1, 2. a) ¿Mbaʼérepa nde reĩ segúro Jehová ohayhuha isiervokuérape? b) ¿Mbaʼéichapa Jehová ñandeapo vaʼekue?

¿MBAʼÉREPA nde reĩ segúro Jehová ohayhuha isiervokuérape? Epensamíntena koʼã ehémplore: Peteĩ ermána hérava Taylene, oexihieterei ijehegui. Upévare oñeñandu vaieterei voi ojapo vai jave álgo, térã nosẽiramo chupe umi mbaʼe haʼe ohaʼarõháicha. Heta áñore umi ermáno mborayhúpe oakonseha chupe anivéma hag̃ua opensa upéicha. Haʼe heʼi: “Jehová ndacherayhúirire, ndojevalemoʼãi kuri umi ermánore chemokyreʼỹ hag̃ua ha omeʼẽ hag̃ua chéve konsého”. Ótra ermána hérava Brigitte, opyta viúda mokõi mitã reheve. Haʼe heʼi: “Ijetuʼueterei ningo ñamongakuaa hag̃ua umi mitã ko múndo añáme, koʼytevéntema pe túva térã sy oĩramo haʼeño. Péro che aĩ segúra Jehová cherayhuha, pórke chepytyvõ agueropuʼaka hag̃ua che mbaʼembyasy ha ndohejái ahasa peteĩ mbaʼe ndaikatumoʼãiva aaguanta” (1 Cor. 10:13). Ótra ermána hérava Sandra, oreko peteĩ enfermeda inkurávle. Peteĩ asambléape, peteĩ ermána ni ndoikuaáiva chupe oñemboja hendápe, osaluda chupe ha opyta oñemongeta hendive. Sandra ména omombeʼu: “Pe ermána ndaorekuaáiramo jepe ohechauka oñeinteresaha orerehe ipyʼaite guive, ha upéva  orembovyʼaiterei. Sapyʼánte ningo sonseramínte umi ermáno ojapóva ore rehehápe, péro upéicha jave rohechakuaa Jehová orerayhuetereiha”.

² Ñande yvypóra ningo japorohayhukuaa ha jaipota avei ótro ñanderayhu. ¿Mbaʼérepa upéva? Pórke Jehová voi ñandeapo upéicha. Péro ñanderasýramo, ñaikotevẽramo pláta térã umi hénte nañanerenduséiramo predikasiónpe, ikatu jaju ñañedesanima. Jahasáramo koʼã situasiónre, ikatu voi ñapensa Jehová nañanderayhuveimaha. Péro upéicha jave ñanemanduʼa vaʼerã haʼe ojepyʼapyha ñanderehe ha ñanepytyvõseha. Jehová siémpre oĩta ñande ykére jasegíramo ñaneñeʼẽrendu chupe (Is. 41:13; 49:15).

3. ¿Mbaʼépa ñanepytyvõta ñaĩ hag̃ua segúro Jehová ñanderayhuha?

³ Umi ermáno oñemensiona vaʼekue oĩ segúro Ñandejára oipytyvõ hague chupekuéra ohasárõ guare umi situasión ijetuʼúva. Ñande avei ikatu ñai konvensído Jehová ñanepytyvõseha (Sal. 118:6, 7). Ñapensa meméramo umi mbaʼe porã Jehová omeʼẽvare ñandéve, núnka ndajadudamoʼãi haʼe ñanderayhuha (elee Salmo 77:11, 12). Ko artíkulope jahecháta cuatro mbaʼe porã Jehová omeʼẽva ñandéve: 1) pe kreasión, 2) la Biblia, 3) pe orasión, ha 4) Jesús sakrifísio.

4. Jajepyʼamongetávo Jehová kreasiónre, ¿mbaʼépa ñaaprende chugui?

⁴ Jajesarekóramo pe kreasión rehe, jahechakuaa Jehová ñanderayhuetereiha (Rom. 1:20). Por ehémplo, haʼe ojapo ko yvy ha omoĩ pype opa mbaʼe ñaikotevẽva jaiko hag̃ua vyʼápe. Avei ojapo vaʼekue diferénte kláse hiʼupy ikatu hag̃uáicha jadisfruta umi mbaʼe jaʼúvagui (Ecl. 9:7). Peteĩ ermána Canadagua hérava Catherine, omombeʼu odisfrutaitereiha oñepyrũvo pe primavéra, pórke ohecha umi plánta hokypaha ha umi guyraʼikuéra oupa jey. Avei ovyʼa ohechávo peteĩ mainumby ou jave hoʼu hembiʼu omoĩva chupe ikosina ventánape. Haʼe oasegura Jehová ñanderayhuetereiha, upévarente omeʼẽha ñandéve hetaite mbaʼe porã. Ñande Ru Jehová odisfruta ohechávo ikreasión ha oipota avei ñande jadisfruta (Hech. 14:16, 17).

