1-3. a) ¿Mbaʼe ehémplopa ojogua Jesús omboʼevaʼekuépe? b) ¿Mbaʼépa iporã ñambohovái?

 EPENSAMÍNA peteĩ tapicha ipuésto yvatéva ojerureha ndéve regueraha hag̃ua chupe nde veíkulope peteĩ kompromíso iñimportántevape. Péro resẽ mboyvemi rehechakuaa sapyʼa saʼiha ne kombustívle, upémarõ pyaʼe reho rekarga. Upe aja, pe karai ipyʼaropútama, omaña ágotyo pégotyo. Ha nderejúimarõ, ojeruréntema ótrope ogueraha hag̃ua chupe. Upéi hasýpe reg̃uahẽ rire, nderetopavéima katu hese. ¿Mbaʼéichapa reñeñandúne?

² Koʼág̃a epensami nde haʼeha pe tapicha ipuésto yvatéva ha reiporavoha mbohapy kuimbaʼe ijeroviapýva ojapo hag̃ua ndéve heta tembiapo iñimportánteva. Upéi ere porã chupekuéra mbaʼépa ojapovaʼerã, ha mbohapyvéva upepete voi oñekompromete okumplitaha nendive. Péro reju jeývo, retopa mokõinte ombaʼapo hague. Peteĩva katu ni ikuã nomonguʼéi ha heʼi guaʼu ndaikatúi hague ombaʼapo. ¿Mbaʼépa rejapóne?

³ Jesús avei oiporu koʼãichagua ehémplo oñeʼẽrõ guare umi vírhen ha umi talénto rehe. Péicha ohechauka mbaʼérepa koʼã ára pahápe oĩta kristiáno unhído ijeroviapy ha iñakãguapýva, ha avei umi naiñeʼẽrendúiva (Mat. 25:1-30). a Koʼã ehémplo rupive omyesakã porã peteĩ mbaʼe iñimportantetereíva. Heʼívo: “Peñatende porãke peikóvo, cháke ndapeikuaái mbaʼe día ni mbaʼe óratapa”, ohechauka ndajaikuaaiha arakaʼetépa haʼe ohundíta ko múndo aña (Mat. 25:13). Umi mbaʼe Jesús heʼivaʼekue ideprovechoiterei ñandéve koʼág̃a rupi. ¿Mbaʼéichapa ñanepytyvõta jajapóramo haʼe heʼíva ha ñañatende porãrõ? ¿Máva mávapa  ohechauka oĩmaha ojesalva hag̃uáicha? ¿Ha mbaʼépa jajapovaʼerã akóinte ñañatende porã hag̃ua?

4. ¿Mbaʼérepa kristianokuéra natekotevẽi jaiko órare ñañatende porã hag̃ua?

⁴ Tekotevẽ ningo jaiko órare ñambaʼapo jave peteĩ fávrikape, jaháta jave doktórpe térã javiaháta jave kolektívope. Péro oĩ tembiapo ndaikatuihápe ñadepende órare. Pór ehémplo, umi vombéro térã umi oporopytyvõva oiko jave sarambi guasu, ndaikatúi ojesarekoiterei órare. Ojapóramo péicha noñatendemoʼãi hembiapóre ha ikatu oĩ omanóva upevakuére. Péicha jave pe óra naiñimportanteguasúi, síno tekotevẽterei oñeñatende porã umi mbaʼe ojejapóvare. Koʼág̃a avei hiʼag̃uivémarõ Ñandejára ára guasu, koʼýte ñambaʼapo meme vaʼerã ñamombeʼu hag̃ua mbaʼépa Jehová ojapo ñandesalva hag̃ua. Péro kristianokuéra natekotevẽi jaiko órare ñañatende porã hag̃ua. Ikuentave voi ndajaikuaái mbaʼe día ha mbaʼe órapa og̃uahẽta huʼãme ko múndo aña, ha upéva ñanepytyvõ cinco hendáicha.

5. ¿Mbaʼérepa jaʼekuaa ikatuha jahechauka oĩva ñande pyʼapýpe ndajaikuaáivo arakaʼépa oñehundíta ko múndo?

