Naayinɛ dima n gane za’a dela Sitaana, Kolkpabɛ’a la. A dela vo’osum nɛra ge isige kpenkpase la Yehowa. Sitaana kelum zabera mɛ la Naayinɛ ge tara daaŋɔ paara asaaleba. Sitaana dela kolkpabɛ’a. A dela pumpɔrema la nɛrekuura.—Yon 8:44.

Vo’osum nɛreba basɛba laɣum naa la Sitaana eŋɛ kpenkpase la Naayinɛ. Baabule la yi’ire ba la kolkpabɛ’ɛsi. Kolkpa’arisi wa diŋdoma dela asaaleba, wuu Sitaana n ane se’em la. Ba boti la ba sa’ana nɛreba. (Matu 9:32, 33; 12:22) Yehowa wan sa’am Sitaana la a kolkpa’arisi wa ti ba kanle bɔna. Dabese’a ti ba tara daana asaaleba la gee la wana fii wa.—Liligere 12:12.

Ho san bɔta ti ho dɛna Naayinɛ zɔ, la ka nari ti ho tuna sɛla ti Sitaana bɔta. Sitaana la kolkpa’arisi la dini Yehowa mɛ. Ba dela Naayinɛ diŋdoma, ge mɛ bɔta ti ba basɛ ti ho dɛna Naayinɛ dima. Ho wan loe la ane pu’usa—Yehowa bii Sitaana. Ho san bɔta ti ho nyɛ daarewoo nyɔvɔre, la dela ho tuna Naayinɛ putɛ’ɛrɛ n boti se’em la. Sitaana tare la bibɛ’ɛlum yɛm la sarɔɔtɔ zo’e zo’e pã’ãsera nɛreba. A pã’ãse nɛreba zo’e zo’e nyaŋɛ mɛ.—Liligere 12:9.