MBAʼÉREPA nde ere Enrique ha Liliana iprovlemaha? Mokõivéva ningo ojapose iporãva. Haʼekuéra ohayhu Ñandejárape ha ohechakuaa tekotevẽha ohesaʼỹijo la Biblia oñondive. Upéicharõ jepe, ostudia jave hikuái noñemoag̃uíri ojuehe, síno oñemomombyryve rei. Enrique ha Liliana ohesaʼỹijo la Biblia oñondive, péro upéva noipytyvõi chupekuéra omombarete hag̃ua ijerovia.

Péro, mbaʼépa heʼise ñamombarete ñande jerovia? Mbaʼérepa umi omendáva oñehaʼãvaʼerã ijerovia rehehápe? Mbaʼépa ikatu ojoko chupekuéra ani hag̃ua omombarete ijerovia? Mbaʼéichapa ombohováita umi mbaʼe?

La Biblia ohechauka pe tapicha ojeroviáva oĩha espíritu sánto poguýpe ha upéva ojekuaa opa mbaʼe opensa ha ojapóvare (Judas 18, 19). Apóstol Pablo omombeʼu mbaʼe mbaʼépepa ojoavy umi tapicha oikóva espíritu oipotaháicha, ha umi oikóva hete oipotaháicha. Haʼe heʼiháicha, umi oikóva hete oipotaháicha ojepyʼapy ijehénte, ojapo chupekuéra g̃uarã oĩ porãvante ha noñehaʼãi ojapo Ñandejára heʼíva (1 Corintios 2:14; Gálatas 5:19, 20).

Péro pe tapicha ohejáva espíritu sánto oisãmbyhy chupe, ohechakuaa iporãha jaiko la  Biblia heʼiháicha. Ohecha Jehovápe iñamígoramo ha oñehaʼãmbaite ohaʼanga chupe (Efesios 5:1). Upévare oporohayhukuaa, hory ha otrata porã opavavépe (Éxodo 34:6). Iñeʼẽrendu akóinte Ñandejárape, ojesakrifikaʼimítaramo jepe (Salmo 15:1, 4). Pór ehémplo, peteĩ karai hérava Darío, oikóva Canadápe ha ojapómava 35 áño omenda hague, omombeʼu: “Chéve g̃uarã, jahejáramo espíritu sánto ñanesãmbyhy, ñapensa raẽta mbaʼéichapa japytáta Ñandejára renondépe umi mbaʼe jaʼe ha jajapóva rupive”. Hembireko, hérava Julia, heʼi: “Peteĩ kuña oikóva espíritu oipotaháicha, oñehaʼãta koʼẽ koʼẽre ohechauka hekovépe umi mbaʼe porã oúva upe espíritugui” (Gálatas 5:22, 23).

Añetehápe natekotevẽi ñamenda raẽ ñamombarete hag̃ua ñande jerovia ha jaiko hag̃ua Ñandejára oipotaháicha. La Biblia heʼi opavave jaikuaa porã vaʼerãha Ñandejárape ha ñahaʼanga chupe (Hechos 17:26, 27).

Maymáva ningo ñañehaʼãvaʼerã ñande jerovia rehehápe. Péro mbaʼérepa ojeʼe umi omendáva tekotevẽha omombarete ijerovia oñondive? Jahechamína ko ehémplo: mokõi tapicha ojapo oñondive peteĩ uérta. Peteĩ omoĩse pe semílla voimi, ha ambue opensa iporãveha ohaʼarõmie. Peteĩva omoĩse avóno, ha pe ótrope katu ndogustái ha heʼi natekotevẽiha voi. Upéi avei peteĩ opensa tekotevẽha ombaʼapo pe uértape káda día, ha ambue ohechase raẽ mbaʼépa osẽ. Ikatu ningo heñói pe semílla oñotỹva hikuái, péro ajépa iporãvéta mokõivéva og̃uahẽramo peteĩ ñeʼẽme ha odesidi mbaʼéichapa ombaʼapóta ha oñangarekóta hiʼuértare.

Upeichaite avei oiko umi omendávare. Ojogueraha porãmiéta hikuái peteĩva jepe oñehaʼãramo omombarete ijerovia (1 Pedro 3:1, 2). Péro iporãitevéta mokõivéva ojapóramo Ñandejára heʼíva ha oñopytyvõramo oservi hag̃ua oñondive Jehovápe. Salomón heʼivaʼekue voi ‘mokõi tapicha iporãveha peteĩguinte’. Mbaʼérepa? Oñondive “hetave oguenohẽkuaa hembiapo repykuégui” ha “hoʼáramo peteĩ, ambue omopuʼãta iñirũme” (Eclesiastés 4:9, 10, ÑÑB).

Oiméne katuete nde ha ne rembiayhu pemombaretese pende jerovia oñondive. Péro upearã mokõivéva peñehaʼãvaʼerã, ojapoháicha umi ombaʼapóva peteĩ uértare. Jahechamína mokõi provléma ikatúva pendejoko ha mbaʼéichapa pembohovaikuaa.

PROVLÉMA PETEĨHA: “Naoretiémpoi voi”.

Peteĩ omenda ramóva, hérava Susi, heʼi: “Che ména oho chereka ambaʼapopa rire kaʼaruete lás siete. Rog̃uahẽvo ógape oĩ jey heta tembiaporã. Ndoroikuaái mbaʼépa rojapóta. Roikuaa porã ningo tekotevẽha rostudia oñondive la Biblia, péro orekaneʼõiterei ha ropytuʼuséntema”.

