Ñamoirũkena Jesucrístope

UMI oikóva politikokuéra rapykuéri ningo pyʼỹinte osẽ vai ndoikóigui haʼekuéra ohaʼarõva. Péro umi omoirũvare Jesucrístope ndoikói upéicha, ohupyty uvei heta mbaʼe porã. Jesús voi oprometevaʼekue: ‘Peju che rendápe peẽ penekaneʼõ ha pembaʼapo pohýiva, ha che pomombytuʼúta. Peñemoĩ chendive che júgo guýpe ha che pomboʼéta. Che ningo chepyʼaporã ha nañembotuichái, upévare pombopiroʼýta’ (Mat. 11:28, 29, NM). Añetehápe, ñañemoĩrõ Jesús poguýpe ñanekyreʼỹ ha ñanembaretéta. Haʼe ojepyʼapy umi ndovyʼái ha oñeñandu vaívare, ha heʼi chupekuéra oñemoĩ hag̃ua ijúgo guýpe. Upéicharõ, mbaʼéichapa jahechaukáta ñañemoĩha Jesús poguýpe?

Apóstol Pedro ohai: “Cristo voi avei ohasa asy vaʼekue pende rehehápe ha ohechauka peẽme mbaʼéichapa peikovaʼerã ipyporépe” (1 Ped. 2:21, BNP). Mbaʼérepa iñimportánte jaguata Jesús pyporére? Ñamoĩ chupe ñandejagarraha peteĩ mbaʼasy ivaietereíva, ha oĩha peteĩ doktór ikatúva ñanepohãno ha haʼe heʼíva añoite ikatu ñanemonguera, mbaʼépa jajapóta ani hag̃ua ñamano? Ajépa ñañehaʼãmbaitéta jajapo heʼíva guive ñandéve jakuera hag̃ua! Upéicha avei, jajesalvaséramo jajapovaʼerã Jesús heʼíva guive ñandéve ha jasegi iñehémplo. Upéva ikatu jajapo ñahendúvo heʼíva, ñaneñeʼẽrendúvo chupe ha ñaipytyvõvo umi haʼe omoĩvape ñanemoakã hag̃ua.

Ñahendu Jesús heʼíva ha ñaneñeʼẽrendu chupe

Omohuʼãnguévo pe Sermón del Mónte Jesús heʼi: ‘Pe cherendúva ha ojapóva haʼéva ojogua peteĩ kuimbaʼe iñarandúvape, omopuʼãva hóga ita ári. Ha upéi ou peteĩ ama guasu yvytu atãre, ha pe y ojejapete pe ógare, péro ni nomonguʼéi chupe ipyenda porã rupi’ (Mat. 7:24, 25, NM).

Jesús heʼi ‘iñarandu’ térã iñakãguapyha pe ohendu ha iñeʼẽrendúva chupe. Ha ñande, kyreʼỹmepa ñaneñeʼẽrenduñaína opaite mbaʼe Jesús heʼívape ha upéicha jahechauka jarrespeta ha ñamombaʼeha iñehémplo? Térãpa ñañehaʼã jajapo umi mbaʼe ou porãvétava ñandéve térã ndahasyivévante? Ñanemanduʼavaʼerã Jesús heʼivaʼekuére: ‘Akóinte ajapo umi mbaʼe che Rúpe ombovyʼáva’ (Juan 8:29). Ñande ningo upéicha vaʼerã avei.

Primer síglope, umi apóstol ohejavaʼekue ehémplo neporãva ohechaukávo mbaʼéichapa ñañemoĩvaʼerã Cristo poguýpe. Pór ehémplo, peteĩ jave apóstol Pedro heʼi Jesúspe: ‘Ore ningo rohejapaite opa mbaʼe ha romoirũ’ (Mar. 10:28, NM). Jahechaháicha umi apóstol omombaʼetereivaʼekue Jesús omoakã haguére chupekuéra, upévare oheja heta mbaʼe omoirũ hag̃ua chupe (Mat. 4:18-22).

