Peteĩ jey, rréi David opurahéi: “Ajapose ne rembipota, péva chembovyʼáta che Ruete, ha ne [mandamiénto] oĩ che pyʼapýpe” (Sal. 40:8, ÑÑB). David ohasáramo jepe heta situasión ijetuʼúva oikove aja pukukue, ovyʼaiterei vaʼekue ojapo jave Ñandejára rembipota. Péro ndahaʼéi haʼeñónte ovyʼa vaʼekue omombaʼeguasúvo Ñandejára añeteguápe.

Apóstol Pablo ohechauka vaʼekue Salmo 40:8 oñekumpliha pe Mesías, térã Crístore. Haʼe omombeʼu Jesús oúrõ guare ko múndope heʼi hague: “‘Ndereipotái sakrifísio ni jopói, péro reprepara chéve che reterã. Ndereguerohorýi umi sakrifísio ojehapýva, ni umi sakrifísio ojejapóva pekádore’. Upévare haʼe kuri: ‘¡Péina! Ñandejára, aju ajapo hag̃ua ne rembipota (Ñandejára kuatiañeʼẽme oĩ peteĩ párte oñeʼẽva cherehe)’” (Heb. 10:5-7).

Jesús oikórõ guare ko yvy ape ári ovyʼaiterei vaʼekue ojesarekóvo Jehová kreasión rehe, okompartívo iñamigokuéra ndive ha okaru jave umi ohayhúva ndive (Mat. 6:26-29; Juan 2:1, 2; 12:1, 2). Péro haʼe oñeinteresave ha ovyʼaiteve vaʼekue ojapóvo Itúva yvagapegua rembipota. Ha heʼi voi: “Che rembiʼu hína kóva: Ajapo upe chembou vaʼekue rembipota, ha amog̃uahẽ huʼãme pe tembiapo omeʼẽ vaʼekue chéve ajapo hag̃ua” (Juan 4:34; 6:38). Umi hemimboʼe oaprende vaʼekue chugui mbaʼépa ojapo vaʼerã ikatu hag̃uáicha ovyʼa añete. Haʼekuéra vyʼápe ha kyreʼỹme omog̃uahẽ umi héntepe pe marandu porã oñeʼẽva Ñandejára Rréinore (Luc. 10:1, 8, 9, 17).

Jesús omanda hembiguaikuérape: “Tapeho pemboʼe umi hénte opa tetãyguápe oiko hag̃ua chuguikuéra che disípulo; ha pevautisa Túva, Taʼýra ha espíritu sánto rérape. Ha pemboʼe chupekuéra  ojapo hag̃ua opa mbaʼe amanda vaʼekue peẽme. Ha ¡péina!, aiméta penendive opa ára, og̃uahẽ meve huʼãme ko múndo ára paha” (Mat. 28:19, 20). Ikatu hag̃uáicha ñakumpli ko mandáto, tekotevẽ ñañeʼẽ umi héntepe mamo oĩháme, jaha jey javisita ha ñamboʼe chupekuéra la Biblia. Ko tembiapo ningo ñanembovyʼaiterei.

Javyʼa hag̃ua japredika jave, ñande voi ñapensa vaʼerã pe mensáhe jagueraháva iñimportantetereiha, oĩramo jepe heta hénte nañanerenduséiva. Péro ¿mbaʼére piko jasegi japredika oĩramo jepe nopenáiva ñanderehe térã nañanerenduséiva? Jaikuaaháicha, japredikávo pe marandu porã ha ñaipytyvõvo ñande rapichápe oiko hag̃ua chugui Jesús disípulo, jahechauka hína jahayhuha Ñandejárape ha umi héntepe. Avei upéicha ikatu jajesalva ñande ha umi ñanerendúva (Ezeq. 3:17-21; 1 Tim. 4:16). Upévare, jahechamína mbaʼe mbaʼépa oipytyvõ heta ermánope akóinte ikyreʼỹ hag̃ua predikasiónpe, jepe ombohovái vaʼerã heta mbaʼe ijetuʼúva iterritóriope.