5. ¿Mbaʼéichapa Jehová ohechauka avei ñanderayhuha?

⁵ Jehová ohechauka avei ñanderayhuha ñandeapóvo ñambaʼapokuaa hag̃ua ha javyʼa hag̃ua jajapóvare (Ecl. 2:24). Haʼe oipota avei ko yvy henyhẽ yvypóragui, ha omeʼẽ ñandéve ko yvy ñañemitỹ hag̃ua ha ñañangareko hag̃ua umi animál rehe ha opa mbaʼe oikovévare (Gén. 1:26-28). Avei ñanembokatupyry jasegi hag̃ua iñehémplo (Efes. 5:1).

6. ¿Mbaʼérepa jaagradese vaʼerã jareko haguére la Biblia?

⁶ Jehová omeʼẽ ñandéve la Biblia ñanderayhúgui. Jaagradese vaʼerã chupe ko rregálore, pórke jaleévo la Biblia ikatu jaikuaa mbaʼeichagua persónapa haʼe ha mbaʼépa oñandu yvyporakuérare. Por ehémplo, la Biblia omyesakã mbaʼépa Jehová oñandu vaʼekue umi isrraelítare haʼekuéra ofalláramo jepe heta vése. Salmo 78:38 heʼi: “Ñandejára oiporiahuvereko chupekuéra. Haʼe operdonámi vaʼekue pe puévlope ha nohundíri chupekuéra. Ipochýramo jepe, heta vése ojejokopaite” (NM). Jajepyʼamongetávo ko téxtore, ñanepytyvõ ñaime hag̃ua segúro Jehová ñanderayhuetereiha ha ojepyʼapyha ñanderehe (elee 1 Pedro 5:6, 7).

7. ¿Mbaʼérepa ñandéve g̃uarã la Biblia ivaliosoiterei?

 ⁷ Ñandéve g̃uarã la Biblia ivaliosoiterei. ¿Mbaʼérepa? Pórke Jehová ojevale Iñeʼẽre oñekomunika hag̃ua ñanendive. Peteĩ túva siémpre oñekomunikáramo itaʼýrandi, koʼẽ koʼẽre ojoayhuve ha okonfiave ojuehe. Jehová haʼe hína ñande Ru ñanderayhuetéva. Ha haʼe oñeʼẽ ñandéve la Biblia rupive, ndaikatúiramo jepe jahecha ni ñahendu chupe. Upévare, jalee jave la Biblia, ñañatende porã vaʼerã jaikuaa hag̃ua mbaʼépa haʼe heʼi ñandéve (Is. 30:20, 21). Jehová ñandegia ha oñangareko ñanderehe. Avei oipota jaikuaa porã chupe ha jajerovia hese (elee Salmo 19:7-11 ha Proverbios 1:33).

8, 9. ¿Mbaʼépa Jehová oipota enterovéva jaikuaa? Emoĩ peteĩ ehémplo ohechaukáva upéva.

⁸ Jehová oipota enterovéva jaikuaa haʼe ojesarekoha umi mbaʼe porã jajapóvare, ha ndoikoiha okontrola mbaʼépa jajapo vai (2 Crón. 16:9). Jahechamína peteĩ ehémplo. Pe rréi Judagua hérava Jehosafat odesidi vai vaʼekue ha omoirũ pe rréi de Israélpe oñorairõ hag̃ua umi sírio kóntrape. Oĩ kuri 400 proféta fálso heʼíva pe rréi de Israélpe oganataha pe gérra. Péro Jehová proféta hérava Micaya heʼi Jehosafátpe operdetaha hikuái ohóramo oñorairõ. Ha upeichaite oiko. Pe rréi Israelgua omano pe gerrahápe, ha Jehosafat katu apenaite ojesalva. Upéi Jehová omondo Jehúpe okorrehi hag̃ua Jehosafátpe odesidi vai haguére, péro heʼika avei chupe: “Oĩ iporãva rejapo vaʼekue” (2 Crón. 18:4, 5, 18-22, 33, 34; 19:1-3).

⁹ ¿Mbaʼépa la ojapo porã vaʼekue rréi Jehosafat? Unos kuánto áño upe mboyve,  omanda kuri umi prínsipe, levíta ha saserdotekuérape oho hag̃ua Judá tuichakuére ikatu hag̃uáicha omboʼe umi héntepe Ñandejára Léi. Heta mbaʼe porã ningo ojehupyty upe haguére, pórke umi hénte ótro tetãgua jepe oaprende Jehovágui (2 Crón. 17:3-10). Péro upéi Jehosafat ou odesidi vai, upéicharõ jepe Jehová ndahesarái umi mbaʼe porã ojapo vaʼekuégui. ¿Mbaʼépa ñanemboʼe ko ehémplo? Ñañehaʼãramo jaservi Jehovápe, haʼe ñanderayhúta ha ndahesaraimoʼãi umi mbaʼe porã jajapo vaʼekuégui, jepe sapyʼánte jajavy henondépe.

