¿MAVAITÉVAPA nde ere siertoha la heʼíva? Heta persónape ogusta pe heʼi vaʼekue Saulo de Tarso, térã apóstol Pablo, pórke oñeñandu porã opensávo Ñandejára namombyryiha oĩ ñandehegui (Hechos 17:26, 27). Ha la Bíbliape heta pártepe voi heʼi ikatuha jaikuaa porã Ñandejárape. Por ehémplo, peteĩ vuéltape Jesús oñemboʼérõ guare heʼi vaʼekue idisipulokuéra ikatuha oikuaa porã Ñandejárape ha ohupyty heta mbaʼe porã (Juan 17:3).

Péro oñemensiona haguéicha iñepyrũme oĩ avei opensáva ndaikatuiha voínte jaikuaa porã Ñandejárape pórke ndaipóri ontende vaʼerã mbaʼeichaitépa haʼe. ¿Mávapepa upéicharõ ikatu jaguerovia?

Añetehápe la Biblia heʼi porã oĩha heta mbaʼe Ñandejáragui ijetuʼúva ñande yvypóra ñantende hag̃ua. Por ehémplo, mboy tiémpomapa ojapo oexisti hague ha mbaʼeichaitépa haʼe iñarandu. Koʼã mbaʼe ñandesuperáramo jepe ha ndaikatúi ñantendepa, upéva ndeʼiséi ndaikatuiha jaikuaa Ñandejárape. Síno ikatu voi ñanemoag̃uive hese jajepyʼamongetávo umívare (Santiago 4:8). Jahechamína algúno umi mbaʼe ndaikatumoʼãiva voínte ñantende porã. Ha upéi jahecháta avei oĩha heta mbaʼe si ikatúva jaikuaa Ñandejáragui.

MBOY TIÉMPOREMAPA OEXISTI. La Biblia heʼi Ñandejára oexistiha “ymaite guive ha opa ára g̃uarã” (Salmo 90:2, NM). Upéva heʼise avave ndojapói hague Ñandejárape, haʼe ymaite guive oexisti ha núnka nomanomoʼãi. La Biblia heʼi voi: “Avave ndaikatúi okonta mboy áñomapa haʼe oikove” (Job 36:26, NM).

Mbaʼérepa iñimportánte. Ñandejára opromete ikatuha jaiko pára siémpre jaikuaa porãrõ chupe (Juan 17:3). Ha, ¿isentídota piko upéva Ñandejára voi ndaikatúirõ oiko pára siémpre? Nahániri, pe “Rréi opa ára g̃uarã” añoite ikatu okumpli ko promésa (1 Timoteo 1:17).

OPENSA LÁJA. La Biblia heʼi ñande ndaikatuiha ñantende mbaʼeichaitépa Ñandejára iñarandu pórke ñane ménte ndorekói voínte upe kapasida (Isaías 40:28; 55:9). Upévare la Biblia ojapo ko porandu: “¿Máva piko oikuaa Jehová opensáva, ohekomboʼe hag̃ua chupe?” (1 Corintios 2:16).

Mbaʼérepa iñimportánte. Ñandejára ikatu ohendu al mísmo tiémpo hetaiterei hénte oñemboʼévape chupe (Salmo 65:2). Natekotevẽi jaiko jajepyʼapy noiméipa Ñandejára oñatendéma hína hetaiterei persónare ha ndaikatumoʼãi ojapysaka ñanderehe. Ñañemboʼeha órante haʼe ikatu ñanerendu. Haʼe ningo ohecha umi gorrión jepe oguejy jave yvýpe, ha la Biblia heʼi ñande javaleveha “heta gorrióngui” (Mateo 10:29, 31).

HEMBIAPOKUÉRA. La Biblia ningo heʼi yvyporakuéra ndaikatuiha oikuaapa Ñandejára rembiapokue “iñepyrũ guive ipaha peve” (Eclesiastés 3:11, ÑÑB). Upévare ndaikatumoʼãi voínte jaikuaa opa mbaʼe Ñandejáragui. Haʼe ningo iñarandueterei, upévare “avave ndaikatúi omyesakã umi mbaʼe haʼe ojapóva ni oikuaa umi hape” (Romanos 11:33). Péro Ñandejára oipota avei isiervokuéra ontende mbaʼérepa haʼe ojapo heta mbaʼe ha upévare omombeʼu chupekuéra (Amós 3:7).

Mbaʼérepa iñimportánte. Jalee ha jastudiávo la Biblia siémpre oĩta heta mbaʼe ñaaprendeve hag̃ua Ñandejáragui. Káda día ñañemoag̃uivéta hese ha ikatúta jajapo upéva pára siémpre.

