ZASEŊƆ 4
Yehowa Ni Kã Bo To Mɛ To San Ni Tiregɛ Eŋɛ Tiirɛ Dia La
“Kɔ’ɔn ita ya wana la ya tɛra n yele.”—LU. 22:19.—NWT
YUUNƐ 19 The Lord’s Evening Meal
YELEKPINA a
1-2. Beni n sɔi ti to kena Tiirɛ Dia la yuunɛ woo?
LA PAƐ wuu yuun 2,000 n wana ti Yezu ki bo to, la wan eŋɛ se’em ti to ta’an nyɛ vom n ka tari ba’asegɔ. Yu’unseko ti Yezu yuun yeti a ki la, a yuun yele a podɔleba la ti ba tara boroboro la daam ita tiisa a kum la yele.—1 Ko. 11:23-26.
2 To nam Yezu nɔɔrɛ wa mɛ, se’ere n sɔi la to nɔŋɛ en mɛ paa. (Yon 14:15) Yuunɛ woo Tiirɛ Dia saŋa la poan, to ni eŋɛ pa’alɛ ti to puurɛ pee mɛ la to ni zusa ge ti’isa taɣesa a kum la n tari nyuurɔ se’em bɔ’ɔra to la. To ni pee la puurɛ tuna zɔ’ɔra na’am mɔɔlegɔ la poan ge bɛɛna nɛreba zo’e zo’e ti ba wa’an Tiirɛ Dia la na. To me ni kɔ’ɔn lu la to suure ti to kan basɛ ti sɛla gu to ti to kan keŋɛ Tiirɛ Dia la.
3. To wan sɔsɛ la bem zaseŋɔ wa poan?
3 Zaseŋɔ wa poan, to wan bisɛ Yehowa yamesi n mɔ se’em yɛla atã poan ta’an tiɛ Yezu kum la. Yɛla atã wa dela: (1) To iti Tiirɛ Dia la wuu Yezu n yuun eŋɛ de se’em la, (2) to ni beem la nɛreba ti ba wa’an Tiirɛ Dia la na, (3) to iti Tiirɛ Dia la mɛ hali la san puɣum kpe’em bo to.
TO TIISERI YEZU KUM LA WUU EŊA N YUUN EŊƐ DE SE’EM LA
4. Bem yɛla ti to ni zamesɛ yuunɛ woo Tiirɛ Dia la poan ge beni n sɔi ti la ka nara ti to bisɛ yele ana wa yoo? (Luke 22:19, 20)
4 Yuunɛ woo Tiirɛ Dia la, to ni kelese la Baabule yetɔɣum n basɛ ti to baŋera sokese’a n pakɛ to la lebesego. To ni baŋɛ sɛla n sɔi ti asaala ɛɛra lua bunɔ, la nɛreyiŋa ma’a kum n wan ta’an faaɛ nɛreba zo’e zo’e be’em basɛ se’em. To ni le baŋɛ boroboro la daam la n ze’ele bo sɛla, la sɛba n nari ti ba obe boroboro la ge nyu daam la. (Kaalɛ Luke 22:19, 20.) To me ni ti’isɛ la sɛba n tari puti’irɛ ti ba wan ta bɔna tinparɛ wa zuo daarewoo la n wan nyɛ kã’a se’em. (Isa. 35:5, 6; 65:17, 21-23) La ka nari ti to bisɛ yele ana wa yoo. Nɛreba zo’e zo’e ka bɔkɛ yele ana wa. Ba me ka mi Yezu lua bunɔ la n tari nyuurɔ se’em. Ba me ka iti Yezu Kum Tiirɛ la wuu eŋa n yuun eŋɛ de se’em la. Beni n ta’asɛ bala?
