“Ani reperde tiémpo remombeʼu hag̃ua pe marandu.” (2 TIM. 4:2, NM)

IKATÚPA REMYESAKÃ?

Mbaʼérepa tekotevẽte vaʼekue ojepredika síglo primérope?

Mbaʼépa ñanepytyvõta ani hag̃ua japerde tiémpo?

Mbaʼérepa tekotevẽvéntema ñamombeʼu koʼág̃arupi pe marandu porã oñeʼẽva Ñandejára Rréinore?

1, 2. Mbaʼépa ñañeporandu jaikuaávo Pablo heʼivaʼekue?

 UMI tapicha ombaʼapóva oporosalva hag̃ua ndoperdéi tiémpo. Pór ehémplo, umi vombéro pyaʼeterei oho oñehenóiramo chupekuéra oikuaágui ikatuha oĩ omanóva ndojapuráiramo.

² Ñande testígo de Jehová ñaipytyvõse avei ñande rapichakuérape ojesalva hag̃ua. Upévare, japerdeʼỹre tiémpo ñamombeʼu pe marandu porã oñeʼẽva Ñandejára Rréinore. Péva ndeʼiséi jajapotaha pyaʼe pyaʼe, japytuʼuʼỹre. Mbaʼépa heʼisevaʼekue Pablo ohaírõ guare “Ani reperde tiémpo remombeʼu hag̃ua pe marandu”? (2 Tim. 4:2.) Mbaʼépa heʼise japredika japerdeʼỹre tiémpo? Mbaʼérepa tekotevẽvéntema japredika koʼág̃a?

MBAʼÉREPA JAPREDIKAVAʼERÃ JAPERDEʼỸRE TIÉMPO

3. Mbaʼépa ikatu ojehupyty pe predikasión rupive ha mbaʼépa oikóta ndajajapóiramo?

³ Ñapensáramo mbaʼépa ikatu ojehupyty pe predikasión rupive ha mbaʼépa oikóta ndajajapóiramo, jahechakuaáta tekotevẽtereiha ñamombeʼu pe marandu porã ñande rapichakuérape (Rom. 10:13, 14). Ñandejára heʼi: “Che haʼéramo peteĩ heko [añávape]: ‘Añetehápe remanóta’; ha haʼe oñembyasývo ojapo vai haguére ha opoíramo hembiapo vaígui ojapo hag̃ua che rembipota, [...] katuete oikovéta ha nomanomoʼãi. Noñemomanduʼamoʼãi chupe mbaʼeveichagua tembiapo vai ojapovaʼekuére” (Eze. 33:14-16, ÑÑB). Jehová opromete opavave omoherakuãvape pe marandu porã: ‘Nde voi rejesalváta ha avei umi nerendúva’ (1 Tim. 4:16, BNP; Eze. 3:17-21).

4. Mbaʼérepa tekotevẽte kuri Timoteo omombeʼu Ñandejára marandu operdeʼỹre tiémpo?

⁴ Ñantende hag̃ua mbaʼérepa Pablo heʼi Timotéope opredika hag̃ua operdeʼỹre tiémpo, ñahesaʼỹijovaʼerã pe téysto omopyendáva ko artíkulo ha avei umi  versíkulo oúva upe rire. Upépe heʼi: “Ani reperde tiémpo remombeʼu hag̃ua pe marandu, tahaʼe iporã térã ivai jave. Katupyrýpe eporohekomboʼe ha pasiénsia reheve eñemoñeʼẽ ha eporokorrehi. Og̃uahẽta hína ára avave nohendusemoʼãiha mboʼepy iporãva. Upéva rangue, ojapóta chupekuéra ogustávante ombyatývo ijerére umi mboʼehára heʼíva haʼekuéra ohendusévante, ha omboykéta hikuái pe añetegua” (2 Tim. 4:2-4, NM). Jesús heʼivaʼekue oĩtaha umi oñemoĩva Ñandejárare (Mat. 13:24, 25, 38). Upévare tekotevẽvéntema kuri Timoteo ‘omombeʼu pe marandu’ kongregasiónpe ani hag̃ua ojegueroviauka kristianokuérape umi japu oñemboʼéva. Upéicharõmante haʼekuéra ojesalváta. Mbaʼépa jaʼekuaa ñane tiémpore?

5, 6. Mbaʼépa oguerovia umi hénte jatopáva predikasiónpe?