Mbaʼépa ikatu penepytyvõ: Peñehaʼã pekambia tekotevẽhápe ha peñopytyvõ. Susi omombeʼu mbaʼépa ojapo haʼe ha iména: “Eduardo ha che rodesidi ropuʼã voive ikatu hag̃uáicha rolee ha rohesaʼỹijoʼimi la Biblia roho mboyve rombaʼapo. Avei haʼe chepytyvõ umi tembiapo ogapypeguápe chetiempove hag̃ua”. Mbaʼéichapa oipytyvõ chupekuéra upéva? Eduardo heʼi: “Koʼág̃a rupi ahechakuaa mbaʼeichaitépa ou porã oréve rohesaʼỹijo pyʼỹive Ñandejára Ñeʼẽ. Orepytyvõ rombohovaikuaave hag̃ua umi provléma ha ani hag̃ua rojepyʼapyeterei oimeraẽ mbaʼére”.

Ajépa iporãitevaʼerã peñemongetáramo umi mbaʼe omombaretétavare pende jerovia, ha avei peñemboʼéramo oñondive káda día! Upéva tekotevẽterei ha tuicha penepytyvõta. Ramón, ojapóva 16 áño omenda hague, heʼi: “Ndaʼareguasúi ningo oreprovléma roikóvo che rembirekóndi. Upémarõ rodesidi roñemboʼe oñondive káda pyhare romombeʼu hag̃ua Ñandejárape umi mbaʼe orepyʼapýva. Upéicha rosolusiona ore provléma ha rovyʼa jey ore rogapýpe”.

PROVLÉMA MOKÕIHA: “Orediferénte ojuehegui”.

Toni heʼi: “Che ningo ndaleeseiete”. Péro hembireko Natalia nopensái upéicha, haʼe heʼi: “Che aleeseterei voi ha amombeʼuse umi mbaʼe aaprendéva. Sapyʼánte apensa Toni otĩmaha chehegui rohesaʼỹijo jave la Biblia”.

Mbaʼépa ikatu pejapo: Peiko rangue petaky ojuehe térã pehecha mávapa oikuaave, iporãvéta peñopytyvõramo. Ehecha mbaʼépepa ikatupyry ne ména térã ne rembireko ha eguerohory chupe upévare. Toni heʼi: “Ahechakuaa che rembireko iñakãrakuetereiha oñeʼẽ jave la Bíbliare, ha upévare ijetuʼu vaʼekue chéve astudia hag̃ua hendive. Péro Natalia imbaʼerechakuaa. Koʼág̃a rupi rostudia meme oñondive, ha ahechakuaa ndaiporiha akyhyje hag̃ua. Amo ipahápe igústoma chéve añemongeta hendive umi mbaʼe omombaretévare ore jerovia. Rojapo rupi upéicha, orepyʼaguapy ha rojogueraha porãve”.

Heta omendáva ohechakuaa oiko porãveha hogapýpe oñemotiémporamo káda semána olee ha ohesaʼỹijo hag̃ua la Biblia oñondive. Péro eñatendéke!, pestudia jave ani emaña ne rembiayhu defékto, síno eñehaʼã ehecha mbaʼépepa nde rekambiavaʼerã (Gálatas 6:4). Tekotevẽtaramo pesolusiona peteĩ mbaʼe ijetuʼúva, ani peñemongeta upévare pestudia jave la Biblia. Upe rirénte peñeʼẽvaʼerã umívare. Mbaʼérepa?

Epensamína rekaruhareína ne família ndive. Reñemoĩtapa reipohãno upépe peteĩ erída oñembyaíva? Nderejapoichéne! Upéicha ningo rembojeguarupáta chupekuéra ha avave ndokarusemoʼãvéima. Jesús ohechaukavaʼekue haʼeteha jakarúva ñaaprende ha jajapo jave Ñandejára rembipota (Mateo 4:4; Juan 4:34). Upévare, pestudia jave, naiporãmoʼãi reñemoĩramo resolusionase pene provléma. Rejapóramo upéicha, ne ména térã ne rembireko naikyreʼỹmoʼãvéima ohesaʼỹijo hag̃ua nendive la Biblia. Jaikuaaháicha, oĩ jave peteĩ mbaʼe pendepyʼapýva, tekotevẽtante voi peñemongeta pesolusiona hag̃ua, péro iporãve pejapo upéva upe rire (Proverbios 10:19; 15:23).

Ména ha tembireko oñopytyvõramo omombarete hag̃ua ijerovia, oiko porãta hogapýpe ha ovyʼáta. Ñandejára Ñeʼẽ heʼi: “Opa umi mbaʼe ñande ñañotỹva, katuete ñamonoʼõ jey vaʼerã avei” (Gálatas 6:7).

Enrique ha Liliana, ñañeʼẽ hague iñepyrũme, ohechakuaa añeteha ko téysto heʼíva. Ojapóma 45 áño omenda hague hikuái ha oikuaa tekotevẽha oñehaʼã meme omombarete hag̃ua ijerovia. Enrique omombeʼu: “Akulpámi che rembirekópe ndaikatúi haguére roñemongeta porã, péro upéi ahechakuaa che avei tekotevẽha añehaʼãve”. Liliana katu heʼi: “Rohayhu rupi Jehovápe, rombohovái porãve heta mbaʼe ijetuʼúva. Koʼã áño ohasávape rojepokuaa akóinte rostudia ha roñemboʼe oñondive. Ha ahechávo mbaʼéichapa Enrique oñehaʼã oiko Jehová oipotaháicha, koʼýte ahayhuve chupe”.