5. Yezu podɔleba zo’e zo’e n yuun ki la, nɛreba yuun tiiseri Yezu kum la wani?
5 Yezu podɔleba zo’e zo’e n yuun ki la, pumpɔreŋɔ Kristakɔma yuun nigum kɛ̃ tansugere la poan mɛ. (Mt. 13:24-27, 37-39) Ba yuun ‘tɔɣeri la pumpɔreŋɔ yɛla ti ba ve’e podɔleba la ti ba pa ba poore.’ (Tm. 20:29, 30) ‘Pumpɔreŋɔ yɛla’ ase’a ti pumpɔreŋɔ Kristakɔma pa’ala dela, Yezu ka ki ‘buyina duuse nɛreba zo’e zo’e be’em basɛ’ wuu Baabule la n yele se’em la ge la nari ti a kiira taɣesa. (Heb. 9:27, 28) Zina beere wa, nɛreba zo’e zo’e sakɛ pumpɔreŋɔ pa’alegɔ wa mɛ. Ba ni kena church la bakwai woo bii daarewoo tiisa Yezu kum la, ti ba ni yi’ira ti, “the Sacrifice of the Mass.” b Pu’usegɔdoma basɛba ka tiiseri Yezu kum la tabela bala. Ba nɛreba la me ka bɔkɛ Yezu kum la n tari nyuurɔ se’em. Sɛba ta’an ti’isa ti, ‘Yezu kum la wan ta’an basɛ ti mam nyɛ n be’em sugeri dia?’ Beni n sɔi ti ba sɔkera bala? Sɛla n sɔi la nɛreba basɛba n ni pã’asɛ ba ti, Yezu kum la kan ta’an basɛ ti ba nyɛ ba be’em sugeri dia. Yezu yelemɛŋɛrɛ podɔleba la soŋɛ nɛreba ti ba bɔkɛ yele wa la wani?
6. Yuun 1872 poan, Baabule zamesegɔdoma la yuun bɔkɛ la bem yele?
6 Yuun kɔbesɛka n pa’asɛ 19 poan la, Charles Taze Russell la Baabule zamesegɔdoma basɛba yuun mɔ’ɛ la nini viisɛ Gulesegɔ la. Ba yuun boti la ba baŋɛ Yezu kum la n tari nyuurɔ se’em, la ban nari ti ba tiisa a kum la se’em. Yuun 1872 poan, ba yuun bɔkɛ Baabule la poan ti, Yezu ki bo la asaala woo. Ba yuun ka baŋɛ yele ana wa ge kɔ’ɔn sina. Ba yuun doose la gɔnɔ poan, lasebaarɛ gɔnɔ la magazinedoma poan basɛ ti yelesum la paɛ nɛreba. Ba yuun tɔɣeseri la yuun kɔbesɛka n deŋɛ nɛŋa Kristakɔma la, nyaa ni laɣesɛ taaba buyina yuunɛ woo poan Tiisera Yezu kum la.
7. Baabule zamesegɔdoma la n yuun viisɛ nyɛ sɛla la, soŋeri to la wani?
7 Kristakɔma wa n yuun viisɛ nyɛ yelese’a yuuma zo’e zo’e n tole la, kelum soŋera tomam mɛ zina beere wa. Sodeni poan? Yehowa soŋɛ tɔ ti to bɔkɛ Yezu kum la n tari nyuurɔ bɔ’ɔra asaala woo se’em mɛ. (1 Yo. 2:1, 2) To me le zamesɛ Baabule la poan baŋɛ ti basɛba wan ta bɔna saazuo kan malum ki ti zo’e zo’e me bɔna tinparɛ wa zuo vɔna daarewoo. To san gɛɛla Yehowa n nɔŋɛ to se’em, la Yezu kum la n tari nyuurɔ bɔ’ɔra to se’em, la ni basɛ ti to ana la du’a du’a la Yehowa. (1 Pe. 3:18; 1 Yo. 4:9) Bala la, wuu to mabiisi la n yuun eŋɛ se’em la, to me ni beem la nɛreba ti ba naɛ la tɔ ti to Tiɛ Yezu kum la wuu eŋa n yuun eŋɛ de se’em la.
