1-2. (a) Gɔmɛtidoma basɛba iti Yehowa nɛreba la bem ge Naayinɛ nɛreba ni eŋɛ la wani? (b) Sore kuni poan ti yaarɛ wan ta’an basɛ ti nɛra tara pupeelum? (Tɔɣɛ fɔɔte la n boi gɔŋɔ wa nɛŋa la yele.)

 NANANAWA, tisi n gaŋɛ 30 n gu to tuuma la. Tisi wa basɛba poan, kpɛ’ɛndoma la nyɔkɛ to mabiisi paɣɛ mɛ. Ba taalɛ dela deni? Yehowa nɛŋan, ba ka tari taalɛ. Ban yeen eŋɛ sɛla dela bamam n kaali ge zamesa Baabule la ge tɔɣera bamam n sakɛ bo yelese’a la bɔ’ɔra nɛreba ge naɛ la ba mabiisi kena zamesegɔ la zuo. Ba me kɔ’ɔn ze’a la kankaŋi ti ba kan dekɛ bamea pa’asɛ tingɔŋɔ wa nalɛɣerɛ yɛla poan. La ka pakɛ la giisegɔ la n paari ba la, Naayinɛ yamesi wa kɔ’ɔn tara ba birikinte * mɛ kɔ’ɔn ana tapilapi pu’usa Naayinɛ. Ba puurɛ me pee mɛ la bamam n nyaŋɛ ita bala la!

² Daanse’ere, ho nyɛ Sɛɛradoma n tari sukpe’ene wa fɔɔra ase’a mɛ ge baŋɛ ti ba ni la’ara la mɔsi mɔsi. Ba puurɛ pee mɛ se’ere n sɔi la ba mi ti Yehowa puurɛ pee la ba mɛ la bamam n tari birikinte bɔ’ɔra en la. (1 Yel. 29:17a) Yezu yuun yeti: “Pupeelum boi mɛ la sɛba ti ba mɛlesa ba tontɔɔ tuuma zuo . . . Tari ya pupeelum ge nyɛɛna ya, se’ere n sɔi la ya yɔɔrɛ karegɛ mɛ.”​—Mt. 5:10-12.

3. Wuu Tooma 4:19, 20 n pa’alɛ se’em la, yuun kɔbesɛka n deŋɛ nɛŋa la poan, tuuntuneba la yuun eŋɛ la wani la yaarɛ n yuun paari ba la ge beni n sɔi?

³ Yelese’a n paari to mabiisi kɔ’ɔn dɛna la sɛla n yuun paɛ tuuntuneba la yuun kɔbesɛka n deŋɛ nɛŋa la poan se’em ma’a ti ba yuun yaɛ ba la bamam n mɔɔli Yezu yɛla la. Yudadoma kootin kãtɛ gãkerɛdoma la yuun kɔ’ɔn tɔɣera taɣesa ti “ba da le tɔɣera Yezu yu’urɛ poan.” (Tm. 4:18; 5:27, 28, 40) Tuuntuneba la yuun eŋɛ la wani? (Kaalɛ Tooma 4:19, 20.) Ba yuun mi ti Naayinɛ n bo ba nɔɔrɛ ti ba mɔɔla bɔ’ɔra nɛreba la ge dita sɛɛra bɔ’ɔra Krista. (Tm. 10:42) Bala la, Peter la Yon, n yuun tɔɣeri bɔ’ɔra tuuntuneba la yuun dekɛ la sukpe’ene yeti bamam wan nana Naayinɛ gana gãkerɛdoma la ge yuun le yeti bamam kan sina kan tɔɣera Yezu yɛla. La wɔ̃ni ti ba yuun soke kpɛ’ɛndoma wa yeti, ‘yamam tuɣum bɔta ya yeti yamam nɔya gani Naayinɛ mɛ?’

4. Wuu Tooma 5:27-29 n pa’alɛ se’em la, bem makesonɛ ti tuuntuneba la eŋɛ bo Kristakɔma za’a waabi ge to wan ta’an tɔɣesɛ ba la wani?

