Síglo primérope, apóstol Pablo heʼi umi ansiáno oservívape pe kongregasión Efesoguápe: “Peñatendéke pendejehe ha entéro ovecha atýre, espíritu sánto penemoĩ rupi ijapytepekuéra ansiánoramo peñangareko hag̃ua ovecharerekuáicha Ñandejára kongregasiónre, haʼe ojogua vaʼekue Itaʼýra ruguýre” (Hech. 20:28). ¿Mbaʼéichapa pe espíritu sánto oipytyvõ oñenombra hag̃ua umi ansiáno ha siérvo ministeriálpe ñane tiémpope?

Primero, pe espíritu sánto ogia umi kuimbaʼe ohai vaʼekuépe la Biblia oskrivi hag̃ua mbaʼe mbaʼépa tekotevẽ okumpli umi oserviséva kómo ansiáno térã siérvo ministeriál. Por ehémplo, 1 Timoteo 3:1-7-pe oñemoĩ 16 rrekisíto okumpli vaʼerã umi ansianorã. Avei Tito 1:5-9 ha Santiago 3:17 ha 18-pe oĩve heta kualida ohechauka vaʼerã koʼã kuimbaʼe. Ha 1 Timoteo 3:8-10, 12, 13-pe oñemombeʼu mbaʼépa okumpli vaʼerã umi oserviséva kómo siérvo ministeriál. Segundo, umi ermáno orrekomendátava peteĩ ansiáno térã siérvo ministerialrã, ha avei umi oporonombrátava, ojerure vaʼerã Jehovápe ijespíritu sánto ikatu hag̃uáicha ogia chupekuéra ha ohecha hag̃ua oimépa pe ermáno okumplipa hína umi rrekisíto oĩva la Bíbliape. Péro ndovaléi avei ojexihieterei umi ermánogui. Tercero, umi oñerrekomendáva oservi hag̃ua kómo ansiáno térã siérvo ministeriál ohechauka vaʼerã hekovépe umi kualida oúva Ñandejára espíritu sántogui (Gál. 5:22, 23). Jahechaháicha, Ñandejára espíritu ogia káda páso ojejapóva oñenombra hag̃ua peteĩ ermánope.

¿Mávapa onombra koʼág̃a umi ermáno oservítavape kómo ansiáno térã siérvo ministeriál? Ymave entéro umi rrekomendasión oñemondo vaʼekue sukursálpe. Upépe, umi ermáno pe Kuérpo Governánte onombra vaʼekue orrevisa umi rrekomendasión ha onombra umi ansiáno térã siérvo ministeriálpe. Upe rire pe sukursál onotifika pe nombramiénto pe kuérpo de ansiáno ikongregasionguápe. Umi ansiáno omombeʼu pe ermánope oñenombra hague, ha oporandu chupe oaseptápa upe rresponsavilida, oĩpa okumpli hag̃uáicha ha oĩ porãpa Jehová renondépe oasepta hag̃ua upe priviléhio. Upéi oñeanunsia pe kongregasiónpe upe nombramiénto.

Péro, ¿mbaʼéichapa ojejapo vaʼekue umi nombramiénto síglo primérope? Upe tiémpope umi apóstol onombra umi ermánope ikatu hag̃uáicha ojapo peteĩ traváho espesífiko. Por ehémplo, oiporavo vaʼekue siete kuimbaʼépe orreparti hag̃ua provísta umi viúdape káda día (Hech. 6:1-6). Jahechaháicha ko kásope, umi apóstol nonombrái koʼã ermánope oservi hag̃ua kómo ansiáno térã siérvo ministeriál, síno ojapo hag̃ua ótro traváho, ha amalisia koʼã ermáno oservíma voi ansiánoramo.