⁵ Ñane tiémpope hetavéntema oĩ umi omboʼéva japu (2 Tes. 2:3, 8). Mbaʼe mbaʼépa ohenduse umi hénte? Heta hendárupi oĩ ogueroviáva pe evolusión. Jaikuaaháicha, upéva omboʼe umi sientífiko, péro ojoguáma peteĩ rrelihiónpe, umi hénte oñemohatãgui upe ogueroviávape. Upéicha rupi omboykéma Ñandejárape ha nomombaʼevéi hapichakuérape. Heta oĩ avei ogueroviáva Ñandejára ndojepyʼapyiha ñanderehe ha upévare natekotevẽiha ñande ñañemoag̃ui hese. Mbaʼérepa umi tapicha ohendu umi mbaʼe omomombyrýva chupekuéra Ñandejáragui? Haʼetégui ojeʼéva chupekuéra: “Ejapo katu rejaposéva, ndaipóri ohekyivaʼerã ndéve mbaʼeve”. Ha upéva ogusta umi héntepe (elee Salmo 10:4).

⁶ Péro oĩ ambue mbaʼe ohenduséva umi hénte. Umi ohóva gueteri tupaópe, ovyʼa umi omoakãva heʼíramo chupekuéra: “Ejapo katu ejaposéva, Ñandejára nderayhu”. Umi paʼi ha pastorkuéra heʼi umi hénte ohendusévante, pór ehémplo tekotevẽha osegi umi kostúmbre irrelihionpegua, oho misahápe, ojapo arete ha omombaʼeguasu umi taʼanga Ñandejára ovendesi hag̃ua chupekuéra. Koʼã hénte ndoikuaaiete mbaʼépa ohaʼarõ chupekuéra! (Sal. 115:4-8.) Péro ñande ikatu ñaipytyvõ koʼã tapichápe oikuaa hag̃ua mbaʼépa omboʼe la Biblia ha ohupyty hag̃ua umi mbaʼe porã oguerútava Ñandejára Rréino. Upéicha ikatúta opáy hikuái térã ojapo Jehová rembipota.

MBAʼÉPA HEʼISE JAPREDIKA JAPERDEʼỸRE TIÉMPO

7. Mbaʼéichapa jahechauka ndajaperdeiha tiémpo?

⁷ Peteĩ doktór ikatupyrýva ningo oñatende porã ha ndoperdéi tiémpo ojapo jave peteĩ operasión ani hag̃ua omano ipasiénte. Upéicha avei japredika jave ñañatende porã ñane rembiapóre japerdeʼỹre tiémpo. Upearã ñapensa mbaʼe rehépa ñañeʼẽkuaa, mbaʼépa ikatu ñaporandu ha mbaʼe informasiónpa ogustavéta umi héntepe. Avei ikatu jahecha mbaʼe órapa opyta porãvéta chupekuéra oñatende hag̃ua ñanderehe (Rom. 1:15, 16; 1 Tim. 4:16).

8. Mbaʼépa jajapóta jahechakuaáramo saʼimaha ñane tiémpo?

⁸ Jahechakuaárõ saʼimaha ñane tiémpo, katuete ñamotenondéta umi mbaʼe iñimportantevéva (elee Génesis 19:15). Pór ehémplo, ñapensamína jajapoukaha peteĩ análisis. Upéi pe doktór heʼi ñandéve nosẽporãiha ha jarekoha un més ñañepohãnoka hag̃ua. Mbaʼépa jajapóta? Ñasẽtapa jadipara upégui ojapoháicha peteĩ vombéro ohóva ombogue tata? Nahániri, katuete japytáta ñahendu porã pe doktór heʼíva, upéi jaháta ñande rógape ha jadesidíta mbaʼépa tekotevẽve jajapo.

9. Mbaʼérepa jaʼekuaa Pablo ndoperdéi hague tiémpo opredika hag̃ua oĩ aja Éfesope?

⁹ Pablo ohaírõ guare umi ansiáno Efesoyguápe ohechauka ndoperdéi hague tiémpo opredika hag̃ua Ásiape (elee Hechos 20:18-21). Amalisia og̃uahẽha ára guive opredikáma umi héntepe hogaitépe. Avei dos áño pukukue “ára ha ára ojapo diskúrso Tirano  mboʼehaópe” (Hech. 19:1, 8-10). Upéicha umi mbaʼe ojapóvare káda día, ohechauka omotenondeha pe iñimportantevéva. Ha heʼírõ guare ndajaperdeivaʼerãha tiémpo, ndeʼíri ñanemboapura hag̃ua, síno oipota opa mbaʼe ári ñamotenonde pe predikasión.

