Heta oĩ ni noñeʼẽséiva pe ñemanóre, ñambyasyeterei voi ningo oikóramo upéva. Upéicharõ jepe, jaikuaa porã peteĩ díapente ikatuha ñanderupyty.

Ndaipóri voi ningo ohaʼarõva omano chugui itúva, iména térã ifamília, péro sapyʼánte ikatu ñaimoʼãʼỹve jave oiko upéva. Térã jaikuaáma voi hiʼag̃uimaha, ha ni upeichavérõ ndajaipotái oiko. Tahaʼe haʼeháicha, oguapyeterei ñanderehe omanóramo peteĩ jahayhúva ha ñandereja vaieterei.

Antóniogui omano vaʼekue itúva peteĩ aksidéntepe, ha haʼe heʼi mbaʼéichapa oñeñandu: “Haʼete ojellaveáva ndehegui nde róga ha oñemokañy pe lláve, ha ndaikatuvéi reike. Nemanduʼántema upe oiko vaʼekuére ha ndaikatuvéima rekambia mbaʼeve. Ni ndajagueroviaséi ningo oikóvo ñanderehe koʼã mbaʼe, péro ndaikatúi jajapo mbaʼeve ñanderesarái hag̃ua chugui”.

Dorothy katu anglikána vaʼekue, ha orekópe 47 áño, omano chugui iména. Haʼe omboʼe vaʼekue tupaópe domingokue peteĩ katekístaicha, ha siémpre opensáva oĩmante vaʼerãha peteĩ esperánsa umi omano vaʼekuépe g̃uarã. Upémarõ, peteĩ díape Dorothy oporandu ipastórpe: “¿Mbaʼépa oiko ñandehegui ñamano rire?”, ha haʼe heʼi chupe: “Avave ndoikuaái upéva. Ñamano rirémante jaikuaáta”.

¿Añetépa upe pastór heʼíva? ¿Tekotevẽpa ñamano raẽ jaikuaa hag̃ua mbaʼépa oiko umi omano vaʼekuégui?