 ¿Mávapa upéicharõ ojapo umi nombramiénto de ansiáno ha siérvo ministeriál? La Biblia nomombeʼúi detálle por detálle mbaʼéichapa ojejapo vaʼekue káda nombramiénto, péro umi rreláto omyesakã heta mbaʼe umívagui. Pablo ha Bernabé oukuévo pe primer viáhe misionálgui “onombra hikuái ansiáno káda kongregasiónpe, upéi oñemboʼe ha oajuna rire, oheja chupekuéra Jehová pópe, haʼekuéra ojeroviágui hese” (Hech. 14:23). Tiémpo rire, Pablo ohai vaʼekue Títope, haʼéva avei superintendénte viahánte: “Roheja kuri Crétape ikatu hag̃uáicha rekorrehi umi mbaʼe oĩ vaíva ha renombra hag̃ua ansiáno káda siudápe, haʼéma haguéicha ndéve” (Tito 1:5). Upéicha avei, oñemeʼẽ vaʼekue Timotéope autorida ojapo hag̃ua umi nombramiénto. Haʼe heta tiémpo omoirũ vaʼekue avei Páblope kómo superintendénte (1 Tim. 5:22). Jahechaháicha, ndahaʼéi umi apóstol ni umi ansiáno oĩva Jerusalénpe la ojapo vaʼekue umi nombramiénto, síno umi superintendénte.

Pe Kuérpo Governánte osegi ko ehémplo vívliko ha koʼág̃a okambia pe prosedimiénto oñenombra hag̃ua umi ansiáno ha siérvo ministeriál. El 1 de septiembre de 2014 guive ojejapo vaʼerã kóicha: Káda superintendénte oanalisa porãta umi rrekomendasión ojejapóva isirkuítope. Ha ovisita vove pe kongregasión, oñehaʼãta oikuaa porãve umi ermáno oñerrekomendávape, ha ikatúma guive osẽta opredika ha ojapo aktivida hendivekuéra. Upéi, oanalisa rire umi rrekomendasión pe kuérpo de ansiáno pe kongregasionpeguándi, pe superintendénte onombráta umi oservítava kómo ansiáno térã siérvo ministeriál. Péicha ojesegíta pe ehémplo oheja vaʼekue umi kristiáno síglo primérope guare.

Jepiveguáicha, pe “tembiguái jeroviaha ha iñarandúva” oreko pe rresponsavilida omongarúvo umi ótro tembiguaikuérape (Mat. 24:45-47). Ko tembiguái ohesaʼỹijo la Biblia espíritu sánto poguýpe, ha upéi omeʼẽ instruksión ikatu hag̃uáicha umi kongregasiónpe ojesegi Ñandejára Ñeʼẽ heʼihaichaite. Pe tembiguái jeroviaha avei onombra umi oservítavape kómo superintendénte de sirkuíto ha Komite de Sukursálpe. Upéi káda sukursál oipytyvõ ojesegi hag̃ua umi instruksión oñemeʼẽva. Káda kuérpo de ansiáno oanalisa porã vaʼerã umi rrekisíto vívliko tekotevẽva okumpli umi ermáno oñerrekomendáva oñenombra hag̃ua Ñandejára kongregasiónpe. Ha káda superintendénte de sirkuíto oreko pe rresponsavilida oñemboʼe ha oanalisa porãvo pe rrekomendasión ojapóva umi ansiáno. Upéi ae onombra umi ermáno okumplívape umi rrekisíto.

Ñantende porãvo mbaʼéichapa ojejapo umi nombramiénto, koʼýte jahechakuaa mbaʼéichapa pe espíritu sánto odirihi koʼã mbaʼe. Upévare jajerovia ha jarrespeta umi ermáno oñenombrávape kongregasiónpe (Heb. 13:7, 17).

Apocalipsis 11:3 heʼi mokõi testígo oprofetisataha 1.260 díare. Pe rreláto heʼi avei pe mymba ñarõ ‘ipuʼakataha hesekuéra ha ojukataha chupekuéra’. Péro “tres día imédio rire”, umi mokõi testígo oikove jeýta, ha opavavénte ohecharamóta upéva (Apoc. 11:7, 11).

