1, 2. a) ¿Mávapa hína pe testígo de Jehová tuichavéva? b) ¿Mbaʼépa heʼise pe téra Jesús? c) ¿Mbaʼéichapa Ñandejára Raʼy ohechauka omombaʼeha héra?

“UPEARÃ voi anase ha upearã aju ko múndope, aikuaauka hag̃ua pe añetegua.” (Elee Juan 18:33-37.) Péicha heʼi vaʼekue Jesús pe mburuvicha rrománo ogovernávape Judea. Hiʼarive upérõ ojehusga hína chupe. Heta áño upe rire, apóstol Pablo imanduʼávo upe susésore heʼi Jesús “kyhyjeʼỹme ha hekoitépe oñeʼẽ [hague] Poncio Pilátope” (1 Tim. 6:13). Jaikuaaháicha, ko múndo añáme oĩ heta hénte ndaijaʼéiva hapicháre, upévare sapyʼánte tekotevẽ ñandepyʼaguasu ikatu hag̃uáicha oiko ñandehegui peteĩ “testígo jeroviaha ha añetegua” (Apoc. 3:14).

² Jesús ningo hudío, upéicha rupi haʼe vaʼekue testígo de Jehová onase guive (Is. 43:10). Hiʼarive, oiko chugui pe testígo tuichavéva Ñandejára omoĩ vaʼekue odefende hag̃ua héra. Jesúspe g̃uarã iñimportanteterei avei pe téra Jehová omoĩ vaʼekue chupe. Pe ánhel heʼírõ guare itúva anga Josépe, María hyeguasutaha espíritu sánto rupive, heʼi avei: “Haʼe imembýta peteĩ mitãʼi ha rembohéra vaʼerã Jesús, haʼe oipeʼáta rupi umi héntepe ipekadokuéra poguýgui” (Mat. 1:20, 21). Opavave umi ostudiáva umi palávra oĩva la Bíbliape, heʼi pe téra Jesús ouha peteĩ téra evréogui: Jesúa. Upe téra heʼise “Jehová hína Salvasión”. Ohechaukaháicha héra, Jesús oipytyvõ  ‘umi ovecha Israelgua okañy vaʼekuépe’, ikatu hag̃uáicha oñarrepenti hembiapo vaígui ha oĩ porã jey Jehová renondépe (Mat. 10:6; 15:24; Luc. 19:10). Upévare kyreʼỹme opredika vaʼekue pe marandu oñeʼẽva Ñandejára Rréinore. Pe disípulo Marcos heʼi: “Jesús oike Galiléape omombeʼu umi marandu porã oñeʼẽva Ñandejárare, ha heʼi: ‘Pe tiémpo ojeporavo vaʼekue og̃uahẽma, ha Ñandejára Rréino hiʼag̃uimbaitéma. Peñarrepentíke ha pejerovia umi marandu porãre’” (Mar. 1:14, 15). Jesús avei ndokyhyjéi vaʼekue ohechauka hag̃ua japuha umi omoakãva hudiokuéra rrelihión omboʼéva, umi ojapo vaʼekue opa ikatúva ojejuka hag̃ua chupe (Mar. 11:17, 18; 15:1-15).

3. ¿Mbaʼépa oiko tres día Jesús omano haguépe?

³ Péro upéi oiko peteĩ mbaʼe ijojahaʼỹva. Tres día Jesús ojejuka haguépe, Jehová omoingove jey chupe, ndahaʼéi yvypóraicha, síno peteĩ espírituicha ha nomanomoʼãi arakaʼeve (1 Ped. 3:18). Ha ikatu hag̃uáicha ohechauka oikove jey hague, Jesús ojaparese yvypóraicha. Upe díape voi ojehechauka cinco véserupi diferénte disípulope (Mat. 28:8-10; Luc. 24:13-16, 30-36; Juan 20:11-18).

4. a) ¿Mbaʼépa ojapo Jesús ojaparesérõ guare pe cinco veseha? b) ¿Mbaʼe rresponsavilidápa omeʼẽ idisipulokuérape?

⁴ Jesús ojaparesérõ guare pe cinco veseha, ojehechauka umi apóstolpe ha umi hénte oñembyatývape hendivekuéra. Upérõ guare haʼe omyesakã Ñandejára Ñeʼẽ. La Biblia heʼi: “Oipytyvõ chupekuéra ontende porã hag̃ua Ñandejára Ñeʼẽ heʼíva”. Péicha haʼekuéra ohechakuaa la Bíbliape ojeʼéma hague Jesús omanotaha iñenemigokuéra pópe ha avei oikove jeytaha peteĩ milágro rupive. Omohuʼãvo upe rreunión, pe orresusitaha árape voi, Jesús heʼi idisipulokuérape orekoha hikuái peteĩ rresponsavilida. Heʼi chupekuéra “hérape [ojepredikataha] hentekuérape oñarrepenti hag̃ua ikatu hag̃uáicha oñeperdona chupekuéra ipekádo. Péicha ojejapóta opa tetãme..., oñepyrũta Jerusaléngui”. Ha upéi ohechauka avei isegidorkuéragui oikotaha itestígo, heʼívo: “Peẽ peikuaaukáta koʼã mbaʼe” (Luc. 24:44-48).

