Si. La Biblia omeʼẽ heta pruéva ohechauka porãva Ñandejára oexistiha. Avei ñanemokyreʼỹ jajerovia hag̃ua Ñandejárare. Péro ndahaʼéi jagueroviáguinte umi rrelihión heʼíva, síno ñanemokyreʼỹ ‘jaipuru hag̃ua ñane akã’ ha ñane “entendimiénto” ñakomprova hag̃ua siértopa umi mbaʼe jagueroviáva (Romanos 12:1; 1 Juan 5:20). Ñaanalisamína umi pruéva omeʼẽva la Biblia:

•   Oexisti hag̃ua la vída, entéro mbaʼe oĩva ko univérsope oĩ vaʼerã hendaitépe ha ombaʼapo porã. Upéva ohechauka álgien okrea hague entéro mbaʼe. La Biblia heʼi voi: “Jaikuaa ningo káda óga orekoha ijapohare, péro Ñandejára hína pe ojapo vaʼekue entéro mbaʼe” (Hebreos 3:4). Ko rrasonamiénto ningo isensíllo, péro heta hénte iñarandúva ohechakuaa siertoiteha. a

•   Ñande yvypóra ningo jaikuaase maʼerãpa jaexisti, ha jarekopáramo jepe umi mbaʼe ñaikotevẽva, ndajaikuaáiramo upéva haʼete ku ofaltáva ñandéve álgo. Pe ñaikotevẽháicha tembiʼu jaikove hag̃ua, la Biblia heʼi ñande ‘ñaikotevẽha Ñandejárare’, upéva heʼise tekotevẽha jaikuaa ha jaadora chupe (Mateo 5:3; Apocalipsis 4:11). Péva haʼe voi peteĩ nesesida ñande jaguerekóva, ha upéva ohechauka Ñandejára oexistiha. Ha avei ñanderayhu ha oipotaha ñañemoag̃ui hese (Mateo 4:4).

•   Heta profesía oĩva la Bíbliape ojeskrivi vaʼekue hetaiterei tiémpo oiko mboyve, péro oñekumpli vaʼekue umi detalleʼi jepe. Upéva ohechauka porã koʼã profesía ndaikatúi hague ou yvypóraguinte (2 Pedro 1:21).

•   Ojeskrivírõ guare la Biblia, oñemoĩ pype umi detálle sientífiko umi hénte upe tiémpope guare neʼĩrava odeskuvri. Por ehémplo, yma heta hénte oguerovia vaʼekue ko yvy oñemboguapyha diferénte animál ári, umíva apytépe peteĩ elefánte, peteĩ tóro, peteĩ havali térã ótro animál. Péro la Biblia katu heʼi porã Ñandejára ‘omosaingo hague pe yvy mbaʼeve ári’ (Job 26:7). Upéicha avei, oñemombeʼu porãma upépe ko ñande ‘yvy ijapuʼaha’ (Isaías 40:22). Upévare heta hénte oguerovia la Biblia ouha Ñandejáragui, pórke ijehegui reínte umi oskrivi vaʼekue ndaikatumoʼãi oikuaa koʼã informasión.

•   La Biblia okontesta avei ñandéve umi porandu ñandepyʼapyvéva. Heta héntepe noñepytyvõi ontende hag̃ua umíva, ha upéicha rupi haʼekuéra ikatu ou opensa Ñandejára ndoexistiriha. Por ehémplo, oiméramo Ñandejára ñanderayhu ha haʼe todopoderóso, ¿mbaʼérepa jasufri ha oiko heta mbaʼe vai ko múndope? ¿Mbaʼérepa heta rrelihión operhudika la héntepe oipytyvõ rangue chupekuéra? (Tito 1:16). La Biblia heʼíva koʼã témare ikatu nepytyvõ rejerovia hag̃ua Ñandejárare.