⁵ Primero, ndajaikuaáivo arakaʼépa oñehundíta ko múndo aña, ikatu jahechauka mbaʼépa oĩ ñande pyʼapýpe. Jehová ñanemombaʼe ha upévare oheja ñandete jadesidi ñaneñeʼẽrendútapa chupe térãpa nahániri. Avave ningo nañamanoséi ág̃a ko múndo oñehundi vove, péro jahechaukavaʼerã jaserviha Jehovápe jahayhúgui chupe, ndahaʼéi jahupytységuinte jeikove opaʼỹva (elee Salmo 37:4). Ñande jajapo Haʼe oipotáva ñandegusta rupi, ha jaikuaa opa mbaʼe ñanemboʼéva ou porãtaha ñandéve (Is. 48:17). Umi mbaʼe omandáva ndaipohýiri ñandéve g̃uarã (1 Juan 5:3).

6. ¿Mbaʼéichapa oñeñandu Jehová jaservíramo chupe ñande pyʼaite guive, ha mbaʼérepa?

⁶ Segundo, ndajaikuaái rupi arakaʼépa oñehundíta ko múndo aña, ikatu ñambopyʼarory Jehovápe. Péicha ndajaikomoʼãi jaservi Ñandejárape ñapenságui pe fécharente ni umi mbaʼe ikatúvare omeʼẽ ñandéve. Jaservíramo Jehovápe jahayhúgui chupe, haʼe ikatúta ohechauka Satanás ijapuha (Job 2:4, 5; elee Proverbios 27:11). Jahecha rire umi mbaʼe vaieta Satanás ojapóva ha ombohasa asyetéva yvyporakuérape, koʼýte ñadefende Jehová goviérno ha ndajajapói Satanás oipotáva.

7. ¿Mbaʼérepa nde ere iporãha ñandesakrifikadove?

⁷ Tercero, ndajaikuaái rupi arakaʼetépa oñehundíta ko múndo aña, ñanekyreʼỹve ñandesakrifikádo hag̃ua. Koʼág̃a rupi heta hénte ndojeroviái Ñandejárare, péro okyhyje oikórõ g̃uarã peteĩ sarambi guasu ha oñehundiete ko múndo. Upévare opensa hikuái: “Jakaru ha ñamokõ, cháke koʼẽrõ ñamanóta” (1 Cor. 15:32, NM). Ñande jaservíva Jehovápe katu ndajakyhyjéi oikórõ g̃uarã upéva. Ndajaikói ñañemohaʼeño térã ñapensa ñandejehénte (Prov. 18:1). Upéva rangue, jaiporupaite ñane tiémpo, ñane mbaretekue ha umi mbaʼe jarekóva ikatu hag̃uáicha japredika pe marandu porã oñeʼẽva Ñandejára Rréinore (elee Mateo 16:24). Javyʼa jaservívo Jehovápe ha koʼýte ñaipytyvõ jave ñande rapichakuérape oikuaa hag̃ua chupe.

8. ¿Mbaʼe ehémplopa ohechauka jajeroviavevaʼerãha Jehováre ha Iñeʼẽre?

⁸ Cuarto, ndajaikuaái rupi arakaʼetépa oñehundíta ko múndo aña, ikatu jajeroviave Jehováre ha avei ñanepytyvõ jajapo hag̃ua Iñeʼẽ heʼíva. Ñande ningo ñaneimperfékto ha upévare jajeroviaseterei ñandejehe. Pablo heʼivaʼekue kristianokuérape: “Pe opensáva oñemboʼyha, toñatendéke ani hoʼa”. Haʼe imanduʼa avei umi 23.000 isrraelíta  omanovaʼekuére Josué tiémpope, oike potaitérõ guare hikuái pe Yvy Oñeprometevaʼekuépe. Pablo ohai: “Koʼã mbaʼe [...] ojehai ñanerekomboʼe hag̃ua ñandéve, jaikóva hína ko múndo ára pahápe” (1 Cor. 10:8, 11, 12, NM).

