1, 2. ¿Mbaʼérepa heta hénte nontendéi vaʼekue Jesús omboʼéva?

IKATU ningo ñahendu peteĩ persóna oñeʼẽramo ñandéve ha jaikuaa chupe ivós rehe. Péro, ¿mbaʼépe piko ideprovéchota ñandéve nañantendéiramo la heʼíva? (1 Cor. 14:9). Péicha avei Jesús oñeʼẽ vaʼekue heta persónape iñidiómape, péro naentéroi ontende kuri pe heʼíva. Upévare haʼe heʼi umi héntepe: “Pejapysakákena cherehe, peẽ enterovéva ha pentende koʼã mbaʼe haʼéva peẽme” (Mar. 7:14).

² ¿Mbaʼérepa heta hénte nontendéi vaʼekue Jesús omboʼéva? Nokambiaséigui umi mbaʼe ogueroviáva térã opensa vaígui Jesúsre. Upévare haʼe heʼi chupekuéra: “Pendevale voi pemboyke hag̃ua Ñandejára mandamiénto pejapo hag̃ua kuimbaʼekuéra omboʼéva” (Mar. 7:9). Umi hénte nontendeséinte Jesús heʼíva, oikose haʼekuéra oikuaaháichante ha nokambiaséi. Ohendu hikuái, péro nopenái (elee Mateo 13:13-15). ¿Mbaʼéichapa ikatu jahechauka ñantendeseha Jesús enseñánsa?

3. ¿Mbaʼéicha rupípa umi disípulo ikatu kuri ontende Jesús enseñánsa?

³ Tekotevẽ ñaneumílde Jesús disipulokuéraicha. Haʼe heʼi  vaʼekue chupekuéra: “Pevyʼa pehecha ha pehendúgui koʼã mbaʼe” (Mat. 13:16). ¿Mbaʼéicha rupípa haʼekuéra ikatu kuri ontende Jesús enseñánsa? Primero, oñeporandu hikuái mbaʼépa osignifika Jesús omboʼéva ha oanalisa umíva (Mat. 13:36; Mar. 7:17). Segundo, haʼekuéra noñemohatãi umi mbaʼe oikuaávapente, síno oasepta umi entendimiénto pyahu (elee Mateo 13:11, 12). Tercero, oipuru meme hikuái hekovépe umi mbaʼe oaprendéva, ha avei oipuru oipytyvõ hag̃ua hapichakuérape (Mat. 13:51, 52).

4. ¿Mbaʼe mbaʼépa jajapo vaʼerã ñantende hag̃ua umi ehémplo Jesús oipurúva?

⁴ Ikatu hag̃uáicha ñantende porã umi ehémplo Jesús oipurúva, tekotevẽ jajapo mbohapy mbaʼe ojapo vaʼekue avei umi disípulo. Primero, ñañemotiémpo vaʼerã jastudia hag̃ua Jesús heʼi vaʼekue, ñaanalisa umi mbaʼe ñañeporandúva, ha jajepyʼamongeta pe ñaaprendévare. Péicha jarekóta konosimiénto (Prov. 2:4, 5). Segundo, jahechakuaa vaʼerã mbaʼéichapa pe konosimiénto ideprovécho ñandéve ha ñanepytyvõ ñantende porãve hag̃ua umi mbaʼe jaikuaámava voi. Upéva haʼe hína entendimiénto (Prov. 2:2, 3). Ha tercero, jaipuru meme vaʼerã umi mbaʼe ñaaprendéva. Péicha jahechauka ñanearanduha (Prov. 2:6, 7).

