YELE tabelɛ paɛ hɔ ti ho ka tara mina n wan soŋɛ hɔ? To boi la sansɛka ti la “kpe’em bo nɛreba.” Bala ta’an basɛ ti to giila kɔ’ɔsɛ ti la ana to wuu to boi la to ma’a. (2 Tim. 3:1) Ge yɛla san daana tɔ, nɛreba boi n wan ta’an soŋɛ tɔ. Baabule la yeti zɔsonɔ wan ta’an soŋɛ tɔ “yɛla poan.”—Mag. 17:17.

Tuntuna Paul la a zɔdoma n yuun tuni satiŋa na’am yetɔɣum yalegerɛ tuuma la, ba yuun soŋɛ en mɛ sarɔtɔ zo’e zo’e poan. (Kol. 4:​7-11) Paul n yuun boi sarega Arom tiŋa poan la, a zɔdoma yuun soŋɛ en mɛ ti a tum tunse’a ti a yuun ka ta’an tum la. Makerɛ, mabiisi n boi Filipi yuun dekɛ la lɔɣɔrɔ bo ti Epaproditus dekɛ ta bo Paul. (Flp. 4:18) Tikikus me yuun tari la Paul gɔnɔ ta bo tansuga la. (Kol. 4:7) Paul zɔdoma yuun soŋɛ en mɛ ti a ta’an kpemese mabiisi la giila, la ka pakɛ la eŋa n yuun boi sarega la. Hon wan eŋɛ la wani ta’an dɛna zɔsonkɔ zina beere wa?

Mabiisi zo’e zo’e eŋɛ pa’alɛ ti zɔsonɔ sirum dela sɛba n wan ta’an soŋɛ tɔ zina beere wa. Makerɛ, Elisabet dela daarewoo sore ŋmɛ’adaana bɔna Spain. A tɔɣɛ pa’alɛ mabipɔka ayima n soŋɛ en se’em sansɛka ti a bɔna wuŋerɛ poan. Se’em ma’a ti bãyaalega yuun ŋmɛ Elisabet ma la, mabipɔka wa yuun ni dekɛ la Baabule gulesegɔ tɛɣesɛ en ti la kpemese a giila. Elisabet yeti, “Yelese’a ti a ni dekɛ tɛɣesɛ mam la basɛ ti mam puurɛ ni pee mɛ ti mam mina ti nɛra boi n fabeli n yele. Mam me ni nyɛ la paŋa ta’an tuna n tuuma dabeserɛ la poan.”—Mag. 18:24.

To wan ta’an basɛ ti tomam la to mabiisi zɔtɔ nyɔka la kpe’em to san soŋɛ ba ti ba ita yɛla ase’a tansugere la poan. Makerɛ, ho ta’an soŋɛ ba ti ba keŋɛ na’am mɔɔlegɔ bii zamesegɔ. Ho san ita bala, ya wan laɣum kpemese taaba giila. (Arom 1:12) Ge mabiisi basɛba kan ta’an yese yire keŋɛ zɛ’an. To wan eŋɛ la wani ta’an soŋɛ ba?

Bã’asi bii yɛla ase’a ta’an basɛ ti mabiisi basɛba kan ta’an kena Na’am Pu’usegɔ Deo. To geele ya David yele la bisɛ. Ɔ̃berega bã’a n yuun nyɔkɛ en. Ba yuun dekɛ la ŋmaresi n gani siyoobi tibɛ en. Sankaŋa la za’a, David la a pɔɣa Lidia yuun ni kɔnɛktɛ la fon poan eŋɛ zamesegɔ.

 Mabiisi n boi tansugere la poan yuun soŋɛ ba la wani? Zamesegɔ la san ba’asɛ, mabiisi la ni pu’usɛ David la Lidia mɛ videoconference poan. Leyɛ’ɛsa, David la Lidia san bo lebesego, mabiisi la ni gulesɛ la sɛla tɛɣesɛ ba ti la kpemese ba giila. Bala yuun soŋɛ David la Lidia la wani? La yuun basɛ ti ba baŋɛ ti mabiisi la nɔŋɛ ba mɛ ge ti ba me ka bɔna ba ma’a.

