Jehová oguerohory umi iñeʼẽrendúvape

SAÚL ningo pe rréi ypykue Israélpe. Ñandejára oiporavovaʼekue chupe oisãmbyhy hag̃ua, upéicharamo jepe amo ipahápe ou naiñeʼẽrenduvéi.

Mbaʼe ivaívapa ojaporakaʼe? Mbaʼéicha rupípa? Mbaʼépa ñanemboʼe Saúl rembiasakue?

Jehová oikuaauka mávapepa oiporavo

Saúl oisãmbyhy mboyve, Jehová omoĩvaʼekue proféta Samuélpe omoakã hag̃ua umi Israelguápe. Péro koʼág̃a Samuel itujáma ha itaʼyrakuéra katu naiñeʼẽrendúi Jehovápe. Hiʼarive Israélpe upérõ ojopy vaipa iñenemigokuéra. Upévare umi ansiáno ojerurérõ guare Samuélpe peteĩ rréi omoakãvaʼerã chupekuéra ñorairõhápe ha oisãmbyhy hag̃ua chupekuéra, Jehová oiporavo Saúlpe ha heʼi: “Saúl oipeʼáta che retãme Filisteayguakuéra poguýgui” (1 Sam. 8:4-7, 20; 9:16, ÑÑB).

Saúl haʼevaʼekue peteĩ ‘mitãrusu neporãva’. Péro oguereko hetave mbaʼe porã, pór ehémplo hekomirĩvaʼekue. Upévare oporandu Samuélpe: ‘Chépa ndahaʼéi Benjamín raʼyre, Israel ñemoñare apytégui pe trívu michĩvéva. Ha cherogayguápa naimbovyvéi Benjamín raʼykuéra apytégui. Mbaʼére piko ere chéve koʼã mbaʼe?’. Jahechakuaa ndeʼíri hague ijehe ni ifamíliare mbaʼeguasuha, itúva Quis ipláta hetáramo jepe (1 Sam. 9:1, 2, 21, ÑÑB).

Jahechakuaa avei Saúl hekomirĩ hague ojekuaaukátarõ guare umi héntepe ojeporavo hague chupe rreirã. Upe mboyve Samuel oiporavóma Saúlpe avave oikuaaʼỹre ha heʼi chupe: ‘Ejapo upe rejuhu porãvéva ha Jehová nepytyvõta’. Péro mbaʼépa ojapo Saúl proféta Samuel ombyatýrõ guare umi héntepe omombeʼu hag̃ua chupekuéra mávapepa Jehová oiporavo? Upérõ Saúl okañy ha avave ndoikuaái moõpa oho. Hiʼotĩetereígui haʼe ojapo upéicha. Upémarõ Jehová omombeʼu Samuélpe moõpa okañy Saúl ha upéicha Jehová oikuaauka pe rréi haʼe oiporavovaʼekue (1 Sam. 10:7, 20-24).

Ñorairõhápe

Oĩramo umi ndojeroviapáiva Saúl rehe, pyaʼe ohechakuaa hikuái tuicha ojavyha. Peteĩ árape, umi Ammongua oñorairõsérõ guare peteĩ táva Israelgua ndive ‘Jehová  espíritu ou Saúl ári’ ha omombarete chupe. Pyʼaguasúpe rréi Saúl ohenoika umi soldádope, omotenonde chupekuéra ha ogana upe ñorairõ. Upéicharamo jepe Saúl ohechakuaa Jehová oipytyvõ rupínte chupe ogana hague, upévare heʼi: ‘Ko árape Jehová oipytyvõ Israelguápe’ (1 Sam. 11:1-13, ÑÑB).

Saúl omoheñoivaʼekue heta mbaʼe porã hekovépe ha Jehová ohovasa chupe. Haʼe ohechakuaa avei Jehová haʼeha pe omombaretéva hembiguaikuérape. Péro akóinte oho porã hag̃ua Saúl ha umi Israelguápe, ojapovaʼerã hikuái ko mbaʼe Samuel heʼivaʼekue: “Peẽ pemombaʼeguasúramo Ñandejárape ha pejapóramo haʼe oipotáva, pehendúramo iñeʼẽ ha napepuʼãiramo hese, peikóramo haʼe oipotaháicha, peẽ ha pende ruvicha guasu, oho porãta peẽme”. Upéi pe proféta heʼi mbaʼépa ohupytýta umi iñeʼẽrendúva: “Héra marangatu rehehápe Ñandejára ndohejamoʼãi hetãyguápe. Haʼe ningo ojapose pendehegui hetãygua tee” (1 Sam. 12:14, 22).