⁴ Tuuntuneba la kɔ’ɔn eŋɛ la makesonɛ bo yelemɛŋɛrɛ Kristakɔma. Ba yuun kɔ’ɛ ba puti’irɛ ti ba “nana Naayinɛ ti a dɛna [ba] bisegadaana gana asaala.” (Kaalɛ Tooma 5:27-29.) Ban yuun ŋmɛ tuuntuneba la, ba birikinte la zuo la, ba yuun yese Yudadoma kootinkãtɛ la mɛ ge “ti ba puurɛ pee se’ere n sɔi la ba bisɛ ti la nari mɛ ti ba zeem ba [Yezu] yu’urɛ la zuo.” Ba me yuun kɔ’ɔn kelum mɔɔla mɛ!​— Tm. 5:40-42.

5. Soke ani ti la nara ti to nyɛ ba lebesego?

⁵ Tuuntuneba la n yuun eŋɛ makesonɛ seko la basɛ ti to tara la sokere ase’a. Makerɛ, sore kuni poan ti bamam n yuun kɔ’ɛ ba puti’irɛ ti ba nana Naayinɛ gana asaala la makɛ la Baabule la n bo nɔɔrɛ ti “nɛra woo siregera amea bɔ’ɔra sɛba n tari kpe’eŋo la”? (Arom 13:1) To wan eŋɛ la wani ta’an “nana gɔmɛtidoma la sɛba n tari kpe’eŋo,” wuu tuuntuna Paul n yele  se’em la ge kelum tara birikinte bɔ’ɔra Naayinɛ n de to Bisegadaana n gaŋɛ za’a la?​—Titus 3:1.

6. (a) Bani n de “sɛba n tari kpe’eŋo la” ti Arom 13:1 tɔɣɛ ba yele la ge la nari ti to ita la bem bɔ’ɔra ba? (b) Asaala bisegadoma za’a paŋa zuni la wani?

⁶ Kaalɛ Arom 13:1. Kaalegɔ zɛ’an wa poan, yelesum la n de “sɛba n tari kpe’eŋo la” ze’ele bo la asaala bisegadoma n tari paŋa ge sɔna nɛreba bisera. Kristakɔma nani sɛba n tari kpe’eŋo la mɛ. Bisegadoma wa soŋeri mɛ ti gbiri gbiri ka bɔna, tara tiŋa la lɔɔ tuna tuuma ge ti saŋa ase’a ba ni tɔɣɛ po’e Yehowa nɛreba. (Lil. 12:16) Bala la, Baabule la bo to nɔɔrɛ ti to tara gilema la na’asegɔ la zoolum bɔ’ɔra ba ge kelum yɔɔra to lampo bɔ’ɔra ba. (Arom 13:7) Gɔmɛtidoma tari kpe’eŋo mɛ se’ere n sɔi la Yehowa n bo ba yɔ’ɔ ti ba tara. Yezu yuun basɛ ti naresum yele wa niɛ peelumi mɛ se’em ma’a ti Arom Gɔmena Pontius Pilate, yuun sɔkera en yɛla la. Se’em ma’a ti Pilate yuun tɔɣɛ pa’alɛ ti eŋa tari kpe’eŋo mɛ n wan ta’an zɔ Yezu nimbɔ̃’ɔ bii ku Yezu la, Yezu yuun yeti: “Ho tare paŋa n zen’en la Na’ayenɛ n dekɛ bo ho la zuo.” (Yon 19:11) Wuu Pilate la, asaala bisegadoma la nalɛɣerɛdoma za’a paŋa tari beene mɛ.   

7. Bɔnkani taaba poan ti la ka nara to nam bo asaala bisegadoma ge bem n nari ti to mina?

⁷ Kristakɔma nani asaala gɔmɛtidoma mɛ, ba lɔɔ la san ka giisɛ Naayinɛ lɔɔ la. Ge to kan nam bo ba se’em ma’a ti ba yeti to eŋɛ sɛla ti Naayinɛ lɔɔ la ka bɔta bii se’em ma’a ti ba yeti to da eŋɛ sɛla ti Naayinɛ bɔta. Makerɛ, ba ta’an pɛregɛ bunbilipaalesi ti ba laɣum pa’asɛ soogɛpa poan zabɛ bo ba tiŋa. * Bii ba ta’an dekɛ ba nu’o paɣelɛ Baabule la Baabule gɔnɔ la zuo ge gu to ti to da mɔɔla bii naɛ taaba pu’usa. Se’em ma’a ti bisegadoma tara ba paŋa la tuna bura bura, maɣesɛ wuu ba san tara yaarɛ paara Krista podɔleba, ba wan eŋɛ kãlɛ bo Naayinɛ. Yehowa biseri mɛ!​—Pa. 5:8.