9. ¿Mbaʼéichapa umi mbaʼe ijetuʼúva omombareteve ñande jerovia ha ñanemoag̃uive Jehováre?

⁹ Quinto, ndajaikuaái rupi arakaʼetépa oñehundíta ko múndo aña, ikatu jagueropuʼaka umi mbaʼe ijetuʼúva ha upéicha ñamombareteve ñande jerovia (elee Salmo 119:71). Jahechaháicha, koʼã ára paha “ijetuʼueterei ha hasy jagueropuʼaka” (2 Tim. 3:1-5, NM). Ko múndo oĩva Satanás poguýpe ndaijaʼéi ñanderehe ha ikatu oĩ ñandepersegíva (Juan 15:19; 16:2). Péro ñanderekomirĩ ha jahejáramo Jehová ñanesãmbyhy, ikatúta ñaaguanta umi mbaʼe ipohýiva ha upéva ñanepytyvõta ñamombareteve hag̃ua ñande jerovia. Koʼẽ koʼẽre ningo ñañemoag̃uivéta Jehováre ñaimoʼãʼỹháicha ha arakaʼeve ndajahejamoʼãi chupe (Sant. 1:2-4; 4:8).

10. ¿Mbaʼérepa sapyʼánte haʼete pe tiémpo ovevéva?

¹⁰ Sapyʼánte ñandéve g̃uarã pyaʼe ohasa pe tiémpo. Pór ehémplo, ñanerembiapoiterei jave, pyaʼe ohasa pe óra. Péicha avei, jajesarekóramo pe tembiapo Jehová omeʼẽvare ñandéve, ikatu pe día ha óra ko múndo oñehunditaha pyaʼeterei og̃uahẽ. Heta unhído ohechauka ojesareko memeha pe tembiapo Jehová omeʼẽvare chupekuéra. Jahechamína mbaʼépa oiko Jesús oñepyrũre oisãmbyhy áño 1914-pe. Upérõ oĩvaʼekue unhído ohechaukáva oñatende porãha ha oĩ katu nahániriva.

11. ¿Mbaʼérepa áño 1914 rire oĩ unhído oimoʼãva pe Nóvio imbegueha?

¹¹ Ñanemanduʼami jey umi ehémplo Jesús omoĩvaʼekuére. Umi vírhen térã umi tembiguái oikuaárire arakaʼetépa oúta pe Nóvio térã pe Karai, natekotevẽivaʼerãmoʼã oñatende porã. Péro haʼekuéra ndoikuaái ha ojesareko porãmante vaʼerã. Péicha avei umi unhído oikuaamavaʼekue áño 1914-pe oikotaha peteĩ mbaʼe iñimportánteva, péro nontendeporãinte hikuái mbaʼépa oikóta. Upéicharõ jepe ohaʼarõ kyreʼỹ hikuái upe fécha. Upéi og̃uahẽvo pe áño ha ndoikói haʼekuéra ohaʼarõva, oĩ oimoʼãva pe Nóvio imbegueha. Pór ehémplo peteĩ ermáno heʼi: “Heta oĩ ore apytépe roimoʼãva rohotaha yvágape oikévo octubre [1914]”.

12. ¿Mbaʼéichapa umi unhído ohechauka iñakãguapy ha ijeroviapyha?

¹² Oiméne umi unhído ou ikangy nog̃uahẽimarõ Jehová ára haʼekuéra ohaʼarõha tiémpope. Hiʼarive oñepyrũre primera gérra mundiál oĩma opersegíva chupekuéra. Upéicha ou hikuái nombaʼapovéi Jehovápe g̃uarã, ku okerõguáicha. Péro 1919-pe Jesús ou ohecha mbaʼéichapa ombaʼapo umi kristiáno, ha oĩ ohechaukáva naiñeʼẽrenduiha, upévare ndaikatuvéima ombaʼapo pe Rréipe g̃uarã (Mat. 25:16). Ojogua hikuái umi vírhen iñembotavývape ndokargaivaʼekue aséite ilámparape. Avei pe tembiguái iñateʼỹetévape, ndojesakrifikaséi rupi pe Rréino rehehápe. Péro opavave lénto umi unhído ohechauka iñeʼẽrendu ha oserviseha ipyʼaite guive Jesucrístope, ohasáramo jepe heta mbaʼe ijetuʼúva pe gérra aja.

