ZASEŊƆ 8
YUUNƐ 130 Be Forgiving (Dita Sugeri)
Ho Wan Eŋɛ La Wani Ta’an Tɔɣesa Yehowa N Diti Sugeri Se’em La?
‘Wuu Yehowa n yese a suure poan di sugeri bo ya se’em la, yamam me nari ti ya ita bala.’—KOL. 3:13.
YELEKPINE
Zaseŋɔ wa poan to wan sɔsɛ baŋɛ to wan eŋɛ se’em ta’an dita sugeri.
1-2. (a) Wani ma’a ti la ni kpe’em bo to ti to ni di sugeri bo nɛra? (b) Denise yuun eŋɛ la bem pa’alɛ ti a di sugeri?
LA NI KPE’EM bo ho mɛ ti ho dita sugeri? La kpe’em bo to zo’e zo’e mɛ, yele yele wuu nɛra san tɔɣɛ bii eŋɛ sɛla ti la daam to paa. Makerɛ, to geele sɛla n yuun paɛ mabipɔka ayima yu’urɛ n de Denise. a La yuun kpe’em bo en mɛ ge ti a kelum di sugeri. Yuun 2017 poan ti Denise la a yidoma yuun keŋɛ ta kaɛ Yehowa Sɛɛradoma Tigere Zuo la. Ban yuun boi ba loore poan yɛ’ɛsa kula la ti buraa ayima dekɛ a loore ta ŋmɛ ba. Denise yuun lige mɛ. A yɛm n yuun lebe na la ti a baŋɛ ti a kɔma la yuun pɔɣelum mɛ paa ge ti a sira Brian me ki. Denise yeti, “Mam san ni ti’isa yele ana wa, mam suure n ni sa’am ti la ana mam bura.” Pooren, eŋa n yuun baŋɛ ti dɔleba la nini kãi ti a ŋmɛ ba la, a yuun zusɛ la Yehowa ti a bo en suma’asum.
2 Ba yuun nyɔkɛ buraa wa mɛ tari en zom kootin. Kootin la san gãkɛ buraa wa ti a ka tari buurɔ, ba wan paɣɛ en. Kootin la yuun yele Denise ti eŋa n wan tɔɣɛ se’em la n wan pa’alɛ ban wan gãkɛ buraa la se’em. Denise yeti, “La yuun nari ti n le tiɛ yelese’a n paɛ mam la. Mam me san tiisa yele aŋa, la ni ana wuu ba dekɛ la nanzu’usi ka’ɛ eŋɛ mam nɔregɔ poan la.” Bakwai fii pooren, Denise yuun keŋɛ la kootin la poan ti a ta tɔɣɛ pa’alɛ sɛla n yuun eŋɛ. A yuun yeti bem? Denise yuun yele gãkerɛdaana la ti a zɔ buraa la nimbũ’ɔ. b Eŋa n yuun yele bala la, la yuun eŋɛ gãkerɛdaana la pakerɛ, ti a kaasa. Gãkerɛdaana la yeti, “Mam tum tuuma wa paɛ yuuma 25 ge mam ka tabelɛ wum ti nɛra tɔɣɛ wana. Mam ka tabelɛ nyɛ ti nɛra belum mam ti n di sugeri bo se’emdaana n tum en be’em la. Mam ka tabelɛ nyɛ nɛra n eŋɛ pa’alɛ ti a nɔŋɛ se’em n tue en ge me di sugeri bo en.”
3. Bem n yuun soŋɛ Denise ti a ta’an di sugeri?
3 Bem n yuun soŋɛ Denise ti a ta’an di sugeri? A yuun ti’isɛ taɣesɛ la Yehowa n diti sugeri se’em la. (Mik. 7:18) To puurɛ san pee la Yehowa n diti sugeri se’em la, bala wan soŋɛ tɔ ti to me ta’an dita sugeri.
4. Yehowa boti ti to eŋɛ la bem? (Epesus 4:32)
4 Yehowa boti la to yese to suuren dita sugeri wuu eŋa n diti sugeri bɔ’ɔra to se’em la. (Kaalɛ Epesus 4:32.) A boti la to kɔ’ɔn maasum ti to di sugeri bo sɛba n tue to la. (Ym. 86:5; Lu. 17:4) Zaseŋɔ wa poan, to wan sɔsɛ yɛla atã n wan soŋɛ tɔ ti to ta’an dita sugeri.
