Mbaʼe mbaʼépa ñanemboʼe Hechos
Jehová Ñeʼẽ ningo oikove
Mbaʼe mbaʼépa ñanemboʼe Hechos
HECHOS kuatiañeʼẽ omombeʼu porã mbaʼéichapa oñepyrũ kristianokuéra kongregasión ha mbaʼéichapa hetave hikuái. Ko lívro ohai Lucas ha omombeʼu kyreʼỹ mbaʼépa ojapo kristianokuéra 28 áño aja, áño 33 guive 61 peve.
Oñepyrũvo omombeʼu apóstol Pedro ojapovaʼekue ha upéi apóstol Pablo rembiapokue. Omombeʼu jave umi mbaʼe oikóva Lucas heʼi “ore” ha upéva ohechauka haʼe ohechahague umi mbaʼe. Hechos kuatiañeʼẽ ñanepytyvõta ñamombaʼeve hag̃ua Ñandejára Ñeʼẽ ha ijespíritu sánto (Hebreos 4:12). Avei ñanemokyreʼỹta jajesakrifika ha jajeroviave hag̃ua Ñandejára rréinore.
PEDRO OIPORU UMI LLÁVE “RRÉINO” ROKẼ OIPEʼA HAG̃UA
Umi apóstolpe oñemeʼẽ rire espíritu sánto oñepyrũ opredika kyhyjeʼỹre. Pedro oiporu upérõ pe lláve tenondegua. Péicha umi hudío ha umi ojeroviáva hudiokuéra rrelihiónre, ‘ogueroviáva iñeʼẽ’ ikatúta oike Ñandejára rréinope (Mateo 16:19, BNP; Hechos 2:5, 41). Ojepersegi rupi kristianokuérape isarambipa hikuái ha péicha ikatu opredika mombyry mombyryve.
Umi apóstol oikuaávo umi Samariaygua ohenduha Ñandejára Ñeʼẽ, vokoiete omondo hendapekuéra Pedro ha Juan. Pedro oiporu pe lláve mokõiha omeʼẽvo chupekuéra oportunida oike hag̃ua Ñandejára Rréinope (Hechos 8:14-17). Un áño rupi Jesús oikove jey rire, Saulo de Tarso tuicha okambia ha ou ojerovia Jesús rehe. Áño 36-pe Pedro oiporu pe lláve mbohapyha ha oñemeʼẽ espíritu sánto umi hénte tetã ambueguápe ndahaʼéiva hudío (Hechos 10:45).
Porandukuéra:
2:44-47; 4:34, 35. Mbaʼérepa umi kristiáno ovende ikosakuéra ha omeʼẽ hepykue? Heta oñepyrũ ramóva ojerovia Jesúsre ou mombyrýgui ha ndorekói pláta opytamie hag̃ua Jerusalénpe. Haʼekuéra opytase oaprendeve hag̃ua ha avei omombeʼu hag̃ua ótrope ijerovia pyahu. Oipytyvõ hag̃ua chupekuéra oĩ kristiáno ovendéva ikosakuéra ha hepykue omeʼẽ oñepytyvõ hag̃ua oikotevẽvape.
4:13. Heʼisépa ko téysto Pedro ha Juan itavyha, térã ndoleekuaaiha? Nahániri, ndeʼiséi upéva. Ojeʼe ningo haʼekuéra haʼeha ‘iñaranduʼỹva rehegua’ ndohói rupi umi fariséo eskuelakuérape oaprende hag̃ua hudiokuéra rrelihión.
5:34-39. Mbaʼéichapa Lucas oikuaa Gamaliel heʼivaʼekue Sanedrín oñembyatyhápe? 1) Ikatu Pablo omombeʼúraʼe chupe; haʼe ningo Gamaliel remimboʼekue; térã 2) Lucas oporandu peteĩ Sanedringuápe imbaʼeporãva kristianokuérandi, pór ehémplo Nicodemo; ỹrõ 3) Jehová oikuaauka chupe ijespíritu sánto rupive.