13. ¿Mbaʼépa ojapo pe tembiguái áño 1914 rire, ha mbaʼépa ojapo oikóvo koʼág̃a rupi?

¹³ Áño 1916-pe ko rrevísta heʼi: “Ñande jaservi Ñandejárape jahayhúgui chupe ha nañanemokangýi umi mbaʼe Haʼe odesidíva, nañandegustáiramo jepe. Ndajajaposéi ningo umi mbaʼe ñantendeháichante. Upévare jahecha rire noñekumpliriha umi mbaʼe ñahaʼarõva 1914-pe, javyʼa jey Ñandejára nokambiái haguére hembipota ñanderehehápente. Ndajaipotáikuri Haʼe  ojapo peteĩ mbaʼe ñande ñahaʼarõ rupínte. Upéva rangue, ñantendese mbaʼépa opensa ha mbaʼépa hembipota”. Ñane tiémpope, umi unhído ohechauka hekomirĩ ha iñeʼẽrenduha. Haʼekuéra ndeʼíri Jehová oiporuha chupekuéra oiporu hagueichaite umi kuimbaʼe ohaivaʼekuépe la Biblia, síno oñehaʼãmbaite okumpli opa tembiapo oñemeʼẽva chupekuéra ko yvy ape ári pe Rréinope g̃uarã. Koʼág̃a rupi umi kristiáno orekóva esperánsa oikovévo opa árare ko yvy ape ári, térã “ambue ovechakuéra” oĩva ‘pe aty guasúpe’, oñatende porã oikóvo ha kyreʼỹme ombaʼapo pe tembiapo Jehová omeʼẽvape (Juan 10:16, NM; Rev. 7:9, ÑÑB).

14. ¿Mbaʼéichapa Jehová oiporu pe tembiguái jeroviaha ha iñarandúvape omombarete hag̃ua ñande jerovia?

¹⁴ Ojapoháicha unhidokuéra, pe aty guasu oñatende porã ohendu rupi umi mbaʼe oúva pe tembiguái jeroviaha ha iñarandúvagui. Pe tembiguái omombarete entéro kristiáno jerovia ha ñanepytyvõ jahechakuaa hag̃ua mbaʼeichaitépa ideprovécho ñandéve Ñandejára Ñeʼẽ (elee Salmo 119:130 ha Juan 16:13). Péicha umi oĩva pe aty guasúpe oñemombarete ha ojepreparáma ojesalva hag̃ua ko múndo oñehundi vove. Ha ohasáramo jepe heta mbaʼe ijetuʼuetereíva, ombaʼapo meme. Pór ehémplo, peteĩ kámpo de konsentrasión násipe, umi ermáno ñepyrũrã oreko peteĩ Bíbliante. Upémarõ ojerure Jehovápe tomeʼẽve chupekuéra umi mbaʼe oikotevẽva omombarete hag̃ua ijerovia. Upe riremínte oikuaa hikuái ojegueru hague upépe peteĩ ermáno hetyma yvyrávape, ha omoinge hague hetymakuápe umi Ñemañaha ipyahuvéva. Peteĩ ermáno unhído oĩvaʼekue upépe hérava Ernst Wauer, heta áño rire omombeʼu: “Jehová orepytyvõ roikuaa hag̃ua de memória umi informasión iporãitéva oĩvaʼekue umi artíkulope”. Ha upéi heʼi: “Koʼág̃a rupi ndahasyiete jareko hag̃ua umi hiʼupy oúva Jehovágui. Péro, ¿ñamombaʼépa umíva? Aikuaa porã Jehová ovendesitaha umi ojeroviávape hese, iñeʼẽrendúva ha oñevenefisiáva umi mbaʼe omeʼẽvagui iñorganisasión rupive”.

