Jahechápa ñande rapichakuérape Jehová ohechaháicha?

“Ani hag̃ua oiko ñorairõ ñande rete rehegua apytépe; ñande rete rehegua oñopytyvõjoavaʼerã uvei.” (1 CORINTIOS 12:​25, ÑÑB.)

1. Mbaʼéichapa reñeñandu reñepyrũrõ guare rejeheʼa Jehová siervokuérare?

 ÑANEMANDUʼÁPA mbaʼéichapa ñañeñanduvaʼekue jahejárõ guare ko múndo aña ha ñañepyrũ jajeheʼa Jehová siervokuérare? Javyʼanerakaʼe upérõ umi ermáno ñandeguerohory ha imbaʼerechakuaahaguére ñanendive. Aje piko ndojoguaiete hikuái umi Satanás poguýpe oĩvape! Umíva ningo ipyʼahatã, iñaña ha oporotrata vai. Péro ñandéve Jehová ñanerekomboʼe rupi, koʼág̃a jaiko pyʼaguapy ha joayhúpe (Isaías 48:​17, 18; 60:18; 65:25).

2. a) Mbaʼérepa ikatu ndajahechavéima ñane ermanokuérape ymaguaréicha? b) Mbaʼépa tekotevẽ jajapo ojehúramo ñandéve upéicha?

² Upéicharamo jepe, ikatu mbeguekatúpe ndajahechavéima ñane ermanokuérape ymaguaréicha. Ha ñane imperfékto rupi, ikatu ndajahechavéima umi mbaʼe porã ojapóva ha jahechántema moõpa ojavy hikuái. Upéva heʼisehína ndajahechaveimaha chupekuéra Jehová ohechaháicha. Ojehu sapyʼáramo ñandéve upéicha, ñañehaʼãmbaitevaʼerã jahecha Jehová ohechaháicha chupekuéra (Éxodo 33:13).

Mbaʼéichapa Jehová ohecha ñane ermanokuérape?

3. Mbaʼérepa oñembojoja Ñandejára Ñeʼẽme kristianokuérape?

³ Apóstol Pablo ohaírõ guare 1 Corintios 12:​2-26 ombojoja umi kristiáno ohótavape yvágape yvypóra retére. Jaikuaáningo ñande po, ñande resa, ha ñande py ndojojoguaiha. Upéicha avei umi ermáno oĩva kongregasiónpe ndahaʼéi peteĩcha. Péro Jehová ndohechavaíri upéva. Haʼe ohayhu ha omombaʼe enterovépe. Upévare apóstol Pablo heʼi ñandéve ‘ñañopytyvõ hag̃ua’. Upéicharamo jepe, sapyʼánte ijetuʼu ñandéve jajapo hag̃ua upéva, koʼýte ñande rapicha nopensáiramo ñandéicha.

4. Mbaʼérepa ñakambiavaʼerã jahechántemaramo moõpa ojavy ñane ermanokuéra?

⁴ Jaʼehaguéicha, ikatu jahechántema moõpa ojavy ñane ermanokuéra. Jajapóramo upéicha haʼetéta jahechavañaína peteĩ fóto ha jajesareko umi mbaʼe nañandegustáivarente. Jehová katu ohechapaitehína pe fóto térã opa mbaʼe umi ermanokuéra ojapóva, iporãva ha ivaíva, ha ndojesarekói pe ivaívarente. Upévare, ñañehaʼãkena jahecha ñane ermanokuérape Jehová ohechaháicha. Jajapóramo upéicha jajoayhuve ha jaikóta peteĩ ñeʼẽme ñane ermanokuéra ndive (Efesios 4:​1-3; 5:​1, 2).

