ZASEŊƆ 5
Bem Zuo Ti Naayinɛ Naam Teŋgɔŋɔ Wa?
1. Bem zuo ti Naayinɛ naam teŋgɔŋɔ wa?
Yehowa dekɛ teŋgɔŋɔ wa bo la asaala. To yire n bala. Bala, a yun ka naam Adam la Hawa ti ba dɔɣɛ pirɛ saazuo sa—Naayinɛ yun puɣum deŋɛ naam malakadoma mɛ saazuo. (Yob 38:4, 7) Naayinɛ yun naam Adam zi’ire la paradiisi n boi Eden gaadin la poan. (Pin’ileŋɔ 2:15-17) Yehowa yun bo Adam la a kɔnsɛba ti a wan dɔɣɛ la yɔ’ɔ ti ba vɔna wuusa teŋgɔŋɔ wa zuo.—Kaalɛ Yooma 37:29; 115:16.
Pin’ileŋɔ poan, Eden gaadin la ma’a n yun de paradiisi. To yia dɔɣereba la n yun de ba dɔɣɛ pirɛ teŋgɔŋɔ wa. La yun dela ba basɛ ti teŋgɔŋɔ wa za’a dɛna paradiisi. (Pin’ileŋɔ 1:28) Teŋgɔŋɔ wa kan malum sa’am. Asaala yire n kɔ’ɔn bala.—Kaalɛ Yooma 104:5.
Bisɛ Beni Zuo Ti Naayinɛ Naam Teŋgɔŋɔ Wa? vidiyo la
2. Beni n sɔi ti teŋgɔŋɔ wa daɣɛ paradiisi nananawa?
Adam la Hawa n yun zaɣesɛ Naayinɛ nɔɔrɛ la n sɔi ti Yehowa yun dige ba yese gaadin la poan. Paradiisi yun nyaa bɔ mɛ, ti asaala me ka boi n nyaŋɛ tari de lebena. Baabule la yeti: ‘Teŋparɛ wa bo la potɔpa nu’usin.’—Yob 9:24.—Kaalɛ Pin’ileŋɔ 3:23, 24.
Yehowa dekɛ a putɛse’ere ti a puɣum deŋɛ tara bɔ’ɔra asaala la basɛ mɛ? Aayi! Eŋa n de paŋa za’a daana. A ka koŋɛ ti a eŋɛ de. (Isaiah 45:18) A wan le basɛ ti asaala zi’irego ze’an lebe ana wuu eŋa n yun boti se’em la.—Kaalɛ Yooma 37:11, 34.
3. Paradiisi wan le bɔna?
Yezu n de Naayinɛ na’am Naba la san ta bisa teŋgɔŋɔ wa, a wan basɛ ti Paradiisi le bɔna. Yezu wan bɔna malakadoma la nɛŋa Armagedon zaberɛ la poan, ti ba sa’am sɛba za’a n ka nam bo Naayinɛ la. Yezu wan paɣɛ Sitaana yuun 1,000. Naayinɛ nɛreba wan nyɛ faarɛ sɛla n sɔi la Yezu wan gu ge te’ele ba soŋa. Ba wan nyɛ daarewoo nyɔvore n ani soŋa Paradiisi teŋgɔŋɔ wa zuo.—Kaalɛ Liligere 20:1-3; 21:3, 4.
4. Tɛm buni ti namesegɔ kanle bɔna?
Daandene ti Naayinɛ wan yese yelebe’ero woo teŋa wa zuo? Yezu yun yele ba “sɛla n wan ta pa’ale” ti ba’asegɔ la pɔri. Yelese’a n iti dunia wa zuo dela dɛŋa bɔ’ɔra asaala ge pa’alɛ ti “teŋa wa ba’ahegɔ” pɔri me n bala.—Kaalɛ Matu 24:3, 7-14, 21, 22.
Yezu yuun 1,000 bisega la poan, a wan bɔna saazuo ge bisa teŋgɔŋɔ wa la, a wan basɛ ti namesegɔ mɛlum. (Isaiah 9:6, 7; 11:9) Yezu dela Naba ge le dɛna Kaabegɔ Nɛŋadaana n wan nyaŋɛ duuse nɛresɛba n nani Naayinɛ la yelebe’ero basɛ. Bala, Naayinɛ wan doose la Yezu poan yese bã’ãsi, kuregere la kum basɛ.—Kaalɛ Isaiah 25:8; 33:24.
5. Ani n wan zi’ire Paradiisi la poan?
Na’am Pu’usegɔ Deo la poan, ho wan nyɛ nɛreba n nɔŋɛ Naayinɛ ge bɔta ba ita sɛla n ani soŋa
Sɛba n iti sɛla ti Naayinɛ bɔta la n wan zi’ire Paradiisi la poan. (1 Yon 2:17) Yezu yun tum a podɔleba ti ba ee sɛba n siregere bamea zamesɛ ba ti ba ita sɛla ti Naayinɛ bɔta. Zina beere wa, Yehowa maasuni la nɛretustusa ti ba beere bɔna Paradiisi teŋgɔŋɔ wa zuo. (Zepania 2:3) Yehowa Sɛɛradoma Na’am Pu’usegɔ Deto la poan, nɛreba ni zamesɛ mɛ tee dɛna sɔdoma, sireba, pɔɣeba la madoma ti ba bɔŋa ana soŋa. Kɔma la dɔɣereba ni laɣum pu’usa mɛ ge nyɛta nyɔɔrɔ yɛsa yelesoma la poan.—Kaalɛ Mikah 4:1-4.
