Mbaʼérepa japredikavaʼerã ogaha rupi?

‘Opa árape oporomboʼe ha omombeʼu marandu porã Jesucristo rehegua Ñandejára rógape ha hetãyguakuéra róga rupi.’ (HECH. 5:42, ÑÑB.)

1, 2. a) Mbaʼéichapa ojekuaa testigos de Jehovápe heta tetãme? b) Mbaʼe porandúpa ñambohováita koʼág̃a?

 HETA henda rupi oiméne rehechámava mokõi tapicha oñemonde porãva og̃uahẽramo ogaha rupi, oñemongeta hag̃ua hapichakuérandi Ñandejára Sãmbyhýre. Ha pe óga jára ohendu porãramo oikuaveʼẽ chupe peteĩ puvlikasión ha oporandu chupe ndostudiaséipa la Biblia. Ha oñemongetapa rire hendive ohasa ótro ógape. Ha nde, rejapópa avei ko tembiapo? Oimérõ upéicha, rehechakuaáne la hénte ndeikuaamaha testígo de Jehováramo, reñeʼẽ mboyve chupe. Upéicha heta tetãme jajekuaa japredika haguére ogaha rupi.

² Testigos de Jehová ningo heta hendáicha opredika ha oporomboʼe (Mat. 28:19, 20). Opredika hikuái merkadoha rupi, tapére ha heta henda rupi (Hech. 17:17). Opredika avei teléfono térã kárta rupive, ha ijáramo chupekuéra ombaʼapoha rupi. Avei oguereko peteĩ páhina Internétpe trescientos idiómape. * Ha péicha og̃uahẽma pe marandu porã oparupiete. Péro heta hendápe ojepredikave ogaha rupi. Mbaʼérepa japredikavaʼerã ogaha rupi? Mbaʼéicha rupípa japredikave ogaha rupi? Ha mbaʼérepa iñimportánte jajapo upéva koʼág̃a?

Umi apostolkuéra opredika haguéicha

3. Mbaʼépa Jesús heʼivaʼekue hemimboʼekuérape omondórõ guare opredika hag̃ua? Ha mbaʼéichapa ojapovaʼerã hikuái upéva?

³ La Bíbliape voi jatopa ojepredika hague ogaha rupi. Ha Jesús omondórõ guare hemimboʼekuérape opredika hag̃ua heʼi: ‘Peg̃uahẽvo peteĩ távape térã oimeraẽ ojeikohápe, peheka umi ipyʼaporãva’. Mbaʼéichapa ojapovaʼerã hikuái upéva? Jesús voi heʼivaʼekue: ‘Peg̃uahẽvo pe ógape pemomaitei umi upépe oikóvape, ha umi upepegua ipyʼaporãramo pejerure Ñandejárape taipyʼaguapy hikuái’. Péicha jahecha tekotevẽ hague oho hikuái hapichakuéra rógape. Oikotevẽpa rakaʼe oñeinvita chupekuéra og̃uahẽ hag̃ua umi ogaha rupi? Nahániri, Jesús heʼivaʼekue chupekuéra: ‘Napenemog̃uahẽséiramo térã napenerenduséiramo, pesẽ pe óga térã pe távagui, ha peityvyro pende pýgui yvytimbo’ (Mat. 10:11-14). Koʼã mbaʼe Jesús heʼivaʼekue ohechauka porã haʼekuéra ohovaʼerãha ovisita hapichakuérape hógape omombeʼu hag̃ua chupekuéra marandu porã (Luc. 9:6).

4. Mbaʼe téystopepa omombeʼu ojepredika hague ogaha rupi?

⁴ La Bíbliape omombeʼu porã Jesús remimboʼekuéra opredika hague ogaha rupi. Pór ehémplo, Hechos 5:42-pe ohechauka mbaʼépa ojapóma hikuái pe áño 33 guive. Upépe heʼi: “Ha opa árape, [témplope] ha ogaha rupi, oporomboʼe ha omoherakuã meme Jesucristo réra”. Veinte áño haguépe, apóstol Pablo omomanduʼa umi ansianokuéra Efesoyguápe: “Opaichagua mbaʼe iporãva ha peikotevẽva amombeʼupa peẽme tahaʼe pende aty guasúpe térã pende rógape”.  Heʼisépa upéva Pablo ovisita hague chupekuéra oiko mboyve chuguikuéra Jesús remimboʼe? Haʼete upéichava, heʼi rupi chupekuéra ‘ojevy hag̃ua hembiapo vaikuégui ha oñemoag̃ui Ñandejárare ha ojerovia hag̃ua Jesucrístore’ (Hech. 20:20, 21, ÑÑB). Pe Comentario al texto griego del Nuevo Testamento, Archibald Thomas Robertson ohaivaʼekuépe heʼi Hechos 20:20-re: “Ikatu jaʼe Páblore opredika hague ogaha rupi”.

