Mbaʼépa jajapovaʼerã ñane rreunionkuéra omokyreʼỹ hag̃ua enterovépe?

‘Peñembyaty jave, opa mbaʼe pejapovaʼerã peñomombarete hag̃ua.’ (1 COR. 14:26)

1. Maʼerãpa ojejapo umi rreunión kongregasiónpe?

 “AJÉIKO igustoite ñane rreunión!” Oiméne jaʼémava péicha opa rire peteĩ rreunión Salón del Réinope. Umi rreunión ningo ñanemokyreʼỹeterei. Ha umi kristiáno ypykue ojapo haguéicha, koʼág̃a rupi avei umi rreunión ojejapo omombarete hag̃ua ñande jerovia. Apóstol Pablo ohechauka porã upéva pe primera kárta ohaivaʼekuépe umi Corintoyguápe. Kapítulo 14-pe heʼi jey jey opa mbaʼe ojejapóva rreunionhápe ojejapovaʼerãha oñemombarete hag̃ua kongregasión (elee 1 Corintios 14:3, 12, 26). *

2. a) Mbaʼérepa umi rreunión ñanemokyreʼỹ? b) Mbaʼe porandúpa ñambohováita?

² Jaikuaa umi rreunión ñanemokyreʼỹ ha ideprovechoha ñandéve oĩ rupi upépe  Ñandejára espíritu. Upévare ñañepyrũ hag̃ua káda rreunión ñañemboʼe ñande pyʼaite guive ha jajerure ñande Ru yvagapeguápe omeʼẽmi hag̃ua ñandéve ijespíritu sánto. Péro jaikuaa avei káda uno ikatuha oipytyvõ pe rreunión oporomokyreʼỹ hag̃ua. Upéicharõ iporã ñañeporandu: Mbaʼépa ñande ikatu jajapo ñane rreunionkuéra akóinte ñanemokyreʼỹ ha omombarete hag̃ua ñande jerovia?

3. Mbaʼérepa tuichaite mbaʼe ñane rreunionkuéra?

³ Ñambohovái hag̃ua upe porandu jahecháta mbaʼépa ojapovaʼerã umi omoakãva rreunionkuéra. Jahecháta avei mbaʼépa ermanokuéra ikatu ojapo ñane rreunionkuéra omokyreʼỹ hag̃ua enterovépe. Tuicha mbaʼe voi ningo ñane rreunionkuéra jaikuaágui upépe ñamombaʼeguasuha Jehovápe. Upévare ñañehaʼãmbaite ani jafalta ha ñakomenta meme (Sal. 26:12; 111:1; Isa. 66:22, 23).

Peteĩ rreunión ojejapóva jastudia hag̃ua la Biblia

4, 5. Maʼerãpa ojejapo pe aty Ñemañaha Ñehesaʼỹijo?

⁴ Enterovépe ningo hiʼãiterei ñanepytyvõ pe Ñemañaha Ñehesaʼỹijo jajapóva Salón del Réinope. Upearã ñantende porã vaʼerã maʼerãpa ojejapo jepi ko rreunión. Ha upéva jaikuaa hag̃ua jahechami jey mbaʼépa oñekambiáraʼe pe rrevísta Ñemañahápe ha umi artíkulo oñehesaʼỹijóvape.

⁵ Pe Ñemañaha 15 de octubre de 2008 guive oñemoĩ peteĩ mbaʼe iñimportánteva ko rrevísta apére. Rehechakuaáparaʼe upéva? Emaña porãmína pe nde rrevísta apére. Pe tórre guýpe oĩ peteĩ Biblia raʼanga, ha upéva ohechauka pe aty Ñemañaha Ñehesaʼỹijo ojejapoha jastudia hag̃ua la Biblia. Upeichaite, ko rreunionhápe ojeporu ha oñemyesakã Ñandejára Ñeʼẽ, yma ojejapo haguéicha Nehemías tiémpope (Neh. 8:8; Isa. 54:13).

6. a) Mbaʼépa oñemoĩ koʼág̃a umi artíkulo oñehesaʼỹijóvape? b) Mbaʼépa jajapovaʼerã pe ñeʼẽ elee oñemoĩ jave umi téysto mboyve ha mbaʼérepa?

