Jesús ohechauka porãiterei Jehová hekojojaha

‘Ñandejára omeʼẽvaʼekue Crístope oipeʼa hag̃ua ñande pekádo jajerovia rupi huguýre. Upéicha oiko ojehechauka hag̃ua Ñandejára hekojojaha.’ (ROM. 3:25)

1, 2. a) Heʼiháicha la Biblia, mbaʼérepa yvyporakuéra ohasa asy? b) Mbaʼe mbaʼépa ñambohováita ko artíkulope?

 MAYMÁVA jaikuaa Adán ha Eva opuʼã hague Jehováre hardín de Edénpe. Ikausakuérare enterove jahasa asy. La Biblia heʼi: “Pe pekádo oike haguéicha yvy ári peteĩ kuimbaʼe rupi, ha pekádo rupi oike pe ñemano, upéicha avei pe ñemano ohasa opavavépe opavave opekágui” (Rom. 5:12, BNP). Ñañehaʼãmbaitéramo jepe jajapo hendaitépe opa mbaʼe, pyʼỹi jajavy, ha upévare jajeruremantevaʼerã Jehovápe tañaneperdona. Apóstol Pablo jepe heʼivaʼekue ñembyasýpe: “Pe iporãva ajaposéva ndajapói, pe ivaíva ajaposeʼỹva [katu] ajapo. [...] Aichejáranga che” (Rom. 7:19, 24, JMP).

² Ñahesaʼỹijóvo ko artíkulo ñambohováita koʼã porandu: Opavave yvypóra ningo iñimperfékto, mbaʼéicha piko upéicharõ Jesús onaserakaʼe perfékto? Maʼerãpa ojevautisa? Mbaʼéichapa Jesús ohechauka Jehová hekojojaha? Ha iñimportantevéva: Mbaʼépa ojehupyty Jesús omano rupi?

Ojeʼe Ñandejárare ndahekojojaiha

3. Mbaʼéichapa Satanás ombotavy Évape?

³ Ñembotavýgui ñande ru ha ñande sy ypykue omboyke Ñandejára sãmbyhy ha oñemoĩ “upe mbói ymaite guare hérava aña ha Satanás” poguýpe (Rev. 12:9, BNP). Mbaʼépa oiko upérõ? Satanás omoĩ vaise Jehovápe, upémarõ oporandu Évape añetehápepa Ñandejára heʼíraʼe chupekuéra ndovaleiha hoʼu “mbaʼeveichagua yva” oĩva pe hardínpe. Eva heʼi chupe peteĩ yvánte ndovaleiha hoʼu, ni opoko hese, ha ojapóramo hikuái upéva omanotaha. Upepete Satanás osẽ heʼi chupe: “Napemanomoʼãi”. Haʼe ombotavy Évape ogueroviaukávo chupe Jehová ijapuha ha nomeʼẽseiha chupekuéra peteĩ mbaʼe iporãva. Avei heʼi hoʼúramo hikuái pe yva oikotaha Ñandejáraicha ha odesidíta ijeheguíntema mbaʼépa iporã ha mbaʼépa ivai. Péicha Satanás heʼi Jehová noisãmbyhyiha tekojojápe (Gén. 3:1-5).

4. Mbaʼérepa opavave yvypóra opyta Satanás poguýpe?

⁴ Pe Aña ruvicha heʼi yvyporakuéra ovyʼavetaha omboykéramo Jehovápe. Añetehápe ningo Ñandejára oisãmbyhy tekojojápe, péro Adán odefende rangue chupe, ohendu hembirekópe ha hoʼu avei pe yva. Upévare ndopytaporãvéima Jehová renondépe ha oiko chugui pekadór. Adán káusare enterove jahasa asyeterei pekádo poguýpe ha ñamano. Ha upe guive opavave yvypóra opyta Satanás poguýpe. Haʼehína “ko múndo ruvicha” (2 Cor. 4:4, BNP, Rom. 7:14).

