1-2. Bem “toonsonɛ” ti keendoma tuna?

 HO SAN dɛna keendoma soŋeredaana, daanse’ere ho tiregɛ tara la halese’a n wan soŋɛ hɔ ti ho ta’an ta dɛna keema. Ho wan bɔta ti ho ta dɛna keema ge ta’an soŋera ho mabiisi la?—1 Tim. 3:1.

² Keema tuuma dela bem? A tulegeri mɛ tuna na’am mɔɔlegɔ tuuma. A kaari mabiisi la bisera mɛ ge pa’ala ba. A me doli la a yetɔɣum, la a itigɔ poan kpɛmesa mabiisi la giila. Yele ana n sɔi ti Baabule la yeti keendoma dela “bo’olom.”—Ep. 4:8.

3. Mabiburaa wan eŋɛ la wani ta’an nyɛ yɔ’ɔ ta dɛna keema? (1 Timoti 3:​1-7; Titus 1:​5-9)

³ Ho wan eŋɛ la wani ta’an nyɛ yɔ’ɔ ta dɛna keema? La daɣɛ nɛra n mi tuuma ma’a n wan ta’an basɛ ti a ta dɛna keema. Tingɔŋɔ wa poan ho san mina tuuma, ho kpɛ’ɛma ta’an bo ho yɔ’ɔ ti ho tum tuunɛ la. Ge ho san bɔta ti ho nyɛ yɔ’ɔ ta dɛna keema, la yeen daɣɛ la ho tana mɔɔla bii pa’ala. La nari ti ho tara halese’a ti Baabule la pa’alɛ ti keendoma nari ti ba tara, ti la bɔna 1 Timoti 3:​1-7 la Titus 1:​5-9. (Kaalɛ.) To wan sɔsɛ hala ase’a n boi kaalegɔ zɛ’ɛsi wa poan. To me wan sɔsɛ mabiburaa n wan eŋɛ se’em ta’an tara yusonɛ, dɛna deo zuodaana n biseri a deodoma soŋa, la sɛla n wan soŋɛ en ti a bɔta ti a soŋera tansugere la.

TARA YUSONƐ

4. La vuurɛ dela bem ti ho da dɛna nɛresɛka ti nɛreba wan “zɛrɛgɛ” en?

⁴ Ho san bɔta ti ho ta dɛna keema, la ka nari ti ho “eŋɛ sɛla ti nɛreba zɛrɛgɛ” hɔ. Bala pa’alɛ ti ho tara yusonɛ tansugere  la poan. Se’em me kan ta’an yeti ho tari la halebe’ero. Ho nari ti ho tara “eteseko te nɛresɛba n ka dole Yesu sore la tɔgɛ tɔgɔsomɔ [ho] yele.” Ge la ka nari ti ho eŋɛ sɛla n wan basɛ ti ba ti’isa ti ho daɣɛ nɛresonkɔ. Sɛba n daɣɛ mabiisi ta’an giisera tɔ la ton sakɛ bo yelese’a la. Ge la ka nari ti to eŋɛ sɛla ti la pa’alɛ ti to ka tari yelemɛŋɛrɛ bii to ka tari halɛ. (Da. 6:​4, 5) Soke homea yeti, ‘Mabiisi la sɛba n daɣɛ mabiisi mi ti mam dela nɛresonkɔ?’

5. Mabia nari ti a ita la bem ti la pa’alɛ ti a “nɔŋɛ sɛla n an soŋa”?

⁵ Ho san “nɔŋɛ sɛla n an soŋa,” bala pa’alɛ ti ho biseri la nɛreba itisoŋɔ ge pɛ̃ɣera ba, la ba halesoma la. Ho puurɛ me ni pee mɛ ti ho ita som bɔ’ɔra nɛreba, hali la yelese’a ti nɛreba ka ti’isa ti la nari ti ho eŋɛ. (1 Tes. 2:8) Beni n sɔi ti la yele pakɛ ti keendoma ita som bɔ’ɔra nɛreba? Sɛla n sɔi la bala wan basɛ ti ba kaara mabiisi la bisera ge tuna ba tuuma la pupeelum. (1 Pe. 5:​1-3) La boi bim ti bala ta’an basɛ ti keendoma la tuuma zo’e ge ban tuni bɔ’ɔra mabiisi la basɛ ti ba tara la pupeelum.—Tm. 20:35.