10. Mbaʼérepa javyʼavaʼerã oĩ haguére kristiáno yma guive ohechakuaáva tekotevẽtereiha ojepredika?

¹⁰ Áño 1914 mboyve guivéma umi Estudiánte de la Biblia ohechauka ndoperdeiha tiémpo opredika hag̃ua. Mbovýramo jepe hikuái, ohechakuaa tekotevẽtereiha oñemyerakuã pe marandu porã ha kyreʼỹme omombeʼu hikuái. Upearã haʼekuéra oguenohẽ diskúrso heta diáriope ha ohechauka heta hendárupi pe “Foto-Drama de la Creación”, haʼetéva peteĩ pelíkula. Upéicha omog̃uahẽ hikuái pe marandu porã hetaitereípe. Ñapensamíntena, koʼã ermáno ndohechakuaáirire tekotevẽha opredika operdeʼỹre tiémpo, ndajaikuaái ikatúnepa raʼe ñande ñahendu pe marandu oñeʼẽva Ñandejára Rréinore (elee Salmo 119:60).

AKÓINTEKE JAHECHAKUAA JAPREDIKAVAʼERÃHA

11. Mbaʼérepa oĩ kristiáno ndohechakuaavéiva tekotevẽtereiha japredika?

¹¹ Heta mbaʼe ikatu ñanderesarea ha upéicha rupi ndajahechakuaavéi iñimportantetereiha pe predikasión. Ko múndo oĩva Satanás poguýpe oipota jaiko ñandejupe g̃uarãnte ha ñamotenonde umi mbaʼe naiñimportanteguasúiva (1 Ped. 5:8; 1 Juan 2:15-17). Heta kristiáno oĩ áñore omotenondevaʼekue Jehová servísio ha upéi ou ndohechakuaavéi tekotevẽtereiha japredika japerdeʼỹre tiémpo. Upéva oikovaʼekue peteĩ kristiánore síglo primeroyguáre, hérava Demas. Haʼe ombaʼapo kyreʼỹ kuri Páblondi, péro upéi oho pe múndo oikuaveʼẽva rapykuéri. Ha omoirũ rangue pe apóstolpe upe tiémpo ijetuʼuetévape, osẽ oheja rei chupe (File. 23, 24; 2 Tim. 4:10).

12. Mbaʼépa jajapovaʼerã koʼág̃a, ha mbaʼépa ikatu jaheja amo gotyove g̃uarã?

¹² Akóinte jahechakuaavaʼerã tekotevẽha japredika, upearã ñañatendevaʼerã ani jaipota térã jajapo umi mbaʼe hoʼupa reítava ñane tiémpo. Ñañehaʼãmbaitevaʼerã koʼág̃a, ikatu hag̃uáicha amo gotyove ‘jahupyty pe jeikove añeteguáva’ (1 Tim. 6:18, 19). Pe múndo pyahúpe jaikovéta opa árare ha jarekóta tiémpo jajapo hag̃ua opa mbaʼe ñandegustáva. Péro ko tiémpope añoite ikatuhína ñaipytyvõ ñande rapichakuérape ani hag̃ua oñehundi pe Armagedónpe. Ko tembiapo ndaikatúi jaheja amo gotyove g̃uarã.

13. Ñasẽ rire pytũmbýgui, mbaʼépa ñanepytyvõta jaiporukuaa hag̃ua pe tiémpo hembýva?

¹³ Ko múndope umi hénte ndojapói Jehová rembipota, upévare tekotevẽ ñañatende porã ani hag̃ua jake haʼekuéraicha. Ñanemanduʼavaʼerã ñande avei ñaime hague pytũmbýpe, péro peteĩ árape oĩ ñanemombáyva ha upe guive, heʼi haguéicha apóstol Pablo, umi mbaʼe jaikuaáva Crístogui ñanderesape. Upéicha rupi, koʼág̃a ñande avei ikatu ñaguenohẽ pytũmbýgui ñande rapichakuérape (elee Efesios 5:14). Upe rire Pablo ohai: “Pemaʼẽ porã mbaʼéichapa peikovaʼerã, ha ani peiko oikoháicha umi noñatendéiva, peiko uvei iñarandúvaicha. Peiporukuaa pe tiémpo hembýva koʼã ára ivaieterei rupi” (Efe. 5:15, 16, NM). Jaiporupaitéke “pe tiémpo hembýva” jajapo hag̃ua Ñandejára rembipota. Upéva ñanepytyvõta ñañatende porã hag̃ua jaikóvo ko múndo añáme ha ani hag̃ua jake.

