SAPYʼÁNTE ikatu oĩ oñandúva omboykeha chupe hapichakuéra, tetã ambuegua térã ipire kolór idiferénte haguére, ikatu avei oiko lája térã oñeʼẽ diferénte haguére. Reñeñandúmapa nde avei upéicha? *...

Koʼág̃a jahecháta peteĩ istória oñeʼẽva peteĩ kuimbaʼére oñeñanduvaʼekue upéicha. Upéva hína Mefibóset. Oiméramo reñeñandúma ko kuimbaʼéicha, ikatu reaprende chugui heta mbaʼe. Mávapa rakaʼe Mefibóset? Mbaʼérepa haʼe oñandu omboykeha chupe hapichakuéra?

Mefibóset ningo Jonatán raʼy vaʼekue, David amigoite. Jonatán omano mboyve ñorairõhápe ojerure Davídpe imbaʼeporã hag̃ua ifamíliandi. Upéi Davídgui oiko rire rréi, imanduʼa iñamígo heʼivaʼekuére chupe. Upérõ Mefibóset oikove gueteri. Haʼe ningo imitãrõ guare oñaksidenta, upévare opyta ndoguataporãvéi. Rehechakuaápa koʼág̃a mbaʼérepa oiméne oñandu oñemboykeha chupe?...

David otrata porãse vaʼekue Jonatán raʼýpe, upévare ogueraha chupe Jerusalénpe oiko hag̃ua ag̃ui chugui ha oheja chupe okaru hendive imesápe. Omeʼẽ avei chupe peteĩ kuimbaʼe hérava Zibá, ifamiliakuéra ha hembiguaikuéra reheve oservi ha oñangareko hag̃ua hese. Añetehápe David oñangareko porãiterei vaʼekue Mefibóset rehe. Reikuaápa mbaʼépa oiko upe rire?...

 David orekovaʼekue provléma hogapýpe. Itaʼýra Absalón ojupise hendaguépe rréiramo. Upévare David okañýmante chugui ha heta kuimbaʼe omoirũ chupe. Mefibóset oiméne omoirũse rakaʼe avei chupekuéra, péro ndaikatúi ndoguataporãi rupi.

Upe rire Zibá ijapu Davídpe, heʼi chupe Mefibóset ndohói hague hendive ojupiségui rréiramo hendaguépe. Ñambyasýramo jepe, David oguerovia Zibá heʼíva ha omeʼẽmbaite chupe Mefibóset yvy. Opa rire pe provléma orekovaʼekue Absalón ndive, David oho jey Jerusalénpe. Upépe ae ohendu Mefibósetpe oikuaa hag̃ua upe oikovaʼekue ha upéi odesidi ombojaʼo pe yvy chupekuéra. Mbaʼépa nde ere ojapo hague Mefibóset?...

Haʼe ndoikói oñeʼẽ vai térã opensa pe rréi odesidi vai hague. Oikuaa porã David hetáma iprovléma hague ha oisãmbyhyseha pyʼaguapýpe. Upévare Mefibóset heʼi opytapánte hag̃ua Zibápe pe yvy. Pe iñimportantevéva Mefibósetpe g̃uarã ningo David ou jeýma hague oisãmbyhy hag̃ua Jerusalénpe.

Mefibóset heta ohasa asy ha pyʼỹinte oñandu oñemboykeha chupe. Péro Jehová ohayhu chupe ha oñangareko hese. Mbaʼépa ñaaprende ko istóriagui?... Jajapóramo jepe pe iporãva, sapyʼánte ikatu oĩ heʼíva japu ñanderehe. Jesús heʼivaʼekue voi: ‘Ko múndo ndaijaʼéirõ penderehe, penemanduʼáke cherehe raẽ ndaijaʼéi hague’. Ndaijaʼeietevaʼekue hese hikuái, upévare voi ojuka chupe. Jajapo meméramo pe iporãva, katuete ñanderayhúta Jehová ha Itaʼýra Jesús.