5. a) Mbaʼéichapa oñekumpli Jehová ñeʼẽ? b) Mbaʼe esperánsapa omeʼẽ Ñandejára Adán ha Eva familiakuérape?

⁵ Jehová heʼivaʼekue Adán ha Eva omanotaha, ha oñekumpli hag̃ua iñeʼẽ haʼekuéra omanomantevaʼerã (Gén. 3:16-19). Péro upéva ni mbaʼevéicharõ ndeʼiséi opyta reitaha Ñandejára rembipota. Ñande Apohare heʼívo mbaʼe kastígopa ohupytýta Adán ha  Évape, omeʼẽ avei peteĩ esperánsa iporãva ifamiliakuérape g̃uarã. Omombeʼu omopuʼãtaha peteĩ ñemoñare omyatyrõtava opa mbaʼe vai. Satanás oisuʼúta chupe ipytápe, péro upéi ko ñemoñare okueráta ha haʼeháma omyanguʼíta Satanás akã (Gén. 3:15). La Biblia ohechauka upe ñemoñare haʼeha Jesucristo heʼívo: “Ñandejára Raʼy ouvaʼekue ombyai hag̃ua [...] pe aña rembiapokue” (1 Juan 3:8, BNP). Mbaʼéichapa Jesús ohechauka Jehová hekojojaha?

Maʼerãpa ojevautisa Jesús?

6. Mbaʼéichapa jaikuaa Jesús onase hague pekadoʼỹre?

⁶ Adán opeka mboyve perfékto vaʼekue, ha Ñandejára oipota Jesús ou ko yvy ape ári oiko hag̃ua chugui peteĩ kuimbaʼe perfékto ojoguáva Adánpe (Rom. 5:14; 1 Cor. 15:45). Péro upearã Jesús onasevaʼerã pekadoʼỹre. Mbaʼéichapa ikatu oiko upéva? Pe ánhel Gabriel omombeʼu porã Maríape: ‘Espíritu sánto oúta nde ári ha Ñandejára puʼaka nemoʼãta. Upévare ne memby imarangatúta ha oñehenóita chupe Ñandejára Raʼy’ (Luc. 1:35, NM). Jesús imitãrõ guare oiméne isy omombeʼúraʼe chupe mbaʼéichapa ou onase ko yvy ape ári. Upévare José ha María ojuhúrõ guare chupe pe témplope haʼe heʼi: ‘Ndapeikuaái piko aimevaʼerãha che Ru rógape?’ (Luc. 2:49, NM). Jesús michĩ guive oiméne oikuaámaraʼe haʼeha Ñandejára Raʼy. Upévare iñimportanteterei chupe g̃uarã ohechauka Ñandejára hekojojaha.

7. Mbaʼe mbaʼe iporãvapa orekorakaʼe Jesús?

⁷ Jesús oikuaasetereivaʼekue opa mbaʼe Ñandejára Ñeʼẽgui, upévare oho meme Ñandejára puévlo ijatyhápe. Iñakãporãiterei rupi haʼe oikumby hendaitépe umi mbaʼe ohendúva ha oleéva upépe (Luc. 4:16). Oreko avei ambue mbaʼe iporãitereíva: hete perfékto, ikatúva omeʼẽ yvyporakuéra rehehápe. Péicha oñekumpli Salmo 40:6-8-pe heʼíva. Oiméne Jesús imanduʼa ko sálmore oñemboʼévo Jehovápe ojevautisa jave (Luc. 3:21; jaleemína Hebreos 10:5-10). *

8. Mbaʼérepa Juan ndovautisaséi Jesúspe?

⁸ Jesús ohórõ guare Juan rendápe ojevautisa hag̃ua, haʼe ndovautisaséi chupe. Mbaʼérepa? Haʼe ovautisa umi oñembyasývape nokumpliporãi haguére Moisés Léi. Juan ha Jesús ningo oñoprímo,  upévare haʼe oikuaa Jesús ndojapoiha mbaʼeve ivaíva ha natekotevẽiha oñembyasy. Upéicharamo jepe Jesús heʼi chupe tekotevẽha ojevautisa. Haʼe heʼi: ‘Péichamante ikatúta jajapopa porã Ñandejára oipotáva’ (Mat. 3:15, NM).