Ymaite guive voi, umi iñeʼẽrendúvape añoite Jehová oguerohory ha katuete ohovasa umi ojapóvape hembipota. Péro mbaʼépa oiko nañaneñeʼẽrendúiramo chupe?

‘Tuichaiterei ningo rejavy’

Saúl ojapovaʼekue umi filistéore ombopochyeterei chupekuéra, upévare peteĩ ehérsito isoldádo hetáva ‘yvykuʼi y guasu rembeʼypeguáicha’ opuʼã Saúl rehe. ‘Israelgua vaípe ojecha oñemongorávo chupekuéra ha ohopa okañy javoraikua, itakua, yvykua ha ita guasu kupe rupi’ (1 Sam. 13:5, 6). Mbaʼépa ojapóta koʼág̃a rréi Saúl?

Samuel heʼi Saúlpe ohaʼarõ hag̃ua chupe Guilgálpe, upépe pe proféta ombaʼekuaveʼẽta hesehápe. Saúl ojapo upéicha, péro Samuel máramo nog̃uahẽi ha Saúl ehérsito oñepyrũma isarambi. Upémarõ Saúl oñepyrũ ombaʼekuaveʼẽ ijehegui rei. Upe rire og̃uahẽ Samuel ha oikuaávo Saúl ojapovaʼekue, heʼi chupe: ‘Tuichaiterei ningo rejavy. Neñeʼẽrendúrire Jehovápe ojeʼe haguéicha ndéve, Jehová nemoĩ hatã vaʼerãmoʼã tetã ruvicháramo opaite árare. Koʼág̃a nandeʼaremoʼãi tetã ruvicháramo, Ñandejára ohekáma peteĩ kuimbaʼe oñembopyʼapeteĩvaʼerã hendive ha Jehová oiporavóta chupe Israel retã ruvicharã nde remboykégui Jehová heʼivaʼekue ndéve’ (1 Sam. 10:8; 13:8, 13, 14, ÑÑB).

Saúl naiñeʼẽrenduvéivo ohechauka oñemombaʼeguasu ha ndojeroviaiha Ñandejárare. Ohaʼarõ rangue Samuélpe ombaʼekuaveʼẽ hag̃ua, ojapóntema haʼe. Ndojoguaiete Gedeónpe, haʼe omoakãrõ guare Israel ehérsito Jehová heʼi chupe omomichĩ hag̃ua 32.000 soldádogui 300-pe ha upéicha ojapo. Mbaʼérepa iñeʼẽrendu Gedeón? Ojeroviágui Jehováre. Upéicha rupi oipytyvõ chupe ipuʼaka hag̃ua 135.000 madianítare (Jue. 7:1-7, 17-22; 8:10). Katuete ningo Jehová oipytyvõvaʼerãmoʼã avei upéicha Saúlpe. Péro naiñeʼẽrendúigui noipytyvõi chupe, upévare umi Israelgua ndaipuʼakái umi Filisteayguáre (1 Sam. 13:17, 18).

Mbaʼépa ikatu jaʼe ñandejehe? Mbaʼépa jajapo jajejopy jave? Upéicha jave umi ndojeroviáivape ndahasyiete omboykénte hag̃ua Jehová heʼíva. Upéicha ojapovaʼekue Saúl, haʼe oiméne opensáraʼe iporã hague pe ojapóva ndaipóri rupi Samuel. Péro jaipotáramo Ñandejára ñandeguerohory ñaneñeʼẽrenduvaʼerã chupe opa mbaʼépe.

Jehová omboyke Saúlpe

Oñorairõramo guare Amaleq ndive Saúl naiñeʼẽrendúi jeýma. Jehová heʼíma upe tetã oñehundietevaʼerãha opersegi ha ombohasa asy haguére ipuévlope pe desiértore (Éxo. 17:8; Deu. 25:17, 18). Hiʼarive, umi hués tiémpope, umi Amaleqgua oñomoirũ  ambue tetã ndive ojopy hag̃ua Jehová puévlope (Jue. 3:12, 13; 6:1-3, 33). Upévare Jehová heʼi Saúlpe ohundi hag̃ua chupekuéra (1 Sam. 15:1-3).

