Jaikuaave hag̃ua

Mbaʼérepa umi hudíope g̃uarã sábado oñepyrũvaʼekue viernes kaʼarúma voi?

Yma ningo Jehová heʼi isiervokuérape mbaʼépa ndojapoivaʼerã peteĩ arete guasu jave: ‘Mbaʼeveichagua tembiapo ndapejapoivaʼerã ko sábadope. Kóva ningo jepytuʼuha ára peẽme g̃uarã. Kaʼaru pytũ guive ambue ára kaʼaru pytũ meve’ (Levítico 23:​28, 32, ÑÑB). Heʼiháicha koʼápe, umi hudíope g̃uarã peteĩ día oñepyrũ kaʼaru ha opa pe ótro día kuarahy oike riréma. Péicha ningo haʼekuéra oipapavaʼekue umi día.

La Biblia ningo heʼi Ñandejára oñepyrũrõ guare ojapo opa mbaʼe ‘ohasaha kaʼarupytũ ha pyhareve, pe ára peteĩha’. Ha heʼi avei umi ótro “ára” oñepyrũha “kaʼarupytũ” (Génesis 1:​5, 8, 13, 19, 23, 31, ÑÑB). Péicha jahecha Ñandejára voi heʼi hague chupekuéra mbaʼéichapa oipapavaʼerã umi día.

Péro, yma ndahaʼéi umi hudíonte oipapáva péicha umi día, Atenas, Numidia ha Feniciaygua ojapovaʼekue avei upéicha. Ha umi Babiloniaygua katu heʼi peteĩ día oñepyrũha kuarahy osẽvo, umi Egipto ha Romayguápe g̃uarã katu oñepyrũ la doce de la nóche ha opa la doce de la nóche jey koʼag̃aguáicha. Upéicharõ jepe, umi hudíope g̃uarã koʼág̃a peve sábado oñepyrũ gueteri viernes kaʼaru kuarahy oike rire.

Mbaʼépa heʼise ‘peteĩ sábado ojeguataha pukukue’?

Ohecha rire Jesúspe ojupi yvágape monte de los Olívospe, hemimboʼekuéra oho jey Jerusalénpe. La Bíbliape heʼiháicha Jerusalén opyta upégui ‘peteĩ sábado ojeguataha pukukue’ (Hechos 1:12). Yma ningo peteĩ oviaháva ikatu oguata 30 kilómetro rupi un díape. Péro pe monte de los Olivos namombyrýi Jerusaléngui. Upéicharõ, mbaʼépa heʼise ‘peteĩ sábado ojeguataha pukukue’?

Yma ningo sabadokue umi isrraelíta ohejavaʼerã hembiapo ha opytuʼu. Haʼekuéra ni ndojatapyivaʼerã hógape (Éxodo 20:10; 35:​2, 3). Jehová heʼi chupekuéra: “Topytáke hógape maymáva ha aníke avave osẽ ombaʼapo ára sietehápe” (Éxodo 16:29). Ko árape haʼekuéra ikatu opytuʼu ha ojepyʼamongeta Ñandejára Ñeʼẽre.

Umi omoakãva hudiokuérape heʼi voi moõ pevéntepa ojeguatavaʼerã sabadokue, pór ehémplo ojehótaramo omombaʼeguasu hag̃ua Ñandejárape. Péicha ojopyetereíma hendivekuéra. Upévare peteĩ enciclopedia heʼi: “Umi léi sabadokuépe g̃uarã ipohyietereíma [...], ojeʼe voi moõ pevépa peteĩ isrraelíta ikatu oguata upe díape. Ha upévape ojeʼe peteĩ sábado ojeguataha pukukue” (Cyclopedia of Biblical, Theological, and Ecclesiastical Literature). Heʼi hikuái ojeguatavaʼerãha 890 métro pevénte.

[Nóta oĩva taʼanga ndive páhina 11]

Monte de los Olivos guive ojehecha Jerusalén