15, 16. ¿Mbaʼéichapa Jehová ovendesi peteĩ matrimóniope ikyreʼỹ haguére opredika hag̃ua, ha mbaʼépa ñanemboʼe koʼãichagua ehémplo?

¹⁵ Ambue ovechakuéra ombaʼapo meme  avei Cristo ermanokuérandi opredikávo kyreʼỹme (Mat. 25:40). Haʼekuéra ndojoguái pe ‘tembiguái aña ha iñateʼỹvape’, síno oñemeʼẽmbaite omotenonde hag̃ua Ñandejára Rréino. Pór ehémplo, Jon ha Masákope oñeinvita opredika hag̃ua Kéniape umi oñeʼẽvape chíno. Ñepyrũrã haʼekuéra ndoikuaái mbaʼépa ojapóta, péro oñemboʼe ha ohecha rire isituasión, odesidi ova hikuái.

¹⁶ Jehová tuichaiterei ovendesi chupekuéra. Haʼekuéra omombeʼu: “¡Koʼápe ningo igustoiterei japredika!”. Omoñepyrũ siete estúdio vívliko ha ohasa hetaiterei mbaʼe ombovyʼáva chupekuéra. Haʼekuéra heʼi: “Koʼẽ koʼẽre roagradese Jehovápe orembou haguére koʼápe”. Péicha avei hetaiterei ermáno ohechauka akóinte oserviseha Ñandejárape, ndoikuaáiramo jepe arakaʼépa ko múndo aña oñehundíta. Ñapensamíntena umi ermáno ohóvare Eskuéla de Galaádpe oiko hag̃ua chuguikuéra misionéro. Reikuaaséramo mbaʼépa ohasa umi misionéro ára ha ára, ikatu relee pe artíkulo “Hacemos todo lo que podemos”, osẽvaʼekue La Atalaya 15 de octubre de 2001-pe. Rejapo aja upéva eñeporandumi mbaʼépa ikatu rejapove Jehová servísiope remombaʼeguasu hag̃ua chupe ha revyʼa hag̃ua.

17. ¿Mbaʼéichapa ñanepytyvõ ndajaikuaái rupi pe día ni pe óra?

¹⁷ Jahecha haguéicha, ndajaikuaái rupi pe ára ni pe óra oñehunditaha ko múndo aña ñanepytyvõ heta hendáicha. Jaiko rangue ñapensa ñahaʼarõ reiha ha ñañembyasy upévare, ñañemeʼẽmbaite jajapo hag̃ua Ñandejára rembipota ha ñañandu ñaneag̃uiveha Ñande Ru ñanderayhuetévagui. Ñambaʼapo meméramo ojapoháicha “pe arádo ojagarráva”, ha ndajahejái mbaʼeve ñanderesarea, koʼýte javyʼáta Jehová servísiope (Luc. 9:62, NM).

18. ¿Mbaʼérepa ndajahejaivaʼerã ikangy ñande jerovia?

¹⁸ Hiʼag̃uietereíma ningo Jehová ára guasu, ha ndajafallaséi Jehová ni Jesúspe. Haʼekuéra omeʼẽ ñandéve heta tembiapo iporãva iservísiope koʼã ára pahápe. ¡Ajépa javyʼaite ojerovia haguére ñanderehe hikuái! (Elee 1 Timoteo 1:12.)

19. ¿Mbaʼéichapa jahechauka ñaimeha jajesalva hag̃uáicha?

¹⁹ Jajapókena opa ikatúva japredika ha ñaipytyvõ hag̃ua ñande rapichakuérape oiko hag̃ua chuguikuéra Jesucristo remimboʼe, tahaʼe haʼéva ñane esperánsa, jaikótaramo yvágape térã ko yvy ape ári. Natekotevẽi ningo jaikuaa mbaʼe día ha mbaʼe órapa oñehundíta ko múndo aña. Jahechaukavaʼerã ñaimeha jajesalva hag̃uáicha (Mat. 24:36, 44). Jajeroviáramo Jehováre ñande pyʼaite guive ha ñamotenondérõ Irréino, jaikuaa porã haʼe ndofallamoʼãiha ñanendive arakaʼeve (Rom. 10:11).