8. Yehowa bisega boi de to’ore la wani la asaala bisega ge beni n sɔi ti la nara ti to mina bala?

⁸ Gɔmɛtidoma tari kpe’eŋo ge ba kpe’eŋo la tari beene mɛ. Yehowa n de kpe’eŋo za’adaana. Baabule la yele zɛ’ɛsi zo’e zo’e poan ti Yehowa dela “Kpe’eŋo Za’adaana.”

9. Nɔdɛ’ɛsa Daniel yuun nyɛ la bem liligere yɛla la poan?

⁹ Nɔdɛ’ɛsa Daniel nyɛ la liligere yɛla ti la niɛ peelumi pa’alɛ Yehowa kpe’eŋo la n gani kpe’eŋo woo se’em. Yia la, Daniel nyɛ la goo dusi kãra anaasi n ze’ele bo diimi kpe’eŋodoma la n de Babilon, Medo-Persia, Greece, Rome la zina beere wa kpe’eŋo la n de Anglo-America la. (Da. 7:1-3, 17) Daniel le nyɛ la Yehowa Naayinɛ n zi a na’am kuka la zuo saazuo. (Da. 7:9, 10) Nɔdɛ’ɛsa la n le nyɛ sɛla la dela kaka bɔ’ɔra zina beere wa bisegadoma la.

10. Wuu Daniel 7:13, 14, 27 n pa’alɛ se’em la, bani ti Yehowa dekɛ tinparɛ wa bisega la bo ba ge bala pa’alɛ A yele la wani?

¹⁰ Kaalɛ Daniel 7:13, 14, 27. Naayinɛ to’e asaala gɔmɛtidoma paŋa la ba kpe’eŋo woo mɛ ge dekɛ bo sɛba n nari ti ba tara kpe’eŋo zo’e. A dekɛ bo la bani? A dekɛ bo la Yezu Krista n de “asaala dayɔa”  la, la nɛreba 144,000 n de “Kpe’eŋo Za’adaana nɛreba la n de zilam la” n wan ta “bisera daarewoo” la. (Da. 7:18) La niɛ peelumi ti, Yehowa n de “Kpe’eŋo Za’adaana,” eŋa ma’a n tari paŋa n wan ta’an eŋɛ bala.

11. Daniel le gulesɛ la bem pa’alɛ ti Yehowa n de kpe’eŋo za’adaana gana tisi bisegadoma?

¹¹ Sɛla ti Daniel nyɛ liligere poan la kɔ’ɔn makɛ mɛ la sɛla ti a daa tɔɣɛ la. Daniel yeti “saazuo Naayinɛ” la, eŋa n “yɛɛri nadoma na’am ge bɔbera nadoma.” A le gulesɛ yeti, “Gaŋɛ Za’adaana la n de Bisegadaana asaala na’am poan ge me tara ka bɔ’ɔra mina ti a bɔta.” (Da. 2:19-21; 4:17) La tabelɛ eŋɛ ti Yehowa sigehe bisegadoma bii loe bisegadoma? Ɛɛ!

