Jaikuaave hag̃ua

Oĩparakaʼe Jesús pariénteva umi doce apóstol apytépe?

▪ La Biblia ndeʼíri oĩ hague, péro oĩ umi téysto ikatúva ñanepytyvõ ñamyesakãve hag̃ua upéva. Yma umi hénte ogueroviavaʼekue umi apóstol apytépe oĩ hague Jesús parientekuéra.

La Bíbliape omombeʼu mávapa umi kuña oĩvaʼekue Jesús ndive, ojejukárõ guare chupe pe yvyráre. Pór ehémplo Juan 19:25-pe heʼi oĩ hague, ‘isy [María], ha isy ermána; avei María Clopas rembireko, ha María Magdalena’. Ñambojojáramo ko versíkulo Mateo ha Marcos kuatiañeʼẽ rehe jaʼekuaa Jesús ‘sy ermána’ haʼe hague Salomé. Ha ojeʼe ningo Zebedeo raʼykuéra, Santiago ha Juan haʼeha Salomé memby (Mateo 27:55, 56; Marcos 15:40). Ha oimérõ upéicha, Santiago ha Juan haʼe Jesús prímo ermáno. Koʼãva ningo peskadór vaʼekue ha Jesús oinvita chupekuéra omoirũ hag̃ua chupe (Mateo 4:21, 22).

Umi hénte yma guare heʼi avei, umi kuña apytégui, peteĩva haʼe hague Clopas (Alfeo) rembireko, ha haʼe ningo José ermáno, pe Jesús tuvanga. Ha oimérõ upéva siérto, pe apóstol Santiago, Alfeo raʼy haʼe avei Jesús prímo (Mateo 10:3).

Oñohéntepa rakaʼe Jesús ha Juan el Bautista?

▪ Oĩ opensáva Jesús haʼe hague Juan el Bautista prímo segundo. Péva oiko heta Bíbliape ojetradusi vaígui Lucas 1:36. Pór ehémplo la Biblia en lenguaje sencillo heʼi Juan sy Elisabet ha Jesús sy María haʼe hague oñopríma.

Péro pe ñeʼẽ ojeporúva griégope heʼise hetave mbaʼe. Upe ñeʼẽ ojeporúva ohechauka Elisabet ha María oñohénte hague, péro ndeʼiséi oñoprimaha. Ko mbaʼére Joseph A. Fitzmyer heʼi: “Pe ñeʼẽ heʼise heta mbaʼe, ndeʼiséi katuete oñopríma hague hikuái” (El Evangelio según Lucas). Upéicharõ, mbaʼérepa ojeʼe Jesús ha Juan oñoprímo hague? Pe Enciclopedia Católica heʼi: “Opa mbaʼe roʼéva [...] María tuvakuérare [...] roguenohẽ ambue kuatiañeʼẽgui ndahaʼéi la Bíbliagui”.

Upévare, ikatu jaʼe Jesús ha Juan oñohénte hague, ndajaikuaáiramo jepe oñoprímopa rakaʼe hikuái.