OJAPÓMA 2.500 áño peteĩ istoriadór griégo hérava Heródoto heʼi hague umi ehípsio itiempopeguáre: “Umi ehípsio irríkova ojapo jave karu guasu, okarupa rire hikuái, peteĩ kuimbaʼe omongorre ataúpe peteĩ omano vaʼekue raʼanga ojejapóva yvyrágui, opinta ha omoldea porã hikuái, haʼete voi peteĩ teʼõngue. Ipuku médio métro térã un métro rupi ha ohechaukakuévo umi héntepe heʼi: ‘Emaña hese, upéi emokõ ha evyʼa, pórke péicha oikóta ndehegui remano vove’”.

Péro ndahaʼéi umi ehípsio añónte opensáva upéicha. Ñane tiémpope heta oĩ heʼíva “ekaru, emokõ ha evyʼa”. Oimérõ japáma ñamano rire, ¿maʼerã piko ñañehaʼãitereíta ñande reko porã? ¿Mbaʼérepa ndajaaprovecháintema ikatu reheve? ¿Maʼerã voi piko jaikove, ñamanótaramo upe rire? Upéicha heʼi vaʼekue apóstol Pablo umi ndogueroviáivape oñemoingove jeytaha umi omano vaʼekuépe: “Umi omanóvape noñemopuʼãmoʼãiramo, ‘jakaru ha ñamokõ katu, cháke koʼẽrõ ñamanóta’” (1 Corintios 15:32, NM).

Péro Pablo ndeʼíri hína umi omano vaʼekue ndorekoveimaha esperánsa. Haʼe oikuaa porã ikatuha opuʼã jey hikuái ha oikove opa árare. Pablo ojerovia mbarete vaʼekue upévare, ¿mbaʼérepa? Oikuaágui Jesucrístope oñemoingove jey hague. * Heta kristiáno ypykue ojerovia mbarete vaʼekue Jehováre oikuaágui omoingove jey hague Jesúspe.

Péro, ¿mbaʼérepa iñimportánte ñandéve g̃uarã jaikuaa Jesucristo oikove jey hague? ¿Mbaʼéichapa jaikuaáta añetehápepa oñemoingove jey rakaʼe chupe? Jahechami mbaʼéichapa Pablo omyesakã porã upéva umi kristiáno Corintoguápe.

Kongregasión Corintoguápe oĩ vaʼekue kristiáno ndogueroviáiva oñemoingove jeytaha umi omanóvape ha ótro katu ndojeroviapái oikóne hag̃ua upéva. Upévare, Pablo ohaírõ guare chupekuéra ikuatiañeʼẽ peteĩha, omombeʼu umi ermánope mbaʼépa oikóta kristianokuéragui noñemoingovemoʼãiramo umi omano vaʼekuépe. Haʼe heʼi: “Añetehápe umi omanóva noñemoingovejeymoʼãiramo, Crístope noñemopuʼãi avei. Péro Crístope noñemopuʼãiramo, añetehápe japredika rei ha jajerovia rei. [...] Upéva heʼise ñandejapuha Ñandejára kóntrape jaʼévo haʼe omopuʼã hague Crístope. [...] Ha Crístope noñemopuʼãirõ, pende jerovia ndovaléi mbaʼeverã ha pende pekádo noñeperdonái gueteri. Ha upéicha avei umi Cristo disípulo omano vaʼekue oñehundíma opa ára g̃uarã” (1 Corintios 15:13-18, NM).

“Ohecha chupe quinientos ermáno rupi [...]. Upéi ojechauka Santiágope ha upe rire enterove umi apóstolpe. Péro ipahaitépe ojechauka avei chéve.” (1 Corintios 15:6-8.)