JAIKO PETEĨ TIÉMPO IÑIMPORTÁNTEVAPE

14-16. Mbaʼérepa tekotevẽvéntema koʼág̃a japredika?

¹⁴ Ymaite guive tekotevẽ vaʼekue oñemombeʼu pe marandu porã ojeperdeʼỹre tiémpo, péro koʼág̃a tekotevẽvéntema. Áño 1914 guive ojehecha mbaʼéichapa oñekumpli umi profesía oĩva la Bíbliape (Mat. 24:3-51).  Yvyporakuéra ningo neʼĩrava gueteri oiko peteĩ tiémpo peichaite peve ipeligrósovape. Pór ehémplo, umi tetã imbaretevéva heta vése oñekompromete omoĩtaha pyʼaguapy ko yvy ape ári, upéicharõ jepe oreko hikuái 2000 árma nukleár rupi, oĩva ojeporu hag̃uáicha oimeha órantema. Heta mburuvicha heʼi avei hetaiterei árma “okañy hague”. Noiméipa koʼã árma hoʼa umi terrorísta pópe? Oĩ heʼíva ko Yvy ikatuha oñehundi umi terrorísta omoñepyrũramo peteĩ gérra. Péro ndahaʼéi hína umi ñorairõ añónte oapeligráva yvyporakuérape.

¹⁵ Áño 2009-pe, peteĩ rrevísta hérava The Lancet ha pe University College de Londres omombeʼu ko Yvy tuicha okambiaha ko síglo 21-pe, pór ehémplo hakueterei térã roʼyeterei, ou ama guasu, torménta ha oiko heta sarambi opárupi. Pe rrevísta heʼi: “Koʼã áño oúvape umi kámbio operhudikáta hetave tapichápe, oguerukuaa mbaʼasy ha hetaiteve mbaʼe ikatúva oporombyai”. Heta lugár oñehundíta ojagarrapa rupi y, oikógui ama guasu, torménta vai térã ojupígui pe már. Oĩta avei heta mbaʼasy, oúta séka puku ha umi tetã katu oñorairõta y, tembiʼu térã ambue mbaʼére. Péicha jahecha umi sarambi ha ñorairõ oapeligraha yvyporakuérape.

¹⁶ Ikatu oĩ opensáva oikóramo peteĩ gérra nukleár oñepyrũtaha oñekumpli “umi mbaʼe” la Biblia heʼivaʼekue. Péro hetaiterei tapicha nontendéi mbaʼéichapa oiko Jesús heʼivaʼekue. Añetehápe, are guivéma oñekumpli oúvo koʼã mbaʼe ohechaukáva Jesús oisãmbyhymaha ha koʼẽrõitéma oñehunditaha ko múndo vaiete (Mat. 24:3) Neʼĩrava ojehecha peichaite peve oñekumpliha umi profesía. Upévare tekotevẽterei opavave opáy térã ojapo Ñandejára rembipota, ha pe predikasión rupive ñaipytyvõta chupekuéra.

17, 18. a) Mbaʼéichapa ñanepytyvõ jaikuaávo “mbaʼe árapepa jaiko”? b) Mbaʼéicha rupípa heta tapicha ohechakuaa tekotevẽha oñemoag̃ui Ñandejárare?

¹⁷ Saʼíma pe tiémpo hembýva jahechauka hag̃ua jahayhuha Jehovápe ha ñamohuʼã hag̃ua pe tembiapo omeʼẽvaʼekue ñandéve koʼã ára pahápe g̃uarã. Jahecha mbaʼeichaitépa iñimportánte ko tiémpope Pablo heʼivaʼekue umi kristiáno Romayguápe: “Peẽ peikuaa mbaʼe árapepa jaiko ha og̃uahẽmaha [óra] japáyvo jakehágui. Ñande [salvasión] koʼág̃a hiʼag̃uivéma jajerovia ypýramo guarégui” (Rom. 13:11, JMP).