5, 6. a) ¿Mbaʼérepa Jesús heʼi “Peikuaaukáta che réra”? b) ¿Mbaʼépa oikuaauka vaʼerã Jesús disipulokuéra?

⁵ Ohasa rire 40 día, Jesús ojechauka kuri última ves. Upérõ oiméne umi apóstol ontende porãma raʼe mbaʼépa añetehápe Jesús heʼise omeʼẽvo chupekuéra ko mandáto: “Peikuaaukáta che réra Jerusalénpe, oparupiete Judéape, Samáriape ha mombyryvehápe ko yvy tuichakuére” (Hech. 1:8). ¿Mbaʼérepa Jesús heʼi “Peikuaaukáta che réra”, heʼi rangue “Peikuaaukáta Jehová réra”? Haʼe ikatu kuri heʼi chupekuéra oikuaauka vaʼerãha Jehová réra, péro umi ohendúva chupe ningo isrraelíta meme, upéicha rupi haʼéma voi Jehová testígo.

⁶ Péro Jesús disipulokuéra tekotevẽ kuri oikuaauka Jehová oipuruha Jesúspe omosãso hag̃ua yvyporakuérape. Añetehápe ningo Ñandejára ojapo vaʼekue peteĩ mbaʼe tuicháva omosãsórõ guare Israélpe Egipto poguýgui ha Babilóniagui. Péro Jesús omano ha oikove jey rupi, Jehová ojapo peteĩ mbaʼe tuichavéva upévagui: omosãsóta yvyporakuérape pekádo ha ñemano poguýgui. Upéi Pentekostés áño 33-pe, ojeporavo espíritu sánto rupive Jesús disipulokuérape, ha oñepyrũ omombeʼu hikuái “umi mbaʼe iporãitereíva Ñandejára ojapo vaʼekue”. Heta tapicha oasepta pe mensáhe ha ojerovia Jesús sakrifísiore. Oikove jey rire, Jesús oguapy Itúva deréchape ha oñemeʼẽ chupe tuicha  autorida yvágape ha Jehová oiporu chupe osalva hag̃ua yvyporakuérape (Hech. 2:5, 11, 37-41).

7. ¿Mbaʼépa ohechauka porã umi mbaʼe oiko vaʼekue Pentekostés áño 33-pe?

⁷ Umi mbaʼe oiko vaʼekue Pentekostés áño 33-pe, ohechauka porã Jehová oasepta hague Jesús sakrifísio repykue ikatu hag̃uáicha oñeperdona ñande pekadokuéra (Heb. 9:11, 12, 24). Jesús heʼi voi ndoúi hague “oporojokuái hag̃ua, ou guei oiko tembiguáiramo, ha omeʼẽ hekove, opaga ha oguenohẽ hag̃ua hetápe pekádo poguýgui” (Mat. 20:28). Umi hénte oñevenefisiátava Jesús sakrifísiogui ndahaʼéi umi hudío oñarrepentíva añónte, síno Ñandejára oipota “opaichagua tapicha ojesalva”. Jesús sakrifísio ‘oipeʼa yvyporakuéra pekádo’ (1 Tim. 2:4-6; Juan 1:29).

8. a) ¿Mbaʼépa oipytyvõ umi kristiáno ypykuépe ipyʼaguasu hag̃ua? b) ¿Moõ pevépa opredika hikuái?

⁸ Umi kristiáno ypykue ndokyhyjéi vaʼekue opredika meme hag̃ua. ¿Mbaʼépa oipytyvõ chupekuéra ipyʼaguasu hag̃ua? Jehová espíritu sánto ipoderosoitéva omombarete chupekuéra osegi hag̃ua opredika (elee Hechos 5:30-32). Veintisiete áñorupi Pentekostés del 33 rire, pe “añetegua, haʼéva hína umi marandu porã” ojepredikáma “oparupiete ko múndope”, tahaʼe hudiokuérape ha umi ndahaʼéivape hudío (Col. 1:5, 23).

9. ¿Mbaʼépa oiko pe kongregasión kristiána ypykuépe?