5. Emoĩ peteĩ ehémplo rehechauka hag̃ua mbaʼépepa idiferénte pe konosimiénto, pe entendimiénto ha pe arandu.

⁵ ¿Mbaʼépepa idiferénte pe konosimiénto, pe entendimiénto ha pe arandu? Ñamoĩmína peteĩ ehémplo: ñañeimahinami ñañemboʼyha peteĩ kálle mbytetépe. Upéi jahecha ouha peteĩ kolektívo ha og̃uahẽmbaitemaha ñandéve. Ñepyrũrã, japilla haʼeha peteĩ kolektívo, ha upéva heʼise jarekoha konosimiénto. Upe rire jahechakuaa pe veíkulo ikatuha ochoka ñanderehe nañasẽiramo hapégui. Upéva heʼise jarekoha entendimiénto. Upe rire pyaʼeterei ñasẽ pe tapégui, ha péicha jahechauka ñanearanduha. Ndareíri la Biblia heʼi iñimportantetereiha ‘ñanearandu’. Upéva ikatu hína ñandesalva (Prov. 3:21, 22; 1 Tim. 4:16).

6. ¿Mbaʼe mbaʼépa ñambohováita ñahesaʼỹijóvo umi siete ehémplo Jesús oipuru vaʼekue? (Ehecha pe  rrekuádro.)

⁶ Ko artíkulope ha pe oúvape ñahesaʼỹijóta siete ehémplo Jesús oipuru vaʼekue. Jastudiávo káda uno, ñambohováita koʼã porandu: ¿Mbaʼépa heʼise ko ehémplo? Upéva ñanepytyvõta jareko hag̃ua konosimiénto. ¿Maʼerãpa Jesús oipuru raʼe? Ko porandu ñanepytyvõta jahupyty hag̃ua entendimiénto. ¿Mbaʼéichapa ikatu jaipuru upe ñaaprendéva ideprovécho hag̃ua ñandéve ha ñande rapichápe? Upéva ñanepytyvõta ñanearandu hag̃ua. Ha upéi jahecháta mbaʼépa ñanemboʼe Jehová ha Jesúsgui ko ehémplo.

7. ¿Mbaʼépa heʼise pe ehémplo oñeʼẽva pe mostása raʼỹire?

⁷ (Elee Mateo 13:31, 32.) ¿Mbaʼépa heʼise pe ehémplo oñeʼẽva pe mostása raʼỹire? Pe mostása raʼỹi orrepresenta pe marandu porã japredikáva ha avei pe kongregasión kristiána. “Pe mostása raʼỹi ningo pe semílla michĩvéva.” Péicha avei pe kongregasión kristiána michĩeterei vaʼekue oñepyrũrõ guare áño 33-pe, péro sapyʼaitépe tuichaiterei okakuaa pe predikasión rupive (Col. 1:23). Jahechaháicha pe ehémplope, pe mostása raʼỹi heñói ha oiko chugui peteĩ yvyramáta, ha upe kresimiénto ideprovechoiterei pórke “umi guyrakuéra yvagapegua ojaitypo hakãre”. Upéva heʼise umi persóna ipyʼaporãva ouha pe kongregasión kristiánape ikatu hag̃uáicha orresivi aliménto espirituál  ha oĩ hag̃ua protehído (embojoja Ezequiel 17:23 rehe).

8. ¿Maʼerãpa Jesús oipuru pe ehémplo oñeʼẽva pe mostása raʼỹire?

⁸ ¿Maʼerãpa Jesús oipuru ko ehémplo? Haʼe oipuru ehémploramo pe mostása raʼỹi ohechauka hag̃ua mbaʼéichapa Ñandejára Rréino pyaʼe okakuaa, oservi de proteksión ha ndaipóri ojokóva chupe. Áño 1914 guive ojekuaa mbaʼéichapa Ñandejára organisasión tuicha okakuaa ko yvy ape ári (Is. 60:22). Umi oĩva ko organisasiónpe ovyʼajoa oñeñangareko porã haguére hesekuéra espirituálmente (Prov. 2:7; Is. 32:1, 2). Hiʼarive jahecha mbaʼéichapa heta hetave umi kongregasión, oĩramo jepe ojokoséva upe progréso (Is. 54:17).

9. a) ¿Mbaʼépa ñanemboʼe pe ehémplo oñeʼẽva pe mostása raʼỹire? b) ¿Mbaʼépa ñanemboʼe Jehová ha Jesúsgui ko ehémplo?

