Oñeporandúva jepi

Ohótapa yvágape opavave kristiáno iñeʼẽrendúva?

▪ Heta tapicha oleéma Jesús heʼivaʼekue: ‘Ñandejára ohayhuetereígui yvyporakuérape, omeʼẽvaʼekue Itaʼýra peteĩete ani hag̃ua omano umi ojeroviáva hese, oikove hag̃ua uvei opa ára g̃uarã’ (Juan 3:16). Heʼisépa rakaʼe Jesús enterove Jehová rembiguái ohotaha yvágape oiko hag̃ua vyʼápe opa árare?

Epensamína ko mbaʼe Jesús heʼivaʼekuére: ‘Avave ndohói yvágape, síno pe oguejyvaʼekue yvágaguinte, pe yvy arigua Raʼy’ (Juan 3:13). Upévare ikatu jaʼe Ñandejára rembiguaikuéra yma guare, pór ehémplo Noé, Abrahán, Moisés térã David omanórõ guare ndohói hague yvágape (Hechos 2:34). Upéicharõ, moõpa oho hikuái? Jaʼe porãséramo g̃uarã, oĩ oñeñotỹ haguépe, haʼekuéra noñandúi mbaʼevete oke hatãramoguáicha, og̃uahẽ meve pe ñemoingove jey ára (Eclesiastés 9:5, 6; Hechos 24:15).

La Bíbliape, Jesús raẽve heʼivaʼekue oĩtaha yvypóra ohóva yvágape omano rire. Haʼe opromete ijapostolkuérape ombosakoʼitaha chupekuéra hendag̃ua yvágape (Juan 14:2, 3). Ko mbaʼe ningo upérõ ipyahu Ñandejára rembiguaikuérape g̃uarã. Tiémpo riremi, apóstol Pablo heʼi Jesús omano, oñemoingove ha oho jeývo yvágape, ‘ombosakoʼi hague peteĩ tape pyahu ha oikovéva’ hembiguaikuérape g̃uarã, ha upérupi avave ndohóiva gueteri (Hebreos 10:19, 20, ÑÑB).

Heʼisépa upéva opavave kristiáno iñeʼẽrendúva ohotaha yvágape upe tiémpo guive? Nahániri, ndahetái ningo umi ohótava yvágape oñemoingove jey rire, upépe ohóta umi ojeporavóva ojapo hag̃ua peteĩ tembiapo. Pe último pyhare ohasavaʼekue ijapostolkuérandi, Jesús heʼi chupekuéra ‘oguapytaha hikuái umi trónope ohusga’ hag̃ua Irréino guive. Kóva iñasiknasión: oisãmbyhy Jesús ndive yvágape (Lucas 22:28-30, NM).

Péro ndahaʼéi umi apóstol añónte oisãmbyhýtava Ñandejára Rréinope. Peteĩ visión rupive apóstol Juan ohecha Jesúspe yvágape ha oĩ hendive peteĩ grúpo yvypóra oñemoingove jey vaʼekue, Juan heʼi oikotaha chuguikuéra ‘rréi ha saserdóte oisãmbyhýtava yvy tuichakue’ (Revelación [Apocalipsis] 3:21; 5:10). Mboýpepa ohecha? Peteĩ tetãme ningo mbovymínte oĩ oisãmbyhýva, upéicha avei Ñandejára Rréinope oisãmbyhýta Jesús ha 144.000 ‘ojeporavovaʼekue yvyporakuéra apytégui’ (Revelación 14:1, 4, 5, BNP).

Añetehápe umi 144.000 michĩeterei ñambojojáramo enterove Jehová siervokuéra yma guare ha koʼag̃aguáre. Upéva upéicha, umi tapicha ohóta rupi ojapo peteĩ tembiapo Ñandejára omeʼẽvaʼekue chupekuéra. Ñambojojami ko mbaʼére: ñamoĩ chupe rejogaposeha. Rekontratátapa enterove alvañíl ikatupyrývape oikóva nde reikoha rupi? Ajépa nahániri. Rekontratáta umi tekotevẽvapente. Upéicha avei Ñandejára ndahaʼéi enterovépe oiporavóva oho hag̃ua yvágape oisãmbyhy Jesucristo ndive.

Ko goviérno yvagapegua okumplíta Ñandejára rembipota yvyporakuérape g̃uarã. Jesús ha umi 144.000 omoakãta yvága guive umi mbaʼe ojejapótava ko yvýgui oiko hag̃ua peteĩ hardín, ikatu hag̃uáicha Ñandejára rembiguaikuéra iñeʼẽrendúva oiko upépe vyʼápe ha opa árare (Isaías 45:18; Revelación 21:3, 4). Umíva apytépe oĩta avei umi Ñandejára omoingove jeýtava, chuguikuéra ningo Haʼe arakaʼeve ndahesaraimoʼãi (Juan 5:28, 29).

Opavave Ñandejára rembiguái, yma guare ha koʼag̃agua, ikatúta oikove opa ára g̃uarã (Romanos 6:23). Ndahetái umi ohótava yvágape oisãmbyhy hag̃ua, péro hetaitereive oĩ umi oikótava peteĩ hardín neporãvape ko yvy ape ári.