6. Nɛra wan ita la bem ti la pa’alɛ ti a “[to’ose] saama soŋa soŋa”? (Hebru 13:​2, 16; bisɛ foote la.)

⁶ Sɛla n wan pa’alɛ ti ho nɔŋɛ ti ho “tɔ’ɔha saama soŋa soŋa” dela hon wan ita som bɔ’ɔra nɛreba, hali la sɛba n daɣɛ ho zɔdoma. (1 Pe. 4:9) Gɔŋɔ kuyima n pa’alɛ buraa n nɔŋɛ a tɔ’ɔsa saama se’em n wana: “A iti la som hali bɔ’ɔra nɛreba ti a ka mina ge ni pee puurɛ beem nɛreba ti ba wa’an a yire na.” Soke homea yeti, ‘Mabiisi mi ti mam dela nɛresɛka n nɔŋɛ n ita som bɔ’ɔra saama?’ (Kaalɛ Hebru 13:2, 16.) Buraa n nɔŋɛ a tɔ’ɔsa saama iti la som bɔ’ɔra nasedoma, la mabiisi sɛba n ni wa’an ba tansugere poan na bo yetɔɣum. A me kelum ita som bɔ’ɔra mabiisi sɛba woo n muuri kpɛmesa a mabiisi giila, maɣesɛ wuu gingilega kaarɛ bisegadoma.—Pin. 18:​2-8; Mag. 3:27; Lu. 14:​13, 14; Tm. 16:15; Arom 12:13.

7. Keema wan eŋɛ la bem pa’alɛ ti a ka “nɔŋɛ ligiri”?

⁷ “A da nɔŋɛ ligiri.” Bala vuurɛ dela ho da basɛ ti ligeri la lɔɣɔrɔ dɛna yelese’a n ba’ɛ pakɛ hɔ. Ho dela buntata bii nasa woo, la dela ho basɛ ti Yehowa pu’usegɔ  dɛna yia ho vom poan. (Mt. 6:33) Ho tari la ho saŋa, ho paŋa, la sɛla woo ti ho tara pu’usa Yehowa, bisera ho deodoma ge me tuna bɔ’ɔra tansugere la. (Mt. 6:24; 1 Yo. 2:​15-17) Soke homea yeti: ‘Mam geele ligeri la wani? Mam basɛ ti mam n tari lɔɣɔse’a la seke mam? Bii mam puti’irɛ kɔ’ɔn bɔna la n nyɛ ligeri la lɔɣɔrɔ zo’e zo’e?’—1 Tim. 6:​6, 17-19.

8. Nɛra n iti a yɛla ti la ‘makera ma’a’ ge me ‘nyɔkera amea’ vuurɛ?

⁸ Ho san “dɛna nɛremama” ge tara ‘nyɔkɛ n mea,’ la pa’alɛ ti ho iti ho yɛla makera mɛ. Makerɛ, ho ka diti zɔ’ɔra bii nyuura zɔ’ɔra. Ho me yɛɛri ho lɔɣɔrɔ mɛ ge maala homea ti la makɛ ma’a. Ho me ni loe la de’eŋo seto n nari. Ho daɣɛ mina n tɔɣeseri tingɔŋɔ wa nɛreba n vɔi ba vom se’em la. (Lu. 21:34; Yam. 4:4) Ho ka gbiti, ho ni ma’ɛ la homea, hali nɛreba san puɣum eŋɛ ho sɛla ti ho sunsɔa nyie. Ho daɣɛ “daambugura,” ho me daɣɛ se’em ti nɛreba mina ti ho nɔŋɛ la daam. Soke homea yeti, ‘Mam n vɔi n vom se’em la pa’alɛ ti mam iti n yɛla ti la makera ma’a ge me nyɔkera n mea?’

