1. ¿Mbaʼépa ojapo heta paʼi ha saserdóte protestánte gérra tiémpope?

¿OIPOTÁPA Ñandejára umi kristiáno oho gerrahápe ha ojuka hapicha ótro tetãguápe? Heta heʼíva ijehe kristianoha, 100 áño rasáma ojapo oikóvo upéva. Umi paʼi ovendesi umi soldádo ha hiʼarmakuéra oho hag̃ua ojuka umi ótro tetãguápe, umíva apytépe iñermanokuéra katólikope jepe. Ha umi saserdóte protestánte ojapónte avei upéicha. Koʼã mbaʼe ojehecha porãiterei vaʼekue oikórõ guare pe segunda gérra mundiál.

2, 3. a) ¿Mbaʼépa ojapo umi testígo de Jehová pe segunda gérra mundiál aja ha upe rire avei? b) ¿Mbaʼéicha rupípa odesidi hikuái upéicha?

² ¿Mbaʼépa ojapo umi testígo de Jehová pe segunda gérra mundiál aja? Haʼekuéra ni michĩmi noñentremetéi umi ñorairõme. Upéva rangue, osegi hikuái Jesús ehémplo ha okumpli umi mbaʼe omboʼe vaʼekue. Haʼe heʼi: “Péicha pejoayhúramo, enterove ohechakuaáta peẽ haʼeha che disípulo” (Juan 13:35). Umi Testígo oñehaʼãmbaite osegi Pablo heʼi vaʼekue umi kristiáno Corintoguápe (elee 2 Corintios 10:3, 4).

³ Umi testígo de Jehová ohekomboʼe ikonsiénsia la Biblia  rupive, upévare noñentrenái oñorairõ hag̃ua ni ndohói gerrahápe. Haʼekuéra odesidi rupi upéicha, heta ojepersegi chupekuéra, tahaʼe mitã térã kakuaápe. Hetápe oñemoinge kárselpe térã ojegueraha umi kámpo oñembaʼapo pohyihápe. Alemániape, umi nási poguýpe ojejuka hetaiterei Testígope. Upéicharõ jepe, umi ermáno oikóva Európape osegi opredika pe marandu porã oñeʼẽva Jehová Goviérnore. Haʼekuéra opredika kárselpe, umi kámpo de konsentrasiónpe ha umi lugár ojeguerekohápe chupekuéra prisionéroicha mombyry hógagui. * Upéi áño 1994-pe, umi Testígo ndopartisipái avei umi hénte de diferénte étnia ojojukapa guasúrõ guare Ruándape. Ha noñentremetéi hikuái oñorairõrõ guare heta país oĩva Európape, suréste gotyo (guerra de los Balcanes).

4. ¿Mbaʼépa orrekonose heta hénte ohechávo ndajapartisipaiha umi gérrape?

⁴ Heta hénte ohecha ñande testígo de Jehová ndajapartisipaiha umi gérrape, upévare orrekonose hikuái jahayhuha ñande pyʼaite guive Ñandejárape ha ñande rapichakuérape. Haʼekuéra ohechakuaa ñande añetehápe jasegiha Jesús ehémplo. Péro oĩ hetave mbaʼe oipytyvõva umi héntepe oñemeʼẽ hag̃ua enkuénta ñande haʼeha kristiáno tee. Jahechamína umíva.

5. ¿Mbaʼe kámbio tuichávapa ojapo raʼe Jesús disipulokuéra?

⁵ Ojevautisa guive, Jesús ohechauka iñimportantetereiha ojepredika pe marandu porã oñeʼẽva Ñandejára Goviérnore. Primerorã, oiporavo 12 disípulo omoñepyrũ hag̃ua peteĩ tembiapo tuicháva, ha upe rire ombokatupyry avei ótro 70 disípulope (Luc. 6:13; 10:1). Oprepara chupekuéra omboʼe hag̃ua ñepyrũrã umi hudíope. Péro upéi oiko peteĩ mbaʼe oñeimoʼãʼỹva: umi disípulo omog̃uahẽ vaʼerã avei pe marandu porã umi hénte ótro tetãguápe. Upéva ningo peteĩ kámbio tuicháva umi kristiánope g̃uarã upe tiémpope (Hech. 1:8).

6. ¿Mbaʼéichapa apóstol Pedro ohechakuaa Jehová nomboykeiha avavépe?