Ñaipytyvõ umi Jesucristo omoĩvape ñanemoakã hag̃ua

Omano mboyvemi, Jesús ohechauka ambue mbaʼe jajapovaʼerã ñañemoĩ hag̃ua ipoguýpe: “Omog̃uahẽva pe che amondóvape, chéve chemog̃uahẽhína” (Juan 13:20). Jesús ningo heʼivaʼekue umi unhídore ‘iñermanoha’ (Mat. 25:40, NM). Oñemoingove jey ha oho rire yvágape, Jesús omoĩ chupekuéra omoakã hag̃ua hendaguépe. Jesús ojapo haguéicha, oipytyvõvaʼerã hikuái hapichakuérape  oĩ porã jey hag̃ua Ñandejára ndive (2 Cor. 5:18-20). Upévare jahechakuaáramo Jesús ñanemoakãha ñaneñeʼẽrendúta iñermanokuérape.

Enterove ñañehaʼãvaʼerã jahechakuaa mbaʼépa jajapo jepi oñemeʼẽ jave ñandéve konsého la Biblia, puvlikasionkuéra ha umi rreunión rupive. Umícha jave, ñahesaʼỹijoñaína ñande Ruvicha guasu ñeʼẽ (2 Ped. 3:1, 2). Jahechaukáta ñamombaʼeha koʼã mbaʼe jaguerekóvo peteĩ prográma jastudia hag̃ua la Biblia. Péro, mbaʼépa jajapo jepi ñahendu jeýramo peteĩ konsého oñemeʼẽmavaʼekue? Pór ehémplo, la Biblia heʼi ñamendavaʼerãha peteĩ oservívare Jehovápe (1 Cor. 7:39). Ko mbaʼe ningo heta áñorema oñehesaʼỹijo Ñemañahápe. Umi artíkulo oñeʼẽva ko konsého ha hetave mbaʼe rehe ohechauka mbaʼeichaitépa ñanderayhu ha ojepyʼapy ñanderehe Jesús ermanokuéra. Jajapóvo heʼíva hikuái, jahechaukáta ñañemoĩha Cristo poguýpe.

Proverbios 4:18 heʼi: ‘Hekojojáva rape koʼẽtĩcha hesakã, ha hesakãve ohóvo omimbipa peve’. Ko téysto ohechauka umi mbaʼe porã Jesús ñanemboʼéva koʼẽ koʼẽre hesakã porãveha ohóvo. Upévare jahechaukáta ñaipytyvõha pe ‘tembiguái jeroviaha ha iñarandúvape’ ñaneñeʼẽrendúvo umi mbaʼe pyahu omyesakãvape hikuái umi puvlikasión rupive (Mat. 24:45, NM).

Mbaʼéichapa jahechauka avei jarrespetaha Jesús ermanokuérape? Ñaipytyvõvo umi superintendéntepe oĩva kongregasiónpe, heʼi haguéicha apóstol Pablo: ‘Peneñeʼẽrendúkena umi penemoakãvape ha peñemoĩ ipoguypekuéra. Haʼekuéra ningo oñangareko penderehe kaneʼõʼỹre’ (Heb. 13:17). Ikatu peteĩ ansiáno ñanemokyreʼỹ jajapo hag̃ua pe Aty Jastudia Hag̃ua Ñande Rogayguándi, térã heʼi ñandéve ñambaʼapo porãve vaʼerãha peteĩ mbaʼépe Jehová servísiope. Ikatu avei peteĩ superintendénte de sirkuíto oñemoñeʼẽ ñandéve ha heʼi mbaʼéichapa jaikovaʼerã. Ñañehaʼãramo jajapo umi konsého oñemeʼẽva ñandéve jahechaukañaína ñañemoĩha Jesucristo poguýpe.

Ko múndo ohasa asy hína ndaipórigui omoakã porãva chupekuéra. Péro, ñande javyʼaiterei Jesucristo ñanesãmbyhy haguére! Upévare, ñañehaʼãmbaitékena ñaneñeʼẽrendu chupe ha ñaipytyvõ umi haʼe omoĩvape ñanemoakã hag̃ua.

[Nóta oĩva taʼanga ndive páhina 27]

Ñaneñeʼẽrendúpa la Biblia heʼi jave ñandéve nañamendaivaʼerãha umi ndoservírivare Jehovápe?