12. Bo Makerɛ pa’alɛ Yehowa n eŋɛ se’em sigehe nadoma diimi sa. (Bisɛ foote la.)

¹² Yehowa tum ti la niɛ peelumi ti a dela kpe’eŋo za’adaana gana “sɛba n tari kpe’eŋo la.” Geele yɛla atã wa bisɛ. Egypt naba Faro yuun basɛ ti Yehowa nɛreba dɛna la a yamesi ge kɔ’ɔn zaɣesɛ ti a kan basɛ ti ba keŋɛ. Ge Naayinɛ yuun faaɛ ba basɛ mɛ ge ku Faro Mɔɣɛ Mɔlega la poan. (Yɛh. 14:26-28; Ym. 136:15) Babilon Naba Belsazar yuun eŋɛ la de’enkãtɛ ge yuun “ton zɛnkɛ [a] mɛŋa la saazuo Daana” la nyaa “pɛngera yena te ba dekɛ sanlenpeelega bii sanlema . . . maalɛ a” ge tuɣum basɛ Yehowa. (Da. 5:22, 23) Ge Naayinɛ yuun basɛ ti nyanɛ n paɛ zɛkɛ n mea nɛra wa. “De daarɛ mea yu’uŋɔ” ti ba yuun ku Belsazar ge ti Mediadoma la Persiadoma yuun soe a na’am la. (Da. 5:28, 30, 31) Palestine tiŋa Naba Herod Agrippa I yuun ku tuuntuna Yames mɛ ge me le paɣɛ tuuntuna Peter ge ti’isa ti a ku en. Yehowa yuun gu Herod mɛ ti a ka nyaŋɛ eŋɛ bala. “Yehowa maleka ŋmɛ en basɛ tiŋa” ti a ki.​—Tm. 12:1-5, 21-23.

13. Bo makerɛ pa’alɛ Yehowa n yuun eŋɛ se’em zabɛ nyaŋɛ bisegadoma n yuun naɛ nɔɔrɛ giisɛ en la.

¹³ Yehowa eŋɛ pa’alɛ ti a kpe’eŋo gani bisegadoma n ni naɛ nɔɔrɛ giisa en la mɛ. A me yuun soŋɛ Israeldoma la mɛ ti ba zabɛ nyaŋɛ Kanaan nadoma 31 n naɛ nɔɔrɛ la ge me zabɛ to’e Pu’ulumbiŋe Tiŋa la zɛ’ɛsi zo’e zo’e. (Yos. 11:4-6, 20; 12:1, 7, 24) Yehowa me yuun kɔ’ɔn zabɛ  nyaŋɛ Naba Ben-hadad la Siria bisegadoma 32 la n yuun wa’ana zabɛ la Israel la.​—1 Na. 20:1, 26-29.

14-15. (a) Naba Nebukadnezar la Darius yuun yeti bo la Yehowa sɔ’ɔlum la? (b) Yuumadaana la yuun yeti bo doose la Yehowa la a tiŋa la?

¹⁴ Sugumnɔɔrɛ zo’e zo’e ti Yehowa tum pa’alɛ ti eŋa n de Kpe’eŋo Za’adaana! Se’em ma’a ti Babilon Naba Nebukadnezar yuun ŋmɛ a nyɔ’ɔ la amea paŋa la a na’am la n som se’em la ge yuun tuɣum ka sigere amea pɛɣɛ Yehowa n de mina n nari pumpɛɣum la, Naayinɛ yuun basɛ ti a zalɛ mɛ. Se’em ma’a ti Nebukadnezar zɔligɔ la yuun basɛ la, a yuun “pɛɣɛ Gaŋɛ Za’adaana la” mɛ ge yuun yeti “[Yehowa] bisega la dela sɛla n kɔ’ɔn bɔna wuusa.” A le yeti: “Nɛra me ka boi n wan nyaŋɛ gu en.” (Da. 4:30, 33-35) Se’em ma’a ti Daniel yuun nyɛ gurebisɛ la eŋa n tari birikinte bɔ’ɔra Naayinɛ la zuo, Yehowa yuun faaɛ en mɛ gbiɣɛma boko la poan. Naba Darius yuun yeti: “Asaala woo zɔta ge na’aha Daniel Yenɛ la. Se’ere n sɔe la, a dela Yenɛ vɔa ka tara ba’ahegɔ. A sɔ’ɔlom ka tare bo sagom, te a na’am ka tara ba’ahegɔ.”​—Da. 6:7-10, 19-22, 26, 27.   

¹⁵ Yuumadaana la yeti: “Yehowa sa’am tisi la puti’ira la mɛ, a basɛ ti nɛreba la n ti’iseri se’em la ka nyaŋɛ tum.” A le yeti: “Teŋsɛka Yenɛ n de Na’ayenɛ wa, dela popeelom teŋa. Nɛresɛba te Na’ayenɛ loe bo a mɛŋa la dela popeelomdoma.” (Ym. 33:10, 12) Yɛm boi bim mɛ ti to tara birikinte bɔ’ɔra Yehowa!