⁹ Ñambyasýramo jepe, pe kongregasión kristiána ypykue mbeguekatúpe oñekontamina ohóvo (Hech. 20:29, 30; 2 Ped. 2:2, 3; Jud. 3, 4). Upe tiémpope, pe “aña”, térã Satanás ombaʼapo meme pe apostasía isarambi hag̃ua umi kongregasiónpe. Ha Jesús heʼi pe apostasía osegitaha oñepyrũ meve “pe múndo ára pahaite” (Mat. 13:37-43). Upéi Jehová omoĩ Jesúspe ogoverna hag̃ua yvyporakuérape. Upéva oiko octubre de 1914-pe, ha upe guive ko múndo aña oike “umi ára pahápe” (2 Tim. 3:1).

10. a) ¿Mbaʼe féchapa heʼi vaʼekue umi kristiáno unhído iñimportantetereiha? b) ¿Mbaʼépa oiko octubre de 1914-pe, ha mbaʼépa ohechauka oñekumpli hague upéva?

¹⁰ Umi kristiáno unhído heʼíma vaʼekue octubre de 1914 haʼetaha peteĩ fécha iñimportánteva.  Oikuaa hikuái upéva ohesaʼỹijo rupi pe profesía oĩva lívro de Daniélpe, oñeʼẽva pe yvyra máta guasu ojetrosáva ha upéi hoky jeývare ohasa rire “siete tiémpo” (Dan. 4:16). Jesús omombeʼu vaʼekue idisipulokuérape mbaʼe mbaʼépa oikóta ohechakuaa hag̃ua hikuái haʼe ogovernamaha ha oñepyrũmaha umi ára paha. Ha umi mbaʼe oikóva ko múndope 1914 guive ohechauka porã Jesúsgui oikomaha Rréi (Mat. 24:3, 7, 14; Luc. 21:24). Ko suséso haʼe avei peteĩ mbaʼe “iporãitereíva Ñandejára ojapo vaʼekue”.

11, 12. a) ¿Mbaʼépa ojapo Jesucristo oñepyrũre ogoverna, ha mbaʼépa oiko upe riremi? b) ¿Mbaʼépa ojehecha porãma áño 1935-pe? (Ehecha pe taʼanga oĩva iñepyrũme.)

¹¹ Jesucristo oñepyrũre ogoverna, pyaʼe voi omosãso isegidorkuéra unhídope “Babilonia Guasu” poguýgui (Apoc. 18:2, 4). Ohasa riremi pe gérra, áño 1919 guive ifasilvéma ojepredika ko yvy tuichakuére ikatu hag̃uáicha oñemombeʼu máva rupivépa Ñandejára ñandesalva, ha oñemombeʼu hag̃ua pe marandu porã oñeʼẽva pe Rréino pyahúre. Umi kristiáno unhído oaprovechapaite upe oportunida, ha upéva rupi hetave persóna oaprende pe añetegua ha ojeporavo avei chupekuéra ogoverna hag̃ua Cristo ndive yvágape.

¹² Áño 1935-pe ojehecha porãma Cristo oñepyrũ hague avei ombyaty “ambue ovechakuéra”, haʼétava hína “peteĩ aty guasu” oĩháme hénte opa tetãygua. Umi unhído ogia ko aty guasúpe ikatu hag̃uáicha osegi hikuái Jesús ehémplo ha kyhyjeʼỹme omombeʼu opavave yvypóra ikatuha ojesalva Ñandejára ha Cristo rupive. Haʼekuéra kaneʼõʼỹre opredika ha osegi ojerovia Cristo sakrifísiore. Upéicha rupi, ikatúta ogueropuʼaka hikuái ‘pe jehasa asy guasu’ ha ojesalváta ág̃a oñehundi vove ko múndo aña (Juan 10:16; Apoc. 7:9, 10, 14).

13. ¿Mbaʼépa jajedesidi vaʼerã jajapo, ha mbaʼéichapa ñakonsegíta upéva?

¹³ Jasegíkena ñamombaʼe ikatu haguére jaikuaauka “umi mbaʼe iporãitereíva Ñandejára ojapo vaʼekue” ha avei oprometéva ojapotaha. Ikatu ningo upéva sapyʼánte ijetuʼu ñandéve. Por ehémplo, oĩ heta ermáno opredikáva umi lugár avave nohenduseihápe pe marandu porã, oĩhápe oñembohorýva hesekuéra, térã opersegi voi chupekuéra. Oiméramo jahasa koʼã mbaʼe, jajapo vaʼerã apóstol Pablo ha iñirũnguéra ojapo vaʼekue. Haʼe heʼi kuri: “Roñembopyʼaguasu Ñandejára rupive roñeʼẽ hag̃ua kyhyjeʼỹme umi marandu porãre, jepe oĩ oñemoĩ mbaretéva orerehe” (1 Tes. 2:2). Aníkena ñañentrega. Upéva rangue, jajedesidi vaʼerã ñakumpli upe ñapromete vaʼekue ñañemeʼẽrõ  guare Jehovápe, ha ñaaguanta oñehundi peve ko múndo aña oĩva Satanás poguýpe (Isa. 6:11). Ñanemanduʼákena upéva nañakonsegimoʼãiha ñandejehegui reínte. Ojapo haguéicha umi kristiáno ypykue, jajerure vaʼerã Jehovápe tomeʼẽ ñandéve ijespíritu rupive “pe podér ijojahaʼỹva” (elee 2 Corintios 4:1, 7; Luc. 11:13).

