Imitãitereípa ojevautisáma hag̃ua?

PETEĨ karai Filipinasgua hérava Carlos, * omombeʼu: “Avyʼaiterei ningo che rajy ojevautisáma haguére oservi hag̃ua Jehovápe, ha aikuaa porã haʼe ovyʼaha avei”. Ambue karai Greciagua katu ohai: “Che rembireko ha che rovyʼaiterei mbohapy ore família ojevautisa haguére imitãrusúpe. Oñakãrapuʼã ohóvo hikuái Jehová servísiope ha vyʼapópe omombaʼeguasu chupe”.

Umi sy ha túva oservíva Jehovápe ipyʼarory ohechávo ifamiliakuéra ojevautisa. Péro sapyʼánte ojepyʼapy avei, heʼi haguéicha peteĩ ermána: “Avyʼa péro akyhyje avei che memby ojevautisárõ guare, aikuaágui upe guive haʼéma ojechataha Jehovándi umi mbaʼe ojapóvare”.

Mayma mitãrusu oñehaʼãvaʼerã ojevautisa. Péro ikatu oĩ túva opensáva: “Aikuaa ningo che raʼy oñakãrapuʼãha ohóvo, péro ndaikuaái imbaretémapa ijerovia ojei hag̃ua tekovaígui ha hekopotĩtapa Jehová renondépe”. Térã ikatu oĩ heʼíva: “Osegínepa che raʼy oservi Ñandejárape kyreʼỹme, térãpa ohóne pláta rapykuéri?”. Upéicharõ, mbaʼéichapa tuvakuéra ikatu oikuaa oĩmapa ifamília ojevautisa hag̃uáicha?

Tekotevẽterei oiko chugui Cristo remimboʼe

Ñandejára Ñeʼẽ ndeʼíri mboy áñopa jaguerekovaʼerã jajevautisa hag̃ua, síno mbaʼéichapa ñaimevaʼerã Jehová renondépe. Jesús heʼivaʼekue hemimboʼekuérape: ‘Tapeho peipytyvõ umi hénte opa tetãyguápe oiko hag̃ua chuguikuéra che remimboʼe; ha pevautisa’ (Mat. 28:19, NM). Upéicharõ ikatu ojevautisa umi haʼémava voi Jesucristo remimboʼe.

Péro, mávapa hína Jesucristo remimboʼe? ‘Ndahaʼéi upe ogueroviánteva Jesucristo omboʼéva, síno oikóva voi haʼe heʼi haguéicha.’ (Perspicacia para comprender las Escrituras.) Añetehápe piko ikatu oiko ñandehegui Jesucristo remimboʼe ñanemitãramo jepe? Peteĩ ermána oservíva de misionéra cuarenta áño rasáma Latinoaméricape heʼi: “Che ha mokõi che ermána oremitã  guive roikuaamavaʼekue roserviseha Jehovápe ha roikoseha pe Paraísope. Roñemeʼẽ rupi Jehovápe orembarete rombohovái hag̃ua umi mbaʼe vai ojaposéva umi imitãva. Norombyasyiete voi rojevautisa haguére oremitã reheve”.

Ha mbaʼéichapa tuvakuéra ikatu oikuaa ifamília haʼemaha Jesucristo remimboʼe? Umi mbaʼe ojapóvare hikuái. La Biblia heʼi voi: ‘Pe mitãrusu, hembiapóre ohechaukáta hekopotĩha’ (Pro. 20:11, ÑÑB). Upévare peẽ tuvakuéra pehechavaʼerã mbaʼépa ojapo hikuái oñakãrapuʼã hag̃ua ohóvo Jehová servísiope (1 Tim. 4:15).

Mbaʼépa ojapovaʼerã Jesucristo remimboʼe?