7:59. Oñemboʼéparaʼe Esteban Jesúspe? Nahániri. Jehovápe añoite ñañemboʼe ha jaadoravaʼerã (Lucas 4:8; 6:12). Oiméne katuete Esteban oñemboʼévami Jehovápe Jesús rérape (Juan 15:16). Péro upérõ Esteban ohecha ‘pe kuimbaʼéicha ouvaʼekue yvy ári oñemboʼyhína Ñandejára akatúape’ (Hechos 7:56, BNP). Haʼe oikuaa porã Jesús ikatuha omoingove jey omanovaʼekuépe. Upévare ojerure Jesúspe taimanduʼa hese, péro noñemboʼéi chupe (Juan 5:27-29).
Mbaʼépa ñanemboʼe:
1:8. Ñandejára espíritu nañanepytyvõirire ndaikatuivaʼerãmoʼã japredika oparupiete ko yvy apére.
4:36–5:11, [JMP]. José Chipreyguápe oñembohéra Bernabé, heʼiséva “oporombopyʼapytuʼúva”. Umi apóstol ombohéra chupe upéicha ipyʼaporã, oporohayhu ha oipytyvõ rupi hapichakuérape. Jajoguase chupe ha ani Ananías ha Safírape. Haʼekuéra hova mokõi, iñensuguy ha oporombotavyse.
9:23-25. Ñakañýramo umi ñandepersegívagui jasegi hag̃ua japredika, ndeʼiséi ñandepyʼamirĩha.
9:28-30. Oĩramo umi lugár ipeligrosóva, térã oĩháme hénte ikatúva ombyai ñande jerovia tekotevẽ ñaneakãporã ha jahecha moõ ha mbaʼe órapa japredikáta.
9:31. Ndaipóri aja ñandepersegíva, jastudia ha jajepyʼamongetavaʼerã ñamombarete hag̃ua ñande jerovia. Upéva ñanepytyvõta jaiko hag̃ua Jehová oipotaháicha, jajapo ñaaprendéva ha ñanekyreʼỹ hag̃ua predikasiónpe.
PABLO OPREDIKA KYREʼỸ VAʼEKUE
Áño 44-pe proféta Ágabo oho Antioquíape. Upépe Saulo ha Bernabé oporomboʼéma “peteĩ áño pukukue”. Ágabo heʼi oĩtaha “ñembyahýi guasu” ha upéva oiko dos áño upe rire (Hechos 11:26-28). “Bernabé ha Saulo omohuʼã rire hembiapo Jerusalénpe” oho jey Antioquíape (Hechos 12:25). Áño 47-pe ojapóma 12 áño Sáulogui oikohague kristiáno. Upérõ oñemondo chupe Bernabéndi opredika hag̃ua mombyry (Hechos 13:1-4). Áño 48-pe oho jey hikuái Antioquíape (Hechos 14:26).
Nueve mése upe rire Pablo (oñehenóiva avei Saulo) ogueraha hendive Sílaspe ha oñepyrũ pe segundo viáhe opredika hag̃ua (Hechos 15:40). Timoteo ha Lucas omoirũ chupe. Lucas opyta Filípospe ha Pablo oho Atenas peve. Upégui oho Coríntope ha upépe ojuhu Áquila ha Priscila rehe. Opyta hendivekuéra 1 áño ha 6 mése (Hechos 18:11). Oñepyrũvo áño 52, Pablo oheja Timoteo ha Sílaspe Coríntope, ha upéi oho Áquila ha Priscila ndive Síriape (Hechos 18:18). Áquila ha Priscila oho hendive Éfeso peve.
Opyta aremi rire Antioquía de Síriape, Pablo oñepyrũ itercér viáhe opredika hag̃ua áño 52-pe (Hechos 18:23). Upe aja Éfesope Ñandejára ñeʼẽ “herakuã ha imbareteve ohóvo” (Hechos 19:20). Pablo opyta upépe 3 áño aja (Hechos 20:31). Pentecostés arete áño 56-pe Pablo oĩ Jerusalénpe. Upépe oho préso péro haʼe pyʼaguasúpe opredika mburuvichakuérape. Rómape ojereko chupe préso peteĩ ógape dos áño aja (áño 59-61). Pablo ohecha mbaʼépa ojapóta oikuaauka hag̃ua Ñandejára rréino ha ‘oñemoñeʼẽ hag̃ua Jesucrístore’ (Hechos 28:30, 31).