⁶ Apóstol Pédrope oñemondo Cornelio rógape, ha upe karai ndahaʼéi vaʼekue hudío. Upépe pe apóstol ohechakuaa Ñandejára nomboykeiha avavépe. Upévare omanda ojevautisa hag̃ua Cornelio ha hogayguakuérape (Hech. 10:9-48). Upe guive kristianokuéra opredikáma vaʼerã opaichagua tapichápe ko yvy tuichakuére. Opa tetãyguápe oñemeʼẽ oportunida oikuaa hag̃ua Ñandejárape ha oñemoag̃ui hag̃ua hese.

7, 8. ¿Mbaʼépa ojapo Jehová organisasión omog̃uahẽ hag̃ua pe marandu porã hetave héntepe? (Ehecha pe taʼanga oĩva iñepyrũme.)

⁷ Ñane tiémpope, umi ermáno odirihíva pe predikasión, omokyreʼỹ entéro Testígope omombeʼu hag̃ua pe marandu porã oparupiete ha omboʼe hag̃ua la Biblia hapichakuérape. Koʼág̃arupi oĩ haimete ocho millón testígo de Jehová opredikáva 600 idióma rasápe, ha katuete heta hetavéta ohóvo. Opárupi ojekuaa Jehová Testigokuérape opredika rupi umi héntepe hógape voi térã kállere. Heta hendárupi omoĩ avei hikuái mesa ári térã karrítope umi puvlikasión ikatu hag̃uáicha ogueraha umi hénte.

⁸ Mas de 2.900 ermáno ha ermánape oñembokatupyry ikatu hag̃uáicha otradusi la Biblia ha ambue puvlikasión vívlika. Ha ndahaʼéi umi idióma ojeporuvévapente  otradusíva hikuái, síno avei heta idióma ndojekuaaguasúivape, péro oñeʼẽva hetaiterei persóna. Por ehémplo, Espáñape oĩ hetaiterei hénte oñeʼẽva idióma catalán michĩete guive. Ha koʼýte koʼã tiémpope umi hénte oñeʼẽve catalánpe ha avei umi idióma ojoguávape upévape, oñeñeʼẽva Andorra, Alicante, umi ísla Baleares ha Valénciape. Testígo de Jehová otradusi heta puvlikasión ha ojapo rreunión catalánpe, ha koʼã mbaʼe opokoiterei umi hénte oñeʼẽvare upe idiómape.

9, 10. ¿Mbaʼérepa jaʼekuaa Jehová organisasión oipotaha enterove oikuaa Ñandejárape?

⁹ Upéicha avei ojetradusi ha oñemboʼe hína hetaitereive idiómape heta lugárpe. Por ehémplo, Méxicope oñeñeʼẽve castellánope, péro oĩ avei heta grúpo indíhena orekóva iñidióma tee, umíva apytépe maya. Pe Sukursál upepegua oguerova pe grúpo otradusíva máyape peteĩ lugár oñeñeʼẽhápe upe idióma. Péicha umi traduktór ikatúta oñeʼẽ ha ohendu upe idióma káda día. Nepálpe katu oiko mas de 29 millón tapicha, ha upe tetãme oñeñeʼẽramo jepe 120 idiómarupi, oĩ mas de 10 millón oñeʼẽva nepalés. Oĩ hetaiterei oñeʼẽva ótro idióma, péro oipuru meme avei nepalés. Ñane puvlikasionkuéra ojetradusi avei upe idiómape.

¹⁰ Jehová organisasión oreko heta grúpo de traduksión oikuaágui iñimportantetereiha oñemog̃uahẽ pe marandu opa tetãme. Testígo de Jehová orrepartíma hetaiterei tratádo, folléto ha rrevísta gratiete ko yvy tuichakuére. ¿Mbaʼéichapa ojekuvri umi gásto? Kontrivusión voluntária rupive. Ojesegi ko mandáto Jesús omeʼẽ vaʼekue: “Reínte oñemeʼẽ kuri peẽme, ha reínte pemeʼẽ vaʼerã avei” (Mat. 10:8).

11, 12. ¿Mbaʼépa opensa heta hénte ohechávo testígo de Jehová opredikaha opárupi?

