NDÉPA reikuaa mbaʼépa ojapo peteĩ tapicha iñenvidiósova? Epensamína ko mbaʼére: Ijetuʼu jepípa ndéve rehayhu peteĩ nde rapicha enterove oguerohorýva, ojeʼéva hese ivuéno, iporã térã iñakãporãha? a... Oiméramo upéicha ikatu nderechaʼeireína hese térã neenvidióso.

Tuvakuéra ombojeroviavéramo peteĩ ifamíliape, ikatu umi ótro mitã ipochy ha ndaijaʼevéi hese. La Biblia omombeʼu peteĩ família tuicha iprovléma hague upévare. Jahechamína upe oikovaʼekue ha avei mbaʼépa ñanemboʼe.

José ningo Jacob raʼy ha orekovaʼekue 10 iñermanoanga. Péro haʼekuéra ndaijaʼéi hese. Reikuaápa mbaʼérepa?... Itúva ombojeroviavégui chupe. Pór ehémplo ojapouka Josépe peteĩ ijaorã iporãva. José onase Jacob “ituja riréma” ha upévare ohayhuve chupe. Avei haʼe itaʼýra ypykue Raquel ndive, hembireko ohayhuetéva.

La Biblia heʼi José ermanokuéra ‘ohechávo itúva ohayhuveha chupe, ndaijaʼevéi hikuái hese’. Ha koʼýte ipochy José omombeʼu rire chupekuéra osoña hague haʼekuéra ha itúva oñakãityha henondépe. Ha Jacob jepe ojaʼo chupe heʼi haguére upéva (Génesis 37:​1-11, ÑÑB).

Peteĩ jey José orekóvo 17 áño, iñermanokuéra oho mombyry oñangareko itúva kavara ha ovechakuérare. Upémaramo Jacob omondo Josépe ohecha hag̃ua mbaʼéichapa oĩ hikuái. Reikuaápa mbaʼépa ojaposemi hikuái Josére ohechávo ou?... Ojukase chupe! Péro Rubén ha Judá ojoko chupekuéra.

 Upe javete ohasa upérupi makatéro ohóva Egíptope, ha Judá heʼi iñermanokuérape: “Ñavendéna chupe”. Ha ojapo hikuái upéva. Upéi ojuka peteĩ kavara ha omona huguykue José aóre. Ohechaukávo itúvape José aokue, Jacob heʼi: ‘Oiméne peteĩ mymba ñarõ ojuka ha hoʼúraʼe chupe’ (Génesis 37:​12-36).

Upéi Egipto mburuvicha, faraón oguerohoryeterei Josépe. Faraón osoña mokõi mbaʼe ha Ñandejára oipytyvõ Josépe omombeʼu hag̃ua faraónpe mbaʼépa heʼise. Primero ohecha iképe siete vaka ndekyráva ha hapykuerikuéra osẽ siete vaka piru. Upéi katu ohecha siete espíga iporãva ha hiʼajupáva, ha siete espíga ichavi ha ipirúva. José heʼi chupe upe ohecháva heʼiseha peteĩ mbaʼénte: siete áño hetaitereitaha hiʼupyrã, ha upéi siete áño oĩtaha ñembyahýi. Upémaramo faraón omoĩ Josépe ombyaty hag̃ua hiʼupy ou mboyve pe ñembyahýi.

Oñepyrũvo ofalta hiʼupy, José ermanokuéra oikóva mombyry Egíptogui ndorekovéima hembiʼurã. Upévare Jacob omondo 10 itaʼýra Egíptope ojogua hag̃ua hiʼupy. Péro ohechávo hikuái Josépe ndoikuaái chupe. José nomombeʼúi chupekuéra mávapa haʼe ha ojapo peteĩ mbaʼe oikuaa hag̃ua oñembyasýpa hikuái ojapovaʼekuére. Ohechakuaávo iñermanokuéra oñembyasyha, José omombeʼu chupekuéra mávapa haʼe ha oñoañuã hikuái. Mbaʼeichaitépa ovyʼáneraʼe hikuái! (Génesis, kapítulo 40 guive 45 peve.)

Mbaʼépa ñanemboʼe ko istória oĩva la Bíbliape?... Heta mbaʼe vai ikatuha jajapo ñaneenvidiósoramo. Ikatu voi jajapose ivaíva ñane ermáno térã ñane ermánare! Koʼág̃a jaleemi Hechos 5:​17, 18 ha 7:​54-59. Mbaʼépa ojapo Jesús remimboʼekuérare umi hénte ndochaʼéiva hesekuéra?... Rehechakuaápa mbaʼérepa naiporãi ñaneenvidióso?...

José oikove 110 áño peve. Haʼe ohecha inietokuéra ha koʼãva familiare avei. Katuetei José omboʼe chupekuéra ojoayhu hag̃ua, ha naiporãiha ñaneenvidióso (Génesis 50:​22, 23, 26).