“Arekópe 10 áño asẽma mitãrusukuéra ndive. Ñepyrurã roñakaramánte ojopóre ha roñohetũ, péro upe riremínte ropokopáma ojuehe. Añepyrũ ambaʼapo arekópe 15 áño ha umi kuimbaʼe che travahohapegua heʼíma chéve añeno hag̃ua hendivekuéra. Che natĩri voi ha ajapose oimeraẽ mbaʼe che irũnguéra ojapóva. Ha ani hag̃ua chemboyke hikuái, asegi cherekovai.” (SARA, AUSTRALIA) a

NDEREGUEROVIASEMOʼÃI reikuaáramo Sara okakuaa hague peteĩ família omombaʼeguasúvape Ñandejárape. Ituvakuéra oñehaʼãramo jepe ohekomboʼe chupe la Biblia heʼíva, haʼe odesidi oiko ambue hendáicha.

Hetápe g̃uarã ndaivaíri Sara ojapóva, oimoʼã rupi umi mbaʼe la Biblia heʼíva sexo rehe yma guaretereimaha. Ambue katu opensa ikatuha oservi Ñandejárape ha hekovai.

Upéicharõ, tekotevẽ piko jaikuaa la Biblia heʼíva sexo rehe? Jasegivaʼerãpa umi konsého oĩva upépe? La Biblia voi heʼi ijehe ‘ouha Ñandejáragui ha iporãha ñaporomboʼe hag̃ua’ (2 Timoteo 3:16). Upévare, jahechakuaáramo Ñandejára haʼeha opa mbaʼe Apohare ha la Biblia ouha chugui, ñamombaʼéta heʼíva pype.

Ñambyasýramo jepe, hetaiterei tapicha nontendeporãi umi mbaʼe la Biblia heʼíva sexo rehe. Umi omoakãva rrelihionkuéra jepe nopensái peteĩcha upe témare, heʼíramo jepe orrespetaha la Biblia. Upéicha rupi hetaiterei rrelihión ojedividipa.

Péro jaguerovia rangue ñande rapicha heʼíva, iporãvéta ñandete voi ñahesaʼỹijóramo la Biblia jaikuaa hag̃ua mbaʼépa heʼi sexo rehe. Pe artíkulo oúvape oĩ diez porandu pyʼỹinte ojejapóva ko témare ha upépe ojehechaukáta la Biblia omboʼéva. Pe artíkulo pahápe oñemyesakãta mbaʼérepa iñimportánte káda uno odesidi mbaʼépa ojapóta.

[Nóta]