Oñepyrũre voi Pablo heʼi: Umi omanóva noñemoingovejeymoʼãiramo, Cristo avei noñemopuʼãjeymoʼãi kuri. Péro, ¿mbaʼépa oiko vaʼerãmoʼã Cristo ndoikovejeýirire? Upéicharõ ningo japredika reietéta, tuichaháicha ñaporombotavýta. Cristo oñemoingove jey hague ningo iñimportanteterei kristianokuérape g̃uarã, iñimportanteháicha avei ambue mbaʼe omboʼéva la Biblia. Por ehémplo, Ñandejára añoite orekoha derécho ñanesãmbyhývo, mbaʼéichapa héra Ñandejára, mbaʼépa Irréino ha mbaʼépa ojapo ñandesalva hag̃ua. Jesucrístope noñemoingovejeýirire, ndovalemoʼãi kuri mbaʼeverã umi marandu omombeʼúva Pablo ha ambue apóstol.

Avei Cristo ndoikovejeýirire jajerovia reietéta, japupáta umi mbaʼe jagueroviáva. Avei Pablo ha umi ermáno ijapúta heʼi haguére Jesús oñemoingove jeyha ha Jehová ojapo hague upéva. Japupa reíta avei “Cristo omano hague ñande pekádore”, ha haʼe voi noñemopuʼãjeýiramo, ni mbaʼevéicharõ ndosalvamoʼãi avavépe (1 Corintios 15:3, NM). Ha oiméramo upéicha, umi ermáno omano vaʼekue ijerovia rehehápe, opensa reietéta oñemoingove jeytaha.

Pablo heʼi: “Jarekóramo esperánsa Crístore jaikove ajánte, upéicharõ ñane situasión ivaive enterove umi ótrogui” (1 Corintios 15:19, NM). Ambue kristiánoicha avei, Pablo ohasa heta mbaʼe ijetuʼúva, ojepersegi, oñemaltrata, operde heta mbaʼe, ha oĩ omano hag̃uáicha ojeroviágui oñemoingove jeytaha chupe ha opa mbaʼe ikatúva ohupyty upéva rupive. Ivyroitereíta ningo ojapóramo koʼã mbaʼe oimérire ojeʼe reínte oñemoingove jeytaha umi omano vaʼekuépe.

Pablo nopensái vaʼekue japuha koʼã mbaʼe. Haʼe oikuaa porã oñemopuʼã jey hague Jesúspe umi omano vaʼekue apytégui ha heʼi umi Corintoguápe: “Cristo omano ñande pekádore heʼiháicha Ñandejára Ñeʼẽme. Chupe oñeñotỹ ha upéi oñemopuʼã tres día haguépe, heʼiháicha Ñandejára Ñeʼẽme. Haʼe ojechauka Céfaspe ha upéi umi dócepe *. Upe rire peteĩ árape ohecha chupe quinientos ermáno rupi, ha ijapyteguikuéra heta oĩ gueteri ñanendive, péro oĩ avei umi omanómava. Upéi ojechauka Santiágope ha upe rire enterove umi apóstolpe. Péro ipahaitépe ojechauka avei chéve” (1 Corintios 15:3-8, NM).

 Pablo jeroviapópe omombeʼu Cristo omano hague ñanderehehápe, oñeñotỹ ha oñemoingove jey hague umi omano vaʼekue apytégui. ¿Mbaʼérepa Pablo ojeroviaite upévare? Oĩ rupi heta ohecháva Jesúspe oikove jey rire. Haʼe ojechauka vaʼekue hemimboʼépe, umíva apytépe Páblope, upéi ambue ijapostolkuérape ha hetaitereive tapichápe, peteĩ jey quinientos rupi oĩ ohecháva chupe. Umíva apytépe oĩ umi ndogueroviapái vaʼekue ohendúrõ guare Jesús oikove jey hague (Lucas 24:1-11). Heta umi ohecha vaʼekue Jesúspe oikove gueteri Pablo tiémpope ha ikatu vaʼekue heʼi añetehápe oiko hague upéva (1 Corintios 15:6). Ndahasýi ningo jaʼe hag̃ua peteĩ térã mokõi tapicha ijapuha, péro ndaikatúi jaʼévo umi quinientos tapicha ijapuha heʼívo ohecha hague Jesúspe.