⁶ La Biblia ningo haʼehína pe lívro iñimportantevéva jaiporúva ñane rreunionhápe. Upévare Ñemañahápe umi artíkulo oñehesaʼỹijóvape, koʼág̃a oñemoĩ heta téysto mboyve pe ñeʼẽ elee. Upéva oñemoĩ enterove oheka ha olee hag̃ua umi téysto ivívliape (Hech. 17:11). Ha mbaʼérepa iporãta jajapo upéicha? Og̃uahẽvégui ñane korasõme jaleéramo la Bíbliape umi konsého omeʼẽva Ñandejára (Heb. 4:12). Upévare ojelee mboyve umi téysto, pe omoakãva Ñemañaha Ñehesaʼỹijo ohaʼarõvaʼerã enterove oheka raẽ pe téysto ojeleétava.

Oñemeʼẽve ñandéve tiémpo ñakomenta hag̃ua

7. Mbaʼépa hetave ermáno ikatu ojapo koʼág̃a Ñemañaha oñehesaʼỹijo jave?

⁷ Koʼág̃a umi artíkulo ñahesaʼỹijóva Ñemañahápe mbykyve avei. Ha saʼive rupi ojeporu pe tiémpo ojelee hag̃ua umi párrafo, ikatu oĩ hetave komentário. Upéicharõ hetave ermáno ikatúta omombaʼeguasu Jehovápe ikomentário rupive. Pór ehémplo, ikatu ombohovái peteĩ porandu pe rrevístape oĩva, omyesakã mbaʼéichapa ikatu ñanepytyvõ peteĩ téysto, térã omombeʼu peteĩ tembiasakue ohechaukáva iporãveha jajapo la Biblia heʼíva. Iporãta avei oñemohembyʼimíramo tiémpo ermanokuéra okomenta hag̃ua umi taʼanga rehe (elee Salmo 22:22; 35:18; 40:9).

8, 9. Mbaʼéichapa pe omoakãva Ñemañaha Ñehesaʼỹijo ikatu oipytyvõ pe rreunión omokyreʼỹ hag̃ua enterovépe?

⁸ Jaikuaáma koʼág̃a pe tiémpo oñemeʼẽveha, ikatu hag̃uáicha hetave oĩ okomentáva pe Ñemañaha oñehesaʼỹijo jave.  Péro upearã tekotevẽ mbykymimi umi komentário oñemeʼẽva ha pe omoakãva katu sapyʼapyʼánte okomentavaʼerã. Mbaʼéichapa pe omoakãva ikatu oipytyvõ pe rreunión omokyreʼỹ hag̃ua enterovépe?

⁹ Ñamoĩmína peteĩ ehémplo ñambohovái hag̃ua upe porandu. Pe Ñemañaha Ñehesaʼỹijo oñemoakã porãva ikatu ñambojoja peteĩ rrámo de flóres iporãitereívare. Jaikuaa ningo peteĩ rrámo orekoha heta yvoty, upéicha avei pe Ñemañaha Ñehesaʼỹijo oreko heta komentário. Ha umi ermanokuéra komentário napeteĩchapái, oĩháicha umi yvoty michĩ ha tuicháva ha diferénte kolórva. Péro, mbaʼérepa ikatu ñambojoja pe omoakãva komentário? Umi komentário sapyʼapyʼa ojapóva ikatu ñambojoja umi plánta rovykãmimi oñemoĩvare umi yvotýndi omoporãve hag̃ua, péro ndahaʼéi ojahoʼipa hag̃ua umi yvotýpe. Upévare pe omoakãva ohechakuaavaʼerã ndovaleiha ojagarrapa térã okomenta pyʼỹi, haʼe tekotevẽ javénte ikatu ombojoapyʼimi ermanokuéra komentário. Ha mbaʼépa ojehupytýta upéicharõ? Umi komentário ojapóva  ermanokuéra ha pe omoakãva ojapo porãramo hembiapo, amo ipahápe ojeguerekóta heta komentário iporãitereíva, omokyreʼỹ ha omombaretéva enterovépe.