5. Mbaʼérepa naiporãi japorohusga?

⁵ Jesús ohechakuaavaʼekue ñane imperfékto rupi ñañeʼẽ vaiseha ñande rapichakuérare. Upévare heʼivaʼekue: ‘Anive peporohusga, ani hag̃ua pejehusga’  (Mateo 7:​1, BNP ). Jahechakuaa, Jesús ndeʼirihague ‘ani peporohusga’, péro heʼi ‘anive peporohusga’. Haʼe oikuaa umi ohendúva chupe ojepokuaaha oñeʼẽ vai hapicháre. Jajapópa ñande upéicha avei? Jajapóramo upéicha, ñañehaʼãvaʼerã ñakambia ani hag̃ua Ñandejára ñandehusga. Ha máva piko ñande jaiko hag̃ua jahusga Jehová rembiguáipe? Térã jaʼe hag̃ua peteĩ ermáno ndaikatuiha oĩ kongregasiónpe? Ikatu ningo peteĩ ermáno ojavy jepi, péro Jehová nomboykéi chupe upévare. Upéicharõ, máva piko ñande ñamboyke hag̃ua chupe? (Juan 6:44). Ndajagueroviái mbaʼe piko Jehová oisãmbyhyha iñorganisasión, ha okambiataha oimeraẽ mbaʼe tekotevẽramo? (jaleemína Romanos 14:​1-4.)

6. Mbaʼépa ohechakuaa Jehová isiervokuérare?

⁶ Jehová oikuaa porã mbaʼeichaitépa ñañehaʼã koʼág̃a peve jaservi porã chupe. Ohechakuaa avei mbaʼépa ikatúta jajapo ñande perfékto vove. Upévare, ndojesarekói umi mbaʼe vai jajapóvarente. Jaleeháicha Salmo 103:​12-pe, “kuarahy resẽ mombyryháicha kuarahy reikégui, upéicha omomombyry ñandehegui ñanerembiapo vaikue”. Ha javyʼaiténingo ojapohaguére upéicha! (Salmo 130:3.)

7. Mbaʼéichapa Jehová ohecha Davídpe ha mbaʼépa ñanemboʼe upéva?

⁷ La Biblia ningo ohechauka Jehová ikatuha ojesareko umi mbaʼe porã jajapóvarente. Jahechamína mbaʼépa heʼivaʼekue David rehe: ‘Ojapovaʼekue che rembiapoukapy, ha oiko che rape rupi ipyʼaite guive, ha ojapo iporãvante che renondépe’ (1 Reyes 14:8). Jaikuaaháicha, David ningo heta vése ojavyvaʼekue. Upéicharamo jepe, Jehová ohecha ipyʼaporãha ha ojesareko umi mbaʼe porã ojapovaʼekuérente (1 Crónicas 29:17).

Jahecha ñane ermanokuérape Jehová ohechaháicha

8, 9. a) Mbaʼépa ñañehaʼãvaʼerã jajapo jahecha hag̃ua ñande rapichakuérape Jehová ohechaháicha? b) Mbaʼérepa ikatu ñambojoja upéva, ha mbaʼépa ñanemboʼe?

⁸ Jehová ohecha ñande pyʼapýpe oĩva, ñande katu nahániri. Upévare naiporãi jahusga ñande rapichápe. Ñande ningo ndajaikuaái mbaʼépa opensa hikuái. Upéicharõ, ñañehaʼãvaʼerã jajapo Jehová ojapoháicha ha ani jahechaiterei moõpa ojavy  ñande rapicha. Iporãitereíta ningo jajapóramo upéicha. Upéva tuichaiterei ñanepytyvõta jaiko hag̃ua pyʼaguapýpe ñane ermanokuéra ndive (Efesios 4:​23, 24).

⁹ Ñamoĩmi peteĩ ehémplo. Peteĩ óga ningo ivaipaitéma, ha umi ikanaléta hoʼapa, iventána ojekapa ha itécho katu otykypa. Ha ohechávante upe óga vaikue heʼi tekotevẽha ojeitypa. Péro oĩ peteĩ tapicha nopensáiva upéicha. Haʼe ohechakuaa hetave mbaʼe pe ógare. Ohecha hese heta mbaʼe iporãva gueteri, ha ikatuha oñemyatyrõ jey. Upémaramo ojogua pe óga ha oñehaʼãmbaite omyatyrõ. Koʼág̃a katu omoporãjoa umi hénte ohasáva henonde rupi. Ikatúpa ñande avei ñañehaʼã pe tapicha omyatyrõ jey vaʼekuéicha pe óga? Jaikorangue jahecha moõpa ojavy ñane ermanokuéra, iporãvéta jahecháramo umi mbaʼe porã ojapóva ha mbaʼéichapa oñehaʼã oservi porã Ñandejárape. Upéicharamo, Jehová ohayhuháicha chupekuéra umi mbaʼe porã ojapóvare, ñande avei jahayhúta ñane ermanokuérape (jaleemína Hebreos 6:10).