Porandukuéra:
14:8-13. Mbaʼérepa umi Listraygua ohenói ‘Bernabépe Zeus ha Páblope Hermes’? Yma Gréciape ojeʼevaʼekue Zeus haʼeha ñandejarakuéra ruvicha, ha itaʼýra Hermes rehe katu ojeʼe oñeʼẽkuaaitereiha. Pablo ningo pe iñeʼẽkuaavéva ha oiméne upévare umi Listraygua ohenói Hermes Páblope ha Zeus Bernabépe.
16:6, 7. Mbaʼérepa espíritu sánto ojoko Pablo ha iñirũnguérape ani hag̃ua opredika Asia ha Bitíniape? Upérõ saʼi umi opredikáva. Upévare espíritu sánto rupi oñemondo chupekuéra hetavehápe umi oikuaaséva Ñandejárape.
18:12-17. Mbaʼérepa mburuvicha Galión ndojapói mbaʼeve umi hénte ombyepotírõ guare Sóstenespe? Oiméne opensa iporãha ojekastiga Sóstenespe, oimoʼãgui haʼe omoakãhague umi hénte opuʼãva Pablo kóntrape. Péro ko ñembyepotipa guasu opa porã ha Sóstenesgui oiko kristiáno. Upéi peteĩ kártape Pablo heʼi Sóstenes rehe “che ermáno” (1 Corintios 1:1, ÑÑB).
18:18. Mbaʼépa pe promésa Pablo ojapovaʼekue Ñandejárape? Oĩ heʼíva oiméne hague Pablo ojapo peteĩ promésa ojapoháicha umi Nazareo (Números 6:1-21). Péro la Biblia ndeʼíri mbaʼeichaguápa. Ndeʼíri avei ojapópa oiko mboyve chugui kristiáno térã upe rire. Tahaʼe haʼeháicha ikatu jaʼe ko promésa ndaivairihague.
Mbaʼépa ñanemboʼe:
12:5-11. Iporã ñañemboʼe ñane ermanokuérare.
12:21-23; 14:14-18. Herodes oheja oñembotuicha chupe Ñandejárape rangue. Tuichaite ojoavy Pablo ha Bernabé ojapóva! Haʼekuéra ndohejái oñemombaʼe chupekuéra. Naiporãmoʼãi jaipotáramo ñande rapichakuéra ñanemombaʼeguasu oimeraẽ mbaʼe jajapóvare Jehová servísiope.
14:5-7. Ñaneakãguapýramo ikatúta jaservi areve Jehovápe (Mateo 10:23).
14:22. Kristianokuéra oikuaa ohasa asy vaʼerãha. Ha nomboykemoʼãi ijerovia ojehekýi hag̃ua umívagui (2 Timoteo 3:12).
16:1, 2. Mitãrusu ha mitãkuñanguéra oñehaʼãvaʼerã ombaʼapo kyreʼỹ Jehovápe g̃uarã. Péicha enterove imanduʼa porãta hesekuéra.
16:3. Ñañehaʼãmbaitevaʼerã ñaipytyvõ ñande rapichakuérape ohenduse hag̃ua pe marandu porã (1 Corintios 9:19-23).
20:20, 21. Japredika ogaha rupi iñimportanteterei ñamog̃uahẽ hag̃ua pe marandu porã hentekuérape.
20:24; 21:13. Iñimportanteve ñaneñeʼẽrendu Ñandejárape ñanerakateʼỹ rangue ñande rekovére.
21:21-26. Kyreʼỹme jajapovaʼerã umi konsého oñemeʼẽva ñandéve.
25:8-12. Kristianokuéra koʼág̃a ojapo oñekotevẽva odefende hag̃ua pe marandu porã “mburuvichakuéra renondépe” (Filipenses 1:7).
26:24, 25. Jaʼevaʼerã opa mbaʼe ‘hekopegua ha añetéva’, jepe umi ‘ndoikuaaséiva mbaʼeve Ñandejára espíritugui’ heʼi ñanderehe ñandevyroha (1 Corintios 2:14).
[Nóta oĩva taʼanga ndive páhina 30]
Arakaʼépa Pedro oiporu umi lláve oipeʼa hag̃ua ‘rréino rokẽ’?
[Nóta oĩva taʼanga ndive páhina 31]
Ñandejára espíritu nañanepytyvõirire ndaikatuivaʼerãmoʼã japredika oparupiete ko yvy apére