Ñamombaʼeguasúkena Ñandejárape ñane komentário rupive

10. Mbaʼéichapa ojejapovaʼekue umi rreunión síglo primérope?

¹⁰ Apóstol Pablo heʼíva 1 Corintios 14:26-33-pe ñanepytyvõ jaikuaa hag̃ua mbaʼéichapa ojejapovaʼekue umi rreunión síglo primérope. Peteĩ karai arandu oñeʼẽvo koʼã versíkulore, ohai: “Jahechakuaa umi kristiáno ypykue oñembyaty jave opavave ikatu hague okomenta, ha oikuaa voi hikuái ojapovaʼerãha upéva. Avave ndohói upépe ohendu hag̃uánte, oho guei okomenta ha oaprende hag̃ua”. Umi kristiáno ypykue ohechakuaavaʼekue voi umi rreunión ojejapoha ikatu hag̃uáicha ohechauka ijerovia Jehováre ikomentário rupive (Rom. 10:10).

11. a) Mbaʼépa jajapovaʼerã ñane rreunionkuéra omokyreʼỹ ha omombarete hag̃ua enterovépe? b) Mbaʼépa ñanepytyvõta ñakomenta porãve hag̃ua rreunionhápe? (Ehecha pe nóta.)

¹¹ Ñakomentáramo rreunionhápe ñaipytyvõñaína ñane ermanokuérape omombarete hag̃ua ijerovia. Ha oiméramo jepe jaháma heta áñore rreunionhápe, katuete javyʼa ñahendu jave umi ermáno ha ermanakuéra komentário. Ñamombaʼeterei voi ñahendúvo okomenta peteĩ ermána ijedámava; ñanemokyreʼỹ avei ñahendúvo peteĩ ansiáno okomenta hekoitépe; ha katuete japukavy ñahendúvo peteĩ mitã okomenta ijeheguínte, ha péicha ohechauka ohayhuha Jehovápe. Upéicharõ jahechakuaa, ñane komentário rupive ñaipytyvõha ñane rreunionkuéra omokyreʼỹ ha omombarete hag̃ua enterovépe. *

12. a) Mbaʼépa ñanemboʼe Moisés ha Jeremías ehémplo? b) Mbaʼéichapa pe ñemboʼe nepytyvõta rekomenta hag̃ua?

¹² Jaikuaa ningo umi hiʼotĩvape ijetuʼuetereiha okomenta hag̃ua. Ha oimérõ nde upéicha, iporã nemanduʼa oĩha heta hiʼotĩva avei ndéicha. Pór ehémplo Moisés ha Jeremías ojerovia mbaretéramo jepe Ñandejárare, ijetuʼuvaʼekue chupekuéra oñeʼẽ hag̃ua hénte atýpe (Éxo. 4:10; Jer. 1:6). Péro Jehová oipytyvõ haguéicha chupekuéra oñeʼẽ hag̃ua hérape, katuete ndéve nepytyvõta avei remombaʼeguasu hag̃ua chupe (elee Hebreos 13:15). Mbaʼépa rejapokuaa ikatu hag̃uáicha Ñandejára nepytyvõ rekomenta hag̃ua? Primeroite, rejeprepara porã vaʼerã rreunionrã. Upéi, reho mboyve Salón del Réinope eñemboʼe Jehovápe ha ejerure chupe tanembopyʼaguasu rekomenta hag̃ua (Fili. 4:6). Ha rejerure rupi Jehovápe “pe haʼe oipotáva”, katuete ohendúta ne ñemboʼe (1 Juan 5:14; Pro. 15:29).

Umi rreunión ñanemombarete, ñanemokyreʼỹ ha ñanekonsola

13. a) Maʼerãpa ojejapo umi rreunión? b) Mbaʼépa oñeporanduvaʼerã ansianokuéra?

¹³ Apóstol Pablo heʼi umi rreunión ojejapoha ñanemombarete, ñanemokyreʼỹ ha  ñanekonsola hag̃ua (1 Cor. 14:3). * Mbaʼépa oipytyvõta umi ansiánope oreko jave párte rreunionhápe omokyreʼỹ ha okonsola hag̃ua ermanokuérape? Ñambohovái hag̃ua ko porandu iporãta jahecha mbaʼéichapa Jesús oikove jey riremi omoakãvaʼekue peteĩ rreunión.