10. Mbaʼéichapa ñanepytyvõ Filipenses 2:​3, 4-pe heʼíva?

¹⁰ Apóstol Pablo heʼivaʼekue peteĩ mbaʼe umi kristiáno Filiposguápe ñanepytyvõtava jaiko porã hag̃ua ñane ermanokuéra ndive. Heʼi chupekuéra: ‘Ani pejapo mbaʼeve peñemombotuichase térã peñorairõségui, peteĩteĩ toñemomirĩ uvei, ha peguereko ambuekuérape mbaʼeguasuvérõ pendehegui. Ani peheka mbaʼe iporãva peẽme g̃uarãnte, peheka avei mbaʼe iporãva pende rapichápe g̃uarã’ (Filipenses 2:​3, 4, ÑÑM). Ñaneumílderamo ñamombaʼéta ñane ermanokuérape. Jajepyʼapýramo hesekuéra ha jahecha umi mbaʼe porã ojapóva, ndahasyivéta ñandéve jahecha hag̃ua chupekuéra Jehová ohechaháicha.

11. Mbaʼépa jahecha koʼág̃a heta kongregasiónpe?

¹¹ Umi mbaʼe oikóva koʼág̃a omomýi hetaitereípe ova hag̃ua ambue tetã rupi. Upévare, heta táva guasúpe oiko tapicha opa tetãygua. Umíva apytépe heta oĩ oikuaasevéva la Biblia omboʼéva ha koʼág̃a omombaʼeguasúma Jehovápe ñanendive. Koʼãva hína tapicha ‘opa tetãygua, trívu, ha ñeʼẽ rehegua’ (Apocalipsis [Revelación] 7:​9, BNP ). Upéicha rupi heta kongregasiónpe oĩ ermáno opa tetãygua.

12. Mbaʼéichapa jahechavaʼerã ñane ermanokuérape, ha mbaʼérepa ikatu ijetuʼu ñandéve upéva?

¹² Upévare, ikatu ñañehaʼãveñaína jahecha enterove ñane ermanokuérape hekopete. Ñanemanduʼavaʼerã apóstol Pedro heʼihague ‘jajoayhuvaʼerãha tovamokõiʼỹ rehe’ ha ‘ñande pyʼaite guive’ (1 Pedro 1:​22, BNP ). Péro ikatu ijetuʼu ñandéve jahayhu hag̃ua opaichagua tetãyguápe. Ikatu oĩ ermáno nopensáiva ñandéicha ha ndahaʼéiva ñane retãygua, térã noñehekomboʼeivaʼekue chupekuéra ñandéicha. Hasýpa ñandéve ñantende hag̃ua mbaʼérepa haʼekuéra opensa térã ojapo peteĩ mbaʼe? Ikatu avei haʼekuéra opensahína upéicha ñanderehe. Upéicharamo jepe, ojeʼe ñandéve: ‘Pehayhúkena opavave ermanokuérape’ (1 Pedro 2:​17, BNP ).

13. Mbaʼérepa sapyʼánte ñakambiavaʼerã umi mbaʼe ñapensáva?

¹³ Sapyʼánte ningo ñakambiavaʼerã umi mbaʼe ñapensáva jahayhu hag̃ua opavave ñane ermanokuérape (jaleemína 2 Corintios 6:​12, 13). Oĩningo heʼíva: “Chéngo namboykéi avavépe, péro...”, ha upéi katu oñepyrũ imanduʼa mbaʼe mbaʼépepa ojavy jepi chupe g̃uarã umi ambue tetãygua. Ojehúmavapa ñandéve upéva? Oiméramo upéicha, ñaikotevẽ gueteri ñambaʼapove jaipeʼa hag̃ua umi mbaʼe ñandejehegui. Iporã vaʼerã ñañeporandu: “Añehaʼãpa aikuaa porãve umi che rapicha ambue  tetãyguápe?”. Jajepyʼamongetáramo upéicha, ndahasyivéta ñandéve ñamombaʼe ha jahayhu hag̃ua opaichagua ermánope.