9. Maʼerãpa ojevautisa Jesús?

⁹ Jesús oikuaáneraʼe iperfékto rupi ifamília ikatuha onase pekadoʼỹre. Upéicharamo jepe, haʼe ndohekái upéva oikuaágui Jehová nombouiha chupe upearã. Jesús ningo Mesías, pe Ñemoñare oñeprometevaʼekue, ha ojapo hag̃ua Ñandejára rembipota omeʼẽvaʼerã hekove perfékto (jaleemína Isaías 53:5, 6, 12). Iporã ñantende Jesús vautísmo ndahaʼeiha ñane vautísmoicha. Haʼe ndojevautisái oñemeʼẽ hag̃ua Jehovápe. Mbaʼérepa? Onaségui Israélpe ha upe tetã Ñandejára mbaʼéma voi. Upévare Jesús ojevautisávo oñepresenta Ñandejára renondépe ojapo hag̃ua hembipota, heʼiháicha umi profesía oñeʼẽva Mesías rehe.

10. Mbaʼe mbaʼépa ojapovaʼerã Jesús okumpli hag̃ua Jehová rembipota? Ha mbaʼéichapa oñeñandu Jesús ojapóvo upéva?

¹⁰ Okumpli hag̃ua Jehová rembipota, Jesús omombeʼuvaʼerã pe marandu porã, omboʼe umi héntepe ha ombokatupyry chupekuéra osegi hag̃ua opredika. Péro oñepresentávo Jehová renondépe, ohechauka avei ohejataha oñembohasa asy ha ojejuka chupe odefende hag̃ua Ñandejára Sãmbyhy. Jesús ningo ohayhueterei Itúvape, upévare vyʼapópe ojapo hembipota ha hekove jepe omeʼẽ ohechauka hag̃ua Jehová hekojojaha (Juan 14:31). Avei vyʼápe omeʼẽ Ñandejárape hekove repykue ñandepeʼa hag̃ua pekádo ha ñemano poguýgui. Mbaʼéichapa oñeñandúne Jehová ohechávo Itaʼýra ojevautisaha okumpli hag̃ua hembipota? Katuete ovyʼáneraʼe!

11. Mbaʼéichapa Jehová ohechauka oguerohoryha Jesúspe?

¹¹ La Bíbliape oĩ irundy kuatiañeʼẽ omombeʼúva Jesús rembiasakue, ha umíva heʼi Jehová oguerohory hague Itaʼýrape ojevautisa haguére. Juan Bautista omombeʼu mbaʼépa oiko upérõ: “Che ahechavaʼekue pe espíritu sánto oguejýramo yvágagui pykasúicha ha opyta hiʼári. [...] Che ahechavaʼekue, ha aikuaauka haʼeha [...] Ñandejára Raʼy” (Juan 1:32-34, BNP). Upe árape Jehová voi heʼivaʼekue: ‘Kóva hína che Raʼy ahayhuetéva ha aguerohorýva’ (Mat. 3:17; Mar. 1:11; Luc. 3:22, NM).

Iñeʼẽrendu omano meve

12. Mbaʼépa ojapo Jesús ojevautisa rire?

¹² Ojevautisa rire, 3 áño ha 6 mése aja Jesús oñeʼẽ meme umi héntepe Itúvare ha oikuaauka chupekuéra Jehová oisãmbyhyha tekojojápe. Oiméne ikaneʼõraʼe oviahávo mombyrymbyry yvýrupi, péro mbaʼeve ndojokói chupe opredika hag̃ua (Juan 4:6, 34; 18:37). Jesús oikuaauka meme Ñandejára rréino, péro avei omonguera hasývape, hetápe omongaru ha omanóva jepe omopuʼã jey. Koʼã milágro rupive ohechauka mbaʼépa ojapóta Ñandejára Sãmbyhy yvyporakuéra rehehápe (Mat. 11:4, 5).