9. Ho wan ita la bem ti la pa’alɛ ti ho tari ‘putɛsonɛ’ ge me “tara zuo”?

⁹ Ho san tara ‘putɛsonɛ,’ ho ni ti’isɛ bisɛ la Baabule la n yele sɛla ge nyaa geele bisɛ hon wan eŋɛ se’em yele poan. Ho ni ti’isɛ bisɛ la hon wan ta’an dekɛ Baabule ka’aŋɔ tum tuuma se’em. Bala ni soŋɛ ho mɛ ti ho bɔkɛ yɛla soŋa ge nyaa kɔ’ɛ ho puti’irɛ. Ho ka iti kãbi kãbi. Ho ni tuɣum ma’ɛ la homea geele yelese’a woo n nari ti ho mina. (Mag. 18:13) Bala ni soŋɛ ho mɛ ti ho kɔ’ɛ ho puti’irɛ ti la makɛ la Yehowa n boti sɛla. Ho san “tara zuo,” ho iti ho yɛla woo la ma’a ma’a ge me tara ho saŋa tuna tuuma. La nari ti nɛreba mina ti ho doli pa’alegɔ ge ti ba me wan ta’an dekɛ bamea delum ho. Ho san tara hala ana wa, la wan soŋɛ hɔ ti ho tara yusonɛ. Basɛ ya ti to sɔsɛ ya halese’a ti Baabule la pa’alɛ ti keema nari ti a tara ta’an dɛna deo zuodaana n tari makesonɛ.

BISA HO DEODOMA SOŊA SOŊA SƐLA WOO POAN

10. Buraa wan eŋɛ la wani “tana beha a mea yire soŋa”?

¹⁰ Ho san tara pɔɣa ge bɔta ti ho ta dɛna keema, la nari ti ho deodoma me tara yusonɛ. Bala la, la nari ti ho “tana beha [homea] yire soŋa.” Nɛreba nari ti ba mina ti ho dela deo zuodaana n tari nɔŋerɛ ge me bisera ho deodoma soŋa. Bala pa’alɛ ti ho ita deodoma pu’usegɔ, soŋera ho deodoma ti ba kena na’am mɔɔlegɔ la zamesegɔ soŋa soŋa. Beni n sɔi ti la yele pakɛ ti ho ita bala? Tuntuna Paul yuun yeti: “Nɛra han ka ta’an beha a mɛŋa yire a kan ta’an behɛ Yenɛ lagaŋɔ.”—1 Tim. 3:5.

11-12. Mabiburaa san bɔta ti a ta dɛna keema, beni n sɔi ti la yele pakɛ ti a bisa a kɔma n vɔi ba vom se’em? (Bisɛ foote la.)

¹¹ Ho san dɛna sɔ ge tara kɔma n ka paɛ yuun 18, la nari ti ba “nana [hɔ] ge bɔ’ɔra na’ahegɔ.” La nari ti ho pa’ala ba ge kumesa ba nɔŋerɛ sore poan. Ho wan bɔta ti ho kɔma tara pupeelum, la’ara ge dɛ’ɛna wuu kɔma woo n iti se’em la. Ge la me nari ti ho pa’ala ba ti ba nana nɛreba, bɔ’ɔra gilema ge me tara halesoma. Leyɛ’ɛsa, la nari ti ho tiregɛ soŋɛ ho kɔma la ti ba tara bɔnsoŋa la Yehowa, tara Baabule naresum yɛla tuna tuuma ge tiregera ti ba ta muse ko’om.

¹² A “kɔma me de’a sɛba n sakɛ bo Yesu ge te nɛreba mina te a kɔma la dagɛ kɔmyaalehe, bii ba ka [nani].” Bia san bɔna yire la poan dɛna mabia ge tum be’em,  bala ta’an tee a sɔ vom la wani? La san dɛna la sɔ la n ka kumesɛ bia la bii pa’alɛ en soŋa, daanse’ere a kan nyɛ yɔ’ɔ ta dɛna keema.—Kaalɛ October 15, 1996 The Watchtower, gɔn. 21, kz. 6-7.

