Oñeporandúva Jepi

Moõpa oĩ pe paraíso oñeñeʼẽha la Bíbliape?

▪ ‘Reiméta chendive pe Paraísope.’ (Lucas 23:43, BNP.) Péicha heʼi Jesús peteĩ kuimbaʼépe ohechávo ojeroviaha hese. Péro moõpa oĩ upe paraíso? Oĩpa yvágape, yvýpe térã ambue lugár ohohápe umi hénte ohaʼarõ hag̃ua ojehusga chupekuéra?

Ñandejára Ñeʼẽ omombeʼu ñande ru ha ñande sy ypykue oiko hague peteĩ paraísope: ‘Ñandejára oñotỹ peteĩ yvotyty Edénpe, kuarahyresẽ gotyo; ha omoĩ ipype pe kuimbaʼe ojapovaʼekue. [...] Ha Ñandejára ogueraha Adánpe Edenpegua yvotytýpe, ombaʼapo hag̃ua ipype ha oñangareko porã hag̃ua hese’ (Génesis 2:8, 15, ÑÑB). Griégo ñeʼẽme ningo ‘yvotyty’ ojeʼe parádeisos, ha upégui ou pe ñeʼẽ paraíso.

Peteĩ ogajára ifamília retavévo ombotuichavemantevaʼerã hóga. Péicha avei Adán ha Eva oipysovaʼerã pe Paraíso, oĩva hardín de Edénpe. Ñandejára heʼi chupekuéra: “Peñembohetáke pemyenyhẽ meve ko yvy, ha pemoĩ pende poguýpe” (Génesis 1:28, ÑÑB).

Jahechakuaa upéicharõ ñande Apohare ymaite guive oipotaha yvyporakuéra oñembohetave ha oiko peteĩ hardínpe ko yvy ape ári. Haʼe ñandeapo jaiko hag̃ua opa árare peteĩ lugár neporãmba jepévape ndaiporihápe omanóva. Ajeve ningo ñandepyʼarory jahechávo umi yvoty, mymba ha opa mbaʼe porã oĩva ñande jerére!

Upéicharõ, mbaʼérepa ndoikói Ñandejára oipotáva? Oime puku okambiáma hembipota? Ni mbaʼevéicharõ. Haʼe voi heʼi: ‘Pe ñeʼẽ osẽva che jurúgui ndojevyichéne che rendápe ojapoʼỹre che rembipota, ha oikopaʼỹre pe che haʼevaʼekue’ (Isaías 55:11). Ohasa rire 3.000 áño ojejapo hague Adánpe la Biblia heʼi Jehováre: “Haʼe ojapo yvy ha omoĩ hatã hendag̃uáme, ndojapói yvy perõ, ojapo uvei pype ojeiko hag̃uáicha” (Isaías 45:18). Upéicha jahecha Ñandejára nokambiaiha, Haʼe oipota gueteri oiko ko yvýgui peteĩ paraíso.

Avei Bíbliape oñeñeʼẽ jave Paraísore, oñemombeʼu heta mbaʼe ojejapóva ko yvy árinte. Pór ehémplo Isaías heʼi umi hénte “ojogapóta ha oikóta imbaʼe teépe, oñotỹta parralty ha hoʼúta hiʼa” (Isaías 65:21). Jaikuaa ko yvýpe añoite ikatuha jajogapo, ñañemitỹ ha jakaru. Upévare Proverbios 2:21 heʼi “hekojojáva [...] oikóne ko yvy ape ári”.

Upéicharõ Jesús oñeʼẽ pe paraíso oĩtavare ko yvy ape ári. Péro, haʼe piko noñeʼẽi avei peteĩ paraíso yvagapeguáre? Oñeʼẽ, péro heʼi mbovymi hemimboʼénte ohotaha upépe (Lucas 12:32). Umíva ohóta yvágape omano rire ha oisãmbyhýta Jesús ndive (Revelación [Apocalipsis] 5:10; 14:1-3). Upe guive oñangarekóta hikuái pe Paraísore oĩtava ko yvy ári, ha ohecháta tojejapo opa mbaʼe Ñandejára oipotaháicha.

Jesús oĩvaʼekue yvágape Itúva ojapórõ guare pe hardín de Edén ha upévare oikuaa porã Ñandejára rembipota ko yvýpe g̃uarã. Upéicharõ, umi ojeroviáva Jesús rehe ikatúta oiko opa ára g̃uarã ko yvy ape ári peteĩ hardín neporãvape (Juan 3:16). Maymávape Jesús opromete: ‘Reiméta chendive pe Paraísope’ (Lucas 23:43, BNP).

[Roagradese oĩva páhina 18-pe]

© FORGET Patrick/SAGAPHOTO.COM/Alamy