Oĩramo jepe heta mbaʼe ndaikatúiva ñantende Ñandejáragui, upéva ndeʼiséi hína ndaikatuieteha jaikuaa chupe. La Biblia ningo ñanemboʼe heta mbaʼe ñanepytyvõva jaikuaa porãve hag̃ua Ñandejárape. Jahechamína algúno.

HÉRA. La Biblia heʼi Ñandejára voi oiporavo hague herarã, haʼe heʼi: “Che hína Jehová. Péva haʼe che réra”. La Bíbliape oñemombeʼu heta persóna réra, péro Ñandejára réra oĩ hetaiteve vése umi ótrogui, mas de 7.000 vése voi (Isaías 42:8, NM).

Mbaʼérepa iñimportánte. Pe padrenuéstrope Jesús omboʼe vaʼekue jajerure hag̃ua: “Ore Ru reiméva yvágape, toñemomarangatu nde réra” (Mateo 6:9). Upévare, jaipuru vaʼerã Ñandejára réra ñañemboʼe jave chupe. Haʼe osalváta entéro orrespetávape héra (Romanos 10:13).

PE LUGÁR OIKOHA. La Biblia omboʼe oĩha mokõi lugár ikatuhápe ojeiko, ko yvy ñande jaikohápe, ha pe lugár espirituál oñehenóiva yvága oikohápe umi ánhel (Juan 8:23; 1 Corintios 15:44). Upéicharõ, la Biblia heʼívo ñande Kreadór oikoha yvágape, heʼise hína oikoha upe lugár espirituálpe (1 Reyes 8:43).

 Mbaʼérepa iñimportánte. Jahecha rire koʼã mbaʼe ñantende porãve mbaʼéichapa Ñandejára. Haʼe ningo peteĩ persóna ha oreko peteĩ lugár oikoha, ndahaʼéi peteĩ fuérsa rei oĩva opárupi ha ikatuʼỹva ñantende. Péro haʼe oikóramo jepe yvágape, “ndaipóri mbaʼeve ni avave okañýva chugui” (Hebreos 4:13).

MBAʼEICHAGUA PERSÓNAPA HAʼE. La Biblia rupive ikatu jaikuaa porã mbaʼeichagua persónapa Ñandejára. Haʼe ningo ñanderayhueterei, ñandeporiahuvereko, ñanembyasy, ihústo, ndaijapúi ha ndaipochyreíri (1 Juan 4:8; Éxodo 34:6; Hechos 10:34; Tito 1:2). Ha iporãveha katu, jarrespetáramo chupe, ikatu voi jaiko iñamigoitéramo (Salmo 25:14).

Mbaʼérepa iñimportánte. Epensamíntena, ikatu oiko ñandehegui Jehová amígo (Santiago 2:23). Ha amáske jaikuaa mbaʼeichagua persónapa haʼe ñantende porãve heta istória oĩva la Bíbliape.

Ñandejára Jehová ndahaʼéi peteĩ mistério, síno haʼe voi katu ñaneinvita jaikuaave hag̃ua chupe. La Biblia ñanemboʼe porã mbaʼeichagua persónapa haʼe, ha opromete voi: “Nde reñehaʼãramo reheka chupe, haʼe ohejáta reñemoag̃ui hese” (1 Crónicas 28:9, NM). Jaleéramo la Biblia ha jajepyʼamongeta mbaʼéichapa Ñandejára otrata vaʼekue umi isiérvo yma guarépe, jaikuaa porãvéta chupe ha haʼe oñemoag̃uíta ñanderehe (Santiago 4:8).

Ikatu oime nde repensa: “Péro mbaʼéichaiko oikóta chehegui Ñandejára amígo ndaikatúiramo antendepa entéro mbaʼe chugui”. Epensamína ko ehémplore, peteĩ persóna oikoséramo peteĩ doktór amígoramo, ¿tekotevẽ piko ontendepa avei la medisína? Nahániri, ¿ajépa? Ikatu voi pe persóna ótra kosaitépe ombaʼapo. Péro la iñimportánteva hína oikuaa porã pe doktórpe, mbaʼépa ogusta térã ndogustái chupe, mbaʼeichagua persónapa haʼe ha umícha. Peichaiténte avei Ñandejárandi, la Biblia rupive ikatu jaikuaa mbaʼeichagua persónapa haʼe ha oiko ñandehegui iñamígo.

La Biblia omombeʼu porã ñandéve umi mbaʼe ñaikotevẽva jaikuaa porãve hag̃ua Ñandejárape. ¿Ndépa reikuaa porãseve chupe eiko hag̃ua iñamígoramo? Umi testígo de Jehová ovyʼáta ikatu haguére nepytyvõ. Ikatu reñeʼẽ hendivekuéra térã eike ko direksiónpe: www.dan124.com/gug.