Mbaʼépepa ojojoguavaʼekue Napoleón Bonaparte, Julio César ha Alejandro Magno? Haʼekuéra omanda guasu ha ohupyty heta mbaʼe. Upéicharõ jepe mbohapyvéva iñenvidióso. Ha upéva venénoicha ipeligrosoiterei.

Peteĩ filósofo hérava Bertrand Russell ohai: “Napoleón oenvidiavaʼekue Césarpe, César katu Alejándrope, ha Alejandro Hérculespe, hiʼarive Hércules rehe oñeñeʼẽ umi kuénto guaʼúpente”. Upéicharõ jaʼekuaa peteĩ tapicha ipláta, ikatupyry ha ohupytýramo jepe heta mbaʼe porã ikatu oipota jeýnte ótro orekóva.

Umi iñenvidiósova ojepicha ha ipochy ohechávo hapichápe oho porãha ha ohupytyha hetave mbaʼe. Peteĩ lívro omyesakãva umi ñeʼẽ oĩva la Bíbliape heʼi umi iselósova orekoseha umi mbaʼe hapicha ohupytýva, umi iñenvidiósova katu, ndahaʼéi oipotánteva ótro orekóva, sino oipeʼase voi chugui.

Mbaʼéicha rupípa oĩ oñepyrũva oipotaiterei ótro orekóva? Mbaʼe ivaívapa ikatu ojapo upevakuére? Mbaʼépa tekotevẽ jajapo ani hag̃ua oiko ñanderehe upéva? Ñahesaʼỹijomína koʼã mbaʼe.

PETEĨ MBAʼE ÑANDEPERHUDIKAITEREÍVA

Ñaneimperfékto rupi jaipota jepi ñande rapicha orekóva, péro nañañatendéiramo ikatu jajapo hína umi mbaʼe ñanemomýiva ñaneenvidiosove hag̃ua (Sant. 4:5). Pór ehémplo ikatu ñañepyrũ ñañembojoja ótrore, ha upéva peteĩ mbaʼe ñandeperhudikaitereíva. Apóstol Pablo heʼivaʼekue voi ndovaleiha jajapo upéva. Mbaʼérepa? Ñañembojojárõ ótrore jahechaukaségui ñandevaleveha ha ñañemombaʼeguasu hag̃ua umi mbaʼe jarekóvare, koʼýte ñaneenvidiósota (Gál. 5:26; 6:4). Jahechamína mbaʼépa oikovaʼekue mokõi ermáno rehe.

Cristina a ningo peteĩ prekursóra rregulár, haʼe heʼi: “Heta vése aimoʼãʼỹre añepyrũ amaña ótro orekóvare ha aipotáma avei umíva”. Peteĩ jey, okaru aja superintendénte de sirkuíto ha hembireko ndive, Cristina imanduʼa koʼã ermáno, haʼe ha iména Eric, peteĩcha oñakãrapuʼã hague Jehová servísiope. Péro koʼág̃a ndaupéichai, hiʼarive koʼã ermáno ijavegua. Upeichaháguinte Cristina osẽ heʼi: “Che ména ningo ansiáno avei! Mbaʼére piko upéicharõ peẽ pejapo ko tembiapo ha ore koʼápente rosegi!”. Cristina oñembojoja rupi ambue ermánore oenvidia chupekuéra, ou nomombaʼevéi pe tembiapo ojapóva iménandi kongregasiónpe ha ndovyʼavéi.

José katu oservise siérvo ministeriálramo. Péro ohechávo ambue ermánogui raẽ oikoha siérvo ministeriál ha haʼe katu nahániri, oenvidia chupekuéra. José heʼi: “Aju ndachaʼevéi peteĩ ansiánore ha apensáma voi haʼe ndoipotaiha che  añakãrapuʼã kongregasiónpe. Añetehápe, jaipotaitereíramo ótro orekóva ñapensa vaipa ñande rapicháre ha ñandejehéntema jajepyʼapy”.

UMI MBAʼE OIKOVAʼEKUE YMA

Ñandejára Ñeʼẽme jatopa heta káso ohechaukáva mbaʼéichapa heta hénte oñepyrũ iñenvidióso. Koʼã ehémplo omboʼe avei upéva venénoicha ipeligrosoitereiha (1 Cor. 10:11).