¹¹ Testígo de Jehová kyreʼỹme opredika ha omboʼe hapichakuérape oñemoag̃ui hag̃ua Ñandejárare. Haʼekuéra oikuaa porã otopa hague pe añetegua, ha upévare ojapo opa ikatúva omog̃uahẽ hag̃ua pe mensáhe opa tetãme ha heta étniape. Por ehémplo, ikatu hag̃uáicha opredikave, heta ermáno oheja umi komodida ha oñekontenta orekomívarente, oaprende ótro idióma, térã ova ótro  lugárpe ha oñehaʼã ojepokuaa ótra kostúmbrere. Testígo de Jehová opredika ha oporomboʼe rupi, heta hénte ohechakuaa haʼekuéra añetehápe haʼeha Jesús disípulo tee.

¹² Ñande Testígo jajapopaite koʼã mbaʼe ñaime rupi segúro jajuhumaha pe añetegua. Péro, ¿mbaʼépa okonvense avei heta héntepe ñane rrelihión haʼeha pe rrelihión verdadéra? (Elee Romanos 14:17, 18.)

13. ¿Mbaʼépa ojapo Testigokuéra ikatu hag̃uáicha Jehová organisasión akóinte ipotĩ?

¹³ ¿Mbaʼérepa heta kristiáno ñane tiempopegua oñekonvense ojuhu hague pe añetegua? Peteĩ ermáno heta áñorema oservíva Jehovápe heʼi: “Entéronte oñehaʼã ikatu hag̃uáicha Jehová organisasión osegi ipotĩ, ha upearã sapyʼánte oñemeʼẽ konsého térã oñedisiplina umi oikotevẽvape”. ¿Mbaʼépa ojejapo ikatu hag̃uáicha ojeiko Jehová oipotaháicha? Opavave Testígo oñehaʼã osegi Ñandejára Ñeʼẽ heʼíva ha avei Jesús ha idisipulokuéra ehémplo. Upéicha rupi saʼi oĩ oñemosẽva kongregasióngui. Hetaiteve oĩ hekopotĩva ha oikóva hekopete, ijapytepekuéra oĩro jepe yma ojapo vaʼekue ivaíva ndoikuaái rupi Ñandejárape (elee 1 Corintios 6:9-11).

14. ¿Mbaʼépa ojapo heta persóna oñemosẽ vaʼekue kongregasióngui, ha mbaʼépa ojehupyty upéicha rupi?

¹⁴ La Biblia heʼi umi hembiapo vaíva oñemosẽ vaʼerãha kongregasióngui. Péro oĩ hetaiterei umíva apytégui oñarrepentíva, oñemoag̃ui jeýva kongregasiónre ha opavave ermáno vyʼápe orresivi chupekuéra (elee 2 Corintios 2:6-8). Pe kongregasión kristiána osegi ipotĩ ojapógui la Biblia heʼíva, ha upéva ñanepytyvõ jajerovia hag̃ua Ñandejára organisasiónre. Testígo de Jehová odefende Ñandejára Léi, ndojoguái umi ótra rrelihiónpe, ohejáva ihentekuéra ojapo ojaposéva. Upéicha rupi heta oĩ ohechakuaáva ñande jaikoha la Biblia heʼiháicha.

15. ¿Mbaʼépa okonvense peteĩ ermánope oĩha pe rrelihión verdadérape?

¹⁵ ¿Mbaʼérepa heta ermáno aréma oservíva Jehovápe ndodudái oĩha pe rrelihión verdadérape? Peteĩ ermáno orekóva 54 áño heʼi: “Chemitãrusu guive oĩ mbohapy mbaʼe chepytyvõva ajerovia mbarete hag̃ua: 1) aikuaa porã Ñandejára oexistiha; 2) haʼe ohaika hague la Biblia, ha 3) oipuru ha ovendesiha testígo de Jehová kongregasión. Ymaite guive astudiáva la Biblia ha siémpre añehaʼã akomprova koʼã mbohapy mbaʼe añeteha. Upéicha rupi ahechakuaa ndagueroviareiriha koʼã mbaʼe. Upéva omombarete che jerovia ha chekonvense aimeha pe rrelihión verdadérape”.

16. ¿Mbaʼépa okonvense peteĩ ermánape oĩha pe rrelihión verdadérape?

