To boi la teŋsɛka poan ti nɛreba dekɛ som lebege be’em ge dekɛ be’em me lebege som. (Isa 5:20) Nimbãalega la dela, nɛreba basɛba iti la yelese’a ti Yehowa yaɛ yele yele wuu buraasi n gã la taaba bii pɔɣesi n gã la taaba. Sukuu tadaandoma bii nɛreba basɛba ni pɛregera bunbilipaalesi ti ba tɔɣesa ba sarum be’ero la. Ho wan eŋɛ la wani ta’an soŋɛ ho kɔma ti ba gu bamea yele ana wa poan?

Tara Yehowa pa’alegɔ la n di mi’a la pa’ala ho kɔma. (Mlm 18:3) Basɛ ti ba baŋɛ Baabule la puti’irɛ n de se’em gã’aregɔ yɛla poan. Bisɛ ba yuuma la yelese’a ti ho wan ta’an pa’alɛ ba ti ba bɔkɛ gã’aregɔ yɛla soŋa. (Tɛ 6:7) Soke homea yeti: ‘Mam pa’ali n kɔma ti ba mina guŋerɛ ge me tana bamea tara sareŋɔ poan, ti ba yɛɛra ba lɔɣɔrɔ ti la makɛ ma’a ge me basɛ ti nɛreba tara gilema bɔ’ɔra ba suɣelum yɛla? Mam kɔma la mi ba wan eŋɛ se’em nɛra san dekɛ yalumfɔɔra pa’ala ba bii pɛregera ba ti ba eŋɛ sɛla ti Yehowa ka bɔta?’ Ba san te’ele mina yele ana, la wan dɛna gu’a bɔ’ɔra ba. (Mag 27:12; Pa 7:12) Ho san pa’ala ho kɔma, la wan pa’alɛ ti ho puurɛ pee mɛ la bo’olum wa n ze’ele Yehowa zɛ’an na la.​—Ym 127:3.

BISƐ VIDIYO LA ZUO N DE MƐ YIRE N WAN ZƐ’A WUUSA​—GU’URIYA YA KƆMA YƐSA “SƐLA N DE BE’EM” POAN GE NYAA LEBESE SOKERE ANA WA:

• Beni n sɔi ti nɛreba basɛba ni ka bɔta ti ba pa’ala ba kɔma gã’aregɔ yɛla?

• Beni n sɔi ti dɔɣereba nara ti ba pa’ala ba kɔma “Na’ayenɛ sore la”?​—Ep 6:4

• Yehowa tigere la tari la bem ti dɔɣereba wan ta’an dekɛ pa’ala ba kɔma gã’aregɔ yɛla?​—w19.05-E 12, daka

• Beni n sɔi ti la nara ti hon la ho kɔma la sɔsera saŋa woo ge ti yeledaaŋɔ nyaa ta paɛ ba?