Pór ehémplo jahechamína mbaʼépa ojapovaʼekue Caín, Adán ha Eva família ypykue. Haʼe ipochyeterei Jehová oguerohorýrõ guare Abel oikuaveʼẽva ha omboyke haguére imbaʼe. Caín ikatúkuri okambia, péro iñenvidióso rupi ojuka iñermánope (Gén. 4:4-8). Ndareíri la Biblia heʼi hese “oikoha Aña poguýpe” (1 Juan 3:12, ÑÑB).

José ermanokuéra iñenvidiosoiterei vaʼekue avei. Haʼekuéra ohecha itúva ombojeroviaveha Josépe ha ou ndaijaʼevéi iñermánore, koʼýte haʼe omombeʼúvo umi mbaʼe ohecháva iképe ha oikótava amo gotyove. Ipahápe ojukaséma katu Josépe! Ha tiémpo rire haʼekuéra ovende chupe tembiguairã ha heʼi itúvape omano hague (Gén. 37:4-11, 23-28, 31-33). Ohasa rire heta áño ohechakuaa hikuái pe mbaʼe vaiete ojapovaʼekue ha heʼijoa: ‘Añetehápe ñanerembiapo vai ñane ermáno ndive. Haʼe ojerure asýramo guare ñandéve, nañahendúi chupe’ (Gén. 42:21, ÑÑB; 50:15-19).

La Biblia oñeʼẽ avei Coré, Datán ha Abiram ojapovaʼekuére. Haʼekuéra oñembojojavaʼekue Moisés ha Aarón rehe. Oiko heʼi hikuái Moisés omandaseha hesekuéra ha oikoseha “ruvicha guasúramo” (Núm. 16:13). Péro ndaupeichaivaʼekue (Núm. 11:14, 15). Jaikuaaháicha Jehová voi omoĩ Moiséspe omoakã hag̃ua pe puévlo, ha haʼekuéra oenvidia chupe. Mbaʼépa oiko upe rire? Ñandejára ohundi chupekuéra (Sal. 106:16, 17).

Rréi Salomón ohechakuaa mbaʼéichapa umi iñenvidiósova ikatu ojapo peteĩ mbaʼe ñaimoʼãʼỹva. Peteĩ jey mokõi kuña oho hendápe haʼe oñatende hag̃ua ikasokuérare. Peteĩvagui omano imembyʼi, upémarõ haʼe heʼi pe mitãraʼy oikovéva haʼeha imbaʼe ha oipeʼase isy teégui. Rréi Salomón heʼi ojejuka hag̃ua pe mitãme, ha pe kuña iñañaitéva naiprovlemaiete voi. Upéicha pe rréi ohechakuaa mávapa heʼi pe añetegua ha omanda oñemeʼẽ hag̃ua chupe imemby (1 Rey. 3:16-27).

Mbaʼépa ñanemboʼe koʼã mbaʼe? Ohechauka umi oipotáva ótro orekóva upe rire ndaijaʼéi hapicháre, haʼekuéra ndojapóiramo jepe mbaʼeve ivaíva. Umi iñenvidiósova ojapo heta mbaʼe hendapeʼỹ ha ikatu voi oporojuka. Mbaʼépa ikatu jajapo ani hag̃ua ñandepochy ótro ohupyty haguére hetave mbaʼe?

IKATÚVA ÑANEPYTYVÕ

Jahayhu ñane ermanokuérape. Apóstol Pedro ohaivaʼekue: ‘Koʼág̃a peẽ, espíritu sánto rupive peneñeʼẽrendu pe ñeʼẽ añetetévape ha upéicha pemopotĩ pene ánga ha pehayhu tovamokõiʼỹre.  Pejoayhúkena pende pyʼaite guive’ (1 Ped. 1:22). Mbaʼépa heʼise jahayhu ñande pyʼaite guive? Apóstol Pablo heʼi: “Pe mborayhu ipasiénsia ha imbaʼeporã, naiñenvidiósoi, ndaijejapói ha noñembotuichái, ndojapói ivaíva, noñemohatãi haʼe heʼívapente” (1 Cor. 13:4, 5). Jahayhúrõ péicha ndajaikomoʼãi jaipota tarovaite ñande rapicha orekóva (1 Ped. 2:1). Jonatán omoĩ ñandéve ehémplo porã, oenvidia rangue Davídpe, “ohayhu chupe haʼe ojehayhuháicha” (1 Sam. 18:1, ÑÑB).