14, 15. a) ¿Mbaʼépa opensa umi hénte síglo primero guare umi kristiánore? b) ¿Mbaʼépa heʼi vaʼekue Pedro umi kristiánore? c) ¿Mbaʼéichapa ñañeñandu vaʼerã oĩramo ñanemaltratáva haʼe rupi testígo de Jehová?

¹⁴ Koʼág̃arupi oĩ hetaiterei tapicha heʼíva ijehe kristianoha ha oadoraha Ñandejárape, “péro umi mbaʼe ojapóva ohechauka ndoikuaaseiha chugui mbaʼeve. Koʼãva ndovaléi ojapo hag̃ua mbaʼeve iporãva, naiñeʼẽrendúi ha ombojeguaru Ñandejárape” (Tito 1:16). Aníkena ñanderesarái avei síglo primérope heta hénte ndaijaʼéi hague umi kristiáno teére. Upévare apóstol Pedro ohai: “Peẽ pevyʼa pejejaʼóramo Cristo réra rehehápe, Ñandejára espíritu sánto [...] oĩgui pende ári” (1 Ped. 4:14).

¹⁵ Ko téxto oñekumpli avei ñanderehe koʼág̃a. Ñande testígo de Jehová jaikuaauka Jesús ogovernamaha ha péicha jaiko avei Cristo testígoramo. Jajepersegíramo ñadefende haguére Jehová réra, katuete jajepersegíta avei “Cristo réra rehehápe”. Oĩ vaʼekue heta ndaijaʼéiva Jesús rehe haʼe haguére Jehová testígo. Upévare haʼe heʼi iñenemigokuérape: “Che aju che Túva rérape, péro peẽ ndacherresivíri” (Juan 5:43). Upéicharõ, aníkena ñanekangy oĩ jave ñanemaltratáva japredika jave. Upéicha ojekuaa porã hína Ñandejára ñandeguerohoryha ha ijespíritu ‘oĩha’ ñande ári.

16, 17. a) ¿Mbaʼe mbaʼépa ombohovái umi ermáno heta lugárpe? b) ¿Mbaʼépa jasegi vaʼerã jajapo?

¹⁶ Ñanemanduʼa vaʼerã avei koʼág̃arupi oĩha heta hetave persóna oaseptáva pe añetegua heta hendápe ko yvy tuichakuére. Umi lugár pyʼỹi ojepredikahárupi jepe ojetopa umi tapicha ohenduséva pe marandu porã oñeʼẽva pe salvasión rehe. Aníkena jaheja rei umi oñeinteresávape pe mensáhere, ha ñañehaʼãkena ñambostudia chupekuéra la Biblia, ikatu hag̃uáicha oñemeʼẽ avei Jehovápe ha ojevautisa. ¿Mbaʼéichapa nde reñeñandu rejapo jave ko tembiapo? Peteĩ ermána Sudafricagua hérava Sarie, ojapóma mas de 60 áño opredika hague. Haʼe omombeʼu: “Aagradese che pyʼaite guive Jesús sakrifísio rupive ikatu haguére aime porã pe Mburuvicha Tuichavéva Jehová ndive. Ha avyʼaiterei aikuaauka haguére pe héra porãite”. Sarie ha iména Martinus oipytyvõma heta persónape oservi hag̃ua Jehovápe, ijapytepekuéra umi mbohapy ifamília. Sarie heʼi avei: “Ndaipóri ótro tembiapo ikatúva peichaite peve ñanembovyʼa. Ha ijespíritu sánto rupive, Jehová ñanemombarete jasegi hag̃ua japredika umi héntepe ikatu hag̃uáicha ojesalva”.

¹⁷ Oiméramo jajevautisáma, térã ñañehaʼãmbaite hína ikatu hag̃uáicha jajevautisa, jaagradese vaʼerã ikatu haguére ñaime testígo de Jehová kongregasiónpe. Upévare, jasegíkena japredika meme ha ñañehaʼãmbaitékena ani jajeheʼa Satanás múndo kyʼáre. Péicha ñambotuicháta ñande Ru yvagapegua ñanderayhuetévape, ha jasegíta jareko pe priviléhio ñañehenóivo testígo de Jehová.