Haʼe ndohejaichéne umi hese ojeroviávape
Ñañemoag̃uíkena Ñandejárare
Haʼe ndohejaichéne umi hese ojeroviávape
AJÉPA ñañeñandu vaiete ofalláramo ñanendive peteĩ ñande rapicha jajeroviaha. Ñambyasýramo jepe, ko múndope oĩ hetaiterei oporombotavýva ha opyrũva iñeʼẽre (2 Timoteo 3:1-5). Upévare haʼetévaicha ndaiporivéimava jajerovia hag̃ua. Péro, oĩnepa peteĩ ndofallamoʼãiva ñanendive arakaʼeve? Jaikuaa hag̃ua upéva, jahechami mbaʼépa ohasavaʼekue rréi David.
Hetaite mbaʼe vai ojejapo David rehe! Oiko mboyve chugui rréi, Saúl oisãmbyhyvaʼekue Israel. Saúl ndaijaʼéi David rehe, upévare omosẽ hetãgui ha opersegi chupe. Hogayguakuéra apytépe jepe oĩ ofalláva hendive. Pór ehémplo, hembireko Mical ‘oapoʼi chupe’, oñehaʼã rangue omombaʼe ha ojepytaso ijykére (2 Samuel 6:16). Upe rire oĩ ndoipotáiva David oisãmbyhy chupekuéra ha upévare opuʼãmba hese. Avei Ahitofel oheja rei chupe, hiʼarigua haʼe iñamigoite kuri. Ha máva piko omoakã chupekuéra? Ndajagueroviaséiramo jepe, itaʼýra Absalón. Mbaʼéichapa oñeñandu David? Oimoʼã piko ndaikatumoʼãveimaha ojerovia avavére?
Jahechamína mbaʼépa heʼi David Ñandejárape: “Nde ndepyʼaporã ipyʼaporãva ndive” (2 Samuel 22:26, ÑÑB). Péicha David ohechauka ojerovia mbareteha Jehováre. Jepe hapichakuéra ofallapa hendive, haʼe oikuaa Itúva yvagapegua ni mbaʼeveichavérõ ndojapomoʼãiha upéva.
Ñahesaʼỹijomiéna ko versíkulo. Pe párte heʼíva “ndepyʼaporã”, ikatu avei ojetradusi “nembaʼeporã reporohayhu rupi”. Ha umi oporohayhu añetéva arakaʼeve ndohejareíri hapichápe. Upévare jajeroviakuaa Jehová ni mbaʼevéicharõ ndohejamoʼãiha umi hese ojeroviávape. Mbaʼérepa? Ohayhuetereígui chupekuéra.
Oĩve ambue mbaʼe ñanemanduʼavaʼerã: ñandepyʼaporãramo ojekuaavaʼerã ñane rembiapóre. Upévare pe versíkulo heʼívo Ñandejára ‘ipyʼaporãha’, ohechauka haʼe ojapoha heta mbaʼe ñanderehehápe. Ha David oikuaa porã vaʼekue upéva añeteha. Mbaʼérepa? Pe ijetuʼuve jave Jehová oĩ ijykére, oñangareko hese ha ohekomboʼe chupe. ‘Oipeʼa chupe umi hese ijaʼeʼỹva poguýgui’ ha David omombaʼeterei upéva (2 Samuel 22:1).
Ikatúpa avei jaguerovia oñekumplitaha ñanderehe 2 Samuel 22:26? Ñanemanduʼákena Jehová nokambiaiha (Santiago 1:17). Haʼe ni mbaʼeveichavérõ nopyrũi iñeʼẽre. David ohaivaʼekue peteĩ mbaʼe Jehová oprometéva: ‘Ñandejára ndohejareichéne umi hese ojeroviávape’ (Salmo 37:28).
Ñandejára ñandeguerohory jajeroviáramo hese. Haʼe ovyʼa ñaneñeʼẽrendúrõ chupe ha oipota jasegi iñehémplo ha ñanembaʼeporã opavavéndi (Efesios 4:24; 5:1). Jajapóramo upéicha, Jehová nañanderejamoʼãi arakaʼeve. Ikatu oĩ oñemomombyrýva ñaikotevẽve jave hesekuéra, péro Jehová ndojapoichéne upéva. Haʼe ñanepytyvõta ñambohovái hag̃ua oimeraẽ mbaʼe. Ndareíri la Biblia heʼi Jehová haʼeha ñande ‘Jeroviaha’ (Revelación [Apocalipsis] 16:5). Nahiʼãipa ñandéve ñañemoag̃uive hese ára ha ára?