Opa rire pe segundo día de asambléa de distríto, Josué, ombaʼapóva Betélpe oĩva Méxicope, oho ojepasea ambue ermáno ndive pe táva Querétarore. Javier ha Maru, peteĩ matrimónio Colombiaygua oĩva de visíta, ojerure Josuépe oguenohẽmi hag̃ua chupekuéra peteĩ fóto. Josué ha iñamigokuéra oñemonde porã ha oreko rupi pe tarhéta de solápa, pe paréha oporandu chupekuéra oúpa peteĩ kolasionhágui térãpa peteĩ fiésta iñimportántevagui. Josué heʼi chupekuéra ouha peteĩ Aty Guasuhágui ojapóva testigos de Jehová ha oinvita chupekuéra oho hag̃ua pe domingo.

Ndorekói rupi ao upeicharãicha, upe paréha heʼi oñeñandu vaitaha upe lugárpe. Upéicharamo jepe, Josué omombeʼu chupekuéra héra ha omeʼẽ Betel teléfono número.

Cuatro mése haguépe, Josué oikuaa peteĩ notísia iporãitereíva: Javier ha Maru, oikóva upérõ Ciudad de Méxicope, ohenói chupe omombeʼu hag̃ua oho hague pe Aty Guasuhápe ha oipotaha testigos de Jehová ovisita chupekuéra. Upe riremínte, oñemoñepyrũ peteĩ estúdio vívliko hendivekuéra, ha pyaʼe voi ohóma hikuái rreunionhápe. Diez mése haguépe oikóma chuguikuéra maranduhára. Upe rire ova hikuái Toróntope (Canadá), upépe osegi oñakãrapuʼã ha ojevautisa.

Tiémpo rire, Javier oguerahauka Josuépe peteĩ kárta omombeʼuhápe mbaʼépa omomýiraʼe chupe oiko hag̃ua chugui Testígo. Haʼe ohai: “Pe Aty Guasu mboyve roʼékuri che rembirekóndi tekotevẽha roñemoag̃ui Ñandejárare. Peẽ ningo peñemonde porãiterei kuri, upévare ropensa oiméne hague iñimportánte upe rreunión peho hague. Pe asambleahápe roguerohoryeterei opavave ojeporta porã ha orepytyvõ haguére rotopa hag̃ua ore rendag̃ua ha roheka hag̃ua umi téysto la Bíbliape. Avavépe nomolestái roho haguére ore ao turísta reheve”.

Añetehápe Josué rehe oiko rréi Salomón heʼivaʼekue: ‘Eñemitỹ pyharevekue guive kaʼaruete peve, ndereikuaáiko moõitépa osẽ porãta, pe oñeñotỹ raẽ vaʼekuépa térãpa upe rireguáva, ỹrõ katu mokõivéva’ (Ecl. 11:6). Nde piko ikatu avei reñemitỹ reinvitávo ambue tapichápe peteĩ Aty Guasurã térã peteĩ diskúrso puvlikorã? Aníkena nderesarái Jehová ikatuha ojevale nderehe omoag̃ui hag̃ua ijehe umi tapicha oikotevẽ asývape hese, oiko haguéicha Javier ha Maru rehe (Isa. 55:1).

[Nóta oĩva taʼanga ndive páhina 32]

De iskiérda a derécha: Alejandro Voeguelin, Maru Pineda, Alejandro Pineda, Javier Pineda ha Josué Ramírez, Betélpe (México)