Anase Texcócope, upe tiémpope umi kálle yvy reínte vaʼekue upépe. Umi hénte kampañagua oguerúmi vúrro ári iproduktokuéra ovende hag̃ua ko puévlope. Che tuvakuéra imboriahu vaʼekue ha roime nueve ermáno, che aime sietehápe. Che túva sapatéro vaʼekue ha omyatyrõ umi sandália de kuéro sensillomi (hérava huarache), oiporúva umi hénte. Péro arekórõ guare siete áño, papa omano, ha che sy heta anga oiko oremongakuaapa hag̃ua.

Che avuélo ombopu vaʼekue violín ha odirihi peteĩ orkésta ombopúva músika rrelihiósa. Che hentekuéra apytépe oĩ heta músiko, che sy opurahéi tupaópe ha che tio katu ombopu piáno ha opurahéi ópera. Ore orerrelihiosoiterei vaʼekue. Por ehémplo, chemitãme aipytyvõmi umi paʼípe misahápe ha aipotaiterei vaʼekue oiko chehegui paʼi, péro chegustaiterei avei umi pelíkula de karáte, ha amáske ahecha cheviolentove.

Aike peteĩ eskuéla rrelihiósape, peteĩ siuda héravape Puebla, ojestudiahápe avei paʼirã. Che aikose vaʼekue paʼíramo, péro ajerresivipotaitépe ndaikuaasevéi mbaʼeve upe rrelihióngui. Ahechakuaa oĩha hetaiterei mbaʼe ndojejapóiva hekópe, por ehémplo, peteĩ mónha imitãva oiko che rapykuéri, ha napenáiramo jepe hese, upéi ajúma amendase. Avei ahechakuaa umi paʼi hekovaiha. Ha amo ipahápe ahejaite che estúdio.

 Upémarõ adesidi astudia músika, Conservatorio Nacional de Música oĩva Ciudad de Méxicope. Amohuʼã rire che estúdio, amenda ha cuatro che família. Ha amantene hag̃ua chupekuéra, apurahéi misahápe.

Péro romenda ypy guive oreprovléma ore rogapýpe. Mokõivévante oreselóso ha rojotrata vaieterei. Ñepyrũrã rojojaʼónte, péro upéi roñombyepotíma. Upévare trece áño romenda haguépe, rojueja ha upe riremínte rojedivorsia.

Rojueja mboyve, mokõi testígo de Jehová og̃uahẽ ógape ha oporandu chéve ndastudiaséipa la Biblia. Che apensa kuri aikuaaitereiha la Bíbliagui, upévare aasepta astudia ahechauka hag̃ua chupekuéra ijapuha. Aporandu umi Testígope umi mbaʼe hasy hasyvéva, aimoʼãgui ndoikuaamoʼãiha hikuái, péro ipahápe ombohovaipaite chéve la Biblia rupive. ¡Mbaʼevete ningo ndaikuaái raʼe! Péro upéi ndastudiavéi hendivekuéra, che ambaʼapoiterei ha che rembireko katu otrata vaieterei chupekuéra.

Cinco áño haguépe, ajotopa jey umi testígo de Jehovándi. Upérõ che aikóma ótro kuña ndive, hérava Elvira, ha haʼe oguerohory chupekuéra, upéicha rupi añepyrũ jey astudia la Biblia. Péro ijetuʼu vaʼekue chéve akambia hag̃ua.

Ahechakuaa aserviséramo Jehovápe tekotevẽha aheja heta mbaʼe ajapóva aikóvo. Por ehémplo, aheja vaʼerã che traváho tupaopegua ha aheka ótro traváho amantene hag̃ua che famíliape (Revelación [Apocalipsis] 18:4). Avei Elvira ndive roiko vaʼekue romendaʼỹre, ha koʼág̃a romenda vaʼerã.

Che ningo cheviolentoiterei kuri, ha upéva pe ijetuʼuvéva chéve akambia hag̃ua. Péro oĩ mokõi téxto vívliko chepytyvõ vaʼekue: Salmo 11:5, ohechaukáva Jehovápe ombojeguaruha pe violénsia, ha 1 Pedro 3:7, chemboʼéva atrata porã vaʼerãha che rembirekópe Ñandejára ohendu hag̃ua che ñemboʼe. Ajepyʼamongeta koʼã téxto heʼívare ha ajerure Jehovápe chepytyvõmi hag̃ua. Upéicha mbeguekatúpe akambia ha ajejokokuaave.

Koʼág̃a avyʼa che rogapýpe ha aipytyvõ che famíliape ojerovia mbarete hag̃ua Jehováre. Añehaʼã avei ajogueraha porãve umi cuatro che famíliandi, aguereko vaʼekue che rembireko ypykuéndi.

Chemitã guive voi aikose vaʼekue paʼíramo aipytyvõ hag̃ua che rapichakuérape, péro koʼág̃a aikuaa mbaʼéichapa ikatu aipytyvõ porãve chupekuéra, ha upéva chembovyʼaiterei. Koʼág̃a amboʼe músika amantene hag̃ua che famíliape. ¡Aagradeseterei ningo Jehovápe hetaite ipasiénsia haguére cherehe akambia hag̃ua!