10, 11. a) ¿Mbaʼérepa ikatu jaʼe pe orasión haʼeha peteĩ rregálo Jehová omeʼẽva ñandéve? b) ¿Mbaʼéichapa Ñandejára okontesta ñane ñemboʼe? (Ehecha pe taʼanga oĩva iñepyrũme.)

¹⁰ ¿Mbaʼépa ojapo peteĩ túva itaʼýra oñeʼẽséramo hendive? Haʼe ojepyʼapýgui hese oñemotiémpo ohendu hag̃ua chupe ha oikuaa hag̃ua mbaʼépa oñandu. Jehová ningo ñande Túva ha haʼe oñeinteresaiterei ñanderehe. Upévare, ñañemboʼe jave chupe, ojapysaka porã ñanderehe. Añetehápe, jareko tuicha priviléhio ikatu haguére ñañeʼẽ Jehovándi.

¹¹ Pe orasión haʼe peteĩ rregálo Jehová omeʼẽva ñandéve. ¿Mbaʼérepa jaʼe upéva? Pórke pe orasión rupive ikatu ñañemongeta Jehovándi ñandegustaha óra. Haʼe ningo ñane amígo ha siémpre oĩ ñanerendu hag̃uáicha. Pe párrafo únope, ñañeʼẽ kuri peteĩ ermána héravare Taylene. Haʼe heʼi ikatuha ñamombeʼu Jehovápe oimeraẽ mbaʼe. Ñamombeʼu jave Ñandejárape umi mbaʼe ñañandúva, haʼe ikatu okontesta ñandéve ñane orasión peteĩ artíkulo osẽva ñande rrevístape rupive térã peteĩ téxto vívliko rupive. Avei ojevalekuaa peteĩ ermánore ñanemokyreʼỹ hag̃ua. Jehová ningo ñanerendu ha ñanentende, ndaipórirõ jepe ótra persóna ojapóva upéva. Ha okontestávo ñane orasión ohechauka avei ñanderayhuetereiha.

12. ¿Mbaʼérepa iporã vaʼerã jastudia umi ñemboʼe oĩva la Bíbliape? Emoĩ peteĩ ehémplo.

¹² La Bíbliape ojehai vaʼekue heta orasión, ha umíva ikatu ñanemboʼe heta mbaʼe. Upévare iporã vaʼerã sapyʼánte jastudiáramo umi orasión jajapo jave ñane adorasión en família. Por ehémplo, ikatu ñahesaʼỹijo pe orasión ojapo vaʼekue Jonás oĩrõ guare pe pira ryepýpe (Jon. 1:17–2:10). Avei ikatu jastudia pe orasión ojapo vaʼekue ipyʼaite guive Salomón oñeinagurárõ guare pe témplo (1 Rey. 8:22-53). Iñimportánte avei ñapensa pe orasión Jesús omboʼe vaʼekuére (Mat. 6:9-13). Jajepokuaáramo jajepyʼamongeta koʼãichagua orasión rehe, ñanepytyvõta ñañemboʼe porãve hag̃ua. Tekotevẽ avei ñanemanduʼa siémpre ‘ñamombeʼu vaʼerãha Ñandejárape jaipotáva’. Upéicha jajapóramo, ‘Ñandejára pyʼaguapy tuichavéva opa mbaʼe ikatúvagui ñantende, oñangarekóta ñane korasõre ha umi mbaʼe ñapensávare’. Avei ñañemboʼe meméramo, amás día jaagradesevéta Jehovápe ñanderayhu haguére (Filip. 4:6, 7).

13. ¿Mbaʼe oportunida jareko Jesús omano rupi ñande rehehápe?

¹³ Jehová ohechauka avei ñanderayhuha ontregávo Itaʼýra sakrifísioramo. Ñandejára omeʼẽ ñandéve ko rregálo “ikatu hag̃uáicha [Jesús] rupive jahupyty pe jeikove” (1 Juan 4:9). Apóstol Pablo heʼi vaʼekue: “Cristo omano iñañáva rehehápe. Haʼe ojapo upéva ñande pekadór aja gueteri. Hasy hína oĩ hag̃ua omanóva peteĩ hekojojáva rehehápe, péro añetehápe ikatu oĩ omanoséva peteĩ ivuénova rehehápe.  Ñandejára katu ohechauka ñanderayhuha, Cristo omanóvo ñande rehehápe ñande pekadór aja gueteri” (Rom. 5:6-8). Jehová omeʼẽvo Itaʼýra sakrifísioramo ohechauka pe mborayhu tuichavéva. Avei péicha jareko oportunida jaiko hag̃ua iñamígoramo.