TO NI BEEM LA NƐREBA TI BA WA’AN TIIRƐ DIA LA NA
Hon wan eŋɛ la wani ta’an laɣum tɔ̃rɛ Tiirɛ Dia beeŋo gɔnɔ la? (Bisɛ kaalegɔ zɛ’an 8-10) e
8. Yehowa yamesi eŋɛ la bem ta’an bɛɛna nɛreba ti ba ni wa’ana ti to Tiɛ Yezu kum la? (Bisɛ foote la.)
8 Yehowa yamesi puɣum bɛɛna la nɛreba wunse’eren sa ti ba laɣum Tiisa Yezu kum la. Yuun 1881 pɔsega poan, mabiisi n boi United States yuun laɣesɛ la nɛra yire Allegheny, Pennsylvania tiŋa, Tiɛ Yezu kum la. Pooren, tansugere woo n nyaa ni maasum bamea Tiisa Yezu kum la. March 1940 poan, ba yuun yele na’am mɔɔlegɔdoma yeti, ba ta’an beem nɛra woo n boi ba gingilega la poan ti ba laɣum wa’ana. Yuun 1960 poan ti Betel pɔsɛ maala beeŋo gɔnɔ bɔ’ɔra tansuga la. Kɔ’ɔn pɔsɛ sankaŋa la, Tiirɛ Dia beeŋo gɔnɔ tusetusa tusa ti to dekɛ bo. Beni n sɔi ti to ita ania bɛɛna nɛreba bala?
9-10. Bani n nyɛti nyuurɔ la ton iti ania bɛɛna nɛreba ti ba wa’an Tiirɛ Dia na la? (Yon 3:16)
9 Sɛla n sɔi ti to ni beem nɛreba ti ba wa’ana naɛ la tɔ ti to Tiɛ Yezu kum la dela, to boti la saama la zamesɛ baŋɛ Yehowa la Yezu n eŋɛ sɛla bo to za’a waabi. (Kaalɛ Yon 3:16.) To tari puti’irɛ ti, ban wan nyɛ sɛla ge wum sɛla Tiirɛ Dia la poan la wan kpemese ba giila ti ba bɔta ti ba zamesɛ pa’asɛ, ta’an dɛna Yehowa yamesi. Ge nɛreba basɛba me nyɛti nyuurɔ mɛ.
10 To me ni beem sɛba n ka le pu’usa Yehowa la mɛ. To iti bala tiisa ba ti, Naayinɛ kelum nɔŋɛ ba mɛ. Ba zo’e zo’e ni wa’an me na. To puurɛ ni pee mɛ la ton ni nyɛ ba la. Ban ni wa’an Tiirɛ Dia na la, la ni tiɛ ba la ban yuun pu’useri Yehowa ge tara pupeelum se’em. To geele Monica yele wa bisɛ. c COVID-19 bã’a la poan, ti a yuun le pɔsɛ na’am mɔɔlegɔ. Eŋa n yuun keŋɛ 2021 Tiirɛ Dia la, a yuun yeti: “Yuunɛ wa Tiirɛ Dia la dela dabese’ere n boi de to’ore bɔ’ɔra mam. Yuun 20 n tole ge ti mam nyaa ta’an tɔɣɛ bo nɛreba ge beem ba ti ba wa’an Tiirɛ Dia la na. Mam kɔ’ɔn mɔ’ɛ la nini beem nɛreba, se’ere n sɔi la mam puurɛ pee mɛ la Yehowa la Yezu n eŋɛ sɛla bo mam la.” (Ym. 103:1-4) To ni kɔ’ɔn mɔ’ɛ la nini bɛɛna nɛreba. Ba wa’ana woo, ba ka wa’ana woo, to mi ti Yehowa puurɛ pee mɛ la ton iti ania la.