Ohundipa rangue pe tetã ha umi mbaʼe oĩva ipype, Saúl ndojukái pe rréipe ni umi mymba iporãvévape. Mbaʼépa oiko Samuel heʼírõ guare Saúlpe ojapo vai hague? Haʼe ombojase ambuére hembiapo vaikue heʼívo: ‘Tetãyguakuéra ndojukaséi umi iporãvéva ovecha ha vakakuéra apytégui, oheja oikuaveʼẽ hag̃ua Jehovápe’. Ndajaikuaái añetehápepa Saúl ojaposéraʼe upéva, péro tuicha ojavy ndojapóivo Jehová heʼi haguéicha chupe. ‘Hekomirĩramo’ jepe iñepyrũme, upéi ou oñembotuicha. Upévare proféta Samuel ontendeuka chupe ombopochy hague Jehovápe ha heʼi: ‘Horýpa Ñandejára kuaveʼẽmbýre ha mymba ojejukavaʼekue rehe, ku horyháicha ojejapóramo chupe iñeʼẽ. Añetehápe pe ñeʼẽrendu iporãve kuaveʼẽmbýgui. Nde remboyke haguére Ñandejára ñeʼẽ, haʼe nemboykéma avei, anivéma hag̃ua reiko tetã ruvicháramo’ (1 Sam. 15:15, 17, 22, 23, ÑÑB).

Avei Jehová oipeʼáma Saúlgui ijespíritu ha ndohovasavéima chupe ha upe guive ndojaposevéi pe iporãva. Oñepyrũ omalisia vai ha ndaijaʼevéi David rehe, pe Jehová oiporavovaʼekue oisãmbyhy hag̃ua upe rire. Heta vése voi oñehaʼã ojuka chupe. La Biblia heʼi ohechakuaávo “Ñandejára oipytyvõha Davídpe”, Saúl “oikove aja pukukue ndaijaʼeveiha hese” ha opersegi chupe ohundiete hag̃uáicha. Saúl ojukauka voi hetápe, umíva apytépe 85 saserdóte. Ndareíri ningo Jehová omboyke chupe (1 Sam. 16:14; 18:11, 25, 28, 29; 19:10, 11; 20:32, 33; 22:16-19).

Upe rire umi filistéo ou jeýrõ guare oñorairõ hag̃ua umi Israelgua ndive, Saúl naiñeʼẽrendúi jeýma. Haʼe oho ojerure peteĩ espiritístape oipytyvõ hag̃ua chupe. Ha upe koʼẽme ojejapi vai chupe ñorairõhápe ha upémarõ haʼe voi ojejuka (1 Sam. 28:4-8; 31:3, 4). La Biblia heʼi mbaʼéicha rupípa oiko hese ko mbaʼe: ‘Upéicha omano Saúl ojapo haguére ivaíva, naiñeʼẽrendúivo Ñandejárape ha ombaʼeporandúvo peteĩ kuña espiritístape, oporandu rangue Ñandejárape’ (1 Cró. 10:13, 14).

Saúl rembiasakue ñanemboʼe iporãveha ñaneñeʼẽrendu Jehovápe jajapo rangue oimeraẽ sakrifísio. Apóstol Juan ohai: ‘Jahayhu Ñandejárape heʼise jajapo hembipota ha hembipota ndahaʼéi mbaʼe pohýi’ (1 Juan 5:3). Aníkena arakaʼeve ñanderesarái ko mbaʼégui: jaikoséramo Ñandejára amígoramo, akóinte ñaneñeʼẽrenduvaʼerã chupe.

[Nóta oĩva taʼanga ndive páhina 21]

Oisãmbyhy ñepyrũme Saúl hekomirĩvaʼekue

[Nóta oĩva taʼanga ndive páhina 23]

Mbaʼérepa Samuel heʼi Saúlpe: “Ñeʼẽrendu iporãve kuaveʼẽmbýgui”?