Iñeʼẽrendu piko ne família? (Col. 3:20.) Ojapópa eréva chupe ogapýpe? La Biblia omombeʼu Jesús orekópe 12 áño iñeʼẽrendu hague ituvakuérape (Luc. 2:51). Jaikuaa ningo ndaiporiha mitã ojapóva hekopete opa mbaʼe ha ndojavýiva voi. Péro entéro kristiáno tee oñehaʼãvaʼerã ohechauka ohaʼangaha Jesúspe ha ‘oguataha ipyporére’. Upévare kongregasiónpe ojehechavaʼerã pe ojevautisátava iñeʼẽrenduha ituvakuérape (1 Ped. 2:21, ÑÑB).

Ikatu avei peñeporandu: Ohechaukapahína che família ‘omotenondeha Ñandejára rréino’ osẽvo opredika kyreʼỹme? (Mat. 6:33, NM). Térãpa oñemyaña myañavaʼerã chupe oho hag̃ua oñeʼẽ pe ogajárandi? Ojapópa umi mbaʼe ojejeruréva peteĩ maranduháragui? Ohópa ovisita jey umi ohendu porã vaʼekuépe pe marandu? Omombeʼúpa imboʼehára ha ikompañerokuérape haʼe testígo de Jehovaha?

Ohechakuaápa iñimportanteha ojeho rreunionhápe? (Sal. 122:1.) Okomentasépa ojejapo jave Ñemañaha Ñehesaʼỹijo, Ñandejára Ñeʼẽ Ñehesaʼỹijo ha Eskuéla Jaiporukuaa Hag̃ua la Biblia? (Heb. 10:24, 25.)

Oñehaʼã piko hekopotĩ ha naijuntavaíri eskuéla térã ambue hendápe? (Pro. 13:20.) Mbaʼépa ohecha jepi télepe térã oiporu jave Internét? Mbaʼeichagua músika, pelíkula térã videohuégopa ogusta chupe? Ohechaukápa umi mbaʼe heʼi ha ojapóvare oikoseha la Biblia heʼiháicha?

Oikuaa porã piko umi mbaʼe omboʼéva la Biblia? Omombeʼukuaápa iñeʼẽtépe umi mbaʼe oaprendéva pejapo jave pe Aty Jastudia Hag̃ua Ñande Rogayguándi? Omyesakãkuaánepa umi mbaʼe iñimportantevéva omboʼéva la Biblia? (Pro. 2:6-9.) Oleese piko Ñandejára Ñeʼẽ? Ostudiasépa umi puvlikasión omboúva tembiguái jeroviaha? (Mat. 24:45.) Oporandúpa ontende porãve hag̃ua la Biblia omboʼéva térã peteĩ téysto heʼíva?

Koʼã porandu penepytyvõta pehechakuaa hag̃ua mbaʼéichapa oñakãrapuʼã ohóvo  pene família Jehová servísiope. Pehesaʼỹijo rire, ikatu pehecha iporãvétapa ohaʼarõmie ojevautisa hag̃ua ha ombaʼapovevaʼerãha. Térã ikatu avei pehecha oĩmaha ojevautisa hag̃uáicha, oñemeʼẽma rupi Jehovápe ha ohechaukágui umi mbaʼe ojapóvare haʼemaha Jesús remimboʼe.

Umi imitãva ikatu omombaʼeguasu Jehovápe

Yma oĩvaʼekue heta oservíva Ñandejárape imitã guive, pór ehémplo José, Samuel, Josías ha Jesús (Gén. 37:2; 39:1-3; 1 Sam. 1:24-28; 2:18-20; 2 Cró. 34:1-3; Luc. 2:42-49). Avei Felipe rajykuéra oprofetisavaʼekue, ha oiméne imitã guive oñehekomboʼerakaʼe chupekuéra Ñandejára rembipota (Hech. 21:8, 9).