13. Mbaʼépa heʼi Jesús jajerurevaʼerãha ñañemboʼe jave?

¹³ Jesús arakaʼeve noñembotuichái oporomboʼekuaa ha oporomonguera haguére. Upéva rangue oñemomirĩ ha omombaʼeguasu Jehovápe (Juan 5:19; 11:41-44). Omombeʼu avei mbaʼépa iñimportánte jajerure ñañemboʼe jave. Jajerurevaʼerã ‘toñemomarangatu’ Ñandejára réra, ha Irréino tomyengovia Satanás goviérno vaiete. Péicha ojejapóta Ñandejára rembipota  ‘yvy ape ári yvagapeguáicha’ (Mat. 6:9, 10, NM). Jesús heʼi hemimboʼekuérape tekotevẽha ‘omotenonde meme Ñandejára rréino ha hembipota’. Ojapóramo hikuái upéva ohechaukáta oikoseha Jehová sãmbyhy poguýpe (Mat. 6:33, NM).

14. Jesús perféktoramo jepe, mbaʼérepa ijetuʼu chupe okumpli Itúva rembipota?

¹⁴ Hiʼag̃uívo pe ára omano hag̃ua, Jesúspe ojopyve pe mbaʼe guasuete ojapovaʼerã. Ha upéichata voi ningo: haʼe oikuaa umi iñañáva ohusgataha chupe hekopeʼỹ, ha oñemboharaitaha hese omano meve. Ha haʼe ogueropuʼakavaʼerã upéva anive hag̃ua oñeñeʼẽ vai Itúvare, ha oñekumpli hag̃ua hembipota. Cinco día ojejuka mboyve Jesús oñemboʼe: ‘Koʼág̃a ajepyʼapyʼaína, ha mbaʼépa haʼéta? Haʼétapa: Che Ru, chesalvami? Kovarã voi che ajuvaʼekue’. Haʼe ningo yvypóra ha katuete oiméne oguapy hese pe oikótava. Péro opensa rangue ijehénte, Jesús ojesareko pe iñimportantevévare ha heʼi: ‘Che Ru, emombaʼeguasu nde réra’. Upepete Jehová ombohovái chupe: “Amombaʼeguasumavaʼekue, ha amombaʼeguasu jeýta” (Juan 12:27, 28, BNP). Upérõ Jesús ombohovaipotaite peteĩ mbaʼe ijetuʼuetereíva. Upévare Itúva oñeʼẽvo chupe yvágagui, haʼe opyta imbareteve ha oñandu ikatutaha omombaʼeguasu Jehovápe ha ohechauka haʼe ogoverna porãha. Ha añetehápe Jesús ojapo porãiterei upéva!

Mbaʼépa ojehupyty Jesús omano rupi?

15. Omano mboyvemi, mbaʼérepa Jesús heʼi: “Oikopaitéma”?

¹⁵ Osaingóvo pe yvyráre, Jesús omano mboyvemi heʼi: “Oikopaitéma” (Juan 19:30, JMP). Ñandejára puʼaka rupive ojapo hetaiterei techapyrã ha milágro, ojevautisa guive omano meve. Jesús omano riremínte oiko peteĩ yvyryrýi guasu ha peteĩ mburuvicha Roma ehersitopegua ohechávo upéva heʼi: ‘Añetehápe, kóva haʼéraʼe Ñandejára Raʼy’ (Mat. 27:54, NM). Oiméne ko mburuvicha heʼi upéicha ohechágui mbaʼéichapa oĩ heta oñembohorýva Jesús rehe heʼi haguére ijehe Ñandejára Raʼyha. Jesús heta ohasa asy, upéicharõ jepe iñeʼẽrendu Itúvape ipahaite peve, ha péicha ohechauka Satanás haʼeha peteĩ tekove japu ndovaléiva mbaʼeverã. Ñanemanduʼáke heta áño upe mboyve pe Aña ruvicha heʼi hague Ñandejára siervokuérare: “Yvypóra oĩ omeʼẽ hag̃uáicha oimeraẽ mbaʼe oikove hag̃ua rehehápe”(Job 2:4). Adán ha Eva ohasavaʼekue ndahaʼéi mbaʼevete ñambojojáramo Jesús ogueropuʼakavaʼekuére. Upévare iñeʼẽrendúvo omano meve Jesús ohechauka haʼekuéra ikatu hague iñeʼẽrendu avei Ñandejárape. Iporãveha katu, haʼe odefende Jehovápe ha ohechauka oisãmbyhyha tekojojápe (jaleemína Proverbios 27:11). Mbaʼépa ojehupytyve Jesús omano haguére?