Tukúicha ojagarrapa hikuái

5. Mbaʼe rehépa proféta Joel ombojoja pe predikasión?

⁵ Síglo primérope ningo ojepredikavaʼekue oparupiete, upéva ohechauka ñane tiémpope ojepredikataha oparupiete ko yvy ape ári. Proféta Joel ningo ombojojavaʼekue umi ungído rembiapo umi tuku ojagarrapávare peteĩ kogaty (Joel 1:4). Koʼã tuku ningo oho oñondivepa ha ndaipóri ojokóva chupekuéra, oikepa ogaha rupi ha hoʼupa ojuhúva guive haperãme (jaleemína Joel 2:2, 7-9). Ko mbaʼe ningo ohechauka porã mbaʼéichapa opredika koʼág̃a rupi Jehová siervokuéra. Opredikáramo jepe heta hendáicha umi ohótava yvágape ha iñirũnguéra ‘ambue ovechakuéra’, pe iñimportantevéva, opredika hikuái ogaha rupi. Upéicha oñekumpli upe profesía (Juan 10:16). Mbaʼérepa umi testigos de Jehová opredika umi apostolkuéra ojapo haguéicha?

6. Mbaʼépa oñemomanduʼa pe áño 1922-pe umi ungídope, péro mbaʼérepa oĩ nosẽseivaʼekue opredika?

⁶ Pe áño 1919 guive ojeʼe opavave oservíva Jehovápe opredikavaʼerãha. Pór ehémplo, pe artíkulo “El servicio es esencial”, osẽvaʼekue pe rrevísta The Watch Tower 15 de agosto de 1922-pe, omomanduʼa umi ungídope “tekotevẽha kyreʼỹme opredika ogaha rupi, omomarandu hag̃ua Ñandejára sãmbyhy hiʼag̃uimbaitemaha”. Ha pe Bulletin-pe (Boletín, koʼág̃a hérava Ñane rembiapo Rréino rehegua) ningo ohechauka mbaʼéichapa ojepredikavaʼerã, ha  ñepyrũrã saʼieterei vaʼekue osẽva opredika ogaha rupi. Heta oĩ heʼíva oimeraẽ mbaʼe nosẽséigui opredika, péro haʼekuéra otĩ rupi ndopredikaséi. Upe rire ojeʼe jey jey ojepredikave hag̃ua ogaha rupi, ha heta oĩ ndojaposéiva ha upévare oñemomombyry Jehovágui.

7. Mbaʼépa ojehechavaʼekue tekotevẽha ojejapo?

⁷ Tiémpo rire hetave oĩ opredikáva. Upéicharamo jepe, ojehechakuaa tekotevẽha oñemboʼe chupekuéra opredika hag̃ua ogaha rupi. Pór ehémplo jahechamína Estados Unídospe oikovaʼekue. Ojapóma 50 áño rupi upe tetãme oĩ hague 150.000 testigos de Jehová, péro umíva apytépe 42.000 rupi orrepartinte kuatia téra opyta oñemboʼy kállepe irrevistakuéra ipópe. Ha oĩ 60.000 rupi ndopredikameméiva ha heta mése nosẽietéva voi opredika. Mbaʼépa ojejapovaʼekue oñepytyvõ hag̃ua chupekuéra opredika hag̃ua ogaha rupi?

8, 9. Mbaʼépa ojejapo 1953-pe ñanepytyvõ hag̃ua predikasiónpe, ha mbaʼépa ojehupyty pe prográma rupive?

⁸ Nueva York-pe ojejapovaʼekue peteĩ asamblea internacional áño 1953-pe ha ojeʼe upépe oñesẽ meme vaʼerãha ojepredika ogaha rupi. Upérõ ermáno Nathan H. Knorr heʼivaʼekue umi ansianokuéra oipytyvõvaʼerãha iñermanokuérape osẽ hag̃ua opredika ogaha rupi. Heʼi avei: “Enterovéva opredikavaʼerã ogaha rupi marandu porã”. Upearã oprepara hikuái peteĩ prográma oñepytyvõ hag̃ua ermanokuérape oparupiete ko yvy ape ári. Péicha oñepytyvõ umi nosẽivape gueteri opredika ogaha rupi oñemongetakuaa hag̃ua hapichakuérandi, ha oiporukuaa hag̃ua la Biblia ombohovái jave umi porandu.