14, 15. a) Emombeʼumi máva mávapa okambiavaʼekue. b) Mbaʼéichapa ñande avei ikatu ñakambia?

¹⁴ La Biblia omombeʼu heta tapicha okambiahague upe opensáva. Upévare, ñanemanduʼami apóstol Pedro rehe. Haʼe niko hudío vaʼekue. Upévare arakaʼeve ijeheguínte ndoikeivaʼerãmoʼã umi ndahaʼéiva hudío rógape. Jajepyʼamongetami upéicharõ, mbaʼeichaitépa oñeñandunerakaʼe ojeʼérõ guare chupe oho hag̃ua Cornelio rógape, peteĩ ndahaʼéiva hudío. Upéicharamo jepe, okambia ohechakuaárõ guare Ñandejára oipotaha opaichagua tapicha oservi chupe (Hechos 10:​9-35). Saulo avei okambiavaʼekue, ha ojekuaa chupe upe rire apóstol Pablo ramo. Haʼe voi heʼi okambia mboyve ndaijaʼeihague kristianokuérare. Upévare heʼi: “Che apersegi mbarete vaʼekue [...] Ñandejára iglésia, ha añehaʼãmbaitevaʼekue ahundi”. Péro Jesús okorrehírõ guare chupe, tuichaiterei okambia ha iñeʼẽrendu umi opersegivaʼekuépe jepe (Gálatas 1:​13-20, BNP ).

¹⁵ Jahecha upéicha ikatuha ñakambia Jehová espíritu ñanepytyvõramo. Upévare, jahechakuaáramo tekotevẽha gueteri ñakambia, ñañehaʼãmbaitevaʼerã ñakambia. Upéicharõ, Ñandejára espíritu rupive jaikóta oñondive pyʼaguapýpe, ha peteĩ ñeʼẽme (Efesios 4:​3-6). La Biblia heʼi ñandéve: “Peñemonde mborayhúpe, mbaʼe oporombojoaju porãva” (Colosenses 3:14).

Jahecha ñande rapichakuérape Jehová ohechaháicha japredika jave

16. Mbaʼépa Jehová oipota ojapo opavave tapicha?

¹⁶ Apóstol Pablo heʼivaʼekue Ñandejára ndoikoiha oiporavo mávapepa ohayhúta (Romanos 2:11). Jehová ningo oipotahína opavave tapicha omombaʼeguasu chupe (jaleemína 1 Timoteo 2:​3, 4). Upévare omombeʼu pe ‘marandu tekove opaveʼỹva rehegua opa yvypórape, opa tetãygua, ñeʼẽ ha tavayguápe’ (Apocalipsis [Revelación] 14:​6, JMP). Jesús avei heʼivaʼekue: “Pe kokue ningo hína ko múndo” (Mateo 13:​38,  ÑÑB). Mbaʼépa heʼise ndéve ha ne famíliape g̃uarã upéva?

17. Mbaʼéichapa ikatu ñaipytyvõ opaichagua tapichápe?

¹⁷ Naentéroiningo ikatu jaha ambue tetãme japredika hag̃ua. Péro ikatu japredika umi ambue tetãyguápe oikóva ñande territóriope. Ñañehaʼãpa japredika opaichagua tapichápe, ha ndahaʼéi umi japredika pyʼỹivapente? Mbaʼérepa nañañehaʼãi ñañeʼẽ umi neʼĩravape gueteri ojepredika porã? (Romanos 15:​20, 21.)