BISA TANSUGERE LA SOŊA

13. Nɛra wan ita la bem ti la pa’alɛ ti a ani “baanlam” ge ka “zɛnkera a mea”?

¹³ Mabiburaasi sɛba n tari halesoma la soŋeri tansugere la mɛ paa. Nɛra n ani “baanlam” basɛ ti suma’asum n bɔna. Ho san bɔta ti nɛreba mina ti ho ani la baalam, ho nari ti ho kɛlesa nɛreba soŋa soŋa ge bɔkera ba puti’irɛ. Makerɛ, ya san sɔsera sɛla ti ho keendoma tadaandoma la zo’e zo’e sakɛ, ti la me ka giisɛ Baabule naresum yele ge ti hon ka sakɛ, ho wan doose ba puti’irɛ la? Nɛra san ka “zɛnkera a mea” la pa’alɛ ti a ka pɛ̃regeri ti nɛreba ita eŋa n boti sɛla. La yele pakɛ mɛ ti ho baŋɛ basɛba puti’irɛ n de sɛla. (Pin. 13:​8, 9; Mag. 15:22) La ka nari ti ho ‘nɔŋɛ nɔkpe’ene’ bii ho “suunre ihegera tɔtɔ tɔtɔ.” Bala pa’alɛ ti ho da kɛsera nɛreba bii ŋmɛ̃’ɛra nɔkpe’ene la ba. Ho ana mama ge me mina guŋerɛ. Hon boti suma’asum la zuo, ho ni tiregɛ mɛ basɛ ti suma’asum bɔna, hali yɛla san ka kena soŋa. (Yam. 3:​17, 18) Mina guŋerɛ. Bala ta’an ma’ɛ basɛba sunsɔa.—Ken. 8:​1-3; Mag. 20:3; 25:15; Mt. 5:​23, 24.

14. La vuurɛ dela bem ti mabiburaa “da dɛna se’em n nan doohe Yesu sore te la ka yue” ge me “bɔna bo Yenɛ ma’an”?

¹⁴ Mabiburaa san nyɛ yɔ’ɔ ti a ta dɛna keema, “a da dɛna se’em n nan doohe Yesu sore te la ka yue.” La ka pa’alɛ ti ho nari ti ho muse ko’om ti la ba’ɛ yue. Ge la nari ti la yue fii wa, lan wan eŋɛ se’em ti hon la Yehowa bɔŋa la ta’an kpe’em ge ti ho me kãsegɛ vo’osum poan. Ge ti ba nyaa loe ho ti ho dɛna keema la, la nari ti ho tɔɣesa Yezu, siregera homea ge gura Yehowa ti a bo ho tuuma sansɛka n nari poan. (Mt. 20:23; Flp. 2:​5-8) Eŋɛ pa’alɛ ti ho  dela “se’em n wan bɔna bo Yenɛ ma’an.” Bala pa’alɛ ti ho ana tapi lapi la Yehowa, ita sɛla ti a bɔta ge me dɔla a tigere la n pa’ali to sɛla la.—1 Tim. 4:15.

15. Keendoma la woo nari ti ba ba’ɛ mina yetɔɣum bɔ’a? Tɔɣɛ pa’alɛ.

¹⁵ Baabule la basɛ ti la niɛ peelumi ti keendoma nari ti ba “pa’ala nɛreba soŋa.” Bala pa’alɛ ti la nari ti ho ba’ɛ mina yetɔɣum bɔ’a? Aayi. La boi bim bim ti la daɣɛ keendoma za’a n ba’ɛ mina yetɔɣum bɔ’a. Ge ba san mɔɔla bɔ’ɔra nɛreba, bii ba keŋɛ ti ba ta kaɛ la mabia bisɛ, ba ni dekɛ la Baabule la pa’alɛ ba ti la kɛ̃’ɛra suure. (Dekɛ makɛ 1 Korint 12:​28, 29 la Epesus 4:11.) Hali la bala za’a, la nari ti ho tiregɛ ta’an kumesɛ homea ge me pa’ala soŋa soŋa. Ho wan eŋɛ la wani pa’ala ti la kɛ̃’ɛra suure?