Peteĩ ermáno Greciagua omombeʼu: “Ajevautisa arekórõ guare 12 áño, ha nambyasýi ajapo haguére upéva. Veinticuatro áñoma ajevautisa hague, ha veintitrés áño ajapo hague che prekursorádo. Ahayhúgui Jehovápe ambohovái porã heta provléma che mitãrusúpe. Arekórõ guare 12 áño ndaikuaái añete heta mbaʼe koʼag̃aguáicha, péro aikuaáma ahayhuha Jehovápe ha aserviseha chupe opa árare. Avyʼaiterei ningo haʼe chepytyvõ haguére akóinte aservi hag̃ua chupe”.

Opavave ohechaukáva Cristo remimboʼeha, tahaʼe imitãva térã kakuaáva, ojevautisavaʼerã. Pablo heʼivaʼekue voi: ‘Ñande pyʼaite guive jajerovia ñanderekopotĩ hag̃ua, ha ñande juru rupi jaʼe jajeroviaha jajesalva hag̃ua’ (Rom. 10:10, BNP). Tuvakuéra, pene família ojevautisaha árape, enterove nde rogayguándi pehupyty peteĩ mbaʼe iporãitereíva. Upévare, aníkena peheja mbaʼeve pendejoko peẽme ni pene famíliape pevyʼa hag̃ua upéicha!

[Nóta]

[Nóta oĩva taʼanga ha rrekuádro ndive páhina 5]

Mbaʼépa ñapensavaʼerã pe vautísmore?

Oĩ túva opensáva iporãha itaʼyrakuéra ojevautisa, péro okyhyje osẽ vaírõ g̃uarã upéva. La Biblia katu ndeʼiriete ipeligrosoha umi imitãva ojevautisa ha oservi Ñandejárape. Proverbios 10:22 heʼi voi: ‘Ñandejára rovasa ñanemyakãrapuʼã, ha nañanembohasaʼasýi’. Apóstol Pablo ohaivaʼekue Timotéope: ‘Tuichaite mbaʼe ningo jaservi Ñandejárape ñande pyʼaite guive ha javyʼáramo umi mbaʼe jaguerekóvare’ (1 Tim. 6:6, ÑÑB).

Péro upéva ndeʼiséi ndaijetuʼumoʼãiha jaservi Jehovápe. Ñapensamína ohasavaʼekuére proféta Jeremías, haʼe heta provléma ombohovaivaʼekue omomarandúrõ guare umi isrraelítape oñehunditaha. Upéicharõ jepe haʼe ovyʼa omombaʼeguasúvo Jehovápe, upévare heʼi: ‘Ne ñeʼẽ che añaminduʼúva chembovyʼa ha chembohory, che ningo nembaʼe tee, ha nde che Jára’ (Jer. 15:16, ÑÑB). Jeremíaspe ombovyʼa haguéicha, ñandéve avei ñanembovyʼáta pe rrelihión añetegua. Satanás múndo katu henyhẽ provlémagui. Upévare, peẽ tuvakuéra peipytyvõvaʼerã pene famíliape ohechakuaa hag̃ua upéva (Jer. 1:19).

 [Nóta oĩva taʼanga ndive páhina 6]

Ohaʼarõvevaʼerãpa che família ojevautisa hag̃ua?

Oĩ sy ha túva ndoipotáiva ifamília ojevautisa oĩmaramo jepe ojapo hag̃uáicha upéva. Mbaʼépa heʼi jepi hikuái?

“Ndaipotái ojevautisa akyhyjégui ojapórõ g̃uarã upe rire peteĩ mbaʼe ivaietereíva ha oñemosẽ kongregasióngui.” Péro ajépa naisentídoi ñapensáramo Ñandejára oheja reitaha hembiapo vaikue ohaʼarõ rupi ojevautisa hag̃ua amo gotyove. Salomón heʼivaʼekue voi umi imitãvape: ‘Eikuaa porã Ñandejára ombojovaketaha hekópe opaite ne rembiapokue, tahaʼe iporãva térã ivaíva’ (Ecl. 11:9, ÑÑB). Pablo katu heʼivaʼekue opavavépe, ndahaʼéi umi kakuaápente: ‘Peteĩteĩ jajecháta Ñandejára ndive’ (Rom. 14:12).

