (Dan. 12:3, 4, ÑÑB). Mávapa koʼã kuimbaʼe iñarandúva, omimbítava mbyjáicha ha ontende porãtava Ñandejára Ñeʼẽ? Jesús omyesakã ñandéve oñeʼẽrõ guare ‘ko múndo ára paháre’. Haʼe heʼi: ‘Upérõ umi hekojojáva kuarahýicha omimbíta Itúva yvagapegua rréinope’ (Mat. 13:39, 43, NM). Upéi Jesús heʼi ‘umi hekojojáva’ haʼeha ‘pe rréino yvagapegua ñemoñare’. Koʼãva hína umi kristiáno ohótava yvágape, térã unhído (Mat. 13:38, NM).

⁹ Omimbítapa opavave umi unhído, heʼiháicha koʼã profesía? Jaʼekuaa upeichataha. Mbaʼérepa? Entéro kristiáno ningo osẽvaʼerã  opredika, oipytyvõ hapichápe oiko hag̃ua chugui Jesús remimboʼe ha ohovaʼerã rreunionhápe oñomokyreʼỹ hag̃ua. Ha umi unhído, ehémplo vaʼerã opavave ermánope g̃uarã (Zac. 8:23). Péro ára pahápe oikovaʼerã avei ambue mbaʼe: oñemyesakãvétama umi mbaʼe hypyʼũva oĩva la Bíbliape. Pór ehémplo, ojekuaátama mbaʼépa heʼise umi profesía ohaivaʼekue Daniel (Dan. 12:9). Ha koʼág̃a rupi, mbaʼéichapa pe espíritu ohesaʼỹijo umi mbaʼe hypyʼũva? Ha mávarepa ojevale Ñandejára omyesakã hag̃ua?

10. a) Máva rupivépa oñemyesakã umi mbaʼe hypyʼũva ko tiémpope? b) Mbaʼéichapa oñemyesakã mbaʼépa heʼise pe témplo espirituál?

¹⁰ Ko tiémpope tekotevẽ jave oñemyesakã peteĩ mbaʼe hypyʼũva, pe espíritu sánto oipytyvõ umi ermáno unhídope ombaʼapóva pe ofisína sentrálpe ontende hag̃ua. Haʼekuéra orrepresenta pe ‘tembiguái jeroviaha ha iñarandúvape’ (Mat. 24:45; 1 Cor. 2:13). Upéi pe Cuerpo Gobernante ohesaʼỹijo umi mbaʼe noñentendeporãiva (Hech. 15:6). Ha umi puvlikasión rupive oikuaauka umi mbaʼe pyahu (Mat. 10:27). Sapyʼánte tekotevẽ oñemyesakã jey peteĩ mbaʼe osẽmavaʼekue ymave, ha haʼekuéra naiprovlémai okorrehi hag̃ua (ehecha pe rrekuádro “Pe espíritu omyesakã mbaʼépa pe témplo espirituál”).

Mbaʼéichapa pe espíritu ñanepytyvõ koʼág̃a rupi

11. Mbaʼérepa ou porã entéro kristiánope pe espíritu sánto ojapóva?

¹¹ Pe espíritu sánto omyesakã umi mbaʼe hypyʼũva oĩva la Bíbliape, ha péva ou porã entéro kristiánope. Mbaʼérepa? Oiko haguéicha primer síglope, koʼág̃a ko espíritu ñanepytyvõ avei ñantende hag̃ua umi mbaʼe jastudiáva. Upéi ñanemomanduʼa ñaaprendevaʼekuére ha ñanepytyvõ jajapo hag̃ua (Luc. 12:11, 12). Natekotevẽi ñanearandueterei ñantende hag̃ua umi mbaʼe hypyʼũva oñehesaʼỹijóva umi puvlikasiónpe (Hech. 4:13). Péro mbaʼépa jajapovaʼerã hesakãve hag̃ua ñandéve? Jahechamína.

12. Mbaʼéicha javépa jajerurevaʼerã Jehovápe ijespíritu sánto?

¹² Jajerure Jehovápe ijespíritu sánto. Jastudiáta jave jajerurevaʼerã Jehovápe tañanepytyvõ ijespíritu rupive. Jastudiátaramo jepe ñaneaño téra sapyʼaitemínte, ñañemboʼevaʼerã katuete. Ñandejára oguerohoryeterei umichagua ñemboʼe. Jesús heʼivaʼekue Jehová omeʼẽtaha ñandéve ijespíritu jajerurérõ chupe ñande pyʼaite guive (Luc. 11:13).

13, 14. Mbaʼérepa iporã jastudia rreunionrã?