16, 17. a) Jesús ou mboyve, mbaʼérepa umi yvypóra imperfékto ikatúraʼe oĩ porã Jehová renondépe? b) Mbaʼépa omeʼẽ Jehová Itaʼýrape? Ha maʼerãpa ñanepytyvõ Jesús?

¹⁶ Jesús ou mboyve ko yvy ape ári, oĩvaʼekue heta yvypóra hekopotĩva ha oĩ porãva Jehová renondépe. Haʼe oguerohory umívape, ha opromete omoingove jeytaha chupekuéra imúndo pyahúpe (Isa. 25:8; Dan. 12:13). Péro máva rupivépa Jehová omeʼẽta koʼã mbaʼe porãite umi yvypóra imperféktope? La Biblia heʼi: ‘Ñandejára omeʼẽvaʼekue Crístope oipeʼa hag̃ua ñande pekádo jajerovia rupi huguýre. Upéicha oiko ojehechauka  hag̃ua Ñandejára hekojojaha, oheja rei rupi pekadokuéra ymaguare. Ohechauka haʼe imarangatu ha hekojojaha, ha oguereko hekojojávaramo umi ojeroviáva Jesús rehe’ (Rom. 3:25, 26, BNP). *

¹⁷ Jehová omyengovia porã Itaʼýrape iñeʼẽrendu haguére. Omoingove jey ha omeʼẽ chupe tuicha puʼaka. Koʼág̃a Jesús oiko espírituicha yvágape ha nomanomoʼãvéima arakaʼeve (Heb. 1:3). Haʼe hína Saserdóte Guasu ha Rréi, ha oipytyvõ meme hemimboʼekuérape oikuaauka hag̃ua Jehová hekojojaha. Ajépa javyʼaite Ñandejára omeʼẽ haguére heta mbaʼe porã umi iñeʼẽrendu ha omombaʼeguasúvape chupe! (Jaleemína Salmo 34:3 ha Hebreos 11:6.)

18. Mbaʼépa jahecháta pe artíkulo oúvape?

¹⁸ Abel guive entéro yvypóra ojeroviáva pe Ñemoñare oñeprometevaʼekuére, ikatu oiko Jehová amígoramo. Ñandejára oikuaavaʼekue Itaʼýra iñeʼẽrendutaha ipahaite peve ha omanóvo oipeʼataha “yvyporakuéra pekádo” (Juan 1:29, BNP). Jesús sakrifísio oipytyvõ opavavépe koʼág̃a peve (Rom. 3:26). Péro mbaʼéichapa ideprovécho ñandéve upe sakrifísio? Péva jahecháta pe artíkulo oúvape.

[Nóta]

Mbaʼépa rembohováita?

• Mbaʼéichapa ojekopi Ñandejárare ha ojeʼe nogovernaiha tekojojápe?

• Maʼerãpa ojevautisa Jesús?

• Mbaʼépa ojehupyty Jesús omano rupi?

[Porandu ñahesaʼỹijóva]

[Nóta oĩva taʼanga ndive páhina 9]

Reikuaápa nde maʼerãpa ojevautisa Jesús?