⁹ ¿Mbaʼépa ñanemboʼe pe ehémplo oñeʼẽva pe mostása raʼỹire? Ikatu ningo oime jaiko peteĩ lugár mbovyhápe Testígo, ha haʼetévaicha ñandéve japredikapa reíva. Péro jahechávo mbaʼéichapa pe Rréino ombaʼapo, ñanepytyvõ ñaaguanta hag̃ua. Por ehémplo, ermáno Edwin Skinner og̃uahẽrõ guare Índiape áño 1926-pe, saʼi oĩ Testígo upe tetãme. Upérõ haʼete voi ndaiporimoʼãiva progréso. Péro ko ermáno osegi opredika, ha upéi ohecháma umi mbaʼe ojehupytýva pe marandu porã rupive. Koʼág̃a oĩma mas de 37.000 Testígo Índiape, ha mas de 108.000 persóna oho kuri Konmemorasionhápe pe áño ohasa vaʼekuépe. Péro oĩve heta ehémplo ohechaukáva pe Rréino okakuaaveha ohóvo. Áño 1926-pe oñeñepyrũ ojepredika Zámbiape. Koʼág̃a g̃uarã oĩ mas de 170.000 puvlikadór upe paíspe ha 763.915 persóna oho Konmemorasionhápe 2013-pe. Upéva heʼise oho hague 1 de káda 18 avitánte. ¡Ajépa tuichaite oprogresa Jehová organisasión!

10. ¿Mbaʼépa heʼise pe ehémplo oñeʼẽva pe levadúrare?

¹⁰ (Elee Mateo 13:33.) ¿Mbaʼépa heʼise pe ehémplo oñeʼẽva pe levadúrare? Ko ehémplo orrepresenta avei pe marandu  porã ha umi mbaʼe ojehupytýva pe mensáhe rupive. “Pe mása” orrepresenta umi hénte opa tetãyguápe, ha pe levadúra ombovúvo pe mása katu heʼise pe marandu porã iñasãiha ohóvo pe predikasión rupive. Pe mostása raʼỹi heñói ha okakuaávo, pyaʼe voi ojehecha, péro pe levadúra ombovúvo pe mása ndojekuaaguasúi ñepyrũrã. Ohasaʼimi raẽ vaʼerã tiémpo ojehecha hag̃ua pe rresultádo.

11. ¿Maʼerãpa Jesús oipuru pe ehémplo oñeʼẽva pe levadúrare?

¹¹ ¿Maʼerãpa Jesús oipuru ko ehémplo? Upéva rupive haʼe ohechauka pe marandu porã orekoha podér iñasãi hag̃ua ‘mombyryveha peve ko yvy tuichakuére’ ha ikatuha okambia umi héntepe (Hech. 1:8). Sapyʼánte ndojekuaapyaʼéi umi kámbio ojapóva umi persóna ohendu rire pe marandu porã. Péro upéva ndeʼiséi nokambiaiha hína hikuái. Hetaiterei persónama ko yvy tuichakuére oasepta pe mensáhe ha oheja pe marandu porã oipytyvõ chupekuéra okambia hag̃ua (Rom. 12:2; Efes. 4:22, 23).

12, 13. Emombeʼu mbaʼéichapa pe marandu porã iñasãi opárupi ohechaukaháicha pe ehémplo oñeʼẽva pe levadúrare.