¹⁸ Ikatu heta tapicha oñemoag̃uise Ñandejárare ohechávo umi mbaʼe oikóva koʼã ára pahápe. Oĩ ohechakuaáva ñande yvypóra ñaikotevẽha peteĩ ñanepytyvõvaʼerã ohechávo umi goviérno ndojapoiha mbaʼeve osolusiona hag̃ua umi provléma ekonómiko. Haʼekuéra ndaikatúi ojoko umi ojapóvape mbaʼe vai hapicháre, umi ombyaipáva ñande Yvy, ni umi ojapóvape vómba nukleár. Ambue katu oñemoag̃uise Ñandejárare ohasa rire peteĩ mbaʼe ijetuʼúva hogapýpe, pór ehémplo ou hasy, ojopoi térã omano haguére peteĩ ohayhúva. Ñasẽvo japredika ikatúta ñaipytyvõ porã koʼãichagua tapichápe.

JAPREDIKÁKE JAPERDEʼỸRE TIÉMPO

19, 20. Mbaʼépa ojapo heta ermáno ohechávo tekotevẽtereiha japredika japerdeʼỹre tiémpo?

¹⁹ Heta kristiáno ohechakua rire tekotevẽha japredika japerdeʼỹre tiémpo, oñehaʼã ojapo ikatúva guive Jehová servísiope. Pór ehémplo, Ecuadórpe, áño 2006-pe oiko rire pe Aty Guasu un diagua hérava “Jajesareko meme vaʼerã peteĩ mbaʼére añónte”, peteĩ ermáno ha hembireko odesidi omboyke heta mbaʼe ha opyta umi mbaʼe oikotevẽvarente. Haʼekuéra oikókuri peteĩ apartaménto tuichávape, upéi omoĩ peteĩ lístape mbaʼe mbaʼépa noikotevẽvéima ha tres mése rire ova hikuái upe oikohágui peteĩ apartaménto michĩvévape, ovende umi mbaʼe noikotevẽguasúiva ha opagapa ideveha. Upe riremínte oñepyrũ ojapo hikuái prekursorádo auxiliar. Upéi pe superintendénte heʼi chupekuéra  ikatuha oservi peteĩ kongregasión oñekotevẽvehápe maranduhárare, ha ojapo hikuái upéva.

²⁰ Peteĩ ermáno Estados Unidosgua ohai: “Oikórõ guare pe Aty Guasu áño 2006-pe, ojapóma 30 áño che rembireko ha che rojevautisa hague. Rojukuévo ógape, roñemongeta mbaʼéichapa rojapóta umi mbaʼe rohenduvaʼekue pe aty guasúpe ha rodesidi roñehaʼãtaha roiko umi mbaʼe roikotevẽmívarente (Mat. 6:19-22). Roguerekovaʼekue mbohapy óga, heta yvy ha veíkulo porã porã, peteĩ láncha ha peteĩ kása rrodánte. Ropensa ndorojapoiha ikatúva guive Jehová servísiope, ikatuha romeʼẽve orejehegui ha upémarõ rodesidi rombaʼapove chupe g̃uarã. Áño 2008-pe romoirũ che rajýpe rojapóvo prekursorádo rregulár. Hetaitéma ningo rovyʼa rombaʼapo kyreʼỹ haguére ermanokuéra ndive! Péicha roservi oñekotevẽhápe maranduhárare ha rojapo rupi koʼã mbaʼe roñandu roñemoag̃uiveha Jehováre. Romombaʼeterei rohechávo mbaʼéichapa umi hénte hova rory asy ohendúvo ha ontendévo umi mbaʼe porãita oĩva la Bíbliape”.

21. Mbaʼépa ñanemokyreʼỹ japredika hag̃ua japerdeʼỹre tiémpo?

²¹ Jaikuaaháicha koʼẽrõitéma og̃uahẽta pe ‘huísio ára ha umi hekove vaíva oñehunditaha ára’ (2 Ped. 3:7, BNP). Jaikuaa rupi mbaʼépa heʼi Ñandejára Ñeʼẽ, ñanekyreʼỹ ñamombeʼu hag̃ua opárupi hiʼag̃uimbaitemaha pe jehasa asy guasu ha upe rire oĩtaha peteĩ múndo pyahu. Jahechakuaa tekotevẽtereiha ñamombeʼu umi héntepe umi mbaʼe porãita katuete oñekumplítava koʼẽrõite. Jasegíramo japredika japerdeʼỹre tiémpo, jahechaukáta jahayhuha Jehovápe ha ñande rapichakuérape.

[Porandu ñahesaʼỹijóva]