Iñimportánte ñapensa raẽ mbaʼeichagua porandúpa ikatu ointeresa umi héntepe. Por ehémplo, peteĩ pyhareve Amalia ohecha peteĩ karai oguapyha olee diário peteĩ párkepe. Upémarõ oñemboja hendápe ha oporandu chupe ojuhúmapa peteĩ notísia iporãmíva. Pe karai heʼi ndaiporiha mbaʼeve iporãva, upémarõ pe ermána heʼi chupe: “Che agueru ndéve peteĩ notísia iporãitereíva oñeʼẽva Ñandejára Rréinore”. Upéva ointeresa pe karaípe ha oñepyrũ ostudia la Biblia. Upéicha, Amalia omoñepyrũma mbohapy estúdio vívliko pe párkepe.

Peteĩ ermána hérava Janice opredika jepi avei itravahohápe. Haʼe ohechakuaa ointeresaiterei hague ikompañéra de traváhope ha avei peteĩ guárdia de seguridápe peteĩ artíkulo osẽva rrevísta Ñemañahápe. Janice ojofrese ogueru hag̃ua chupekuéra umi rrevísta káda mes. Upéi oikuaa oĩha ótra ombaʼapóva upépe ha oleeséva Ñemañaha ha ¡Despertad!, upémarõ oikuaveʼẽ avei chupe. Ótra ombaʼapóva upépe ohendu upéva ha ojerure avei chupe umi rrevísta. Amo ipahápe Janice ogueraha umi rrevísta 11 persónape itravahohápe. Haʼe heʼi: “Ahecha mbaʼeichaitépa Jehová chevendesi”.

Peteĩ superintendénte heʼi umi maranduhárape ani hag̃ua heʼínte umi ogajárape ou jeytaha ótro día. Upéva rangue, oporandu vaʼerã chupekuéra: “¿Ikatúpa ahechauka ndéve mbaʼéichapa jastudiakuaa la Biblia?”. Térã: “¿Arakaʼépa ha mbaʼe órapa opyta porã ndéve aju jey hag̃ua ñañemongetamie?”. Pe superintendénte omombeʼu ovisita hague peteĩ kongregasión ha umi ermáno oipuru meme hague upe método pe semánape, ha omoñepyrũ hikuái 44 estúdio vívliko.

Iporã avei pyaʼe javisita jey umi héntepe, ani jaheja ohasa heta día. ¿Mbaʼérepa? Péicha umi hénte ipyʼaporãva ohechakuaáta añetehápe ñaipytyvõseha  chupekuéra ontende hag̃ua Ñandejára Ñeʼẽ. Peteĩ kuñakaraípe oñeporandu mbaʼérepa odesidi ostudia la Biblia umi testígo de Jehovándi, ha heʼi: “Añepyrũ astudia ahechakuaávo haʼekuéra oñeinteresaha cherehe ha cherayhuetereiha”.

Oho rire pe Eskuéla de Prekursórpe, Madaí oreko 15 estúdio vívliko ha ombohasáma cinco estúdio ótro puvlikadórpe. Umi estudiánte apytégui oĩma oho meméva rreunionhápe. ¿Mbaʼépa oipytyvõ Madaípe omoñepyrũ hag̃ua heta estúdio vívliko? Pe Eskuélape oaprende iñimportantetereiha jasegi javisita umi ohendu porã vaʼekuépe pe mensáhe, jepe ndajatopái jepi hesekuéra. Ótra ermána oipytyvõ vaʼekue hetápe oikuaa hag̃ua pe añetegua, heʼi: “Aaprende tekotevẽha jaha jey jey javisita umi héntepe ñaipytyvõ hag̃ua chupekuéra oikuaa hag̃ua Jehovápe”.

Heta vése ñañehaʼãmante vaʼerã javisita jey hag̃ua umi ñanerendu porã vaʼekuépe ha ñambostudia chupekuéra la Biblia. Péro umi sakrifísio jajapóva hekoviapaite jey ñandéve. Ñañemeʼẽmbaitéramo japredika hag̃ua pe marandu porã, ñaipytyvõta ñande rapichakuérape ikatu hag̃uáicha “oikuaa porã pe añetegua”, ha upéicha haʼekuéra ikatúta ojesalva (1 Tim. 2:3, 4). Aníkena ñanderesarái javyʼaitereiha japredikávo pe marandu porã ha ñaipytyvõvo ñande rapichakuérape oiko hag̃ua chuguikuéra Jesús remimboʼe.