⁹ Ha upe prográma rupive diez áño haguépe hetaitereive oĩ opredikáva ha ostudiáva la Biblia. Ha koʼág̃a rupi oĩma siete millones rupi testigos de Jehová opredikáva marandu porã oparupiete ko yvy ape ári. Péicha jahecha oĩha hetaitereive oñehaʼãva opredika ogaha rupi ha upéva ohechauka Jehová ovendesiha ñane rembiapo (Isa. 60:22).

Umi ikatútava ojesalva

10, 11. a) Mbaʼépa Ezequiel ohecha pe visión rupive? b) Mbaʼéichapa oñekumpli upe visión?

¹⁰ Jahechakuaa hag̃ua iñimportanteha japredika ogaha rupi jahechamíta Ezequiel kapítulo 9-pe heʼíva. Ezequiel ohecha visión rupive seis kuimbaʼe ikyse pukúva ha sieteha katu ijao de líno ha oguereko ikuʼáre peteĩ tínta ryru. Ha Jehová heʼi pe kuimbaʼe ijao de línovape : ‘Ehasa pe táva mbyte rupi, ha emárka isyvápe umi ojepyʼapy ha ipyahẽ asýva opaite mbaʼe vai ojejapóvare ko távape’. Ojejapo rire upe tembiapo, oñemondo umi seis kuimbaʼépe ojukapaite hag̃ua umi noñemarkáivape (jaleemína Ezequiel 9:1-6).

¹¹ Mbaʼéichapa oñekumpli pe visión? Jaikuaa ningo pe ‘kuimbaʼe ijao de línova’ haʼeha hína umi ojeporavovaʼekue oho hag̃ua yvágape, oĩva gueteri ko yvy ape ári. Haʼekuéra opredika ha oporomboʼe jave omárka térã oiporavo umi oĩvaʼerã ‘ambue ovechakuéra’ apytépe (Juan 10:16). Ha mbaʼépa pe márka? Pe márka ningo heʼise peteĩ tapichágui oikoha Jesús remimboʼe, peteĩ oñemeʼẽ máva Jehovápe ha ojevautisa, ha okambia máva heta mbaʼe hekovépe (Efe. 4:20-24). Umi ambue ovechakuéra ningo oipytyvõ  umi ohótavape yvágape omárka hag̃ua yvyporakuérape (Rev. 22:17).

12. Mbaʼépa ohechauka ñandéve upe visión?

¹² Upe visión ohechauka tekotevẽha ñaipytyvõ umi ‘ojepyʼapy ha ipyahẽ asývape’ ikatu hag̃uáicha ojesalva. Jaikuaa ningo koʼẽrõitéma Jehová ohunditaha umi noñemarkáivape. Apóstol Pablo ningo heʼivaʼekue Jesús ha umi anhelkuéra ‘okastigataha umi ndoikuaáiva Ñandejárape ha naiñeʼẽrendúivape Jesucristo marandu porãme’ (2 Tes. 1:7, 8). Péicha jahechakuaa opavavépe ojehusgataha umi mbaʼe ojapóvare ohendu rire pe marandu porã, upévare japredikákena kyreʼỹme Jehová ára peve (Rev. 14:6, 7). Upéva heʼise enterovéva pópe oĩha upe tembiapo ikatútava osalva opavavépe (jaleemína Ezequiel 3:17-19).

13. a) Mbaʼépa apóstol Pablo ohechakuaa tekotevẽha ojapo? b) Mbaʼéichapa rehechavaʼerã nde rapichakuérape?

¹³ Apóstol Pablo ohechakuaavaʼekue tekotevẽtereiha opredika hapichakuérape. Upévare ohai péicha: ‘Añandu oĩha ajapovaʼerã penderehe tahaʼe griégo térã ambue tetãyguáre, tapenearandu térã tapendetavy jepe raʼe. Upévare, hiʼãiterei chéve aikuaauka ko Jesucristo marandu porã peẽme avei, peikóva Rómape’ (Rom. 1:14, 15). Pablo oagradeseterei Ñandejárape oiporiahuvereko haguére chupe. Upévare haʼe ohechakuaa tekotevẽha oipytyvõ hapichakuérape oñemoag̃ui hag̃ua Ñandejárare (1 Tim. 1:12-16). Haʼete ku odevéva umi hapichakuérape, ha ikatútava opaga opredikáramo añoite chupekuéra. Ndépa rehecha avei upéicha umi nde rapichakuérape? (jaleemína Hechos 20:26, 27.)

