IKATU oime nde repensa: “¡Mbaʼéicha piko oĩta heʼíva péicha Ñandejárare!”. Péro añetehápe, káda día heta hetave oĩ opensáva Ñandejára oporokastigaha.

Heta umi ohasa asy vaʼekue oúgui yvytu atã, ama guasu ha ambue mbaʼe, oñeporandu: “¿Mbaʼérepa Ñandejára oheja oiko koʼã mbaʼe? ¿Haʼe piko ipyʼahatã ha ndojepyʼapýi voi ñanderehe?”.

Oĩ avei ndogustáiva chupe umi istória omombeʼúva la Biblia. Por ehémplo, umi mbaʼe oiko vaʼekue oúrõ guare pe ama guasu Noé tiémpope. Koʼã tapicha oñeporandu: “¿Mbaʼéicha piko Ñandejára oiméramo oporohayhu ojukáta hetaite héntepe? ¿Noiméi piko ipyʼahatãguinte ojapo upéva?”.

¿Reñeporandúmavapa nde avei umi mbaʼe? ¿Ndereikuaáipa mbaʼéichapa rembohováita oĩramo oñeporandúva ipyʼahatãpa Ñandejára? Upéicharõ tuicha nepytyvõta rehesaʼỹijóvo ko porandu oĩva iguýpe.

Ñandejára ningo ñandeapo ‘ijoguaháramo’, upéicha rupi ikatu jaikuaa mbaʼépa oĩ porã ha mbaʼépa oĩ vai (Génesis 1:27). Upéva heʼise, ikatuha jahechauka umi mbaʼe porã Ñandejára orekóva, ha jahecha haʼe ohechaháicha umi mbaʼe oĩ porã ha oĩ vaíva. Epensamíntena: ñandéve voi nañandegustáiramo umi mbaʼe vai oikóva, koʼýte Ñandejárape ndogustamoʼãi.

Ñandejára heʼi ijehe la Bíbliape: “Yvága oĩháicha yvate yvýgui, péicha che rape ijyvateve pende rapégui ha che remiandu pene remiandúgui” (Isaías 55:9). Ñapensáramo Ñandejára iñañaha, jaʼe hína japuha ko téxto heʼíva, ha haʼete jaʼéva ñande rape ijyvateveha Ñandejára rapégui. Ñapensa vai mboyve Ñandejárare, tekotevẽ jaikuaa hetave mbaʼe. Ñañeporandu rangue mbaʼérepa Ñandejára ipyʼahatãite ñanendive, iporãve ñañeporandu mbaʼérepa ñapensa hese upéicha. ¿Mbaʼeichaguápa hína peteĩ ipyʼahatãva? Jahechamína.

Umi ipyʼahatãva ningo ovyʼa ohecháramo hapicha ohasa asy ha ni nombyasýi chupe. Ñapensáramo ñande rapicháre iñaña térã ipyʼahatãha, ikatu hína jahusga vai chupe. Por ehémplo, peteĩ túva okorrehíramo ifamíliape omoñeñandu vai térã omotĩ hag̃uánte chupe, iñaña hína. Péro okorrehíramo chupe ohekomboʼe ha oprotehe hag̃ua katu, ivuéno. Ñande ningo ndajaikuaái mbaʼépa oĩ ñande rapicha pyʼapýpe, upéicha rupi ndahasyiete jahusga vai hag̃ua chupekuéra umi mbaʼe ojapóvare, koʼýte jaikuaa upéva siertoha oiméramo oikóma ñanderehe upéicha.

Iñepyrũme jahecha kuri oĩha opensáva Ñandejára oporokastigaha, ohechágui umi sarambi oikóva ha oleévo umi istória oĩva la Bíbliape. Ñahesaʼỹijovemína umíva jahecha hag̃ua añetehápepa Ñandejára iñaña ha ipyʼahatã.