TIREGƐ MAALƐ YELE LA
5. Wuu Magaha 12:18 n pa’alɛ se’em la, la ni ana to la wani nɛra san tue to?
5 Nɛra san eŋɛ sɛla ti la daam tɔ, la ni basɛ ti to suure sa’am mɛ yele yele wuu la san dɛna to zɔ bii to yire nɛra. (Ym. 55:12-14) Saŋa ase’a, yele la ta’an daana tɔ ti la ana wuu ba dekɛ la su’a lu to la. (Kaalɛ Magaha 12:18.) La nari ti to tiregɛ maalɛ yele la. To san ka eŋɛ bala, la wan ana wuu ba dekɛ la su’a lu hɔ ge ti ho ka foe su’a la. Bala me wan dɛna dɛŋa paa.
6. Nɛra san eŋɛ sɛla ti la daam tɔ, la ni ana to la wani?
6 Nɛra san eŋɛ sɛla ti la daam tɔ, la ta’an basɛ ti to sunsɔa nyie. Baabule la yeti to sunsɔa ta’an nyie ge to da tum be’em. (Ym. 4:4; Ep. 4:26) Beni n sɔi? Se’ere n sɔi la, lan ni ana ho se’em la ta’an basɛ ti ho tum som bii be’em. Saŋa zo’e zo’e la, sunsɔa nyiisum ni basɛ ti ho tum la be’em. (Yam. 1:20) Tɛ̃ra ti ho sunsɔa ta’an nyie ge homea n wan loe hon nyaa wan eŋɛ sɛla.
Tɛ̃ra ti ho sunsɔa ta’an nyie ge homea n wan loe hon nyaa wan eŋɛ sɛla
7. Yele ani ti nɛreba wan ta’an eŋɛ ti la daam tɔ?
7 Nɛra san tue to, la ni daana to mɛ. Mabipɔka ayima yu’urɛ n de Ann yeti, “Mam n yuun de bia la, mam sɔ yuun basɛ mam ma mɛ ge tee di mam ma posɔɔ. Ban yuun nyaa ta dɔɣɛ kɔma la, ba kɔ’ɔn tamɛ mam yele mɛ. Mam yele yuun ka le pakɛ ba. Bala yuun daam mam mɛ paa.” Mabipɔka ayima yu’urɛ n de Georgette tɔɣɛ lan yuun ani en se’em, a sira n yuun kaɛ a poore la. A yeti, “Mam suure yuun sa’am mɛ se’ere n sɔi la, to yuun kɔ’ɔn dɛna la zɔdoma to bunbilemen sa. To me yuun laɣum dɛna la daarewoo sore ŋmɛ’adoma.” Mabipɔka Naomi me yeti, “Mam ka tabelɛ ti’isɛ ti mam sira wan eŋɛ sɛla ti la daam mam. Mam suure yuun sa’am mɛ la eŋa n yuun yele mam ti eŋa suɣɛ bisa la yalumfɔɔra la.”
8. (a) Beni n sɔi ti la yele pakɛ ti to dita sugeri? (b) To nyɛti nyuurɔ la wani to san dita sugeri? (Bisɛ daka la zuo n de “ Nɛra San Eŋɛ Ho Sɛla Ti Bala Ta’asɛ Daaŋɔ Ase’a, Ho Wan Eŋɛ La Wani?”)
8 To kan ta’an baŋɛ nɛra n wan yele bii eŋɛ sɛla ge to wan ta’an tiregɛ bisɛ ton wan lebese se’em. Sɛla n nari ti to eŋɛ dela to di sugeri. Beni n sɔi? Se’ere n sɔi la to nɔŋɛ la Yehowa, a me boti la to dita sugeri. To san basɛ ti to sunsɔa kelum nyie, la dela gɔɔnɛ. Bala me ta’an daam to imma’asum. (Mag. 14:17, 29, 30) Basɛ ya ti to geele mabipɔka ayima yu’urɛ n de Christine yele la bisɛ. A yeti, “Mam sunsɔa san ni nyie bii yele n daani mam, la ni basɛ ti mam puurɛ ka pɛɛra ge ti mam ka ta’an dita soŋa. Mam ni ka ta’an gisera soŋa ge ti la ni kpe’em bo mam ti n ta’an nyɔkera n mea. Bala me ni sa’am mam la mam sira la nɛreba basɛba bɔŋa mɛ.”
9. Beni n sɔi ti la ka nara ti to ugera yɛla?
9 Hali nɛra san eŋɛ sɛla ti la daam tɔ ge ka belum to, to ta’an kelum basɛ ti to suure ana mama. Wani wani? Georgette ti to puɣum tɔɣɛ a yele la yeti, “La yuun yue mɛ ge ti mam sunsɔa ka le nyiira la mam sirekɛka la. Mam n yuun eŋɛ bala la yuun basɛ ti mam suure ana la mama.” To san ka ugera yɛla, to wan ita nɛreba soŋa. La me ni basɛ ti to puurɛ pee mɛ ti to ka le ti’isa yele aŋa. (Mag. 11:17) Ge ho wan eŋɛ la wani, ho san ka maasum ti ho di sugeri?