Jajeheʼa meme umi ijerovia mbaretévare. Pe kuimbaʼe ohaivaʼekue Salmo 73 ohecha umi iñañáva ndojepyʼapyiha mbaʼevére ha oimoʼã haʼekuéra ovyʼaveha, upévare oikoséma avei haʼekuéraicha. Péro oho rire ‘Ñandejára róga guasúpe’ okambia opensa lája (Sal. 73:3-5, 17, ÑÑB). Mbaʼérepa? Ojeheʼávo umi hekopotĩvare ohechakuaa mombyry oganaha ojapóvo Ñandejára rembipota (Sal. 73:28). Ñande avei ndajajavýiramo ni peteĩ rreunión ñañemog̃uivéta Jehováre ha ñande jerovia imbaretevéta.

Ñaipytyvõ ñande rapichápe. Jehová heʼimavaʼekue Caínpe okambia hag̃ua ohechakuaárõ guare hese ndaijaʼeiha iñermánore, ha heʼi chupe: ‘Ejapo pe iporãva’ (Gén. 4:7). Mbaʼéichapa ñande ikatu avei jajapo pe iporãva? Jesús heʼivaʼekue: ‘Rehayhuvaʼerã Jehová nde Járape nde pyʼaite guive, ne ánga rugua guive, ha opa ne arandukue reheve ha rehayhuvaʼerã nde rapichápe nde rejehayhuháicha’ (Mat. 22:37-39). Ñañemeʼẽmbaitéramo Jehová servísiope ha ñaipytyvõrõ ñande rapichápe javyʼáta ha ndajaikomoʼãi ñaenvidia ótrope. Jajapórõ Ñandejára oipotáva ha ñamboʼéramo la Biblia umi héntepe katuete ‘Jehová ñanderovasáta’ (Pro. 10:22).

‘Javyʼa umi ovyʼáva ndive’ (Rom. 12:15). Jesús ovyʼavaʼekue hemimboʼekuéra ndive oho porãitérõ guare chupekuéra predikasiónpe. Heʼi voi haʼekuéra ojapotaha heta mbaʼe haʼe ndaikatumoʼãiva ohupyty (Luc. 10:17, 21; Juan 14:12). Ñande jaservíva Jehovápe ningo ndajaikói ñapuʼãmba ojuehe, javyʼa guei jahecháramo ñane ermánope oho porãha (1 Cor. 12:25, 26). Upévare oñemeʼẽrõ peteĩ ermánope ambue tembiapo kongregasiónpe jaguerohoryvaʼerã chupe ha ani ñandepochýma voi hese.

ÑAÑATENDE MEMÉKENA

Ñaimoʼãʼỹre ikatu jeýma ñaenvidia ñande rapichápe. Cristina heʼi voi: “Che ningo añatende meme vaʼerã chejehe, ndajapóirõ upéicha aipota tarovaite jeýtama ótro orekóva”. Ha José omombeʼu avei mbaʼéichapa oĩ koʼág̃a, haʼe heʼi: “Jehová chepytyvõ aguerohory hag̃ua umi mbaʼe porã ojapóva pe ansiáno. Añehaʼã rupi aĩ porã Jehovándi napensavéima yma guaréicha”.

Ñaneenvidiósoramo jahejahína upe “mbaʼe ñande rete ojaposéva” ipuʼaka ñanderehe. Péro jajaposéramo Jehová rembipota ñañehaʼãvaʼerã pono oiko upéva (Gál. 5:19-21, NM). Upéicharõ javyʼavéta ha Jehová, ñande Ru yvagapegua ñandeguerohorýta.

[Nóta]

[Komentário oĩva páhina 17-pe]

‘Javyʼa umi ovyʼáva ndive’