14. a) Mbaʼépa oikovaʼekue Jesús ojapo mboyve peteĩ rreunión hemimboʼekuérandi? b) Mbaʼéichapa oñeñandúneraʼe Jesús remimboʼekuéra haʼe oñembojárõ guare ha oñeʼẽ chupekuéra?

¹⁴ Ñepyrũrã jahecha raẽta mbaʼépa oikovaʼekue upe rreunión mboyve. Jesús omano mboyvemi, umi hemimboʼekuéra ‘ohejapa chupe’, ha péicha oñekumpli pe profesía heʼíva: ‘Isarambipáta hikuái ha káda uno ohóta hógape’ (Mar. 14:50; Juan 16:32). Upéi, Jesús oikove jey rire oinvita ijapostolkuérape peteĩ rreunionrã. * Upémarõ, ‘umi once hemimboʼe oho Galiléape, pe montáña Jesús heʼi haguépe chupekuéra’ oho hag̃ua. Upépe og̃uahẽvo hikuái, ‘Jesús oñemboja ha oñeʼẽ chupekuéra’ (Mat. 28:10, 16, 18). Oiméne tuichaite ipyʼaguapy hikuái ohechávo Jesús voi oñembojaha hendapekuéra. Ha mbaʼépa heʼi chupekuéra?

15. a) Mbaʼépa heʼi Jesús upe rreunionhápe? Ha mbaʼépa ndojapói upérõ? b) Mbaʼéichapa oipytyvõ upe rreunión umi apóstolpe?

¹⁵ Oñepyrũvo pe rreunión Jesús heʼi hemimboʼekuérape: ‘Opa mbaʼe oĩva yvága ha yvýpe oñemoĩ chepoguýpe’. Upe rire omeʼẽ chupekuéra hembiaporã heʼívo: ‘Tapeho peipytyvõ umi héntepe oiko hag̃ua chuguikuéra che remimboʼe’. Ha opromete chupekuéra: ‘Che aiméta penendive ára ha ára’ (Mat. 28:18-20). Péro rehechakuaápa mbaʼépa Jesús ndojapói upérõ? Haʼe ndojaʼói ijapostolkuérape. Nopensái umi ijapóstol ndaipyʼaporãiha ha nomomanduʼái chupekuéra ijerovia kangy hague. Upéva rangue Jesús omeʼẽ ijapostolkuérape peteĩ tembiapo iñimportantetereíva ha péicha ohechauka jey haʼe ha Itúva ohayhuha chupekuéra. Mbaʼéichapa oipytyvõ upéva umi apóstolpe? Omombarete, omokyreʼỹ ha okonsola chupekuéra. Upévare pe rreunión riremínte ojehecha jeýma umi apóstolpe ‘oporomboʼe ha omombeʼu oikóvo pe marandu porã’ (Hech. 5:42).

16. Mbaʼépa ojapovaʼerã umi ansiáno ikatu hag̃uáicha umi rreunión oporomokyreʼỹ?

¹⁶ Yma Jesús ojapo haguéicha, koʼág̃a rupi avei umi ansiáno oaprovecha umi rreunión omomanduʼa ha ohechauka hag̃ua ermanokuérape ndaiporiha mbaʼeve oipeʼavaʼerã chupekuéra Jehová mborayhúgui (Rom. 8:38, 39). Upévare ojapo jave ipárte ojesareko umi mbaʼe porã ojapóvare ermanokuéra ha ndoikói heʼi mbaʼépepa ojavy hikuái. Ha nopensavaíri hesekuéra, upéva rangue umi ansiáno oñeʼẽ porã umi ermánore ha heʼi haʼekuéra ohayhuha Jehovápe ha ojaposeha hembipota (1 Tes. 4:1, 9-12). Sapyʼánte umi ansiáno tekotevẽ oñemoñeʼẽ pe kongregasiónpe. Péro ikatu avei mbovymi ermánonte oikotevẽ oñeñemoñeʼẽ chupekuéra, upéicha jave iporãvéta umi ansiáno oñeʼẽ umi ermánondi haʼeñohápe (Gál. 6:1; 2 Tim. 2:24-26). Ha umi ansiáno oñeʼẽ jave kongregasiónpe, oñehaʼãmbaite oguerohory umi mbaʼe porã ojapóva ermanokuéra (Isa. 32:2). Upévare oñatende porã hikuái heʼívare, ikatu hag̃uáicha pe rreunión  opávo enterove ikyreʼỹ ha ijerovia mbarete (Mat. 11:28; Hech. 15:32).