¹² Heta vése pe progréso ojekuaa heta áño ojepredika ypy rire. Por ehémplo, áño 1982-pe peteĩ matrimónio oservi vaʼekue sukursál de Brasílpe, hérava Franz ha Margit, oho opredika peteĩ puevloʼípe. Oñepyrũ hikuái omboʼe la Biblia heta persónape, umíva apytépe peteĩ kuñakarai ha umi cuatro imembýpe. Pe mitãkuimbaʼe tuichavéva, orekóva 12 áño, hiʼotĩeterei ha heta vése okañými vaʼekue oñepyrũ mboyve pe estúdio. Upe rire Franz ha Margit oho oservi ótro lugárpe ha upévare ndaikatuvéi omboʼe chupekuéra. Péro 25 áño rire, ou jey hikuái ovisita pe puévlo ha otopa oĩmaha peteĩ kongregasión orekóva 69 puvlikadór, umíva apytépe 13 prekursór rregulár. Orekóma hikuái peteĩ Salón pyahu, ha pe mitãkuimbaʼe hiʼotĩete vaʼekue okakuaapáma ha oservi kómo koordinadór del kuérpo de ansiáno. Heʼi haguéicha Jesús iñehémplope, pe levadúra mbeguekatúpe ojagarra ohóvo pe mása. Péicha avei pe marandu porã oñeʼẽva pe Rréinore iñasãi ohóvo opárupi ha oipytyvõ heta persónape okambia hag̃ua.

¹³ Heta tetãme ningo pe léi oproivi jepi umi ermánogui opredika lívremente, péro umi lugárpe jepe ojekuaa pe marandu porã orekoha podér okambia hag̃ua umi héntepe. Heta vése ñañesorprende jahechávo mbaʼeichaite pevépa iñasãi pe mensáhe umichagua lugárpe. Por ehémplo, ñapensamína oiko vaʼekuére Cúbape. Upépe ojepredika ypy vaʼekue 1910-pe, ha ermáno Russell ovisita pe ísla 1913-pe. Ñepyrũrã haʼetévaicha ndaiporiguasúiva progréso, ¿péro mbaʼépa jahecha koʼág̃arupi Cúbape? Oĩma mas de 96.000 puvlikadór opredikáva pe marandu porã, ha 229.726 persóna oho kuri Konmemorasiónpe 2013-pe. Upéva heʼise oho hague 1 de káda 48 avitánte. Ha umi tetã ojepredikahápe lívremente katu pe marandu porã oñemog̃uahẽ umi lugár oñeimoʼãʼỹ haguépe oĩtaha progréso (Ecl. 8:7; 11:5). *

14, 15. a) ¿Mbaʼéichapa ñanepytyvõ pe ehémplo oñeʼẽva pe levadúrare? b) ¿Mbaʼépa ñanemboʼe Jehová ha Jesúsgui ko ehémplo?

¹⁴ ¿Mbaʼéichapa ñanepytyvõ pe ehémplo oñeʼẽva pe levadúrare? Jajepyʼamongetáramo umi ehémplo Jesús oipuru vaʼekue signifikádore, jahechakuaa Jehová oñenkargataha omog̃uahẽ hag̃ua pe marandu porã  umi nohendúivape gueteri. Upévare natekotevẽi jajepyʼapy. Péro, ¿mbaʼépa ñande jasegi vaʼerã jajapo? Ñandejára Ñeʼẽ heʼi: “Eñemitỹ pyharevekue ha kaʼaruete peve ani repytuʼu; ndereikuaái ningo moõpa osẽ porãta hína, koʼápe térã amo, térãpa mokõivéva osẽ porãta” (Ecl. 11:6, NM). Aníkena avei ñanderesarái jajerure hag̃ua Jehovápe tovendesi pe predikasión, koʼýte umi tetã ojeproivihápe ñane rembiapo (Efes. 6:18-20).

¹⁵ Aníkena ñañedesanima haʼetéramo ñandéve japredika reíva. Ndovaléi ñapensa ndoserviriha mbaʼeverã umi mbaʼe jajapóva predikasiónpe ndajahechaguasúi rupi ‘ñepyrũrã’ umi rresultádo (Zac. 4:10). Ikatu hína tiémpo rire jahecha mbaʼeichaitépa ideprovécho raʼe umi mbaʼe jajapo vaʼekue (Sal. 40:5; Zac. 4:7).