11. Yehowa kã bo to la wani, la ton iti ania bɛɛna nɛreba ti ba wa’an Tiirɛ Dia na la? (Hagai 2:7)
11 Yehowa kã bo to mɛ la ton iti ania bɛɛna nɛreba ti ba wa’an Tiirɛ Dia na la. Yuun 2021 poan, hali la COVID-19 bã’a la n yuun wi’iri la, nɛreba 21,367,603 n yuun wa’an Tiirɛ Dia la na. Wana wa wɔ̃ni ti la dela Yehowa Sɛɛradoma kãlɛ tingɔŋɔ wa za’a sugumnɔɔrɛ buyi la girego! La daɣɛ nɛreba la n zo’e se’em la yele n pakɛ Yehowa ge tomam ayima ayima woo yele pakɛ en mɛ. (Lu. 15:7; 1 Tim. 2:3, 4) To mi ti Yehowa ni doose la to beeŋo la poan basɛ ti to nyɛta putɛsonɛdoma la.—Kaalɛ Hagai 2:7.
TO ITI TIIRƐ DIA LA MƐ HALI LA SAN PUƔUM KPE’EM BO TO
Yehowa ni kã bo to mɛ to san ni tiregɛ ti to eŋɛ Tiirɛ Dia la (Bisɛ kaalegɔ zɛ’an 12) f
12. Bem yɛla n wan ta’an basɛ ti la kpe’em bo to ti to Tiɛ Yezu kum la? (Bisɛ foote la.)
12 Yezu tɔɣɛ biŋe ti ba’asegɔ dabesa la poan, la wan kpe’em bo to. La ta’an dɛna giisegɔ, yaarɛ, zaberɛ, bã’a n wi’iri la yɛla ase’a. (Mt. 10:36; Mr. 13:9; Lu. 21:10, 11) Saŋa ase’a, yele ana ta’an basɛ ti la kpe’em bo to ti to tiɛ Yezu kum la. To mabiisi eŋɛ la bem yele ana poan ge Yehowa soŋɛ ba la wani?
13. Yehowa yuun kã bo Artem la wani la eŋa n yuun dekɛ sukpe’ene eŋɛ Tiirɛ Dia sarega poan la?
13 Ba san paɣɛ tɔ. To mabisɛba ti ba paɣɛ ba, ba sakerɛ zuo la ni mɔ mɛ tiɛ Yezu kum la. Geele Artem yele la bisɛ. Yuun 2020 Tiirɛ Dia saŋa la, ba yuun paɣɛ en la sarega mika poan la nɛreba basɛba. Ge a yuun kelum nyɛ boroboro la daam ti a wan dekɛ eŋɛ Tiirɛ Dia la. A yuun maasum mɛ ti a bo Tiirɛ Dia yetɔɣum la. Sɛba n yuun boi la en sarega la poan la yuun nyuuri la sigaari ge me tɔɣera yetɔɣepɔ̃’ɔsa. A yuun eŋɛ la bem? A yuun belum ba ti ba su’use ba sigaari nyua, la yetɔɣepɔ̃’ɔsa la paɛ awa ayima. La yuun eŋɛ Artem la pakerɛ la ban yuun sakɛ ti ba kan nyu sigaari bii tɔɣɛ yetɔɣepɔ̃’ɔsa Tiirɛ Dia saŋa la. Artem yeti, “mam yuun boti la n tɔɣɛ Tiirɛ Dia la yele bo ba.” Ba yuun yeti bamam ka boti ba wum Tiirɛ Dia la yele. Ge ban yuun nyɛ Artem n eŋɛ Tiirɛ Dia la se’em la, ba yuun soke en la yɛla zo’e zo’e.
14. To yuun eŋɛ ania la wani Tiɛ Yezu kum la, hali la COVID-19 bã’a la poan?
14 COVID-19 bã’a la poan. Bã’a wa n yuun wi’iri la, Yehowa yamesi yuun ka ta’an laɣesɛ taaba eŋɛ Tiirɛ Dia la. Ge bala yuun ka gu ti ba ka ta’an eŋɛ Tiirɛ Dia la. d Tansuga se’a n tari intanɛt la yuun eŋɛ Tiirɛ Dia la videoconference poan. Ge mabiisi la zo’e zo’e n ka tari intanɛt la? Tisi sise’esi poan, ba yuun maasum mɛ bo yetɔɣum la TV bii walesi poan. Leyɛ’ɛsa, tigere yila yuun rekɔɔdɛ yetɔɣum wa mɛ ti la bɔna jw.org poan gaŋɛ yetɔɣum 500 hali ti sɛba n boi kinkɛlesi ta’an dekɛ eŋɛ Tiirɛ Dia la. Mabiisi n ni ve’e yetɔɣum wa tari ta bo sɛba n ka tari la.