¹³ Jastudia rreunionrã. Pe tembiguái jeroviaha omeʼẽ ñandéve ñane ‘rembiʼurã hiʼoraitépe’. Upearã oiporu umi puvlikasión, rreunión ha aty guasu. Heʼíramo ñandéve ñahesaʼỹijo hag̃ua peteĩ mbaʼe, katuete hína ñaikotevẽguinte (1 Ped. 2:17; Col. 4:16; Jud. 3). Ñañehaʼãramo jajapo pe tembiguái heʼíva, jahejañaína espíritu sánto ñanesãmbyhy (Rev. 2:29).

¹⁴ Jastudia jave rreunionrã iporãta jahekáramo umi téysto ha ñañehaʼã ñantende  mbaʼérepa oñemoĩ pe artíkulope. Péicha hesakã porãvéta ñandéve la Biblia heʼíva (Hech. 17:11, 12). Jahekáramo umi téysto ñande Bíbliape, opyta porãvéta ñane akãme. Upéi pe espíritu sánto ñanepytyvõta ñanemanduʼa hag̃ua mbaʼépa heʼi, ha avei jatopa pyaʼevéta.

15. Mbaʼérepa jaleepavaʼerã umi informasión osẽ pyahúva, ha mbaʼéichapa ikatu jajapo upéva?

¹⁵ Jalee entéro puvlikasión osẽ pyahúva. Entéro lívro ha rrevísta ojeprepara ñanepytyvõ hag̃ua. Umi rrevísta ojejapóva ñaikuaveʼẽ hag̃ua predikasiónpe jepe ojehai ñandéve g̃uarã. Ñanerembiapoitereírõ jepe sapyʼánte ija porã ñandéve jaleeʼimi hag̃ua, pór ehémplo, ñahaʼarõ jave oñeñatende ñanderehe doktórpe, japaga hag̃ua peteĩ mbaʼe, térã javiahakuévo. Oĩ ermáno ohendúva umi gravasión osẽ jave oguata térã omanehávo imbaʼyru. Ñanemanduʼáke koʼã informasión ojeprepara porãitereiha oipytyvõ hag̃uáicha opaichagua tapichápe, enterovéva omombaʼe ha oguerohory hag̃ua la Biblia (Hab. 2:2).

16. Mbaʼérepa iporã ñaanota ha upéi jahekave informasión?

¹⁶ Jajepyʼamongeta. Jalee rire la Biblia ha umi puvlikasión iporã jajepyʼamongeta hese. Jaleekuévo oĩta katuete heta mbaʼe jaikuaasevéva. Ñaanotákena umíva ha upéi jahekave informasión. Jatopa jave peteĩ mbaʼe ñaneinteresáva katuete jaikuaasevéta ha jastudia porãvéta. Jajapóramo péicha, jaikuaavéta heta mbaʼe la Bíbliagui. Haʼete voi ñambyatýva ‘mbaʼerepy’, ikatútava upéi jaiporu ñaikotevẽ jave (Mat. 13:52).

17. Arakaʼépa remboyke tiémpo restudia hag̃ua nde rogayguándi térã neañohápe?

¹⁷ Jajapo Aty Jastudia Hag̃ua Ñande Rogayguándi. Pe Cuerpo Gobernante ñanemokyreʼỹ ñamboyke hag̃ua tiémpo káda semána jastudia hag̃ua ñande rogayguándi térã ñaneañohápe. Upévare koʼág̃a 2 díantema ñane rreunión, ikatu hag̃uáicha hemby ñandéve un día jastudia hag̃ua. Mbaʼépa ikatu ñahesaʼỹijo? Oĩ oleéva la Biblia, ohesaʼỹijóva umi versíkulo ointeresavéva chupe, ha ohai ibíbliare umi mbaʼe iñimportantevéva. Heta ógape pe família ostudia ha ohecha mbaʼéichapa ikatu ojapo umi mbaʼe oaprendéva. Oĩ katu túva oiporavóva informasión umi hogaygua oikotevẽva térã ogustáva chupekuéra. Ha péicha mbeguekatúpe jatopáta hetave mbaʼe jastudia hag̃ua. *

18. Mbaʼérepa ndajakyhyjeivaʼerã jastudia hag̃ua umi mbaʼe hypyʼũva oĩva la Bíbliape?

¹⁸ Jesús heʼivaʼekue pe espíritu sánto ñanepytyvõtaha, upévare ndajakyhyjeivaʼerã jastudia hag̃ua umi mbaʼe hypyʼũva oĩva la Bíbliape. Umíva ningo ou Jehovágui ha haʼe oipota ñahesaʼỹijo (jaleemína Proverbios 2:1-5). Koʼã informasión hypyʼũva rupive Ñandejára omyesakã heta mbaʼe ‘haʼe opreparavaʼekue umi chupe ohayhúvape g̃uarã’. Upévare ñañehaʼãkena jaikuaa porãve Iñeʼẽ. Pe espíritu sánto, ‘oipyguaráva opa mbaʼe, umi mbaʼe hypyʼũva Ñandejára rehegua jepe’, katuete ñanepytyvõta upearã (1 Cor. 2:9, 10).