14. Mbaʼérepa japredikavaʼerã atyhápe ha ogaha rupi?

¹⁴ Iporã ningo ñaipytyvõ ñande rapichakuérape ikatu hag̃uáicha ojesalva, péro oĩ peteĩ mbaʼe iñimportantevéva. Malaquías 1:11-pe Jehová heʼi: ‘Kuarahy resẽ guive oikeha peve oñemombaʼeguasuhína che réra opa tetãme, ha oñekuaveʼẽta heta mbaʼe porã che rérape, oñembotuicháta che réra tetãnguéra apytépe’. Ko profesía oñekumpli Jehová siervokuéra opredikávo kyreʼỹme oparupiete ko yvy ape ári (Sal. 109:30; Mat. 24:14). Ñande ningo japredikavaʼerã atyhápe ha ogaha rupi ñamombaʼeguasu hag̃ua Jehovápe (Heb. 13:15).

Mbaʼéichapa og̃uahẽta huʼãme ñane predikasión?

15. a) Mbaʼépa ojapovaʼerã umi Israelgua ojere rire siete vése Jericó rehe? b) Mbaʼéichapa ojepredikáta oñehundi mboyvemi vove ko múndo?

¹⁵ Mbaʼéichapa og̃uahẽta huʼãme ñane predikasión? Jahechamína la Bíbliape mbaʼépa oikorakaʼe pe táva Jericó oñehundi mboyvemi. Ñandejára ohundi mboyvemi Jericó, heʼi umi Israelguápe ojere hag̃ua una vés upe távare káda día. Ha siete día haguépe Jehová heʼi Josuépe: ‘Siete vése pejeréta Jericó rehe ha umi saserdotekuéra katu tombopu ituru. Pehendu vove turupu opavave pesapukái hatã Jericó murálla hoʼa hag̃ua’ (Jos. 6:2-5). Upéicha avei koʼág̃a ko ára pahápe ojepredikave kyreʼỹme hetaiterei henda rupi. Oñehundi  mboyvemi ko múndo, ikatúne jahecha mbaʼeichaite pevépa ojekuaauka Ñandejára réra, ha ojepredikáta pe marandu porã arakaʼeve ojejapoʼỹ haguéicha.

16, 17. a) Mbaʼépa oikóta opa mboyve ‘jehasa asy guasu’? b) Mbaʼe porandúpa oñembohováita pe artíkulo oúvape?

¹⁶ Og̃uahẽta pe ára ñamombeʼutaha marandu porã umi Israelgua osapukáirõ guaréicha hoʼa hag̃ua Jericó murálla. Pe lívro hérava Revelaciónpe ningo oñeʼẽ peteĩ mensáhe ipohýiva rehe, ha ombojoja ‘amandáu guasúre, ipohýiva un talento’. * Upévare, Revelación 16:21-pe heʼi upe ‘tuichaitereitaha upe kastígo’. Ndajaikuaái gueteri mbaʼeichaite oñemog̃uahẽta koʼã mensáhe ipohyietéva, ikatu ningo ojekuaauka predikasión rupive. Péro jaikuaa porã opa mboyve ‘jehasa asy guasu’, Jehová réra ojekuaatamaha oparupiete ko yvy ape ári (Rev. 7:14; Eze. 38:23).

¹⁷ Ñahaʼarõ aja oiko koʼã mbaʼe ñamombeʼúkena kyreʼỹme ñande rapichakuérape umi mbaʼe porã ojapótava Ñandejára Rréino. Ha jahecha haguéicha, jajapo hag̃ua upéva japredikavaʼerã ogaha rupi. Mbaʼérepa ikatu ijetuʼu ñandéve japredika hag̃ua ogaha rupi? Mbaʼépa ikatu ñanepytyvõ upéicharõ? Pe artíkulo oúvape oñembohováita koʼã porandu.

[Nóta]

Ñambohovaimi koʼã porandu

• Mbaʼe téystopepa omombeʼu ojepredikavaʼerãha ogaha rupi?

• Mbaʼépa ojejaporakaʼe oporopytyvõva ojepredika hag̃ua ogaha rupi?

• Mbaʼérepa opavave oservíva Jehovápe opredikavaʼerã?

• Mbaʼéichapa og̃uahẽta huʼãme ñane predikasión?

[Porandu ñahesaʼỹijóva]

[Nóta oĩva taʼanga ndive páhina 11]

Rehechakuaápa avei repredikavaʼerãha nde rapichakuérape, apóstol Pablo ojapo haguéicha?

[Nóta oĩva taʼanga ndive páhina 12]

Ermáno Knorr áño 1953-pe