To wan eŋɛ la wani ta’an soŋɛ sɛba n kan ta’an keŋɛ na’am mɔɔlegɔ la? To wan ta’an eŋɛ maaseŋɔ naɛ la ba keŋɛ na’am mɔɔlegɔ ti la pa’alɛ ti to ka tamɛ ba yele. (Mag. 3:27) Ho ta’an kɔnɛktɛ ba fon poan ti ya eŋɛ na’am mɔɔlegɔ bii ho soŋɛ ba ti ba gulesɛ sɛla dekɛ mɔɔlɛ. Keendoma la ta’an soŋɛ sɛba n kan ta’an yese la ti ba kelese na’am mɔɔlegɔ sɔsega videoconference poan. David la Lidia puurɛ yuun pee mɛ la ba tansugere la n yuun eŋɛ maaseŋɔ wa la. David yeti, “Tomam ni san kɛlesa na’am mɔɔlegɔ sɔsega, la zusega la, la ni kpemese to giila mɛ paa.” Ho ta’an soke mabia n kan ta’an yese ti, la san makɛ bo en ho wan ta’an tari ho Baabule zamesegɔdaana kena a yire na ti ya zamesa.

To san naɛ la mabiisi sɛba n kan ta’an yese la sɔsera, to wan baŋɛ ba halesoma la ge me ana du’a du’a la ba. Makerɛ, ho san naɛ la ba bɔna na’am mɔɔlegɔ poan ge nyɛ ban ta’an mɔɔla se’em la, la wan basɛ ti ho suure malum kɛ̃ ba. Ho san soŋera mabiisi ti ya kena zamesegɔ la na’am mɔɔlegɔ, ho wan nyɛ zɔdoma zo’e zo’e.—2 Ko. 6:13.

Paul n yuun boi biɣi biɣi poan la, a puurɛ yuun pee mɛ la a zɔ Titus n yuun keŋɛ ta bisɛ en la. (2 Ko. 7:5-7) La ani soŋa ti to ni yele sɛla kpemese to mabiisi giila ge Titus makerɛ la pa’alɛ to ti to san naɛ la ba sɔsera ge me soŋera ba, ba puurɛ wan pee.—1 Yo. 3:18.

To mabiisi n boi Russia eŋɛ la makesonɛ pa’alɛ ton wan ta’an soŋera taaba se’em. To geele ya mabia Sergey la a pɔɣa Tatyana yele la bisɛ. Pulisi n yuun wa’ana saasɛ ba yire ge nyɔɣɛ ba keŋɛ. Ba yuun basɛ Tatyana mɛ ti a kule. Sergey yeti: “[Tatyana] n yuun paɛ yire la, mabipɔka ayima yuun wa’ana bisɛ en mɛ. La puɣum ka yue ge ti mabiisi zo’e zo’e me wa’ana soŋɛ ti ba malum maalɛ yire la.”

Sergey le yeti: “Mam kɔ’ɔn nɔŋɛ gulesegɔ la n boi Magaha 17:17 la mɛ. La yeti: ‘Zɔ dela se’em n tare nɔŋere saŋa woo, te sɔɔnrɔ mɛ soŋora taaba yɛla poan.’ Yaarɛ wa poan ti mam bɔkɛ gulesegɔ wa soŋa. Yehowa dekɛ la zɔdoma zo’e zo’e soŋɛ mam.”

Biɣi biɣi saŋa wa poan, to eeri la to zɔdoma soŋɛ tɔ. To wan kelum ɛɛra ba soŋerɛ mɛlesekãtɛ la poan. Bala la, basɛ ya ti to tara yelemɛŋɛrɛ bɔ’ɔra taaba nananawa!—1 Pe. 4:​7, 8.