 ¹⁶ Peteĩ ermána omendáva ha oservíva pe séde mundiálpe, Nueva Yórkpe, heʼi Ñandejára organisasión rehe: “Ko rrelihión añoite omombeʼu opárupi Jehová réra. [...] ¡Hiʼarive Ñandejára réra oĩ amo 7.000 véserupi la Bíbliape!”. Pe ermána imanduʼa heʼívare 2 Crónicas 16:9: “Ñandejára niko omaʼẽ opa mbaʼe ko yvy ári ojehúvare, oipytyvõ hag̃ua umi hese añetehápe ojeroviávape”. Upéi heʼi avei: “Pe añetegua chemboʼe aservi hag̃ua Jehovápe che pyʼaite guive, ikatu hag̃uáicha haʼe chepytyvõ. Amombaʼeterei aiko haguére iñamígaramo. Aagradese avei Jesúspe ñanepytyvõ haguére jaikuaa hag̃ua Itúvape. Koʼã mbaʼe aikuaáva tuicha chemombarete”.

17. ¿Mbaʼéicha peteĩ ermáno haʼe vaʼekue atéo oñekonvense ojuhuha pe añetegua?

¹⁷ Peteĩ ermáno yma haʼe vaʼekue atéo omombeʼu: “Ajesarekóvo pe kreasión rehe, ahechakuaa Ñandejára oipotaha jaiko vyʼápe. Upévare aikuaa haʼe ndohejamoʼãiha jasufri opa árare. Avei, ko múndo ivai vaivéramo jepe ohóvo, Jehová puévlo ojerovia mbareteve, ikyreʼỹ ha oporohayhuve. Ñandejára espíritu añoite ikatu ojapo ko milágro” (elee 1 Pedro 4:1-4).

18. ¿Mbaʼépa repensa umi mokõi ermáno heʼi vaʼekuére?

¹⁸ Peteĩ ermáno heta áñorema oservíva Jehovápe omombeʼu mbaʼérepa oĩ segúro añeteha umi mbaʼe opredikáva: “Ohasávo pe tiémpo, umi mbaʼe aaprendéva chekonvense Testigokuéra oñehaʼãmbaiteha osegi umi kristiáno síglo primérope guare ehémplo. Hetáma aviaha ko múndore ha che resa teérupi ahecha mbaʼéichapa entéro Testígo oiko peteĩ ñeʼẽme. Pe añetegua oĩva la Bíbliape chepytyvõ akóinte avyʼa hag̃ua”. Peteĩ ermáno orekóvape 60 áño oñeporandu mbaʼérepa haʼe oĩ segúro testígo de Jehová omboʼeha pe añetegua. Haʼe heʼi: “Ore rostudia porã Jesús rembiasakue ha romombaʼeterei iñehémplo. Rokambia heta mbaʼépe ikatu hag̃uáicha Jesús rupive roñemoag̃ui Ñandejárare. Ore rorrekonose isakrifísio rupivénte ikatuha entéro yvypóra ojesalva. Jesúspe oñemoingove jey kuri umi omanóva apytégui ha oĩ ohecha vaʼekue añetehápe oiko hague upéva” (elee 1 Corintios 15:3-8).

19, 20. a) ¿Mbaʼépa heʼi Pablo umi ermáno Romaguápe? b) ¿Mbaʼe priviléhiopa jareko ñande kristiáno?

¹⁹ Ñande jahayhu ñande rapichakuérape, upévare ndovaléi ñaguerokirirĩ pe añetegua. Iñimportanteterei ningo umi mbaʼe oĩva la Bíbliape. Apóstol Pablo heʼi voi umi ermáno Romaguápe: “Remombeʼúramo opavave renondépe ‘pe marandu oĩva nde jurúpe’; upéva hína Jesús haʼeha ñande Ruvicha, ha nde pyʼapýpe rejeroviáramo Ñandejára omopuʼã hague chupe omanóva apytégui, upéicharõ rejesalváta. Ñanderekojoja hag̃ua jajerovia vaʼerã ñande pyʼapýpe, ha jajesalva hag̃ua jaiporu vaʼerã ñande juru ñamombeʼu hag̃ua pe marandu” (Rom. 10:9, 10).

²⁰ Ñande testígo de Jehová ñaime segúro jajuhu hague pe rrelihión verdadéra. Tuichaiterei priviléhio ñandéve g̃uarã ñamombeʼu ñande rapichápe pe marandu porã oñeʼẽva Ñandejára Rréinore. Upévare, japredika jave umi héntepe, ñañeʼẽ vaʼerã oñehenduse hag̃uáicha ha tojekuaa ñanderehe jagueroviaha umi mbaʼe ñamboʼéva la Bíbliagui.