16. a) ¿Mbaʼépa orrepresenta pe ehémplo oñeʼẽva pe komersiántere? b) ¿Mbaʼépa orrepresenta pe ehémplo oñeʼẽva pláta yvyguýre?

¹⁶ (Elee Mateo 13:44-46.) ¿Mbaʼépa heʼise pe ehémplo oñeʼẽva pe komersiántere ha pe pláta yvyguýre? Síglo primérope, heta komersiánte oviaha vaʼekue oséano Índico peve ojogua hag̃ua umi pérla iporãvéva. Pe komersiánte Jesús imanduʼa hague pe ehémplope, orrepresenta hína umi persóna ipyʼaporãvape, ohekáva Ñandejárape ha ojapóva ikatúva guive oñemoag̃ui hag̃ua hese. Pe “pérla iporãva” orrepresenta hína pe marandu porã ijojahaʼỹva oñeʼẽva Ñandejára Rréinore. Pe komersiánte ohechávo pe pérla iporã ha ivaliosoitereiha, oho ovendepaite umi mbaʼe orekóva ojogua hag̃ua upe pérla. Upéi Jesús oñeʼẽ kuri avei peteĩ chokokue otopa vaʼekuére ‘pláta yvyguy’ ombaʼapohápe. Péro ko kuimbaʼe ohekaʼỹetére ojuhu pe tesóro, ndahaʼéi pe komersiánteicha ohóva haʼe voi oheka. Upéicharõ jepe, ovendepaite avei umi mbaʼe orekóva ikatu hag̃uáicha ojogua pe yvy oĩháme pe pláta yvyguy.

17. ¿Maʼerãpa Jesús oipuru umi ehémplo oñeʼẽva pe komersiántere ha pe pláta yvyguýre?

¹⁷ ¿Maʼerãpa Jesús oipuru koʼã ehémplo? Ohechauka hag̃ua pe marandu porã ikatuha og̃uahẽ heta hendáicha umi héntepe. Oĩ persóna ojeporekáva voi pe añeteguáre ha ótro katu ojuhu ohekaʼỹetére oñemog̃uahẽgui chupe pe marandu porã. Péro jahechaháicha pe ehémplo Jesús omoĩ vaʼekuépe, umi mokõi kuimbaʼe ovaloraiterei kuri umi tesóro ojuhúva ha osakrifika heta mbaʼe ani hag̃ua ojavy upe oportunida oñepresentáva ohupyty hag̃ua pe mbaʼe porãite.

18. a) ¿Mbaʼéichapa ñanepytyvõ koʼã mokõi ehémplo? b) ¿Mbaʼépa ñanemboʼe Jehová ha Jesúsgui ko ehémplo?

¹⁸ ¿Mbaʼéichapa ñanepytyvõ koʼã mokõi ehémplo? (Mat. 6:19-21.) Eñeporandumína: “¿Amombaʼépa pe añetegua oúva Ñandejáragui, umi mokõi kuimbaʼe omombaʼe haguéicha umi tesóro? ¿Ajapópa opa ikatúva ani hag̃ua aperde ko mbaʼe porãite, térãpa aheja chedistrae ambue mbaʼe, por ehémplo umi provléma ambohováiva káda día?” (Mat. 6:22-24, 33; Luc. 5:27, 28; Filip. 3:8). Javyʼaiterei ningo jajuhu haguére pe añetegua, ha upéva katuete ñanemombaretéta akóinte ñamotenonde hag̃ua pe marandu porã.

19. ¿Mbaʼépa ñahesaʼỹijóta pe artíkulo oúvape?

¹⁹ ¿Jajapysaka porãpa raʼe ha ñañehaʼã ñantende umi ehémplo oñeʼẽva pe Rréinore? Oiméramo ñañatende porã mbaʼépa heʼise umi ehémplo, ikatúta jaexplika ótrope ha ñañehaʼãta jajapo pe ñaaprende vaʼekue. Pe artíkulo oúvape ñahesaʼỹijovéta mbohapy ehémplo ha jahecháta mbaʼépa ñanemboʼe umíva.