Pablo omombeʼúrõ guare Jesús omano, oñeñotỹ ha oñemopuʼã jey hague, dos vése heʼi “heʼiháicha Ñandejára Ñeʼẽme”. Upéva ohechauka oñekumpliha umi profesía oñeʼẽva pe Mesías rehe, oĩva Escrituras Hebréaspe ha Jesús haʼeha pe Mesías oñepromete vaʼekue.

Heta oĩ oikuaáramo jepe la Biblia heʼíva ha oĩramo jepe ohecha vaʼekue Jesúspe oikove jey rire, ndogueroviáiva oiko hague upéva ha koʼág̃a peve oĩ umichagua. Oĩ heʼíva umi disípulo omonda hague Jesús retekue ha upéi heʼi guaʼu oikove jey hague. Péro umi Jesús remimboʼe ndorekói vaʼekue autorida ni ndaikatúi ohesaʼã térã ombotavy umi soldádo rrománo oñangarekóvape pe sepultúrare. Ótro katu heʼi umi hénte vaichánte ohecha hague Jesúspe. Péro umi mbaʼe ojeʼe reínte, hetaiterei tapicha ningo oĩ ohecha vaʼekue Jesúspe oikove jey rire ha ndahaʼéi peteĩ hendápente. Ha oimérõ umi hénte oñeimahinánte ohechaha Jesúspe, ¿mbaʼéicha piko haʼe ombojýta pira ha oservi hemimboʼekuérape ojapo haguéicha Galiléape? (Juan 21:9-14.) Avei ¿mbaʼéicha piko heʼíta chupekuéra upéicharõ opoko hag̃ua ipy ha ipóre? (Lucas 24:36-39).

Oĩ avei heʼíva umi disípulo oporombotavy hag̃uánte heʼi hague Jesús oñemoingove jey hague.  Péro ¿mbaʼe piko oganáta hikuái ojapóramo upéicha? Haʼekuéra ningo heta ohasa asy kuri oiko haguére omombeʼu Jesús oikove jey hague. Heta oĩ oñembohorýva hesekuéra, omaltrata ha ojukáva chupekuéra. ¿Mbaʼerã piko ijapúta hikuái ohasa asýtaramo upe haguére? Haʼekuéra Jerusalénpe voi oñepyrũ vaʼekue omombeʼu upe marandu umi iñenemigokuéra apytépe, umíva ningo oheka voi oikóvo mbaʼépa ojapo vai hikuái ojagarra hag̃ua chupekuéra.

Umi disípulo ojerovia rupi oñemoingove jeytaha umi omano vaʼekuépe, ipyʼaguasu omombeʼu hag̃ua Jesús oikove jey hague ha ombohovái hag̃ua umi mbaʼe ohasáva upe haguére. Tuichaiterei mbaʼe kristianokuérape g̃uarã oñemoingove jey umi omano vaʼekuépe ha upéva omombarete ijerovia. Umi kristiáno ypykue ningo heta mbaʼe ohasa, péro ndahaʼéi omombeʼu hag̃ua ojejuka hague peteĩ mboʼehára iñarandúvape, síno oñemoingove jey hague chupe. Upéva ohechauka Jesús haʼeha Cristo, Ñandejára Raʼy, oikove ha ipoderósova, omoakã ha oipytyvõ vaʼekue chupekuéra. Oñemoingove jey rupi Jesúspe, haʼekuéra oreko avei esperánsa. Jaʼe porãsérõ g̃uarã, ndaipóri vaʼerãmoʼã umi kristiáno ni oñeʼẽva Jesús rehe arakaʼeve, noñemoingovejeýirire chupe.

Péro, ¿mbaʼéichapa ñanepytyvõ Jesús oñemoingove jey hague?