Pyʼaguapy renda

17. a) Mbaʼérepa tekotevẽ ñane rreunionkuéragui oiko pyʼaguapy renda? b) Mbaʼépa ikatu nde rejapo ñane rreunionkuéra oporomokyreʼỹ hag̃ua? (Ehechami pe rrekuádro “Mbaʼe mbaʼépa ikatu rejapo umi rreunionkuéra omokyreʼỹ hag̃ua enterovépe”.)

¹⁷ Satanás múndo ñandejopyve rupi koʼág̃a, tekotevẽ ñane rreunionkuéragui oiko pyʼaguapy renda, ha tekotevẽ ñanekonsola enterovépe (1 Tes. 5:11). Peteĩ ermána ningo iménandi ombohovái rire peteĩ mbaʼe ijetuʼúva, omombeʼu: “Salón del Réinope roimévo ore ermanokuéra apytépe, roñandu Jehová oñangarekoha orerehe. Ha rohechakuaa ikatuha roheja ipópe umi mbaʼe orejopýva ha upéva orembopyʼaguapy” (Sal. 55:22). Toñeñandúkena avei upéicha enterove ohóva ñane rreunionhápe. Ha káda uno ñañehaʼãramo, ñane rreunionkuéra omokyreʼỹ ha omombaretéta enterovépe.

[Nóta]

Mbaʼépa rembohováita?

• Mbaʼérepa iñimportantete ñane rreunionkuéra?

• Mbaʼéichapa umi komentário ikatu omokyreʼỹ ha omombarete ermanokuérape?

• Mbaʼépa ñanemboʼe pe rreunión Jesús ojapovaʼekue hemimboʼekuérandi?

[Porandu ñahesaʼỹijóva]

[Taʼanga ha rrekuádro oĩva páhina 22 ha 23-pe]

MBAʼE MBAʼÉPA IKATU REJAPO UMI RREUNIONKUÉRA OMOKYREʼỸ HAG̃UA ENTEROVÉPE

Ejepreparákena. Restudiáramo nde rógape umi mbaʼe oñehesaʼỹijótava rreunionhápe, rentende porãvéta ha og̃uahẽvéta ne korasõme.

Aníkena refalta. Nde rehóramo rreunionhápe ñanderetavéta, ha javyʼavéta katuete.

Eg̃uahẽkena órape. Reg̃uahẽramo oñepyrũ mboyve rreunión, ikatúta repurahéi ha reñemboʼe enterovéndi, ha péicha remombaʼeguasúta avei Jehovápe.

Eguerúkena umi puvlikasión ojeporútava. Reguerekóramo la Biblia ha umi puvlikasión ojeporúva rreunionhápe, rentende porãvéta umi informasión oñehesaʼỹijóva.

Eñatende porãkena. Pór ehémplo, ani relee umi mensáhe og̃uahẽva nde selulárpe rreunión aja. Upéicharõ neremotenondemoʼãi umi mbaʼe naiñimportanteguasúiva.

Ekomentákena. Oĩramo heta ermáno okomentáva, omokyreʼỹ ha omombaretéta hetavépe.

Mbykymínte ekomenta. Upéicharõ hetave ermáno okomentáta.

Ejapókena umi tembiapo oñemeʼẽva ndéve. Oñemeʼẽrõ ndéve ne rembiaporã Eskuéla Jaiporukuaa Hag̃ua la Bíbliape térã pe Aty Ñanemboʼéva Japredika Hag̃uáme, tekotevẽ rejeprepara porã, reñensaja ha reñehaʼãmbaite rekumpli.

Eporoguerohorýkena. Eagradese ha eguerohory umi oguerekovaʼekuépe párte rreunionhápe ha umi okomentávape.

Eñemongetákena nde rapichakuérandi. Torypápe resaluda ha reñemongeta kyreʼỹramo oñepyrũ mboyve ha opa rire rreunión, katuete enterove javyʼavéta ha hetave mbaʼe porã jahupytýta.