14, 15. a) ¿Mbaʼéichapa Jesús sakrifísio ovenefisia umi unhídope? b) ¿Mbaʼéichapa Jesús sakrifísio ovenefisia umi kristiáno ndahaʼéivape unhído?

¹⁴ ¿Mbaʼe venefísiopa ogueru Jesús sakrifísio? Por ehémplo, umi unhído oñandu de fórma espesiál mbaʼéichapa Jehová ohayhu chupekuéra (Juan 1:12, 13; 3:5-7). Ñandejára oiporavo kuri chupekuéra espíritu santo rupive ha upévare koʼág̃a haʼekuéra haʼe itaʼýra (Rom. 8:15, 16). Pablo heʼi vaʼekue entéro umi unhído ‘oguapyha yvágape, haʼégui Cristo Jesús disípulo’ (Efes. 2:6). Péro, ¿mbaʼérepa Pablo heʼi haʼekuéra oguapyha yvágape oĩrõ gueteri koʼág̃a heta unhído ko yvy ape ári? Haʼe heʼi péicha pórke Jehová omeʼẽ entéro unhídope pe esperánsa oiko hag̃ua yvágape (Efes. 1:13, 14; Col. 1:5).

¹⁵ Péro, ¿mbaʼéichapa Jesús sakrifísio ovenefisia umi ndahaʼéivape unhído? Ojeroviáramo hikuái Jesús sakrifísiore oiko chuguikuéra Jehová amígo. Avei omombaʼéramo hikuái upe sakrifísio, amo gotyove Ñandejára ikatúta oadopta chupekuéra itaʼýraramo ha ikatúta oiko pára siémpre ko yvy ape ári. Jahechaháicha, Jesús sakrifísio ohechauka Jehová ohayhuetereiha entéro yvypórape (Juan 3:16). Jasegíramo ñaneñeʼẽrendu Ñandejárape, ikatúta jadisfruta heta mbaʼe porã jaiko vove pe paraísope. ¡Ajépa javyʼaite jaikuaávo upéva! Añetehápe, Jehová omeʼẽvo Itaʼýrape omano hag̃ua ñande rehehápe ohechauka pe mborayhu tuichavéva. Upévare, jasegíkena jahechauka jaagradeseha chupe ñande pyʼaite guive.

16. ¿Mbaʼérepa iporã jajepyʼamongeta umi mbaʼe Jehová ojapóvare ohechauka hag̃ua ñanderayhuha?

¹⁶ Jehová ohechauka heta hendáicha ñanderayhuha. Rréi David heʼi vaʼekue: “Ne pensamientokuéra ningo tuichaiterei mbaʼe chéve g̃uarã. Ndaikatúi ñambyatypa jaipotáramo jepe. Aipapáramo oñemboheta hetave yvykuʼi raʼỹigui” (Sal. 139:17, 18, ÑÑB). Jajepyʼamongetáramo umi mbaʼe Jehová ojapóvare ohechauka hag̃ua ñanderayhuha, katuete jahayhuvéta chupe ha ñameʼẽséta chupe pe iporãvéva.

17, 18. ¿Mbaʼéichapa ikatu jahechauka Jehovápe jahayhuha chupe?

¹⁷ Ñande ikatu jahechauka Jehovápe jahayhuha chupe, japredikávo kyreʼỹme pe notísia porã oñeʼẽva Ñandejára Rréinore (Mat. 24:14; 28:19, 20). Avei tekotevẽ ñaneñeʼẽrendu chupe jahasa jave umi pruéva omokangyséva ñande jerovia (elee Salmo 84:11 ha Santiago 1:2-5). Upéicharõ, ñambohováiramo jepe umi provléma ijetuʼuetereíva, ñanemanduʼa vaʼerã Jehová ohecha ha ontendeha umi mbaʼe jahasáva, ha katuete ñanepytyvõtaha, pórke haʼe ñanderayhueterei (Sal. 56:8).

¹⁸ Ko artíkulope ñahesaʼỹijo kuri mbaʼépa jajapo vaʼerã jahechauka hag̃ua Jehovápe jahayhuha chupe: Primero, jajepyʼamongeta umi mbaʼe porãita haʼe ojapo vaʼekuére. Segundo, jastudia meme la Biblia. Tercero, ñañemboʼe pyʼỹi ikatu hag̃uáicha amás día ñañemoag̃uive hese. Ha cuarto, jajepyʼamongeta Jesús sakrifísiore, haʼéva hína peteĩ rregálo Jehová omeʼẽva ñandéve (1 Juan 2:1, 2). Jajapóramo koʼã mbaʼe, ñaĩta segúro Jehová ñanderayhuha ha ñande avei jahayhuvéta chupe koʼẽ koʼẽre.