[Nóta]

Mbaʼépa rembohováita?

• Jesús heʼi haguéicha, mbaʼéichapa pe espíritu sánto ñanepytyvõ ñahesaʼỹijo hag̃ua umi mbaʼe hypyʼũva oĩva la Bíbliape?

• Máva rupivépa pe espíritu omyesakã umi mbaʼe hypyʼũva pe primer síglope?

• Mbaʼéichapa pe espíritu omyesakã koʼág̃a umi mbaʼe hypyʼũva oĩva la Bíbliape?

• Mbaʼépa jajapovaʼerã ideprovechove hag̃ua ñandéve umi mbaʼe omyesakãva pe espíritu sánto?

[Porandu ñahesaʼỹijóva]

[Rrekuádro oĩva páhina 22-pe]

Pe espíritu omyesakã mbaʼépa pe témplo espirituál

Primer síglope hesakã heta ‘mbaʼe hypyʼũva Ñandejára rehegua’. Pór ehémplo, ojehechakuaa pe tavernákulo ha umi ótro témplo oĩvaʼekue Jerusalénpe orrepresenta hague peteĩ mbaʼe tuichavéva. Upévape Pablo ohenói ‘tavernákulo añeteguáva, Ñandejára ojapovaʼekue, ndahaʼéi yvypóra rembiapokue’ (Heb. 8:2, BNP). Kóva haʼe peteĩ témplo espirituál orrepresentáva opa mbaʼe Jehová omeʼẽva ñandéve ñañemoag̃ui hag̃ua hese. Upéva ikatu jajapo Jesús omano rupi ñanderehehápe, ha oiko chugui saserdóte yvágape.

Pe ‘tavernákulo añeteguáva’ oñepyrũ áño 29-pe Jesús ojevautisárõ guare. Upérõ Jehová heʼi oguerohoryha itaʼýra ojapóva (Heb. 10:5-10). Jesús omano ha oikove jey rire oho pe Lugár Imarangatuvévape, yvágape. Upépe omeʼẽ isakrifísio repykue “Ñandejára renondépe” (Heb. 9:11, 12, 24, BNP).

Ohaírõ guare ikárta umi Efesoyguápe, Pablo heʼi umi unhídore ‘opuʼãha ohóvo oiko peve chuguikuéra peteĩ témplo marangatu oñemboykéva Ñandejárape g̃uarã’ (Efe. 2:20-22). Ikatúpa jaʼe peteĩnteha ko ‘témplo marangatu’ ha pe ‘tavernákulo añeteguáva’ oĩva Hebréospe? Heta tiémpore testigos de Jehová oimoʼã upeichaha. Haʼekuéra heʼi umi unhído ojepreparaha ko yvy ape ári, upéi omano rire oiko hag̃ua chuguikuéra “ita” Jehová témplope g̃uarã amo yvágape (1 Ped. 2:5).

Péro áño 1971 rupi pe “tembiguái jeroviaha” ohechakuaa ohóvo pe témplo oñeñeʼẽha Efésiospe ndahaʼeiha pe ‘tavernákulo añeteguáva’, térã témplo espirituál. Mbaʼérepa? Pablo heʼivaʼekue: ‘Umi mbaʼe niko mbojojaha ko ára kóvape g̃uarã’ (Heb. 9:9, BNP). Upéicharõ ikatu jaʼe pe ‘tavernákulo añeteguáva’ ndahaʼeiha umi unhído oikove jey vaʼekue. Mbaʼérepa? Chupekuéra oñemoingove jey ára paha oñepyrũ rire ae (1 Tes. 4:15-17).

Pe tembiguái jeroviaha ohesaʼỹijo koʼãva ha ambue téysto, ha ohechakuaa pe témplo espirituál noñemopuʼãiha koʼág̃a. Avei ontende hikuái umi unhído noĩriha ko yvy ape ári omopyenda hag̃ua Jehová témplo. Haʼekuéra oservi pe Lugár Marangatu ha pe témplo espirituál korapýpe, ha upépe ára ha ára omombaʼeguasu Jehovápe (Heb. 13:15).

[Nóta oĩva taʼanga ndive páhina 23]

Mbaʼéichapa ikatu ñantende porãve umi mbaʼe hypyʼũva oĩva la Bíbliape?