¿Mávapa koʼã mokõi testígo? Umi detálle oĩva pe rrelátope ñanepytyvõ jaikuaa hag̃ua mávapa hikuái. Primero, pe rreláto heʼi “umi mokõi olívo máta ha umi mokõi lámpara renda” orrepresentaha koʼã testígope (Apoc. 11:4). Upéva ñanemomanduʼa lívro de Zacaríaspe oñeñeʼẽha avei pe lámpara rendáre ha mokõi olívo mátare. Umi olívo mátare ojeʼe haʼeha “umi mokõi ojeporavóva”, térã pe governadór Zorobabel ha pe saserdóte prinsipál Josué. Hesekuéra avei ojeʼe ‘oñemboʼyha hína ko yvy tuichakue Jára renondépe’ (Zac. 4:1-3, 14, ÑÑB). Segundo, umi mokõi testígore ojeʼe avei ojapoha milágro ojoguáva Moisés ha Elías ojapo vaʼekuépe (embojoja Apocalipsis 11:5, 6 heʼíva Números 16:1-7, 28-35 ha 1 Reyes 17:1; 18:41-45 heʼívare).

¿Mbaʼépepa ojojogua umi profesía oĩva Apocalipsis ha Zacaríaspe? Mokõivéva oñeʼẽ umi kuimbaʼe Ñandejára oiporavo vaʼekuére, odirihíva ipuévlo peteĩ tiémpo ijetuʼuetereívape. Apocalipsis kapítulo 11 oñekumpli umi unhído odirihíva Jehová puévlo opredikárõ guare tres áño imédio “ao chalái” reheve, Ñandejára Rréino oñepyrũrõ guare ogoverna yvágape 1914-pe.

Ohasa rire umi tres áño imédio, koʼã unhídope oñemoinge kárselpe peteĩ tiémpo mbykývare, orrepresentáva tres día imédio. Upérõ haʼete ojejukáva chupekuéra. Ñandejára puévlo enemigokuéra ovyʼajoa openságui ojokoitemaha umi unhído rembiapo (Apoc. 11:8-10).

Péro heʼi haguéicha pe profesía, opávo umi tres día imédio, umi mokõi testígo oikove jey. Upéva oñekumpli umi unhído osẽrõ guare kárselgui. Umi osegíva iñeʼẽrendu orresivi Jesucristo rupive peteĩ nombramiénto iñimportantetereíva Ñandejáragui. Áño 1919-pe oñenombra chupekuéra “tembiguái jeroviaha ha iñarandúva”, ikatu hag̃uáicha omombarete Ñandejára puévlo jerovia umi ára pahápe (Mat. 24:45-47; Apoc. 11:11, 12).

Koʼã mbaʼe oikoha tiémpope oñekumpli avei Apocalipsis 11:1, 2, heʼihápe pe témplo espirituál oñemedi térã ojerrevisataha. Malaquías kapítulo 3 oñeʼẽ avei peichagua inspeksión rehe, ha heʼi upe rire ojejapoha peteĩ limpiésa pe témplo espirituálpe (Mal. 3:1-4). ¿Mboy tiémpopa odura pe inspeksión ha limpiésa? Oñepyrũ 1914-pe ha oho hese prinsípio de 1919 peve. Ha ko tiémpo aja oñekumpli umi 1.260 día (42 mése), ha umi tres día imédio oñeñeʼẽha Apocalipsis kapítulo 11-pe.

Ajépa javyʼaite Jehová ojapo haguére pe limpiésa espirituál ipuévlope, ikatu hag̃uáicha ojapo umi tembiapo iporãva (Tito 2:14). Ñamombaʼeterei avei pe ehémplo omoĩ vaʼekue pe tembiguái jeroviaha. Haʼekuéra odirihi kuri Jehová puévlo pe tiémpo ijetuʼuetévape ha péicha orrepresenta umi mokõi testígope. *