16. Ho wan eŋɛ la wani ta’an pa’ala soŋa soŋa? (Bisɛ foote la.)

¹⁶ “Gorɛ yelesoma la te nɛreba wan ta’an nam la . . . kaŋkaŋɛ.” Ho san bɔta ti ho pa’ala soŋa soŋa, hon pa’ali bii ka’ana nɛreba sɛla la nari ti la ze’ele Baabule la poan. Zamesa Baabule la, la tansugere gɔnɔ soŋa soŋa. (Mag. 15:28; 16:23) Ho san zamesa, ni bisa to tansugere gɔnɔ la n pa’alɛ Baabule kaalegɔ zɛ’ɛsi la vuurɛ se’em, lan wan eŋɛ se’em ti ho mina hon wan dekɛ a tum tuuma se’em. Ho san pa’ala nɛreba, ni tiregɛ ti ho kpemese ba giila ti yele la ta’an kɛ̃ ba suure. Ho san bɔta ti ho pa’ala soŋa soŋa, ni soke keendoma sɛba n mi pa’alegɔ ti ba soŋɛ hɔ. (1 Tim. 5:17) Keendoma nari ti ba ta’an kpemese’ ba mabiisi giila. Ge saŋa ase’a, keendoma nari ti ba kaɛ ba mabiisi la bii ba soŋɛ ba ti ba ‘baŋɛ sɛla ti ba tue.’ Lan yeen dɛna se’em, la nari ti keendoma tɔɣera la gilema. Ho san dɛna nɛra n ani mama, tara nɔŋerɛ ge basɛ ti ho pa’alegɔ ze’ele Baabule la poan, ho wan ta’an pa’ala soŋa soŋa. Ho san ita bala, la pa’ali ti ho tɔɣeseri la Yezu n de Pa’alegɔ Kãtɛdaana la.—Mt. 11:​28-30; 2 Tim. 2:24.

 KƆ’ƆN TIREGERA

17. (a) Bem n wan soŋɛ keendoma soŋeredoma ti ba kɔ’ɔn tiregera ta’an nyɛ yɔ’ɔ ta dɛna keendoma? (b) Bem n nari ti keendoma tɛ̃ra ba san ti’isa ti ba loe mabiburaa ti a ta dɛna keema? (Bisɛ daka la zuo n de “ Ya San Ti’isa Ti Ya Loe Mabiisi, Tari Ya Sirege N Mea.”)

¹⁷ Keendoma soŋeredoma ta’an ti’isɛ ti bamam kan ta’an dɛna keendoma, se’ere n sɔi la hala zo’e zo’e n boi ti la nara ti ba tara. Ge tɛ̃ra ti Yehowa bii a tigere la ka ti’isɛ ti la nari ti ho di mi’a. (1 Pe. 2:21) La dela Yehowa vo’osum la n wan ta’an soŋɛ hɔ ti ho tara hala wa. (Flp. 2:13) Halɛ kani ti hon bisɛ ti la nari ti ho tiregɛ tara de tuna soŋa soŋa? Zusɛ Yehowa ti a soŋɛ hɔ ti ho ta’an tara dɛ. Eŋɛ viisegɔ ge yele keema ti a soŋɔ hɔ ti ho baŋɛ hon wan eŋɛ se’em ta’an tara dɛ.

18. Ba kpemese keendoma soŋeredoma giila ti ba eŋɛ la bem?

¹⁸ Basɛ ya ti to za’a waabi, hali la keendoma, kɔ’ɔn tiregɛ ti to wan tara halese’a ti to sɔsɛ de yele zaseŋɔ wa poan la tuna tuuma. (Flp. 3:16) Hon dela keendoma soŋeredaana? Kɔ’ɔn tiregera nyɛta nɛŋa tɔlega! Zusɛ Yehowa ti a kumesɛ hɔ ti ho ta’an pu’usa en soŋa soŋa ge me soŋera ho mabiisi la. (Isa. 64:8) Yehowa wan soŋɛ hɔ la hon tiregeri ti ho nyɛ yɔ’ɔ ta dɛna keema la.