Enterove oservíva Jehovápe, tahaʼe ojevautisámava térã nahániri, ojecháta hendive hembiapokuére . Ñanemanduʼavaʼerã Haʼe oñangarekotaha hesekuéra ha ‘ndohejaichéne ohasa jepyʼaraʼã ipohyivéva pe ikatuvaʼerãgui ogueropuʼaka’ (1 Cor. 10:13). ‘Iñakãguapy’ ha ombohovái aja entéro umi mbaʼe vai, Jehová oipytyvõta chupekuéra (1 Ped. 5:6-9). Peteĩ ermána ohai: “Umi imitã reheve ojevautisáva oñatendeve ani hag̃ua ojapo mbaʼe vai. Che membykuimbaʼe ojevautisákuri orekópe 15 áño ha heʼi upéva oipytyvõ hague chupe. Haʼe omombeʼu chéve: ‘Ni ndohasái voi che akã rupi ajapo hag̃ua peteĩ mbaʼe Jehovápe ndogustáiva’. Opavave ojevautisáva ningo oñehaʼãmbaite hekopotĩ”.

Remoĩpa ehémplo porã ne famíliape ha remboʼe chupe iñeʼẽrendu hag̃ua Jehovápe ipyʼaite guive? Oiméramo upéicha, ojevautisa rire osegíta iñeʼẽrendu. Proverbios 20:7 heʼi: “Hekojojáva ijoheipyre, ha ovyʼaitevaʼerã itaʼyrakuéra”.

“Aipota che família ostudia ambue mbaʼe ha upéi ae ojevautisa.” Oĩ porã ningo añete umi mitãrusu ha mitãkuña ojeprepara oñemantenekuaa hag̃ua, péro ikatu osẽ vai ojeʼéramo chupekuéra ijestúdio yvate ha ipláta heta vaʼerãha. Upéva rangue iporãvéta oñemokyreʼỹ chupekuéra ombaʼapove hag̃ua Jehová servísiope. Ñanemanduʼavaʼerã pe “semílla” térã Ñandejára rréino marandu ikatuha naheñóiri ñande rapicha korasõme. Jesús heʼivaʼekue voi: ‘Umi oñeñotyvaʼekue ñuatĩndýpe haʼehína umi ohendúva Ñandejára ñeʼẽ péro ojepyʼapyeterei hemikotevẽre ha oiko pláta rapykuéri. Koʼã mbaʼe ojahoʼipa Ñandejára ñeʼẽ ha upévare ndahiʼái’ (Mat. 13:22, NM). Ha upeichaite ningo umi oikoitereíva pláta rapykuéri ikatu omboyke Jehovápe ha ndoservisevéi chupe.

Tuvakuéra, pejokóramo pene famíliape ojevautisa hag̃ua, ikatu peperhudika chupe. Peteĩ ansiáno ikatupyrýva heʼi: “Oĩramo ojevautisaséva ha ñande jajoko chupe, ikatu ikangy ha noñakãrapuʼãvéi Jehová servísiope”. Ha peteĩ superintendénte de sirkuíto heʼi: “Ikatu ijerovia kangy ha oñandu avave ndojeroviaiha hese, upévare ikatu oho múndope oheka omombaʼéva chupe”.

[Nóta oĩva taʼanga]

Omotenondevaʼerãpa umi estúdio ijyvatevéva?

[Nóta oĩva taʼanga ndive páhina 3]

Oĩ heta imitã guive ohechaukáva haʼemaha Jesucristo remimboʼe

[Nóta oĩva taʼanga ndive páhina 3]

Ojeprepara rreunionrã ha okomenta upépe

[Nóta oĩva taʼanga ndive páhina 4]

Iñeʼẽrendu ituvakuérape

[Nóta oĩva taʼanga ndive páhina 4]

Osẽ opredika

[Nóta oĩva taʼanga ndive páhina 4]

Oñemboʼe Jehovápe