15. Hon zamesɛ la bem Sue yele la poan?
15 Giisegɔ poan. Giisegɔ ni basɛ ti la kpe’em bo basɛba mɛ ti ba keŋɛ Tiirɛ Dia la. Geele Baabule zamesegɔdaana yu’urɛ n de Sue yele la bisɛ. Yuun 2021 poan, lan yuun ta gee dabeserɛ la Tiirɛ Dia la paɛ la, Sue yuun yele a Baabule pa’alegɔdaana la yeti, a yire nɛreba n giiseri en la zuo, eŋa kan ta’an wa’an Tiirɛ Dia la na. A Baabule pa’alegɔdaana la yuun kaalɛ la Luke 22:44. A yuun pa’alɛ Sue ti la san ni kpe’em bo to, to nari ti to tɔɣesɛ Yezu, zusɛ Yehowa ge dekɛ tomea delum en. Yiimbeere, Sue yuun maasum boroboro la daam la mɛ ge bisɛ Bulika Pu’usegɔ n boi de to’ore la jw.org poan. Dedaarɛ zaanɔɔrɛ, a yuun boi la a bɔ’ɔ ge kɛlesa Tiirɛ Dia yetɔɣum la fon poan. Pooren, Sue yuun gulesɛ bo a Baabule pa’alegɔdaana la yeti: “Ho zaam kpemese mam giila mɛ paa. Mam tiregɛ eŋɛ sɛla woo mɛ, ti Yehowa me soŋɛ mam ti n ta’an kelese Tiirɛ Dia yetɔɣum la. Mam kan ta’an pa’alɛ mam puurɛ n pee se’em!” Ho san bɔna Sue bɔŋa wa poan, hon ti’isɛ ti Yehowa wan ta’an soŋɛ hɔ?
16. Beni n sɔi ti to tara suure lua ti Yehowa wan kã bo to, la ton tiregeri ita Tiirɛ Dia la? (Arom 8:31, 32)
16 Yehowa puurɛ ni pee mɛ la to ni ita ania se’em ti to tiɛ Yezu kum la. To mi ti a wan kã bo to, la ton iti pa’ala ti to puurɛ pee mɛ la sɛla ti a eŋɛ bo to la. (Kaalɛ Arom 8:31, 32.) Basɛ ya ti to lu ya to suure ti to wan keŋɛ yuunɛ wa Tiirɛ Dia la ge me ta’an tum zo’e na’am mɔɔlegɔ poan Tiirɛ Dia saŋa la.
YUUNƐ 18 Grateful for the Ransom
a Atalatadaarɛ April 4, 2023, nɛreba zo’e zo’e n boi tingɔŋɔ wa poan wan tiɛ Krista kum la. La wan dɛna la nɛreba zo’e zo’e yia dabeserɛ n bala. Sɛba n yuun pu’useri Yehowa ge nyaa ma’ɛ la wan laɣum bɔna la tɔ dadendaarɛ. La wan kpe’em bo nɛreba basɛba ti ba wa’ana ge ba wan kelum wa’ana. Ho bɔŋa la san puɣum ana la se’em me, mina ti Yehowa puurɛ wan pee, ho san tiregɛ wa’ana.
b Pu’usegɔdoma la sakɛ ti boroboro la daam la ni sirum lebege la Krista inya la a ziim la. Ba ti’isɛ ti nɛra san obe boroboro la ge nyu daam la, la pa’alɛ ti Yezu le ki mɛ n bala.
c Ba tee yu’ura ase’a mɛ.
d Le bisɛ “2021 Memorial Commemoration” n boi jw.org poan la.