16. To tari puti’irɛ ti Naayinɛ wan eŋɛ la bem “mɛlesekatɛ la poan” ge bem n sɔi? (Bisɛ foote la.)

¹⁶ To mi Yehowa n tabelɛ eŋɛ sɛla kurum mɛ. To ti’iseri ti bem n wan eŋɛ beere sa’am? To tari puti’irɛ ti Yehowa wan faaɛ a yelemɛŋɛrɛ yamesi basɛ “mɛlesekatɛ la poan.” (Mt. 24:21; Da. 12:1) A wan eŋɛ bala se’em ma’a ti tisi n naɛ  nɔɔrɛ ti ba yu’urɛ dɛna Gog n boi Magog tiŋa, wan ta isige zabera la Yehowa yamesi tingɔŋɔ wa za’a waabi poan. Hali tisi wa n naɛ nɔɔrɛ wa san puɣum dɛna United Nations tisi la za’a n de 193 la, ba kan ta’an ze’ele la Kpe’eŋo Za’adaana la, la a saazuo pɛɛntɛɛreba! Yehowa pu’ulumbiŋe ti: “Mam wan zɛkɛ n mea ge ana fa’a ge basɛ ti tisi zo’e zo’e baŋɛ mam; ba wan baŋɛ ti mam de Yehowa.”​—Eze. 38:14-16, 23; Ym. 46:10.

17. Baabule la tɔɣɛ biŋe ti bem n wan paɛ tinparɛ wa nadoma la sɛba n tari birikinte bɔ’ɔra Yehowa la?

¹⁷ Gog n wan ta isige zabɛ la Naayinɛ nɛreba la n wan basɛ ti Yehowa doose Armagedon zaberɛ la poan sa’am “tinparɛ wa nadoma la.” (Lil. 16:14, 16; 19:19-21) Ge, “tontɔɔdoma la wan bɔna tinparɛ la poan, sɛba n ka tari tuure la wan kelum bɔna ka poan.”​—Mag. 2:21.

18. Yelemɛŋɛrɛ Kristakɔma zo’e zo’e boti ba eŋɛ la bem ge beni n sɔi? (Daniel 3:28)

¹⁸ Yuun kɔbesi poan, yelemɛŋɛrɛ Kristakɔma zo’e zo’e koŋe ba fai bɔŋa mɛ hali pɔ̃sɛ ba nyɔɔrɛ la bamam n nɔŋɛ Yehowa n de ba Sɔ’ɔlum Bisegadaana la zuo. Kristakɔma wa kɔ’ɔn kɔ’ɛ ba puti’irɛ mɛ ti ba tara yelemɛŋɛrɛ bɔ’ɔra Yehowa. Ba ani wuu Hebru nɛreba batã la n yuun kelum tara yelemɛŋɛrɛ bɔ’ɔra Kpe’eŋo Za’adaana la ti a yuun faaɛ ba bugum kãtɛ poan la.​—Kaalɛ Daniel 3:28.

19. Yehowa ni bisɛ la bem ta’an gãkɛ a nɛreba ge bem ti la nara ti to eŋɛ nananawa?

¹⁹ David n yuun de yuumadaana la yuun gulesɛ pa’alɛ la yele n pakɛ se’em ti to tara birikinte bɔ’ɔra Naayinɛ: “Yehowa wan gãkɛ nɛreba la. O Yehowa, gãkɛ mam doose n tontɔɔ tuuma la n birikinte poan.” (Ym. 7:8) David yuun le gulesɛ yeti: “Basɛ ti birikinte la tontɔɔ tuuma gu’ura mam.” (Ym. 25:21) Vom sebo n ani soŋa dela to kɔ’ɔn tara yelemɛŋɛrɛ bɔ’ɔra Yehowa la ka pakɛ la sɛla n paɛ tɔ! Bala wan basɛ ti la ana to wuu yuumadaana la n gulesɛ yeti: ‘Pupeelum boi mɛ la sɛba n tari birikinte . . . , sɛba n nani Yehowa lɔɔ la.’​—Ym. 119:1.