Jesús heʼivaʼekue: ‘Hesãiva natekotevẽi oñepohãno, umi hasývante oikotevẽ’ (Mateo 9:12, NM). La Biblia ohechauka ikatuha ñañepohãno ñaneresãi ha jaiko areve hag̃ua. Upévare testígo de Jehová oikotevẽramo, osegi avei tratamiénto doktór ndive. Síglo primérope peteĩ kristiáno hérava Lucas médiko vaʼekue, upéicha avei koʼág̃a rupi heta Testígogui oiko doktór (Colosenses 4:14).

Péro Testigokuéra ndojapói umi tratamiénto ojoavýva la Biblia heʼíva ndive. Pór ehémplo, Ñandejára Ñeʼẽ heʼi ndovaleiha jaiporu tuguy hendapeʼỹ ha upéicha rupi haʼekuéra nomoĩkái tuguy (Génesis 9:4; Levítico 17:1-14; Hechos 15:28, 29). Avei la Biblia heʼi porã ndajajevaleivaʼerãha espiritísmore ha upévare omboyke hikuái umi tratamiénto ojeporuhápe ‘podér máhiko’ oporomonguera hag̃ua (Isaías 1:13, NM; Gálatas 5:19-21).

Oĩ avei heta doktór omeʼẽva tratamiénto ikatúva oporomonguera ha noñemoĩriva la Biblia heʼívare. Pyʼỹinte koʼãichagua tratamiénto iporãve umi ótrogui ha heta Testígo oiporavo umíva.

Oĩ ningo hetaiterei tratamiénto ikatúva ojejapo. Ha peteĩme ikatu ou porã umi tratamiénto ótrope ndouporãiva. Upévare oĩ ohecha jeýva mbaʼépa heʼi ótro doktór, ikatu hag̃uáicha oikuaa porã mbaʼépa oreko ha mbaʼéichapa oñepohãnóta (Proverbios 14:15).

Peteĩ testígo de Jehová oñepohãnóta jave, haʼete odesidivaʼerã mbaʼépa ojapóta. Péro la Biblia ndeʼíriramo mbaʼeve upe tratamiéntore, opensa porã vaʼerã mbaʼéichapa ohecha Ñandejára ha mbaʼépa iporãve chupe g̃uarã (Romanos 14:2-4). Osegítaramo peteĩ tratamiénto oikuaa raẽ vaʼerã upe ojapótava. Upéichamante oikuaáta oĩ porãpa upe tratamiénto ha ndojapomoʼãipa peteĩ mbaʼe ombopochýtava Ñandejárape (Gálatas 6:5; Hebreos 5:14).

Mbaʼérepa Testigokuéra oñatende porã odesidi hag̃ua koʼã mbaʼe? Jahechamína peteĩ ehémplo omyesakãtava upéva. Ñamoĩ chupe peteĩ tapicha ohohahína imbaʼyrúpe, ha og̃uahẽvo peteĩ avenída tuichávape ohecha umi ohóva henonderã ohasanteha. Ajépa ivyroitéta osegínteramo umívape ha ohasa avei omañaʼỹre! Katuete opytáta ohaʼarõ ha ohecha raẽ ikatúpa ohasa. Upéicha avei peteĩ Testígo oñepohãnóta jave ndosegíri oimehaichagua tratamiénto ojeʼe rupínte chupe. Upéva rangue ojesareko porã ha ohecha mbaʼépa heʼi la Biblia, upéi odesidi mbaʼépa ojapóta.

Testigokuéra oagradese umi doktór oñatende rupi hesekuéra ha oguerohory ojapo porã haguére hembiapo.