HON WAN EŊƐ SE’EM TI HO SUURE ANA HO MAMA
10. Beni n sɔi ti la nara ti ho bo homea tɛm ti ho suure ana ho mama? (Bisɛ fɔɔra la.)
10 Ho wan eŋɛ la wani ti ho suure ana ho mama? Bo homea tɛm. Nɛra san pɔɣelum, la ni yue me fii ge ti nɔregɔ la nyaa bɔi. Bala mea nɔɔ ti la ni yue fii ge ti to ta’an yese to suuren di sugeri bo nɛra.—Pa. 3:3; 1 Pe. 1:22.
Nɛra san pɔɣelum, la ni yue la fii ge ti nɔregɔ la nyaa bɔi. Bala mea nɔɔ ti la ni yue fii ge ti to ta’an yese to suuren di sugeri bo nɛra (Bisɛ kaalegɔ zɛ’an 10)
11. Zusega wan ta’an soŋɛ ho la wani ti ho dita sugeri?
11 Zusɛ Yehowa ti a soŋɛ hɔ ti ho ta’an dita sugeri. c Ann ti to puɣum tɔɣɛ a yele la tɔɣɛ pa’alɛ zusega n soŋɛ n se’em. A yeti, “Mam ni zusɛ la Yehowa ti a di sugeri bo mam la n deodoma la to tuure yɛla la. Mam yuun gulesɛ la gɔŋɔ bo n sɔ, la a pɔɣesarega la yele ba ti mam di sugeri bo ba mɛ.” Ann yeti la yuun daɣɛ naana. Ge a le yeti, “Mam tari puti’irɛ ti mam n tɔɣesɛ Yehowa ge di sugeri bo mam sɔ, la a pɔɣesarega la ta’an ta basɛ ti ba bɔta ti ba zamesɛ baŋɛ Yehowa.”
12. Beni n sɔi ti la nara ti to dekɛ tomea delum Yehowa ge daɣɛ tomea puti’irɛ? (Magaha 3:5, 6)
12 Dekɛ homea delum Yehowa ge daɣɛ homea puti’irɛ. (Kaalɛ Magaha 3:5, 6.) Yehowa mi sɛla n ani soŋa bɔ’ɔra to mɛ. (Isa. 55:8, 9) A me kan bɔta ti to eŋɛ sɛla n wan daam tɔ. Bala la, Yehowa n yeti to dita sugeri la dela tomea som zuo. (Ym. 40:4; Isa. 48:17, 18) To san sakɛ tomea puti’irɛ n de se’em, to kan ta’an dita sugeri. (Mag. 14:12; Yer. 17:9) Naomi ti to puɣum tɔɣɛ a yele la yeti, “Yia la, mam yuun ti’isɛ ti la ka nari ti n di sugeri bo mam sira, la eŋa n biseri yalumfɔɔra la. Mam yuun ti’isɛ ti mam san di sugeri bo en, a ta’an le eŋɛ sɛla ti la daam mam. Bii a tamɛ ti eŋa n eŋɛ sɛla la daam mam mɛ. Mam yuun ti’isɛ ti n san puɣum ka di sugeri bo en, Yehowa wan bɔkɛ. Ge bala ka pa’alɛ ti Yehowa sakɛ mam n iti sɛla la mɛ. Yehowa bɔkɛ lan ani mam se’em la mɛ. A mi ti la wan yue fii ge ti n sunsɔa la ma’ɛ ge a boti la n dita sugeri.” d
TARA PUTƐSONƐ
13. Wuu Arom 12:18-21 n pa’alɛ se’em la, la nari ti to eŋɛ la bem?
13 Nɛra san tue to ti to di sugeri bo en, ton wan sina kan tɔɣɛ de yele la ma’a ka seke. La nari ti to eŋɛ sɛla pa’asɛ. Nɛra la n tue to la san dɛna la mabia, la nari ti tomam la eŋa tara suma’asum la taaba. (Mt. 5:23, 24) Lan tuɣum deni ti to sunsɔa nyie la nɛra la, la nari ti to zɔ a nimbũ’ɔ ge di sugeri bo en. (Kaalɛ Arom 12:18-21; 1 Pe. 3:9) Bem n wan soŋɛ tɔ ti to ta’an eŋɛ bala?