18. Mbaʼéichapa Jesús ohechaukavaʼekue oipytyvõseha umi héntepe?

¹⁸ Jesús ningo oipytyvõsetereivaʼekue opavavépe. Upévare ndopredikái peteĩ hendápe añónte. La Biblia heʼi: “Jesús oiko umi táva ha tavaʼiháre”. Avei, haʼe ‘ohechávo umi hénte aty, oiporiahuvereko chupekuéra’. Ha heʼi jey jey oñepytyvõvaʼerãha chupekuéra (Mateo 9:​35-37, JMP ).

19, 20. Mbaʼéichapa ikatu jahechauka ñaipytyvõseha opaichagua tapichápe Jehová ha Jesús ojapoháicha?

¹⁹ Mbaʼéichapa ikatu ñaipytyvõse avei ñande rapichápe Jesús ojapohaguéicha? Heta puvlikadór ningo oho umi lugár saʼi ojepredikahápe jepi. Oĩ umi negósio, plása, terminál, térã umi óga guasu renondépe, ikatuʼỹhápe ojeike. Oĩ avei umi oñehaʼãva oaprende ótro idióma opredika hag̃ua umi ovaramóvape ha ndojepredikáivape jepi. Jasaludánteramo jepe chupekuéra iñeʼẽme, ohechakuaátama hikuái mbaʼeichaitépa jajepyʼapy hesekuéra. Ndaikatúiramo jepe ñaaprende ótro idióma, ñamokyreʼỹvaʼerã umi oñehaʼãvape ojapo upéva. Animoʼãkena ñamokangy térã jaʼe chupekuéra ndojapoporãiha oñehaʼãhaguére opredika umi ambue tetãyguápe. Jehová ningo omombaʼeterei yvypóra rekove. Upévare ñande avei jajapovaʼerã upéicha (Colosenses 3:​10, 11).

²⁰ Ha jahecháramo chupekuéra Jehová ohechaháicha, japredikáta chupekuéra toiko oikoháicha hikuái. Nañamboykemoʼãi chupekuéra ndahogaihaguére, noñemondeporãi térã heko vai haguére. Ha oĩramo ñandetrata vaíva, nañapensamoʼãi enterove upe tetãygua upeichaha. Apóstol Páblope ningo oĩvaʼekue otrata vaíva. Upéicharamo jepe osegi opredika umi otrata vai vaʼekue chupe retãyguápe (Hechos 14:​5-7, 19-22). Haʼe ojeroviavaʼekue oĩtaha umíva apytépe ohendu porãva pe marandu.

21. Mbaʼéichapa ñanepytyvõta jahecháramo ñande rapichápe Jehová ohechaháicha?

²¹ Enterove jahechavaʼerã ñane ermanokuérape Jehová ohechaháicha, tahaʼe ñane retãygua térã ambue tetãygua. Ñañehaʼã meméramo ko mbaʼépe, ñande pyʼaguapy ha jajoayhuvéta kongregasiónpe. Avei, ñande jahechavaʼerã Jehová ohechaháicha umi ñande rapicha oĩva ñande territóriope. Jajapóramo upéicha, ñaipytyvõ porãvéta chupekuéra ohayhu hag̃ua Jehovápe. Jaikuaáma haʼe ndoiporavoiha mávapepa ohayhúta ha ojepyʼapyha opavavére, ‘mayma yvypóra hembiapokue rupi’ (Job 34:​19, ÑÑB).

Mbaʼéichapa ñambohováita?

• Mbaʼéichapa ikatu ndajahechavéi ñane ermanokuérape ymaguaréicha?

• Mbaʼépa ikatu jajapo jahecha hag̃ua ñane ermanokuérape Jehová ohechaháicha?

• Mbaʼéichapa jahechavaʼerã ñane ermanokuéra ndahaʼéivape ñane retãygua?

• Mbaʼépa jajapovaʼerã jahecha hag̃ua umi ñande territóriope oĩva Jehová ohechaháicha?

[Porandu ñahesaʼỹijóva]

[Nóta oĩva taʼanga ndive páhina 26]

Mbaʼéichapa ikatu jaikuaave umi hénte ambue tetãyguápe?

[Nóta oĩva taʼanga ndive páhina 28]

Mbaʼépa ikatu jajapo japredika hag̃ua opaichagua tapichápe?