Kárta Papúa Nueva Guinea rehegua

Peteĩ lugár yvate neporãmba jepéva

PETEĨ mártepe hakuvo jave, pyhareve la cinco rupi che rembireko ndive rosẽ táva Lae-gui roho hag̃ua Lengbati-pe, opytáva monte Rawlinson-pe (Morobe). Ore ningo rohose rovisita peteĩ grúpo de testigos de Jehová oikóvape Papúa Nueva Guinea-pe.

Roho peteĩ avionéta imotór peteĩvape ha cuatro persónape g̃uarãvape. Péicha jave che aguapy jepi pe pilóto ykére añemongeta hag̃ua hendive, ha pe motór hyapu hatã rupi roiporu auricular roñohendu hag̃ua. Umi treinta minúto roviaha aja pe pilóto omombeʼu chéve maʼerãpa ojeporu umi aparatoʼi oĩva pe aviónre, ha heʼi chéve oikóramo hese álgo chetaha la pilóto. Haʼetépe ningo la chembojarúnte! Upéva chemomanduʼa testigos de Jehová superintendénte viahánte rehe oikovaʼekuére. Upérõ pe pilóto odesmaja ha omoĩ hikuái pilóto automátiko, upe aja ojere rei pe yvate oĩ porã jey peve pe pilóto ha upéi raẽ oaterrisa hikuái. Péro haʼetépe orerehe ndoikói upéicha.

Pe ore avión oveve umi montáña ykére, ha upeichaháguinte rojere ha rosẽ hesakãháme pe arai paʼũgui ha rohasa peteĩ montáña ári 100 metrohápe. Upépe rohecháma Lengbati, peteĩ tavaʼi orekóva heta óga itécho kapiʼíva ha ojejapóva ñanágui. Rojere aja upe tavaʼi ári pe pilóto omaña mbaʼetekópa pe písta oaterrisa hag̃ua, pórke sapyʼánte oĩ mitã ohugáva upépe térã umi kure ojoʼopa upérupi. Umi hénte upepegua ojapovaʼekue upe písta pe montáña yképe ha ndaʼareiete ogueru hikuái ita kuʼi peteĩ montáña ag̃uieténte oĩvagui okarga pyahu jey hag̃ua. Ha pe pilóto heʼi: “Oĩ porãmbánte amalisia ha ñatanteáta jaguejy”. Upéi mbeguekatu rojere roguejykuévo ha roaterrisa.

Káda rojúnte koʼápe che añeporandu jepi mboy áñopa orekóne ko lugár. Amombaʼeterei apensávo mbaʼeichagua puʼakápa ohupirakaʼe pe oséanogui ko montáña porãite cuatro kilometrohápe pe ýgui, ha hiʼarive ipe heta kilómetro. Añetehápe ningo roime peteĩ lugár yvate neporãmba jepévape.

Umi oikóva upépe ohendúrõ g̃uarã peteĩ avionéta ryapu odiparajoáma ohecha hag̃ua mávapa ou. Péicha rupi roguejývo rotopa hetaiterei héntema oreraʼarõ. Pe pilóto omboparáre iñavionéta orerug̃uaitĩ peteĩ karai hérava Zung. Chupe ningo ojerrespetaiterei upe tavaʼípe, haʼe omoakã voi umi rreunión ojapóva testigos de Jehová káda semána. Zung heʼi ojapo rupi la Biblia heʼíva  hekoporãveha. Ha rojosaluda rire, rovahea peteĩ tape poʼíre Zung ha ambue Testígo ndive. Orerapykuéri katu umi mitã oñorairõjoa oraha hag̃ua oréve oremochíla.

Rog̃uahẽ peteĩ ogaʼi de távlape umi Testígo ojapovaʼekue opyta hag̃ua pe superintendénte viahánte, ovisitáva chupekuéra káda seis mése. Ha Papúa Nueva Guinea-pe ára hakúramo jepe, ko montáña roimehápe hoʼysã. Pyhare vove romyendy lámpara a kerosén, ha rohecha mbaʼéichapa oike pe píso de távla paʼũ rupi umi arai ojupivaʼekue ohóvo upe árape. Ajeʼínte hakueterei oréve kuri ha koʼág̃a katu romondemavaʼerã ore ao aku. Ajéiko pyaʼete okambia la tiémpo!

Péro mbaʼéichapa oñemoñepyrũ peteĩ kongregasión de testigos de Jehová Lengbati-pe? Áño 1985 rupi, peteĩ karai upepegua oñeʼẽ testigos de Jehová ndive táva Lae-pe ha oñepyrũ ostudia la Biblia. Oho rire jey Lengbati-pe omopuʼã ambue hapichakuérandi peteĩ óga ojapo hag̃ua rreunión ha upéva ombovyʼaiterei chupekuéra. Péro upéi peteĩ árape upe óga ohapypaite pe pastór luteráno ha ambue tapicha upe rrelihionpegua, pórke heʼi táva Lengbati ijiglesiakuéra mbaʼeha. Upéicharõ jepe, ndojokói hikuái umi Testígope, upe riremínte haʼekuéra omopuʼã jey peteĩ óga ojapo hag̃ua irreunionkuéra. Ha mbaʼéichapa la situasión upépe koʼág̃a? Oĩ gueteri opuʼãva hesekuéra, upevére hetave rei umi Testígo, koʼág̃a g̃uarã cincuéntama oĩ hikuái. Ha ijapytepekuéra oĩ avei umi oñemoĩvaʼekue hesekuéra predikasiónpe.

Testigos de Jehovápe ningo ojerresivi porãnte umi ogaha rupi oho jave oikuaveʼẽ estúdio vívliko. Peteĩ lugárpe saʼieterei oĩ oleekuaáva, péro ojehecharamoiterei enterovelénto Testígo oleekuaa haguére. Haʼekuéra ningo oñehaʼã olee ha oskrivikuaa ikatu hag̃uáicha omboʼe hapichápe la Biblia. Ha opredikágui hikuái káda semána 200 tapicha rupi ijaty Salón del Reino-pe.

Hesekuéra ojekuaa voi mbaʼeichaitépa ovyʼa oservi haguére Jehovápe. Haʼekuérango oñembyatyseterei okaru ha oñemongetami hag̃ua. Ha koʼápe ndaipórigui electricidad, pyharekue rosẽ okápe peteĩ techoʼi guýpe ha roguapy tata jerére hesakãmihápe. Óra vove roho hag̃ua ore rógape katu oĩ ojagarráva peteĩ palméra roguekue oĩva pe tatápe (térã bombom) ha ogueraha ohesape hag̃ua haperã pe ñanandýre.

Ko lugár ningo itrankiloiterei ha ñahendu umi guyraʼi opuraheijoa. Roho mboyve pe ogaʼi ropytahápe romaña jey yvágare ha rohecha mbaʼeichaitépa ojajaipa umi mbyja.

Ore ningo roimoʼãʼỹre ohasáma ko una semána, ha koʼẽrõ roho jeýma vaʼerã koʼágui. Upévare roho mboyve pe lugár hakuvohápe, roaprovecháta ko pyhare ipiroʼy asýva, pórke ko pyharéntema roiméta Lengbati-pe, ko lugár neporãmba jepévape.