14. La nari ti to tiregɛ eŋɛ la bem ge bem zuo?
14 Yehowa ni kɔ’ɔn bisera la to halesoma la. Bala la, la nari ti to tiregɛ tɔɣesa Yehowa ge me bisera nɛra sɛka n tue to la halesoma. (2 Yel. 16:9; Ym. 130:3) To san bisera la tuure yɛla, to me wan nyɛ la tuure yɛla ma’a ge to san bisera la halesoma, to me wan nyɛ la halesoma ma’a. To san bisera nɛra la halesoma, la kan kpe’em bo to ti to di sugeri bo en. Makerɛ, mabia ayima yu’urɛ n de Jarrod yeti, “Mam san ni ti’isa mabia la n tue mam la halesoma, la ni ka kpe’em bo mam ti n di sugeri bo en.”
15. Beni n sɔi ti la yele pakɛ ti ho yele nɛra yeti ho di sugeri bo en?
15 La yele me pakɛ mɛ ti to yele nɛra la yeti to di sugeri bo en. Beni n sɔi? Naomi ti to puɣum tɔɣɛ a yele la yeti, “Mam sira yuun soke mam yeti, ‘Hon di sugeri bo mam?’ Mam n yuun ya’ɛ n nɔɔrɛ ti n yeti, ‘Mam di sugeri bo ho’ la, mam kunkɔa n li’ire. Mam yuun baŋɛ ti mam ka yese n suuren di sugeri bo en. Ge la yuun ka yue ti mam yele en ti, ‘Mam di sugeri bo ho.’ Mam n yuun yese n suuren yele mam sira ti mam di sugeri bo en la, a yuun keli mɛ ge ti a suure nyaa ana mama, ti mam me nyaa tara suma’asum. Kɔ’ɔn pɔsɛ daandindaarɛ, a san ni yele sɛla, mam ni sakɛ mɛ ge ti to sire ele la me le malum ana soŋa.”
16. Hon zamesɛ la bem sugeri dia poan?
16 Yehowa boti la to yese to suuren dita sugeri bɔ’ɔra taaba. (Kol. 3:13) Saŋa ase’a, la ni kpe’em mɛ ti to di sugeri. Ge to wan ta’an di sugeri to san tiregɛ maalɛ yele la ge ka basɛ ti to sunsɔa nyiira. La me nari ti to tara putɛsonɛ.—Bisɛ daka la zuo n de “ Yɛla Atã N Wan Soŋɛ Hɔ Ti Ho Ta’an Di Sugeri.”
TI’ISƐ BISƐ HON WAN NYƐ NYUURƆ SE’EM HO SAN DITA SUGERI
17. To san dita sugeri, to wan nyɛ nyuurɔ la wani?
17 To san dita sugeri to wan nyɛ nyuurɔ zo’e zo’e. Basɛ ya ti to geele nyuurɔ wa basɛba. Yia, la pa’alɛ ti to tɔɣeseri la Yehowa. Bala n basɛ ti a puurɛ pɛɛra. (Lu. 6:36) N yi’i, la pa’alɛ ti to puurɛ pee mɛ la Yehowa n diti sugeri bɔ’ɔra to se’em la. (Mt. 6:12) N tã’a, la basɛ ti to tara la imma’asum ge ti tomam la nɛreba bɔŋa me ana soŋa.
18-19. To san dita sugeri, bem n wan ta’an eŋɛ?
18 To san dita sugeri, to nyɛti la kã’a zo’e zo’e. To geele ya Denise ti to puɣum tɔɣɛ a yele la bisɛ. Denise yuun ka mi ti kootin la san gãkɛ yele la ba’asɛ, buraa la wan ku amea. Ge Denise n yuun di sugeri bo en la basɛ ti buraa la puurɛ pee mɛ ti eŋa la Yehowa Sɛɛradoma pɔsɛ zamesa Baabule la.
19 To ta’an ti’isa ti la kpe’em mɛ ti to di sugeri bo nɛra ge to san eŋɛ bala, to wan nyɛ kã’a zo’e zo’e. (Mt. 5:7) Bala la, to za’a waabi nari ti to tiregɛ tɔɣesa Yehowa n diti sugeri se’em la.
YUUNƐ 125 “Happy Are the Merciful!” (“Sɛba N Zoti Nɛreba Nimbũ’ɔ La Wan Tara Pupeelum”!)
a Ba tee yu’ura ase’a mɛ.
b Yele ana taaba san paɛ tɔ, Kristabia woo nari ti a kɔ’ɛ a puti’irɛ bisɛ eŋa n wan eŋɛ sɛla.
c Keŋɛ jw.org ta bisɛ tigere la yuuma ase’a vidiyodoma zuo n de “Forgive One Another,” “Forgive Freely,” la “Friends Again.”
d La boi bim ti nɛra san bisera yalumfɔɔra, la dela be’em ge Baabule la ka bo nɛra la luɣerɛ kpɛ’a yɔ’ɔ ti a ta’an basɛ en.
